ការលក់បន្តផ្ទាល់ពិតជាទាក់ទាញកម្មវិធីទិញទំនិញតាមអ៊ីនធឺណិត (រូបថត៖ VOV)

ដោយមានអ្នកតាមដានលើបណ្តាញច្រើនជាង ៣០០ នាក់   រាល់វគ្គលក់ទំនិញរបស់អ្នកស្រី Vu Le Thuy នៅលើវេទិកា Tik Tok តែងតែទទួលបានការបញ្ជាទិញរាប់រយដែរ។ ពីមុននេះ អ្នកស្រីគ្រាន់តែលក់នៅតាមផ្សារប្រពៃណីប៉ុណ្ណោះ ប៉ុន្តែពេលនេះ នាងចាប់ផ្តើមផ្តោតលើការលក់តាមការផ្សាយបន្តផ្ទាល់ ហើយបរិមាណទំនិញដែលលក់ និងចំណូលមកពីការលក់កើនឡើងជាបន្តបន្ទាប់។

“នៅពេលដែលខ្ញុំលក់នៅលើវេទិកា និងផ្សាយបន្តផ្ទាល់នៅលើបណ្តាញ Tik Tok ចំនួនប័ណ្ណបញ្ជាទិញបានកើនឡើងយ៉ាងខ្លាំង ពោលគឺកើនឡើងកាន់តែច្រើនដែរ។ លើសពីនេះ ដោយសារ Tik Tok shop ជួយឧបត្ថម្ភលេខកូដបញ្ចុះតម្លៃ ដូច្នេះនៅពេលដែលអតិថិជនទិញនៅលើការផ្សាយបន្តផ្ទាល់ ពួកគេក៏ទទួលបានការបញ្ចុះតម្លៃច្រើន និងការផ្តល់យោបល់ដោយផ្ទាល់ផងដែរ។ អ្នកទិញអាចសួរសំណួរណាមួយអំពីផលិតផលដែរ”។

ការលក់ផ្សាយបន្តផ្ទាល់ត្រូវបានចាត់ទុកថាជាទិសដៅចាំបាច់ ខណៈពេលដែលហេដ្ឋារចនាសម្ព័ន្ធបច្ចេកវិទ្យាព័ត៌មាន និងវេទិកាឧបត្ថម្ភនៅវៀតណាមកំពុងអភិវឌ្ឍន៍កាន់តែខ្លាំងឡើង។ ការដឹកជញ្ជូនមានតម្លៃថោក រហ័ស និងអាចទុកចិត្តបាន។ ទម្រង់នៃការលក់នេះជួយលុបបំបាត់អន្តរការី ដោយនាំយកផលិតផលពីក្រុមហ៊ុនផលិតទៅកាន់អ្នកប្រើប្រាស់ដោយផ្ទាល់។ ដូច្នេះអ្នកផលិតនឹងទទួលបានប្រាក់ចំណេញកាន់តែប្រសើរ ហើយអ្នកប្រើប្រាស់ក៏អាចទិញផលិតផលដោយផ្ទាល់ក្នុងតម្លៃសមរម្យផងដែរ។ លោកស្រី Nguyen Thi My ជាអ្នកធ្លាប់ទិញទំនិញតាម អនឡាញបានឲ្យដឹងថា៖ “ការបញ្ជាទិញតាមប្រព័ន្ធអនឡាញ និងបណ្តាញទំនាក់ទំនងសង្គមមានតម្លៃសមរម្យ និងមានគុណភាពល្អ ជាពិសេសការទិញពីអង្គភាពផ្លូវការដែលមានកេរ្តិ៍ឈ្មោះ។ ប្រការនេះក៏ងាយស្រួលសម្រាប់អ្នករវល់ដូចខ្ញុំដែរ”។

ការផ្ទុះឡើងនៃការផ្សាយបន្តផ្ទាល់លក់ទំនិញ ក៏ដូចជាលក់តាមវេទិកាពាណិជ្ជកម្មអេឡិចត្រូនិកកំពុងបង្កើតរលកនៃការផ្លាស់ប្តូរវិធីសាស្រ្តលក់រាយនៅវៀតណាម។ ប្រការនេះក៏បង្កបញ្ហាប្រឈមដូចជា ត្រូវការបុគ្គលិកផ្នែកទីផ្សារ/ផ្នែកលក់ដែលមានជំនាញក្នុងការលក់ផ្សាយបន្តផ្ទាល់។ រដ្ឋធានី-ខេត្តជាច្រើនក៏បានចាប់យកនិន្នាការនេះយ៉ាងឆាប់រហ័ស ដោយ បើកវគ្គបណ្តុះបណ្តាលជំនាញលក់តាមរយៈការផ្សាយផ្ទាល់សម្រាប់កសិករ ដើម្បីលើកកម្ពស់ការប្រើប្រាស់ផលិតផលក្នុងស្រុក។ លោក Nguyen Minh Tan គ្រូបណ្តុះបណ្តាលជំនាញលក់តាមការផ្សាយបន្តផ្ទាល់បានឲ្យដឹងថា៖ “បច្ចុប្បន្ននេះ និន្នាការលក់ផ្សាយបន្តផ្ទាល់គឺជានិន្នាការអភិវឌ្ឍន៍យ៉ាងខ្លាំង។ ថ្វីត្បិតតែនៅប្រទេសផ្សេងៗ និន្នាការនេះបាននិងកំពុងអភិវឌ្ឍន៍ជាច្រើនឆ្នាំ ប៉ុន្តែនៅប្រទេសវៀតណាម ចាប់តាំងពីពេលមានបណ្តាញ Tik Tok ការលក់បន្តផ្ទាល់បានបើកទូលាយ ហើយគ្រប់គ្នាកំពុងផ្សាយបន្តផ្ទាល់ការលក់នៅលើវេទិកា។ រាល់មេរៀនដែលខ្ញុំបង្រៀន ខ្ញុំបង្រៀនដោយការអនុវត្តជាក់ស្តែង ព្រោះបើអ្នករៀនតែទ្រឹស្តី ដោយគ្មានការអនុវត្តជាក់ស្តែងនោះ ការលក់បន្តផ្ទាល់នឹងមិនមានប្រសិទ្ធភាពទេ”។

ទន្ទឹមនឹងការបណ្តុះបណ្តាលការលក់តាមប្រព័ន្ធអ៊ីនធឺណេត  ខេត្ត ក្រុង និងសមាគមឧស្សាហកម្មនានាក៏ផ្តោតលើការតភ្ជាប់អ្នកទិញនិងអ្នកលក់ ការបង្កើតខ្សែសង្វាក់ផ្គត់ផ្គង់ប្រកបដោយសុវត្ថិភាពនិងនិរន្តរភាព និងការបង្កើនការទទួលខុសត្រូវរបស់ភាគីទាំងអស់ក្នុងអំឡុងពេលចែកចាយទំនិញ។ ទំនួលខុសត្រូវនៅទីនេះមិនត្រឹមតែជាអ្នកផ្គត់ផ្គង់ក្នុងការធានាគុណភាពផលិតផលប៉ុណ្ណោះទេ ប៉ុន្តែក៏ជាទំនួលខុសត្រូវរបស់អ្នកលក់រាយក្នុងទិសដៅឧបត្ថម្ភក្នុងផលិតកម្ម និងទំនួលខុសត្រូវរបស់អ្នកប្រើប្រាស់ក្នុងការត្រួតពិនិត្យ ហើយថែមទាំងការទទួលខុសត្រូវរបស់ភ្នាក់ងារគ្រប់គ្រងរដ្ឋក្នុងការកសាងការផ្គត់ផ្គង់ខ្សែសង្វាក់ផ្គត់ផ្គង់ប្រកបដោយសុវត្ថិ ភាពនិងនិរន្តរភាពផងដែរ។ 

លោក ង្វៀន មិញតាន់ ក្នុងវគ្គចែករំលែកជំនាញផ្ទាល់ជាមួយសិស្ស (រូបថត៖ ផ្តល់ដោយម្ចាស់រូបថត)

ក្នុងពិធីចុះហត្ថលេខាលើកម្មវិធីកិច្ចសហប្រតិបត្តិការត្រួតពិនិត្យគុណភាពទំនិញរវាងទីក្រុងហូជីមិញនិងខេត្ត ក្រុង សម្ព័ន្ធក្រុមហ៊ុនលក់រាយ វេទិកាពាណិជ្ជកម្មអេឡិចត្រូនិក ទីផ្សារលក់ដុំ អាជីវកម្ម ... នាពេលថ្មីៗនេះ លោក Vo Van Hoan អនុប្រធានគណៈកម្មាធិការប្រជាជនទីក្រុងហូជីមិញ បានឲ្យដឹងថា ដើម្បីលើកកំពស់ទំនួលខុសត្រូវពីផលិតកម្ម រហូតដល់ការចែកចាយទំនិញ ទីក្រុងបានតភ្ជាប់ពង្រឹងការទទួលខុសត្រូវរបស់គ្រប់ភាគី តាមនោះ បើកឱកាសសម្រាប់អង្គភាពអាជីវកម្មបើកទូលាយទីផ្សារ និងទប់ស្កាត់ទំនិញខូចគុណភាព៖ “ជាមួយនឹងបំណងប្រាថ្នាមិនត្រឹមតែតភ្ជាប់ដើម្បីគាំទ្រដល់ការប្រើប្រាស់ទំនិញប៉ុណ្ណោះទេ យើងក៏ភ្ជាប់អ៊ីនធឺណិត ២៤/២៤ ម៉ោង ដោយតភ្ជាប់ដើម្បីបង្កើតម៉ាកយីហោផងដែរ។ តាមនោះ ដាក់មូលដ្ឋានគ្រឹះជាបណ្តើរៗ ដើម្បីឆ្ពោះទៅរកខ្សែសង្វាក់ផ្គត់ផ្គង់ប្រកបដោយនិរន្តរភាព សុវត្ថិភាព និងតម្លាភាព”។

នៅក្នុងបរិបទដែល ពាណិជ្ជកម្មអេឡិចត្រូនិក និងបច្ចេកវិទ្យាឌីជីថលកំពុងរីកចម្រើនកាន់តែខ្លាំងឡើងនៅវៀតណាម ការផ្សាយបន្តផ្ទាល់កំពុងក្លាយជាឧបករណ៍ដ៏សំខាន់មួយដើម្បីជួយម៉ាកយីហោវៀតណាមទៅដល់អតិថិជនដោយផ្ទាល់ និងប្រកបដោយប្រសិទ្ធភាព។ ការកសាងវេទិកាប្រតិបត្តិការបន្តផ្ទាល់ ដើម្បីធានាបាននូវការអភិវឌ្ឍប្រកបដោយនិរន្តរភាពនៃសកម្មភាពរបស់ខ្លួន គឺជាមធ្យោបាយមួយសម្រាប់អង្គភាពអាជីវកម្ម ក្រុមហ៊ុនផលិត កសិករ ជាដើម ដើម្បីនាំយកផលិតផលខិតមកជិតជាមួយអតិថិជន៕