(vovworld)- ພາຍຫລັງໄລຍະເກືອບ 3 ປີແຫ່ງການປະຕິບັດແຜນຮ່າງສ້າງໂຄງປະກອບລະບົບບັນດາອົງການສິນເຊື່ອ(ໄລຍະ 2011-2015) ຄືນໃຫມ່, ມາຮອດປະຈຸບັນ ເລື່ອງສ້າງໂຄງປະກອບລະບົບທະນາຄານຄືນໃຫມ່ບັນລຸໄດ້ໝາກຜົນດີສົມຄວນບາງຢ່າງ. ການເຄື່ອນໄຫວທະນາຄານໄດ້ຮັບການສ້າງໂຄງປະກອບຄືນໃຫມ່ເທື່ອລະກ້າວຕາມທິດປອດໃສ. ສະພາບຫນີ້ເສຍໄດ້ຮັບການແກ້ໄຂໂດຍພື້ນຖານ, ຄວາມສາມາດຊຳລະຂອງລະບົບທະນາຄານການຄ້າໄດ້ຮັບປະກັນ, ອັດຕາດອກເບ້ຍລະຫວ່າງທະນາຄານໄດ້ຮັບການຮັກສາເປັນປົກກະຕິ.
ພາບປະກອບ:tinnhanhchungkhoan
|
ໃນໄລຍະເກືອບ 3 ປີ ຜ່ານມາ, ທະນາຄານແຫ່ງລັດຫວຽດນາມ ໄດ້ປະຕິບັດຫລາຍມາດຕະການສ້າງໂຄງປະກອບບັນດາທະນາຄານການຄ້າ, ທະນາຄານຕ່າງປະເທດ ແລະ ບັນດາອົງການສິນເຊື່ອຄືນໃຫມ່. ສະນັ້ນ ປະຈຸບັນ ຈຳນວນບັນດາອົງການສິນເຊື່ອ, ທະນາຄານຕ່າງປະເທດສາຂາ ຢູ່ ຫວຽດນາມ ກໍຫລຸດລົງ, ພິເສດ ແມ່ນບັນດາທະນາຄານອ່ອນດ້ອຍ. ມາຮອດປະຈຸບັນ ທັງລະບົບທະນາຄານໄດ້ຫລຸດລົງ 7 ອົງການສິນເຊື່ອ, 2 ສາຂາທະນາຄານຮ່ວມທຸລະກິດ, 4 ສາຂາທະນາຄານຕ່າງປະເທດ, 5 ກອງທຶນສິນເຊື່ອປະຊາຊົນ ຜ່ານການໂຮມເຂົ້າກັນ, ໂຮມເຂົ້າເປັນອົງການຫນຶ່ງດຽວ, ເກັບຄືນຫນັງສືອະນຸຍາດ, ຫັນປ່ຽນຮູບການເຄື່ອນໄຫວ. ດຣ ເລຊວນເຫງ໋ຍ, ອະດີດຮອງປະທານຄະນະກຳມະການຕິດຕາມກວດກາການເງິນແຫ່ງຊາດໃຫ້ຮູ້ວ່າ: ພາຍຫລັງ 3 ປີແຫ່ງການປະຕິບັດ, ວິວັດການສ້າງໂຄງປະກອບຄືນໃຫມ່ໄດ້ນຳມາເຊິ່ງໝາກຜົນຕາມທິດຕັ້ງຫນ້າ. ຄວາມສາມາດຊຳລະເປັນປົກກະຕິ, ຕະຫລາດຄຳ, ເງິນຕາຕ່າງປະເທດເປັນປົກກະຕິໂດຍພື້ນຖານ, ຄວາມໄວ້ເນື້ອເຊື່ອໃຈຂອງຜູ້ຝາກເງິນໄດ້ຮັບການປັບປຸງ. ນີ້ໄດ້ຮັບຖືວ່າແມ່ນໝາກຜົນເບື້ອງຕົ້ນມີຄວາມສຳຄັນທີ່ສຸດ.
“ພວກເຮົາ ປັບປຸງທັງທະນາຄານພາຍໃນປະເທດ ແລະ ທະນາຄານຕ່າງປະເທດ ຊື່ງລວມມີ 17 ທະນາຄານອ່ອນດ້ອຍ, ໃນນັ້ນ ມີບາງທະນາຄານສະໝັກໃຈໂຮມເຂົ້າກັນຫລື ສ້າງໂຄງປະກອບຄືນໃຫມ່ສຳເລັດຜົນຄື: ທະນາຄານ tienphongbank, ທະນາຄານ ກວກເຢີນ, ທະນາຄານຫຸ້ນສ່ວນໄຊງ່ອນ ຫລື BIDV ໂຮມເຂົ້າກັບທະນາຄານເຮືອນຢູ່ ທົ່ງພຽງແມ່ນ້ຳຂອງ. ນອກນັ້ນ ທະນາຄານແຫ່ງລັດ ຍັງດຳເນີນບັນດາບາດກ້າວທີ່ຂັນແຂງກວ່າ ຕົວຢ່າງຄື ຊື້ຄືນທະນາຄານອ່ອນດອ້ຍບາງແຫ່ງ.”
ພ້ອມກັບວິວັດການສ້າງໂຄງປະກອບລະບົບບັນດາອົງການສິນເຊື່ອຄືນໃຫມ່, ບັນຫາຫນີ້ເສຍ ກໍໄດ້ຮັບການແກ້ໄຂໄດ້ບາດກ້າວຫນຶ່ງໂດຍພື້ນຖານ. ມາຮອດປະຈຸບັນ, ຫນີ້ເສຍ ກວມພຽງປະມານ 3%. ໝາກຜົນກ່ຽວກັບການສ້າງອົງປະກອບລະບົບບັນດາອົງການສິນເຊື່ອຄືນໃຫມ່ ແລະ ແກ້ໄຂຫນີ້ເສຍໃນໄລຍະຜ່ານມາ ໄດ້ຫລຸດອັດຕາດອກເບ້ຍລົງ, ເປີດກວ້າງແຫລ່ງທຶນໃຫ້ບັນດາວິສາຫະກິດ. ທ່ານ ຫວູແມ້ງຕຽນ, ຮອງຜູ້ອຳນວຍການໃຫຍ່ທະນາຄານ ກວກເຢີນ ໃຫ້ຮູ້ວ່າ:
“ພວກຂ້າພະເຈົ້າບໍ່ນອນໃນບັນຊີລາຍຊື່ບັນດາທະນາຄານຕ້ອງໂຮມເຂົ້າກັນ, ສະນັ້ນ ພວກຂ້າພະເຈົ້າສືບຕໍ່ປະຕິບັດແຜນຮ່າງສ້າງໂຄງປະກອບຄືນໃຫມ່ຊື່ງໄດ້ຮັບຮອງເອົາຈາກທະນາຄານແຫ່ງລັດ. ຄວາມຈິງ ວິວັດການສ້າງໂຄງປະກອບຄືນໃຫມ່ໄລຍະຜ່ານມາໄດ້ປະຕິບັດສຳເລັດຜົນໃນເບື້ອງຕົ້ນ.”
ໃນປີ 2015, ທະນາຄານໃຫຍ່ ຈຳນວນຫນຶ່ງຄື: Vietcombank ຫລື BIDV ໄດ້ດຳເນີນການໂຮມເຂົ້າກັບບາງທະນາຄານຂະຫນາດນ້ອຍກວ່າ. ທ່ານ ຫງວຽນວັນບີງ, ຜູ້ວ່າການທະນາຄານແຫ່ງລັດ ໃຫ້ຮູ້ວ່າ: ນັບແຕ່ປີ 2015 ໄດ້ກຳນົດແມ່ນໄລຍະຈຸດສຸມ ແລະ ທະນາຄານໃຫຍ່ທັງໝົດຕ້ອງເຂົ້າຮ່ວມແກ້ໄຂ ແລະ ຖືວ່ານັ້ນແມ່ນຫນ້າທີ່ຕ້ອງເຮັດ. ບັນດາທະນາຄານໃຫຍ່ ຄື Vietcombank, BIDV ຫລື Vietinbank ເຂົ້າຮ່ວມການໂຮມເຂົ້າກັບບັນດາທະນາຄານມີຂອບຂະຫນາດນ້ອຍກວ່າ ເພື່ອ ທັງຫນູນຊ່ວຍ, ທັງເພີ່ມຂອບຂະຫນາດ ແລະ ພ້ອມກັນພັດທະນາ.
ພ້ອມກັບການກຳນົດວ່າ ປີ 2015 ຈະແມ່ນປີຫລັກແຫລ່ງໃນການສ້າງໂຄງປະກອບລະບົບທະນາຄານ, ທະນາຄານແຫ່ງລັດຢືນຢັນ ຈະສ້າງເງື່ອນໄຂ ຍູ້ໄວການເຄື່ອນໄຫວໂຮມເຂົ້າກັນ, ຊື້ຄືນບັນດາອົງການສິນເຊື່ອບົນພື້ນຖານສະໝັກໃຈ ແລະ ຖືກຕ້ອງຕາມກົດໝາຍ. ໝາກຜົນເບື້ອງຕົ້ນຂອງວິວັດການສ້າງໂຄງປະກອບລະບົບທະນາຄານ ໄດ້ ແລະ ພວມປະກອບສ່ວນຕອບສະຫນອງຄວາມຕ້ອງການພັດທະນາເສດຖະກິດສັງຄົມຂອງປະເທດຊາດ.