“គ្មានអ្វីពិបាក ខ្លាចចិត្តកំសាកមិនហានធ្វើ

លើកភ្នំ ទប់សមុទ្រ សប់សារពើរ សម្រេចចិត្តធ្វើបានទាំងអស់។"។

នោះគឺជាបាវចនាដែលលោក Attapon Rươngsirichok មគ្គុទ្ទេសក៍ទេសចរណ៍នៅមណ្ឌលអនុស្សាវរីយ៍លោកប្រធានហូជីមិញ តែងតែចងចាំជានិច្ចរាល់ពេលដែលលោកជួបការលំបាក។ ក្នុងនាមជាអ្នកស្តាប់វិទ្យុដ៏យូរលង់ម្នាក់របស់ VOV - អាណិកជនវៀតណាមជំនាន់ទី ៣ ដែលបានកើតមកនិងធំដឹងក្តីនៅប្រទេសថៃ - លោក Attapon ជានិច្ចកាលខិតខំស្រាវជ្រាវនិងសិក្សាអំពីប្រវត្តិសាស្ត្រវៀតណាម និងលោកប្រធានហូជីមិញ ដើម្បីរួមចំណែកពូនជ្រុំទំនាក់ទំនងជិតស្និទ្ធរវាងមាតុភូមិទាំងពីរ រួមចំណែកផ្សព្វផ្សាយភាសាវៀតណាម វប្បធម៌ និងប្រវត្តិសាស្ត្រវៀតណាមក្នុងសហគមន៍ប្រជាជនថៃ។ នៅក្នុងនាទីដំបូលអាស៊ានថ្ងៃនេះ សូមអញ្ជើញប្រិយមិត្ត ជួបជាមួយបុរសរូបនេះតាមរយៈអត្ថបទ៖ "Attapon - បុគ្គលម្នាក់ដែលរួមចំណែកផ្សព្វផ្សាយវប្បធម៌វៀតណាមនៅប្រទេសថៃ"។

លោក Attapon Rươngsirichok មានឈ្មោះវៀតណាមថា Van Viet Thanh។

“ខ្ញុំចូលចិត្តបង្រៀនភាសាវៀតណាមដល់ក្មេងៗថៃដើមកំណើតវៀតណាមណាស់ ពីព្រោះក្រោយឆ្នាំ ១៩៧៥ ការបង្រៀននិងរៀនភាសាវៀតណាមនៅតាមខេត្តជាច្រើនក្នុងប្រទេសថៃ ជាពិសេសនៅខេត្ត Udon Thani រងការអាកខាន ដែលបានធ្វើឲ្យកូនចៅវៀតណាមជំនាន់ក្រោយ មិនចេះនិយាយភាសា   វៀតណាម។ ខ្ញុំក៏បារម្ភដែរថា នាពេលអនាគត ភាសាវៀតណាមនឹងសាបសូន្យ ហើយកូនចៅវៀតណាមនឹងមិនអាចនិយាយភាសាវៀតណាមជាមួយជនជាតិវៀតណាមក្នុងប្រទេសវៀតណាមបាន។ ដូច្នេះ ខ្ញុំស្ម័គ្រចិត្តបង្រៀនភាសាវៀតណាម ព្រោះខ្ញុំចេះទាំងភាសាវៀតណាម និងភាសាថៃ”។

លោក Attapon Rươngsirichok ដែលមានឈ្មោះវៀតណាមថា Van Viet Thanh កើតនៅឆ្នាំ ១៩៧០ នៅក្នុងគ្រួសារដែលជីដូន ជីតា និងឪពុកម្តាយរបស់លោកជាគ្រូបង្រៀនភាសាវៀតណាមក្នុងសហគមន៍ជនវៀតណាមនៅខេត្ត  Sakon Nakhon និងខេត្ត Udon Thani។ ដោយចេះភាសាវៀតណាមតាំងពីកុមារភាព ហើយប្រើប្រាស់ជាញឹកញាប់នៅក្នុងគ្រួសាររបស់ខ្លួន សមត្ថភាពនិយាយភាសាវៀតណាម និងភាសាថៃរបស់លោកបានអភិវឌ្ឍដូចគ្នា។ ក្នុងរយៈពេលជិត ២០ ឆ្នាំមកនេះ លោកគឺជាអ្នកគាំទ្រដ៏ធំបំផុតមួយ នៃកម្មវិធីភាសាថៃ របស់វិទ្យុសម្លេងវៀតណាម និងទទួលបានរង្វាន់ទី ៣ ក្នុងកម្មវិធីប្រឡង “តើអ្នកយល់ដឹងអ្វីខ្លះអំពីប្រទេសវៀតណាម” ដែលរៀបចំដោយ VOV5 ។ ការស្តាប់កម្មវិធីផ្សាយសំឡេង និងអានព័ត៌មានរបស់ VOV ជារៀងរាល់ថ្ងៃ បានជួយឱ្យលោកទទួលបានចំណេះដឹងបន្ថែមអំពីវៀតណាម អំពីលោកអ៊ុំហូ និងធ្វើបច្ចុប្បន្នភាពព័ត៌មានដ៏ត្រឹមត្រូវអំពីវៀតណាម។ នោះគឺជារបៀបដែលលោកបានសម្តែងក្តីស្រឡាញ់ចំពោះវៀតណាម ចំពោះលោកអ៊ុំ ហូ និងរក្សាប្រពៃណី ជំរុញទំនាក់ទំនងរវាងប្រជាជនទាំងពីរ។

“ខ្ញុំបានជ្រើសរើសធ្វើការនៅបណ្ឌលអនុស្សាវរីយ៍លោកប្រធានហូជីមិញ  ព្រោះខ្ញុំកោតសរសើរលោកប្រធានហូជីមិញយ៉ាងខ្លាំងណាស់។ លោកគឺជាវីរបុរសជាតិរបស់វៀតណាម និងជាឥស្សរជនសំខាន់ក្នុងពិភពលោក។ ជាប្រភពនៃការបំផុសគំនិតសម្រាប់ប្រជាជនដែលរងការជិះជាន់ ឲ្យក្រោកឡើងតស៊ូដណ្តើមឯករាជ្យពីរបបអាណានិគម។ ទី២ ខ្ញុំចង់ផ្សព្វផ្សាយអំពីសីលធម៌ មនោគមវិជ្ជា និងអំពើល្អរបស់លោកអ៊ុំ ហូ ដល់ប្រជាជនថៃ ព្រោះលោកធ្លាប់រស់នៅក្នុងប្រទេសថៃ ត្រូវបានប្រជាជនថៃជួយគាំទ្រ ក្នុងការតស៊ូរំដោះប្រជាជាតិវៀតណាម ហើយទទួលបានបានជោគជ័យ។ ទី៣ ខ្ញុំចង់រួមចំណែកមួយចំណែកតូចក្នុងការអភិវឌ្ឍខេត្ត Udon Thani ដែលជាស្រុកកំណើតរបស់ខ្ញុំ។ ភ្ញៀវទេសចរណ៍បន្ទាប់ពីមកទស្សនាតំបន់អនុស្សាវរីយ៍ នឹងទៅទិញឥវ៉ាន់និងទស្សនាតំបន់សំខាន់ៗផ្សេងទៀត ជួយផ្សព្វផ្សាយតំបន់ទេសចរណ៍ និងខេត្ត Udon Thani ឱ្យក្លាយជាគោលដៅទេសចរណ៍ដ៏គួរឲ្យទាក់ទាញ ហើយសេដ្ឋកិច្ចក៏នឹងរីកចម្រើនជាង”។

លោក Attapon បង្រៀនភាសាវៀតណាម។

ក្នុងនាមជាមគ្គុទ្ទេសក៍ទេសចរណ៍នៅមណ្ឌលអនុស្សាវរីយ៍លោកប្រធានហូជីមិញក្នុងខេត្ត Udon Thani ការងារប្រចាំថ្ងៃរបស់លោក Attapon អស់រយៈពេលជិត ១០  ឆ្នាំគឺឧទ្ទេសនាមអំពីតំបន់អនុស្សាវរីដល់ក្រុមអ្នកទស្សនា។ លោកបានឲ្យដឹងថា ក្នុងចំណោមគណៈប្រតិភូដែលមកទស្សនាទីនេះ ភាគច្រើនមកពីប្រទេសវៀតណាម និងប្រទេសមួយចំនួនដូចជា អង់គ្លេស បារាំង អាល្លឺម៉ង់ កូរ៉េខាងត្បូង និងជប៉ុន ដែលចង់ស្វែងយល់អំពីជីវិតនិងអាជីពរបស់លោកប្រធានហូជីមិញ ពិសេសអំឡុងពេលដែលលោករស់នៅប្រទេសថៃ ចាប់ពីឆ្នាំ ១៩២៨ ដល់ឆ្នាំ ១៩២៩ ៖

លោក Attapon ឧទ្ទេសនាមអំពីតំបន់អនុស្សាវរីដល់ក្រុមអ្នកទស្សនា។

“សូមមានមោទនភាពដែលជាជនវៀតណាមម្នាក់ ព្រោះវៀតណាមជាជនជាតិដ៏អងអាច់ក្លាហាន ដែលមានភាពអត់ធ្មត់ តស៊ូ និងអត់ធ្មត់។ វៀតណាមចាប់ផ្តើមមិនមែនជាប្រទេសអ្នកមានទេ ប៉ុន្តែជាប្រទេសស្ថិតក្រោមអាណានិគម ជំនាន់ដូនតារបស់យើងត្រូវតែខិតខំប្រឹប្រែងយ៉ាងខ្លាំង ដើម្បីឱ្យមានប្រទេសវៀតណាមរីកចម្រើនដូចសព្វថ្ងៃនេះ យើងជាកូនចៅវៀតណាមមិនថាក្នុងប្រទេស ឬក្រៅប្រទេស គួរតែមានមោទនភាពចំពោះប្រវត្តិសាស្ត្ររបស់ប្រទេសជាតិ ចំពោះអ្វីដែលជំនាន់ដូនតាបានថែរក្សានិងបន្សល់ទុកមក។ ខិតខំព្យាយាមធ្វើឲ្យវៀតណាមអភិវឌ្ឍន៍ដោយប្រកៀកស្មាជាមួយបណ្តាប្រទេសនៅទូទាំងទ្វីបទាំង៥ ដូចបំណងប្រាថ្នារបស់លោក ប្រធានហូជីមិញ។ ដូច្នេះទៅថ្ងៃអនាគត ទៅទីណាក៏ដោយ យើងថាយើងជាជនជាតិវៀតណាម គ្រប់គ្នានឹងស្គាល់វៀតណាម ហើយពេញចិត្តនិងមោទនភាពដែលបានជួបនិងចងមេត្រីភាពជាមួយប្រជាជនវៀតណាម”។

ខាងលើនេះ ជាសារទៅកាន់អាណិកជនវៀតណាមជំនាន់វ័យក្មេង ក៏ជាគោលគំនិតដែលជួយឲ្យលោកខិតខំព្យាយាម ពីមួយថ្ងៃទៅមួយថ្ងៃ តាមរយៈវិធីផ្សេងៗជាច្រើន។ សម្រាប់លោក មានឈាមជ៍រជាវៀតណាម គឺជាសំណាងល្អ និងជាមោទនភាព។ ហើយលោកតែងតែមានបំណងចង់បន្តការរួមវិភាគទានតូចតាចទៅក្នុងការផ្សព្វផ្សាយអំពីប្រទេស និងប្រជាជនវៀតណាម អំពីលោកប្រធានហូជីមិញ អំពីចំណងមិត្តភាពយូរអង្វែងរវាងប្រជាជនវៀតណាមនិងថៃ ហើយជាងគេបំផុតគឺរួមចំណែកថែរក្សាភាសាវៀតណាម - វប្បធម៌វៀតណាមក្នុងសហគមន៍ជនវៀតណាមនៅប្រទេសថៃ៕