ឧបនាយករដ្ឋមន្ត្រី និងជារដ្ឋមន្ត្រីការបរទេសវៀតណាមលោក Bui Thanh Son។ (រូបថត៖ TTXVN)

កាលពីថ្ងៃទី២៤ ខែធ្នូ នៅទីក្រុងញូវយ៉ក សហរដ្ឋអាមេរិក មហាសន្និបាតអង្គការសហប្រជាជាតិបានអនុម័តលើអនុសញ្ញាអង្គការសហប្រជាជាតិស្តីពីការប្រយុទ្ធប្រឆាំងនឹងបទល្មើសតាមអ៊ីនធឺណិត ហើយបានជ្រើសរើសប្រទេសវៀតណាមជាទីតាំងសម្រាប់ពិធីចុះហត្ថលេខាលើអនុសញ្ញា។ ក្នុងបទសម្ភាសន៍ជាមួយសារព័ត៌មាន ក្នុងឱកាសនេះ ឧបនាយករដ្ឋមន្ត្រី និងជារដ្ឋមន្ត្រីការបរទេសវៀតណាមលោក Bui Thanh Son បានលើកច្បាស់ថា៖ ក្នុងនាមជាឯកសារដំបូងស្តីពីបទល្មើសឆ្លងដែន ដែលត្រូវបានអនុម័តក្នុងក្របខណ្ឌអង្គការសហប្រជាជាតិក្រោយរយៈពេល ២០ ឆ្នាំកន្លងមក អនុសញ្ញានេះបានបើកទំព័រថ្មីក្នុងកិច្ចសហប្រតិបត្តិការរវាងប្រទេសនានាជាមួយនឹងអត្ថន័យសំខាន់ៗជាច្រើន។

ឧបនាយករដ្ឋមន្ត្រី និងជារដ្ឋមន្ត្រីការបរទេស លោក Bui Thanh Son បានឲ្យដឹងថា នេះជាលើកទីមួយ ដែលវៀតណាមធ្វើជាម្ចាស់ផ្ទះនៃពិធីចុះហត្ថលេខាលើអនុសញ្ញាអង្គការសហប្រជាជាតិ ដែលជាសញ្ញាសម្គាល់ថ្មីមួយក្នុងការធ្វើសមាហរណកម្មអន្តរជាតិផ្នែកគតិយុត្តនិយាយដោយឡែក និងកិច្ចការបរទេសពហុភាគីរបស់វៀតណាមនិយាយរួម។ ព្រឹត្តិការណ៍ដ៏សំខាន់នេះអាចត្រូវបានវាយតម្លៃលើទិដ្ឋភាពចំនួន ៣។ ទីមួយ ការដែលវៀតណាមបានម្ចាស់ការលើកសំណើរធ្វើជាម្ចាស់ផ្ទះនៃពិធីចុះហត្ថលេខានោះ បានបញ្ជាក់សារជាថ្មីម្ដងទៀតពីការសន្យាយ៉ាងមុតមាំរបស់បក្ស និងរដ្ឋចំពោះកិច្ចសហប្រតិបត្តិការអន្តរជាតិក្នុងការទប់ស្កាត់ ប្រយុទ្ធប្រឆាំងបទល្មើសឆ្លងដែន។ ទីពីរ ប្រការនេះក៏អះអាងនូវគោលជំហរដ៏ខ្ជាប់ខ្ជួនរបស់វៀតណាមក្នុងការគោរពច្បាប់អន្តរជាតិ និងគោលជំហរចូលរួមដោយម្ចាស់ការ រួមចំណែកយ៉ាងសកម្មក្នុងការងាររួមរបស់អង្គការសហប្រជាជាតិដើម្បីដោះស្រាយបញ្ហាជាសកលនានា។ ជាចុងក្រោយ ដោយការដែលសមាជិកអង្គការសហប្រជាជាតិបានឯកភាពជ្រើសរើសទីក្រុងហាណូយជាកន្លែងរៀបចំពិធីចុះហត្ថលេខាលើអនុសញ្ញានោះ ចាប់ពីពេលនេះតទៅ ឈ្មោះហាណូយនឹងត្រូវបានផ្សារភ្ជាប់ជាមួយនឹងឯកសារគតិយុត្តអន្តរជាតិដ៏សំខាន់មួយ ដើម្បីដោះស្រាយបញ្ហាប្រឈមមួយនៃសតវត្សទី ២១៕