ពិធីចុះហត្ថលេខាលើកម្មវិធីធ្វើសកម្មភាព អនុវត្តក្របខ័ណ្ឌភាពជាដៃគូយុទ្ធសាស្ត្រវៀតណាម-នូវែលសេឡង់ ដំណាក់កាល ២០២១-២០២៤។ (ប្រភព៖ TTXVN)

រដ្ឋមន្ត្រីទាំងពីរបានឯកភាព បន្តពង្រឹងទំនាក់ទំនងនយោបាយគួរឲ្យជឿទុកចិត្ត; ជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មបន្ថែមទៀត ប្រើប្រាស់ប្រកបដោយប្រសិទ្ធភាពនូវយន្តការសហប្រតិបត្តិការសេដ្ឋកិច្ចដែលមានស្រាប់; អនុវត្តឲ្យបានល្អនូវកិច្ចព្រមព្រៀងពាណិជ្ជកម្មជំនាន់ថ្មី ដែលភាគីទាំងពីរជាសមាជិក។ រដ្ឋមន្ត្រីលោក Bui Thanh Son បានស្នើឲ្យនូវែលសេឡង់បង្កើតលក្ខខណ្ឌអំណោយផលបន្ថែមទៀតសម្រាប់ផលិតផលកសិកម្មវៀតណាមនាំចេញទៅកាន់នូវែលសេឡង់ នៅចំពោះមុខគឺផ្លែក្រូចឆ្មារស្រស់ៗ ផ្លែក្រូចថ្លុង និងផ្លែមៀន; លោកសង្ឃឹមថា នូវែលសេឡង់នឹងបន្តជួយឧបត្ថម្ភ ODA សម្រាប់វៀតណាមលើវិស័យដូចជា កសិកម្មប្រកបដោយនិរន្តរភាព ការឆ្លើយតបនឹងបម្រែបម្រួលអាកាសធាតុ សុខាភិបាល និងនវានុវត្តន៍។

ទាក់ទង់នឹងកិច្ចសហប្រតិបត្តិការសន្តិសុខ និងការពារជាតិ រដ្ឋមន្ត្រី Mahuta បានយល់ព្រម បន្តជួយគាំទ្រវៀតណាមក្នុងការបណ្តុះបណ្តាលកងកម្លាំងរក្សាសន្តិភាព កិច្ចសហប្រតិបត្តិការក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន និងចែករំលែកបទពិសោធន៍ក្នុងការបង្ការ និងជួយសង្គ្រោះ គ្រោះមហន្តរាយ។

ភាគីទាំងពីរជឿជាក់ថា ចាំបាច់ត្រូវស្រាវជ្រាវ និងលើកកម្ពស់វិស័យដែលសមស្របទៅនឹងសក្ដានុពល តម្រូវការ និងគោលដៅរបស់ភាគីទាំងពីរ ដូចជាការប្រយុទ្ធប្រឆាំងនឹងបម្រែបម្រួលអាកាសធាតុ កាត់បន្ថយការបំភាយឧស្ម័នតាមទិសដៅសម្រេចបានការសន្យាក្នុង COP-26; ការអភិរក្ស និងអភិវឌ្ឍន៍ព្រៃឈើ អភិវឌ្ឍន៍កសិកម្មប្រកបដោយនិរន្តរភាពនិងស្និទ្ធស្នាលជាមួយបរិស្ថាន កិច្ចសហប្រតិបត្តិការនេសាទ និងការការពារបរិស្ថានសមុទ្រ។

រដ្ឋមន្ត្រីទាំងពីរបានឯកភាពគ្នា បន្តសម្របសម្រួល និងគាំទ្រគ្នាទៅវិញទៅមកនៅក្នុងអង្គការ និងវេទិកាពហុភាគី ជាពិសេសអង្គការសហប្រជាជាតិ និងសមាគមប្រជាជាតិអាស៊ីអាគ្នេយ៍ (អាស៊ាន)។ ភាគីទាំងពីរបានចែករំលែកគោលជំហរលើការធានាសន្តិភាព ស្ថិរភាព សន្តិសុខ កិច្ចសហប្រតិបត្តិការ និងការអភិវឌ្ឍន៍ក្នុងតំបន់ ដោយឈរលើគោលការណ៍នីតិរដ្ឋ ដោះស្រាយបញ្ហានានាក្នុងនោះមានសមុទ្រខាងកើត ដោយឈរលើមូលដ្ឋានច្បាប់អន្តរជាតិ គោរពអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឆ្នាំ១៩៨២។ លោកស្រី Nanaia Mahuta បានបញ្ជាក់សារជាថ្មីថា នូវែលសេឡង់ យកចិត្តទុកដាក់ចំពោះទំនាក់ទំនងភាពជាដៃគូយុទ្ធសាស្ត្រ ដែលបានបង្កើតឡើងជាមួយអាស៊ាន ហើយនឹងជួយគាំទ្រយន្តការអនុតំបន់ រួមទាំងទន្លេមេគង្គផងដែរ៕