ប្អូនៗនិស្សិដែលចូលរួមវគ្គបណ្តុះបណ្តាល បានស្លៀកពាក់សម្លៀកបំពាក់ប្រពៃណីថៃ។

“បន្ទាប់ពីវគ្គបណ្តុះបណ្តាលនេះ ខ្ញុំយល់កាន់តែច្បាស់អំពីប្រទេស និងប្រជាជនថៃ តាមរយៈពិធីបុណ្យ ម្ហូបអាហារ និងទំនៀមទម្លាប់។ នេះមិនត្រឹមតែជួយខ្ញុំឱ្យយល់កាន់តែច្បាស់អំពីវប្បធម៌ចម្រុះរបស់ប្រទេសថៃប៉ុណ្ណោះទេ ប៉ុន្តែថែមទាំងជួយឱ្យខ្ញុំមើលឃើញភាពរួសរាយរាក់ទាក់ និងភាពកក់ក្តៅរបស់ប្រជាជននៅទីនេះទៀតផង” ។

“រយៈពេលមួយខែចូលរួមក្នុងវគ្គបណ្តុះបណ្តាលនៅប្រទេសថៃអាចនិយាយបានថា ជាពេលវេលាដែលមិនអាចបំភ្លេចបានសម្រាប់ខ្ញុំ។ ខ្ញុំបានយល់ដឹងកាន់តែច្រើនអំពីប្រទេសថៃ និងមានអនុស្សាវរីយ៍ដ៏ល្អជាមួយប្រជាជននៅទីនេះ។ ការចូលរួមវគ្គបណ្តុះបណ្តាលនេះ មិនត្រឹមតែជួយឱ្យយើងទទួលបានចំណេះដឹងបន្ថែមអំពីប្រទេសថៃ និងជីវភាពរស់នៅរបស់ប្រជាជនថៃប៉ុណ្ណោះទេ ថែមទាំងបានដឹងថាប្រទេសថៃមានប្រវត្តិសាស្ត្រដ៏យូរលង់ និងមានវប្បធម៌ខុសពីវប្បធម៌វៀតណាមទៀតផង” ។

បើទោះបីបានត្រឡប់មកវៀតណាមវិញក៏ដោយ ប៉ុន្តែ Minh Tan, Long Vu និង Phuong Nga - និស្សិត ៣ នាក់ក្នុងចំណោមនិស្សិតទាំង ២៤ នាក់ដែលទើបបានចូលរួមក្នុងវគ្គបណ្តុះបណ្តាលនេះ នៅតែរំជួលចិត្តនៅពេលរំលឹកពីអំឡុងពេល ១ខែ ដែលបានទៅសិក្សានៅប្រទេសថៃ។ នោះគឺជាពេលវេលាដែលមិនអាចបំភ្លេចបានក្នុងជីវិតរបស់ពួកគេ។ ក្រៅពីចូលរួមក្នុងថ្នាក់រៀនភាសាថៃដែលបង្រៀនដោយគ្រូបង្រៀនថៃ និស្សិតវៀតណាមក៏អាចចូលរួមក្នុងសកម្មភាពចម្រុះជាច្រើន និងទស្សនាទីតាំងសំខាន់ៗរបស់ប្រទេសថៃដូចជា រាជធានីបុរាណ Ayuthada ; វត្ត Suthat Thepwararam Ratchawora Mahawihan; សិក្សាស្វែងយល់អំពីសំលៀកបំពាក់ប្រពៃណីថៃ និងប្រវត្តិសាស្រ្តទីក្រុងបាងកកនៅដើមសម័យ     រតនៈកូស៊ីន ឬឧទ្យានជាតិ Sirindhorn ក្នុងខេត្ត Phetchaburi។ មិនត្រឹមតែបានយល់កាន់តែច្បាស់អំពីវប្បធម៌ថៃប៉ុណ្ណោះទេ អ្វីដែលនិស្សិតកត់សម្គាល់ច្បាស់បំផុតបន្ទាប់ពីវគ្គបណ្តុះបណ្តាលនេះ គឺសមត្ថភាពនិយាយភាសាថៃបានប្រសើរឡើងយ៉ាងខ្លាំង។ 

“ក្នុងរយៈពេល១ខែកន្លងមកនេះ ខ្ញុំត្រូវបានលត់ដំជំនាញស្តាប់និងនិយាយភាសាថៃ។ ខ្ញុំបាននិយាយជាមួយប្រជាជនថៃ និងចេះប្រើប្រាស់វាក្យស័ព្ទក្នុងបរិបទផ្សេងៗគ្នា។ ខ្ញុំបានរៀនពាក្យថ្មីជាច្រើនផងដែរ” ។

“សម្រាប់អ្នកដែលស្រឡាញ់ភាសាថៃដូចខ្ញុំ ការចូលរួមវគ្គបណ្តុះបណ្តាលនៅប្រទេសថៃមានអត្ថន័យជាច្រើន។ ពីអ្នកដែលមិនពូកែក្នុងការបញ្ចេញមតិ ខ្ញុំកាន់តែជឿជាក់លើខ្លួនឯង ហើយហ៊ានបញ្ចេញយោបល់របស់ខ្លួន។ ខ្ញុំបានរៀនចំណេះដឹងជាច្រើនពីលោកគ្រូ អ្នកគ្រូ និងតាមរយៈដំណើរកម្សាន្តផងដែរ”។

មិនត្រឹមតែបានកែលម្អជំនាញភាសារបស់ខ្លួនប៉ុណ្ណោះទេ អ្វីដែលធ្វើឱ្យប្អូនៗនិស្សិតចាប់អារម្មណ៍បំផុតនោះ គឺយតិភាពនិងភាពហ្មត់ចត់របស់លោកគ្រូ អ្នកគ្រូ និងបុគ្គលិកគាំទ្រក្នុងវគ្គបណ្តុះបណ្តាលនេះ។ ចំណាប់អារម្មណ៍ទាំងនេះ បានបំផុសគំនិតដល់ប្អូនៗនិស្សិត និងជួយពួកគេជំនះលើការនឹកផ្ទះ ។

“លោកគ្រូ អ្នកគ្រូ និងមិត្តភ័ក្តិជនជាតិថៃគឺជាអ្នករួមដំណើរដ៏អស្ចារ្យក្នុងអំឡុងពេលកន្លងមក។ ពួកគេមិនត្រឹមតែជួយយើងខ្ញុំលើការហូបចុក ការស្នាក់នៅ និងមធ្យោបាយធ្វើដំណើរប៉ុណ្ណោះទេ ប៉ុន្តែក៏ជួយយើងក្នុងជីវភាពប្រចាំថ្ងៃផងដែរ។ អ្នកគ្រូតែងតែរួសរាយរាក់ទាក់ និងចែករំលែកម្ហូបឆ្ងាញ់ៗជាមួយយើង។ ហើយបុគ្គលិកគាំទ្រតែងតែត្រៀមខ្លួនឆ្លើយសំណួរទាំងអស់របស់យើង។ ការយកចិត្តទុកដាក់ទាំងនេះ បានបង្កើតបទពិសោធន៍និងបរិយាកាសសិក្សារៀនសូត្រដ៏ជិតស្និតសម្រាប់យើងខ្ញុំ”។

ចូលរួមវគ្គបណ្តុះបណ្តាលនេះ ប្អូនៗនិស្សិក៏មានឱកាសសិក្សាស្វែងយល់អំពីប្រវត្តិសាស្ត្រថៃ។

បន្ទាប់ពីរៀបចំឡើងចំនួន ២៣ លើក កម្មវិធីនេះមាននិស្សិតជាង ១.០០០ នាក់បានចុះឈ្មោះចូលរួម។ ប្រការនោះបង្ហាញពីភាពទាក់ទាញរបស់កម្មវិធីចំពោះនិស្សិតវៀតណាមដែលស្រឡាញ់ភាសាថៃ។ វាយតម្លៃប្រសិទ្ធភាពនៃកម្មវិធីនេះ អ្នកស្រី Supak Mahavakorn និងអ្នកស្រី Nation Pornumpaisakul អ្នកទទួលបន្ទុកកម្មវិធី មានប្រសាសន៍ថា៖  

“អាចនិយាយបានថា កម្មវិធីនេះទទួលបានជោគជ័យ។ ជោគជ័យនោះត្រូវបានបង្ហាញតាមរយៈការពិតថា និស្សិតវៀតណាមមានសេចក្តីស្រឡាញ់ខ្លាំងចំពោះប្រទេសថៃ។ បន្ទាប់ពីបញ្ចប់ការសិក្សា និស្សិតជាច្រើនបានក្លាយទៅជាគ្រូបង្រៀនភាសាថៃនៅសកលវិទ្យាល័យនានារបស់វៀតណាម អ្នកបកប្រែភាសាថៃ និងធ្វើការនៅទីភ្នាក់ងាររដ្ឋ ឬក្រុមហ៊ុនថៃជាច្រើន។ លើសពីនេះ កម្មវិធីក៏បានរួមចំណែកលើកកម្ពស់ទំនាក់ទំនងរវាងប្រទេសទាំងពីរ និងជួយប្រជាជនវៀតណាមយល់កាន់តែច្បាស់អំពីវប្បធម៌ ប្រទេស និងប្រជាជនថៃ។ នោះជាអ្វីដែល យើងមានមោទនភាពយ៉ាងខ្លាំង ក្នុងនាមជាអ្នករៀបចំកម្មវិធី”។

“នៅពេលចូលរួមក្នុងកម្មវិធីនេះ និស្សិតទាំងអស់អាចអភិវឌ្ឍន៍សក្តានុពលរបស់ពួកគេ ហើយយើងអាចមើលឃើញការផ្លាស់ប្តូររបស់ពួកគេ។ និស្សិតកាន់តែមានទំនុកចិត្តនៅពេលប្រើប្រាស់ភាសាថៃ ហើយមានបំណងចង់ធ្វើការងារទាក់ទងនឹងភាសាថៃ។ កម្មវិធីនេះ គឺជាការចាប់ផ្ដើមនៃសេចក្តីស្នេហាជាមួយភាសាថៃ។ ពួកគេជ្រើសរើសរៀនភាសាថៃ ហើយស្រឡាញ់ភាសាថៃ”។

 ដូចជាការចែលរំលែករបស់លោកស្រី Nation Pornumpaisakul កម្មវិធីនេះជាការចាប់ផ្តើមនៃសេចក្តីស្រឡាញ់ចំពោះភាសាថៃ ហើយសម្រាប់និស្សិតម្នាក់ៗដែលចូលរួមក្នុងកម្មវិធីនេះ ក្តីស្រឡាញ់ចំពោះភាសាថៃនឹងត្រូវបានរីកចម្រើន និងអភិវឌ្ឍន៍កាន់តែខ្លាំងឡើង។ ហើយពួកគេនឹងក្លាយជាស្ពានចង់មេត្រីភាពរួមចំណែកលើកកម្ពស់ទំនាក់ទំនងមិត្តភាពនិងការយោគយល់គ្នាទៅវិញទៅមករវាងប្រជាជននៃប្រទេសទាំងពីរ៕