(vovworld)- ປີ 2013, ສະພາບການເສດຖະກິດໂລກຍັງປະສົບກັບຄວາຫຍຸ້ງຍາກຫລາຍຢ່າງ, ແຕ່ການດຶງດູດເງິນລົງທຶນໂດຍກົງຂອງຕ່າງປະເທດ(FDI)ເຂົ້າຫວຽດນາມ ຍັງຄົງບັນລຸໝາກຜົນເປັນຫນ້າປະທັບໃຈ. ພິເສດ, ມີຫລາຍໂຄງການໃຫຍ່ທີ່ມີລັກສະນະບຸກທະລຸໄດ້ລົງທຶນເຂົ້າບັນດາແຂວງພາກກາງໃນໄລຍະຜ່ານມາ ອັນໄດ້ເປີດຫລາຍກາລະໂອກາດພັດທະນາໃຫ້ແກ່ເຂດດິນນີ້.
ປີ 2013, ບັນດາແຂວງພາກກາງ ຫວຽດນາມ ໄດ້ດຶງດູດໂຄງການ FDI 850 ໂຄງການ ດ້ວຍຍອດຈຳນວນທຶນຈົດທະບຽນເກືອບ 25,5 ຕື້ USD, ກວມເກືອບ 12% ຍອດຈຳນວນທຶນ FDI ຂອງທັງປະເທດ. ບັນດາທ້ອງຖິ່ນດຶງດູດທຶນ FDI ເປັນຈຳນວນຫລາຍ ນັ້ນແມ່ນ: ແຂວງ ແທງຮວາ, ຮ່າຕີ້ງ, ບີງດີ້ງ, ຟູອຽນ, ກວ໋າງຫງາຍ… ໃນນັ້ນ ພົ້ນເດັ່ນແມ່ນບັນດາໂຄງການລົງທຶນກ່ຽວກັບການກັ່ນນຳ້ມັນໄດ້ສ້າງບາດກ້າວບຸກທະລຸໃນການດຶງດູດການລົງທຶນໂດຍກົງຂອງຕ່າງປະເທດເຂົ້າພາກກາງ. ໂຄງການກັ່ນນຳ້ມັນ ງີເຊີນ ຊື່ງແມ່ນໂຄງການຮ່ວມທຸລະກິດລະຫວ່າງ ຍີ່ປຸ່ນ ແລະ ບັນດາຄູ່ຮ່ວມມືຢູ່ ງີເຊີນ ແຂວງ ແທງຮວາ ມີຍອດຈຳນວນເງິນລົງທຶນກວ່າ 9 ຕື້ USD ແມ່ນໂຄງການ FDI ໃຫຍ່ສຸດນັບແຕ່ກ່ອນມາຮອດປະຈຸບັນຢູ່ ຫວຽດນາມ. ໂຄງການນີ້ໄດ້ເປີດກາລະໂອກາດພັດທະນາໃຫ້ທັງເຂດພາກກາງຫວຽດນາມ. ທ່ານ ເຈີນຮ່ວາ, ຫົວຫນ້າຄະນະຄຸ້ມຄອງເຂດເສດຖະກິດ ງີເຊີນ ໃຫ້ຮູ້ວ່າ:
“ເຂດເສດຖະກິດ ງີເຊີນ ດ້ວຍການພັດທະນາຂອງໂຄງການກັ່ນນຳ້ມັນ ງີເຊີນ ຈະຂະຫຍາຍບາງເຂດອຸດສາຫະກຳບໍ່ສົ່ງມົນລະຜິດເຖິງສິ່ງແວດລ້ອມ, ກະສິກຳອຸດສາຫະກຳສູງ, ອຸດສາຫະກຳສຳຮອງ ແລະ ບໍລິການອື່ນຈຳນວນຫນຶ່ງ. ລັດຖະບານ ແລະ ກະຊວງແຜນການ ແລະ ການລົງທຶນ ໄດ້ອະນຸຍາດໃຫ້ເປີດກວ້າງເຂດອຸດສາຫະກຳດ້ວຍຂອບຂະຫນາດ 45.000 ເຮັກຕາ. ປະຈຸບັນ ແຂວງ ແທງຮວາ ພວມສຸມໃສ່ປັບປຸງສະພາບແວດລ້ອມແຫ່ງການລົງທຶນ, ຫນູນຊ່ວຍບັນດານັກລົງທຶນແກ້ໄຂລະບຽບການບໍລິຫານ, ບຸກເບີກຫນ້າພຽງຢ່າງວອ່ງໄວ.”
ພາບປະກອບ:internet
|
ປີ 2013, ໂຮງງານກັ່ນນຳ້ມັນ ຫວູງໂຣ, ຊື່ງແມ່ນໂຄງການຮ່ວມມືລະຫວ່າງລາຊະອານາຈັກອັງກິດ ແລະ ສະຫະພັນລັດເຊຍ ຢູ່ ແຂວງ ຟູອຽນ ກໍໄດ້ເພີ່ມເງິນລົງທຶນຈາກ 1,7 ຕື້ USD ຂຶ້ນເຖິງ 3,18 ຕື້ USD ແລະ ກໍໃນປີ 2013, ໂຄງການເຂດປະສົມກັ່ນນຳ້ມັນ ຂອງ ກຸ່ມບໍລິສັດ PTT ຂອງໄທ ຄາດວ່າມີຂອບຂະຫນາດເງິນລົງທຶນປະມານ 27 ຕື້ USD ໄດ້ຮັບອະນຸຍາດຈາກລັດຖະບານໃຫ້ກໍ່ສ້າງຢູ່ແຂວງ ບີງດີ້ງ, ໃນຂະນະນັ້ນ, ເຂດເສດຖະກິດ ຢູງກວດ ຊື່ງແມ່ນສະຖານທີ່ທີ່ມີໂຄງການກັ່ນນຳ້ມັນ ຢູງກວດ ໄດ້ນຳເຂົ້າເຄື່ອນໄຫວ, ມາຮອດປະຈຸບັນ ກໍໄດ້ດຶງດູດເງິນລົງທຶນກວ່າ 10 ຕື້ USD, ໃນນັ້ນທຶນປະຕິບັດບັນລຸກວ່າ 5 ຕື້ USD. ບັນດາໂຄງການທີ່ມີຂອບຂະຫນາດນີ້ ໄດ້ ແລະ ພວມເຮັດໃຫ້ພາກກາງ ກາຍເປັນແຫ່ງພົ້ນເດັ່ນໃນການດຶງດູດ FDI ຂອງທັງປະເທດ.
ຕາມການໃຫ້ສັງເກດຈາກບັນດາຜູ້ຊ່ຽວຊານເສດຖະກິດແລ້ວ, ໃນຫລາຍປີກະກຽມການລົງທຶນພື້ນຖານໂຄງລ່າງ, ເດັດດຽວປະຕິບັດບັນດານະໂຍບາຍຢ່າງເປີດອົກເປີດໃຈ ແລະ ຕັ້ງຫນ້າຫນູນຊ່ວຍໃຫ້ບັນດານັກລົງທຶນ…ນັ້ນ ໄດ້ປະກອບສ່ວນສ້າງສະພາບແວດລ້ອມແຫ່ງການລົງທຶນຢ່າງສະດວກສະບາຍ, ດຶງດູດບັນດານັກລົງທຶນເຂົ້າລົງທຶນຢູ່ບັນດາແຂວງພາກກາງ. ສະເພາະໃນ 3 ປີ ແຕ່ປີ 2007-2009, ຍອດຈຳນວນທຶນ FDI ລົງທຶນເຂົ້າເຂດນີ້ບັນລຸລະດັບສະຖິຕິ ເກືອບ 11,3 ຕື້ USD, ສູງທົບ 4 ເທົ່າເມື່ອທຽບໃສ່ 19 ກ່ອນນີ້ (ໄລຍະ ແຕ່ປີ 1988-2006 ບັນລຸພຽງ 2,7 ຕື້ USD). ບໍ່ພຽງແຕ່ເພີ່ມຂຶ້ນດ້ານປະລິມານເທົ່ານັ້ນ, ຫາກຄຸນນະພາບບັນດາໂຄງການກໍໄດ້ຮັບການຍົງສູງຂຶ້ນ. ບັນດາໂຄງການລົງທຶນກັ່ນນຳ້ມັນລວມມູນຄ່າເກືອບສີບໆຕື້ USD ແມ່ນພະຍານຫລັກຖານຢ່າງມີຊີວິດຊີວາໃຫ້ສິ່ງດັ່ງກ່າວ. ພິເສດ ມີບັນດາແຂວງທີ່ປະສົບກັບຄວາມຫຍຸ້ງຍາກຄື: ກວ໋າງຫງາຍ, ຟູອຽນ, ບີງດີ້ງ… ກ່ອນນີ້ ມີພຽງບາງໂຄງການລວມມູນຄ່າ 20 -30 ລ້ານ USD ເທົ່ານັ້ນ, ປະຈຸບັນ ໄດ້ມີໂຄງການດ້ວຍເງິນລົງທຶນນັບຕື້ USD. ບັນດາໂຄງການລົງທຶນກ່ຽວກັບກັ່ນນຳ້ມັນ ບໍ່ພຽງແຕ່ຍົກຂອບຂະຫນາດການລົງທຶນເທົ່ານັ້ນ ຫາກຍັງດຶງດູດບັນດາໂຄງການກ່ຽວກັບໄຟຟ້າໃຊ້ພະລັງຄວາມຮ້ອນ, ຫລອມເຫລັກກ້າ, ທາດເຄມີ, ອຸດສາຫະກຳສູງ, ອຸດສາຫະກຳສຳຮອງ… ລວມມູນຄ່ານັບຕື້ USD, ເປີດຫລາຍທິດ,ຫລາຍຂົງເຂດ, ດຶງດູດແຮງງານທ້ອງຖິ່ນເປັນຈຳນວນຫລວງຫລາຍ. ບັນດາເຂດອຸດສາຫະກຳ, ເຂດເສດຖະກິດຢູ່ພາກກາງຫວຽດນາມ ດ້ວຍກົນໄກ, ນະໂຍບາຍດີກວ່າ, ດ້ວຍການກຳນົດທິດພັດທະນາຂະແຫນງອຸດສາຫະກຳຈະກາຍເປັນຂະແຫນງນຳຫນ້າເຮັດໃຫ້ເສດຖະກິດຂອງທັງເຂດພັດທະນາ, ປະກອບສ່ວນພັດທະນາເສດຖະກິດສັງຄົມແບບຍືນຍົງກວ່າ. ເຂດເສດຖະກິດຈຸດສຸມພາກກາງລວມມີ: ດາຫນັງ ແລະ ບັນດາແຂວງ ເທື່ອທຽນເຫ້ວ, ກວ໋າງນາມ, ກວ໋າງຫງາຍ, ບີງດີ້ງ ມີບົດບາດເປັນກຳລັງຫນູນອັນໃຫຍ່ຫລວງໃນຍຸດທະສາດພັດທະນາເສດຖະກິດສັງຄົມຂອງພາກກາງ. ດ້ວຍບົດບາດໃຈກາງ, ບັນດາທ້ອງຖິ່ນດັ່ງກ່າວພວມປະສົບຜົນສຳເລັດຫລາຍຢ່າງໃນການສົ່ງເສີມການລົງທຶນໂດຍກົງຂອງຕ່າງປະເທດ. ມີວິສາຫະກິດໃຫຍ່ຫລາຍແຫ່ງມາຈາກ ຍີ່ປຸ່ນ, ອາເມລິກາ, ສິງກະໂປ, ສເກົາຫລີ ໄດ້ມາແຫ່ງນີ້ເພື່ອລົງທຶນໃນບັນດາຂົງເຂດອຸດສາຫະກຳ, ອຸດສາຫະກຳເຕັກໂນໂລຊີສູງ.
ດ້ວຍເງື່ອນໄຂທຳມະຊາດ, ພື້ນຖານໂຄງລ່າງຄ້າຍຄືກັນ, ໃນຊຸມປີມໍ່ໆມານີ້ ບັນດາແຂວງພາກກາງ ຫວຽດນາມໄດ້ ແລະ ພວມຍູ້ແຮງການຮ່ວມສຳພັນໃນການສົ່ງເສີມ, ດຶງດູດການລົງທຶນ. ບັນດາກອງປະຊຸມສຳມະນາກ່ຽວກັບການຮ່ວມສຳພັນເຂດໄດ້ຮັບການຈັດຕັ້ງຂຶ້ນເປັນປະຈຳ ອັນໄດ້ຊ່ວຍໃຫ້ການນຳບັນດາທ້ອງຖິ່ນມີກາລະໂອກາດປຶກສາຫາລື, ໄຈ້ແຍກ ແລະ ເສີມຂະຫຍາຍຄວາມສາມາດບົ່ມຊ້ອນ, ທ່າໄດ້ປຽບຂອງແຕ່ລະທ້ອງຖິ່ນ. ຕົວຢ່າງຄື: ນະຄອນ ດາຫນັງ ໄດ້ສຸມໃສ່ດຶງດູດການລົງທຶນເຂົ້າໃນຂົງເຂດເຕັກໂນໂລຊີສູງ, ການເງິນ; ແຂວງ ກວ໋າງນາມ ແລະ ເທື່ອທຽນເຫ້ວ ໃຫ້ບຸລິມະສິດພັດທະນາການທ່ອງທ່ຽວ,ແຂວງ ກວ໋າງຫງາຍ ບຸລິມະສິດອຸດສາຫະກຳຫນັກ, ສ່ວນແຂວງ ບີງດີ້ງ ແລະ ຟູອຽນ ກຳນົດດຶງດູດການລົງທຶນເຂົ້າໃນຂົງເຂດກັ່ນນຳ້ມັນ. ທ່ານ ກາວຄວາ, ປະທານຄະນະກຳມະການ ປຊຊ ແຂວງ ກວ໋າງຫງາຍ ຖືວ່າ: ວຽກງານສົ່ງເສີມການລົງທຶນນັບມື້ນັບຊຳນານງານກວ່າ.
“ແຂວງ ພວກຂ້າພະເຈົ້າ ໄດ້, ພວມ ແລະ ຈະຮ່ວມແຮງຮ່ວມໃຈ ແລະ ຫນູນຊ່ວຍບັນດານັກລົງທຶນ ດ້ວຍຈິດໃຈຖືວຽກງານຂອງນັກລົງທຶນແມ່ນວຽກງານຂອງພວກຂ້າພະເຈົ້າ. ຄວາມຫຍຸ້ງຍາກຂອງບັນດານັກລົງທຶນແມ່ນຄວາມຫຍຸ້ງຍາກຂອງແຂວງ ກວ໋າງຫງາຍ ແລະ ພ້ອມກັນແກ້ໄຂຢ່າງທັນການ.”
ມາຮອດປະຈຸບັນ, ກະແສ ເງິນລົງທຶນໂດຍກົງຂອງຕ່າງປະເທດເຂົ້າບັນດາແຂວງພາກກາງໄດ້ປະກອບສ່ວນ 6% ຍອດຜະລິດຕະພັນສັງຄົມຂອງພາກພື້ນ ແລະ ແກ້ໄຂວຽກເຮັດງານທຳໃຫ້ແກ່ຄົນງານກວ່າ 66.000 ຄົນ. ບັນດາທ້ອງຖິ່ນຖືວ່າ: ການຮ່ວມສຳພັນດຶງດູດການລົງທຶນ ແມ່ນຂອດບຸກທະລຸໃນການພັດທະນາເສດຖະກິດ, ແກ້ໄຂວຽກເຮັດງານທຳ, ເພີ່ມແຫລ່ງລາຍຮັບງົບປະມານ ແລະ ສ້າງປະຖົມປັດໄຈຢ່າງໝັ້ນຄົງໃຫ້ແກ່ພາລະກິດຫັນເປັນອຸດສາຫະກຳ ແລະ ທັນສະໄຫມ.