(vovworld)- ປີ 2014, ວິວັດທະນາການສ້າງໂຄງປະກອບພື້ນຖານເສດຖະກິດ ຢູ່ ຫວຽດນາມ ໄດ້ຮັບການຍູ້ແຮງ ດ້ວຍການສຸມໃສ່ເຂົ້າໃນ 3 ຂົງເຂດສຳຄັນນັ້ນແມ່ນ: ການສ້າງໂຄງປະກອບການລົງທຶນຂອງລັດຄືນໃຫມ່, ການສ້າງໂຄງປະກອບວິສາຫະກິດຄືນໃຫມ່ ແລະ ການສ້າງໂຄງປະກອບລະບົບທະນາຄານການເງິນຄືນໃຫມ່. ເຖິງວ່າ ໝາກຜົນບໍ່ທັນບັນລຸໄດ້ຄືດັ່ງຄວາມມຸ່ງຫວັງກໍຕາມ, ແຕ່ບັນດາມາດຕະການຂອງລັດຖະບານໃນການຊຸກຍູ້ການສ້າງໂຄງປະກອບເສດຖະກິດຄືນໃຫມ່ ກໍໄດ້ເສີມຂະຫຍາຍຢ່າງມີປະສິດທິຜົນ, ສ້າງພື້ນຖານເພື່ອຍູ້ແຮງວິວັດທະນາການສ້າງໂຄງປະກອບພື້ນຖານເສດຖະກິດໃນໄລຍະຕໍ່ໄປ.
ພາບປະກອບ:internet
|
ລາຍການສ້າງໂຄງປະກອບພື້ນຖານເສດຖະກິດຄືນໃຫມ່ຢູ່ ຫວຽດນາມ ໄດ້ຮັບການຜັນຂະຫຍາຍໃນໄລຍະ 3 ປີຜ່ານມາ, ມາຮອດປະຈຸບັນ ໄດ້ເສີມຂະຫຍາຍຢ່າງມີປະສິດທິຜົນ. ໝາກຜົນພົ້ນເດັ່ນທີ່ສຸດ ແມ່ນການສ້າງພື້ນຖານເສດຖະກິດມະຫາພາກເປັນປົກກະຕິ, ໄພເງິນເຟີ້ໄດ້ຮັບການຄວບຄຸມ, ຄຸນນະພາບພື້ນຖານເສດຖະກິດມີການຫັນປ່ຽນຢ່າງຕັ້ງຫນ້າ. ບົນພື້ນຖານໝາກຜົນທີ່ບັນລຸໄດ້ໃນເບື້ອງຕົ້ນຂອງລາຍການສ້າງໂຄງປະກອບພື້ນຖານເສດຖະກິດຄືນໃຫມ່, ປີນີ້ ລັດຖະບານຫວຽດນາມ ໄດ້ຍູ້ແຮງວິວັດທະນາການສ້າງໂຄງປະກອບເສດຖະກິດຄືນໃຫມ່ ດ້ວຍຈຸດໝາຍປ່ຽນໃຫມ່ລະບອບນະໂຍບາຍເສດຖະກິດ, ກຳນົດຮູບແບບການເຕີບໂຕໃຫມ່, ຫລຸດຜ່ອນໄພເງິນເຟີ້ຢ່າງວ່ອງໄວ, ສ້າງເງື່ອນໄຂໃຫ້ແກ່ບັນດາວິສາຫະກິດພັດທະນາຢ່າງວ່ອງໄວ ແລະ ໝັ້ນຄົງ. ລັດຖະບານ ໄດ້ຊີ້ນຳໃຫ້ບັນດາກະຊວງຂະແຫນງການ, ທ້ອງຖິ່ນ ສືບຕໍ່ສ້າງບັນດາພື້ນຖານດ້ານກົດໝາຍໃຫ້ສົມບູນແບບ ສ້າງເງື່ອນໄຂຍູ້ແຮງການສ້າງໂຄງປະກອບຄືນໃຫມ່ຢູ່ໃນ 3 ຂົງເຂດຕົ້ນຕໍ ນັ້ນແມ່ນ: ການລົງທຶນຂອງລັດ, ລັດວິສາຫະກິດ ແລະ ລະບົບການເງິນ, ທະນາຄານ. ດຣ ຫງວຽນດືກກຽນ, ຮອງຫົວຫນ້າກຳມາທິການເສດຖະກິດຂອງສະພາແຫ່ງຊາດຖືວ່າ:
“ເບິ່ງລວມແລ້ວ ຄວາມຕັດສິນໃຈດ້ານການເມືອງກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່ ຖືກລະບຸໄວ້ໃນບັນດາເອກະສານນິຕິກຳ ແລະ ເລີ່ມມີຄຸນປະໂຫຍດເຂົ້າສູ່ຊີວິດຕົວຈິງ. ເຖິງວ່າໝາກຜົນບໍ່ທັນບັນລຸຄືດັ່ງແຜນການທີ່ວາງອອກໃນເບື້ອງຕົ້ນກໍຕາມ, ແຕ່ໄດ້ເປີດທິດທາງທີ່ສຳຄັນ.”
ໂດຍປະຕິບັດການຊີ້ນຳຂອງລັດຖະບານ, ນັບແຕ່ຕົ້ນປີ ການສ້າງໂຄງປະກອບການລົງທຶນຂອງລັດຄືນໃຫມ່ ໄດ້ປະຕິບັດບັນດາບາດກ້າວຢ່າງຂ້ຽວຂາດຄື: ຍົກເລີກ 42 ໂຄງການທີ່ບໍ່ມີປະສິດທິຜົນ, ແກ້ໄຂສະພາບການລົງທຶນບໍ່ມີຈຸດສຸມ, ການຟຸມເຟືອຍເທື່ອລະກ້າວ. ຄຽງຄູ່ກັນນັ້ນ, ກອບກົດໝາຍໄດ້ຮັບການສ້າງໃຫ້ສົມບູນແບບ. ບັນດາແຜນການລົງທຶນໄລຍະຍາວຈາກສູນກາງຕະຫລອດຮອດທ້ອງຖິ່ນ ຖືກປ່ຽນແທນໃຫ້ບັນດາແຜນການໄລຍະສັ້ນກ່ອນນີ້. ບັນດາກະຊວງ, ຂະແຫນງການ ແລະ ທ້ອງຖິ່ນ ໄດ້ເປັນເຈົ້າການສັບຊ້ອນແຫລ່ງຊັບພະຍາກອນມະນຸດ ຕາມການໃຫ້ບຸລິມະສິດຕາມລຳດັບ,ສຸມໃສ່ຈັດວາງແຫລ່ງທຶນເພື່ອສຳເລັດບັນດາໂຄງການທີ່ພວມໂຈະໄວໄວ້. ຂົງເຂດສ້າງໂຄງປະກອບລັດວິສາຫະກິດຄືນໃຫມ່ ພວມແກ້ໄຂຂໍ້ຈຳກັດເທື່ອລະກ້າວ ແລະ ຜັນຂະຫຍາຍຫລາຍມາດຕະການຢ່າງແຮງຄື: ເພີ່ມທະວີການສ້າງກອບກົດໝາຍໃຫ້ສົມບູນແບບ ເພື່ອຊຸກຍູ້ການຫັນເປັນຫຸ້ນສ່ວນ. ໄລ່ມາຮອດເດືອນ 11/2014, ອົງການມີສິດອຳນາດເຊັນອະນຸມັດແຜນຮ່າງສ້າງໂຄງປະກອບຄືນໃຫມ່ໃຫ້ 90/108 ກຸ່ມບໍລິສັດ, ບໍລິສັດໃຫຍ່ແຫ່ງລັດ . ປະຈຸບັນ ມີວິສາຫະກິດ 126 ແຫ່ງຫັນເປັນຫຸ້ນສ່ວນ. ເປັນຫນ້າສົນໃຈ, ໃນຈຳນວນບັນດາວິສາຫະກິດໄດ້ອະນຸມັດວິທີການຫັນເປັນຫຸ້ນສ່ວນ, ມີວິສາຫະກິດຂອບຂະຫນາດໃຫຍ່ຫລາຍແຫ່ງ ຄື: ກຸ່ມບໍລິສັດຕ່ຳແຜ່ນຕັດຫຍິບຫວຽດນາມ ຫລື ບໍລິສັດໃຫຍ່ການບິນຫວຽດນາມ. ຄຽງຄູ່ກັນນັ້ນ ຍັງມີບໍລິສັດໃຫຍ່ 10 ແຫ່ງ ຂຶ້ນກັບກະຊວງຄົມມະນາຄົມຂົນສົ່ງ, ທ່າກຳປັ່ນໃຫຍ່ 4 ແຫ່ງ(ຫາຍຟ່ອງ, ດາຫນັງ, ກວ໋າງນີງ, ຍາຈາງ) ກໍໄດ້ຮັບອະນຸມັດວິທີການຫັນເປັນຫຸ້ນສ່ວນ. ເຖິງຢ່າງໃດກໍຕາມ, ວິວັດການຫັນບັນດາລັດວິສາຫະກິດເປັນຫຸ້ນສ່ວນໃນໄລຍະຈະມາເຖິງ ຍັງຕ້ອງການບັນດາມາດຕະການສັງລວມ ເພື່ອຍູ້ໄວຄວາມຄືບຫນ້າທີ່ໄດ້ວາງອອກ. ດຣ ເລດັງຢວານ, ຜູ້ຊ່ຽວຊານດ້ານເສດຖະກິດໄດ້ໃຫ້ຂໍ້ສັງເກດວ່າ:
“ການສ້າງໂຄງປະກອບລັດວິສາຫະກິດຄືນໃຫມ່ໃນໄລຍະຜ່ານມາ ສ່ວນຫລາຍແມ່ນມຸ່ງໄປເຖິງຈຸດໝາຍຫັນເປັນຫຸ້ນສ່ວນ, ບໍ່ທັນສ້າງໂຄງປະກອບຄືນໃຫມ່ຮອບດ້ານ. ສິ່ງດັ່ງກ່າວຮຽກຮ້ອງຕ້ອງມີຂໍ້ຕົກລົງຫລາຍຢ່າງກ່ຽວກັບດ້ານກົດໝາຍ ແລະການຕິດຕາມກວດກາພິເສດ. ສະນັ້ນ ຕ້ອງມີບັນດາມາດຕະການເພື່ອສ້າງບັນດາແຜນຮ່າງທີ່ສາມາດປະຕິບັດຢ່າງຄົບຖ້ວນ, ຮອບດ້ານ ແລະ ມີປະສິດທິຜົນກວ່າໃນການສ້າງໂຄງປະກອບຄືນໃຫມ່.”
ໃນວິວັດການສ້າງໂຄງປະກອບພື້ນຖານເສດຖະກິດຄືນໃຫມ່, ການສ້າງລະບົບການເງິນ, ທະນາຄານ ໃນໄລຍະຜ່ານມາ ບັນລຸປະສິດທິຜົນຢ່າງເຫັນໄດ້ຊັດ. ມາຮອດປະຈຸບັນ ໄດ້ແກ້ໄຂ 8 ໃນຈຳນວນ 9 ທະນາຄານອ່ອນດ້ອຍ. ລັດຖະບານ ກໍໄດ້ຮັບຮອງເອົາໄລຍະ 2 ຂອງແຜນຮ່າງສ້າງໂຄງປະກອບລະບົບທະນາຄານຄືນໃຫມ່, ຕາມນັ້ນແລ້ວ ຈະສືບຕໍ່ສ້າງໂຄງປະກອບຄືນໃຫມ່ ຫລືໂຮມທະນາຄານ 6-7 ແຫ່ງເຂົ້າກັນ. ພ້ອມກັບການສັບຊ້ອນບັນດາອົງການສິນເຊື່ອທະນາຄານຄືນໃຫມ່, ເລື່ອງແກ້ໄຂຫນີ້ເສຍກໍໄດ້ປະຕິບັດຢ່າງຂ້ຽວຂາດ, ຫນີ້ເສຍຫລຸດລົງເຄິ່ງຫນຶ່ງ.
ພ້ອມກັບວິວັດທະນາການສ້າງໂຄງປະກອບເສດຖະກິດຄືນໃຫມ່, ລະດັບຈະເລີນເຕີບໂຕ GDP ຂອງປີ 2014 ໄດ້ຮັບການຄາດຄະເນວ່າ ອາດສາມາດບັນລຸ 5,8%. ເປັນຫນ້າປິຕິຊົມຊື່ນ ນັ້ນແມ່ນມີວິສາຫະກິດຫລາຍແຫ່ງ ພາຍຫລັງຫັນເປັນຫຸ້ນສ່ວນ ລ້ວນແຕ່ມີທ່າອ່ຽງເຕີບໂຕເປັນປົກກະຕິ ແລະ ພັດທະນາ. ສິ່ງດັ່ງກ່າວສະແດງໃຫ້ເຫັນວ່າ ການສ້າງໂຄງປະກອບພື້ນຖານເສດຖະກິດຄືນໃຫມ່ ພວມໄປຖືກທິດ, ຕອບສະຫນອງຄວາມຕ້ອງການການພັດທະນາ ແລະ ເຊື່ອມໂຍງຂອງຫວຽດນາມ.