នាវា HMAS Sirius បានធ្វើដំណើរឆ្លងកាត់នាវាកងទ័ពជើងទឹកហ្វីលីពីន BRP Emilio Jacinto ក្នុងពេលធ្វើសមយុទ្ធនៅសមុទ្រ Sulu (ប្រភព៖ ក្រសួងការពារជាតិអូស្ត្រាលី)

នៅក្នុងសេចក្តីជូនដំណឹងមួយ ចេញផ្សាយនៅថ្ងៃទី ១៥ ខែមីនា រដ្ឋមន្រ្តីការបរទេស និងជារដ្ឋមន្រ្តីការពារជាតិអូស្ត្រាលី លោកស្រី Marise Payne បានឲ្យដឹងថា នាវាចម្បាំងពីរគ្រឿងរបស់ប្រទេសខ្លួន នឹងចូលរួមក្នុងសមយុទ្ធនាវាចរពហុភាគី នៅសមុទ្រ La Perouse ដឹកនាំដោយបារាំងនៅតំបន់ភាគឥសាននៃមហាសមុទ្រឥណ្ឌា។ លោកស្រី Marise Payne បានឲ្យដឹងថា ការដាក់ពង្រាយ នាវាកងទ័ពជើងទឹកទាំងនេះ គឺជាផ្នែកមួយនៃកម្មវិធីសហប្រតិបត្តិការអន្តរជាតិរយៈពេលវែងនិងរឹងមាំ របស់កងទ័ពអូស្ត្រាលីនៅក្នុងតំបន់មហាសមុទ្រឥណ្ឌា - ប៉ាស៊ីហ្វិក។ យ៉ាងណាមិញ អូស្រ្តាលីប្តេជ្ញាធ្វើកិច្ចសហប្រតិបត្តិការជាប្រចាំជាមួយដៃគូ និងប្រទេសជិតខាង ដើម្បីរក្សាឲ្យតំបន់មហាសមុទ្រឥណ្ឌា-ប៉ាស៊ីហ្វិក ប្រកបដោយសន្តិភាព បរិយាប័ន្ន មានអធិបតេយ្យ មានភាពធន់និងធានានូវផលប្រយោជន៍របស់ប្រទេសទាំងអស់។

មុននោះ កាសែតឥណ្ឌា Hindustan Times បានរាយការណ៍ថា នាវាកងទ័ពជើងទឹករបស់ក្រុមប្រទេស Quad រួមមានអាមេរិក ជប៉ុន ឥណ្ឌានិងអូស្ត្រាលី នឹងធ្វើសមយុទ្ធជាមួយនាវាចម្បាំងបារាំង ចាប់ពីថ្ងៃទី ៤ ដល់ថ្ងៃទី ៧ ខែមេសា។ សមយុទ្ធនេះគ្រោងនឹងមានការចូលរួមពីនាវាពិឃាតបំពាក់ដោយមីស៊ីលនាំផ្លូវ នាវាមុជទឹកនិងយន្តហោះឈ្លបយកការណ៍ផងដែរ៕