ក្រុមបាល់ទាត់ជម្រើសជាតិនារីវៀតណាមនៅទីស្នាក់ការរដ្ឋាភិបាល (រូបថត៖ Viet Cuong/VOV)

នារសៀលថ្ងៃទី១០ ខែកុម្ភៈ នៅទីស្នាក់ការរដ្ឋាភិបាល លោកនាយករដ្ឋមន្ត្រី Pham Minh Chinh បានអញ្ជើញជាអធិបតីក្នុងពិធីជួបសំណេះសំណាលនិងលើកសរសើរក្រុមកីឡាបាល់ទាត់ជម្រើស ជាតិនារីវៀតណាមនិងគណៈកម្មាការហ្វឹកហាត់  បន្ទាប់ពីក្រុម “នារីមាស” បានមកដល់អាកាសយានដ្ឋាន Noi Bai ជាមួយនឹងស្នាដៃដ៏ល្អប្រសើរ ដែលជាលើកដំបូងក្នុងប្រវត្តិសាស្ត្រ ក្រុមបាល់ទាត់ជម្រើសជាតិនារីវៀតណាមបានចូលរួមក្នុងការប្រកួតវគ្គផ្តាច់ព្រ័ត្របាល់ទាត់ពិភព លោកនារី  ២០២៣ (World Cup)។

នៅទីនេះ លោកនាយករដ្ឋមន្ត្រី Pham Minh Chinh បានកោតសរសើរចំពោះការដែលក្រុមជម្រើសជាតិនារីដណ្តើមបានសំបុត្រចូលរួមក្នុងការប្រកួត World Cup ហើយនេះគឺជាស្នាដៃដ៏ធំបំផុតក្នុងប្រវត្តិសាស្ត្របាល់ទាត់វៀតណាម។ ស្នាដៃនេះជាភាពស្បាយរីករាយបំផុតសម្រាប់ប្រទេសជាតិទាំងមូលក្នុងប៉ុន្មានថ្ងៃដំបូងនៃឆ្នាំថ្មី។

ក្នុងជំនួបនេះ គ្រូបង្វឹកនិងកូនក្រុមគ្រូបង្វឹក Mai Duc Chung បានចែករំលែកអារម្មណ៍និងថ្លែងអំណរគុណចំពោះរដ្ឋាភិបាល លោកនាយករដ្ឋមន្ត្រី សហព័ន្ធកីឡាបាល់ទាត់វៀតណាម (VFF) និងអ្នកគាំទ្រទូទាំងប្រទេស ដែលតែងតែចាប់អារម្មណ៍លើកទឹកចិត្តដល់ក្រុមបាល់ទាត់នារី។ គ្រូបង្វឹក Mai Duc Chung បានចាត់ទុកថា នាពេលខាងមុខ ក្រុមការងារទាំងមូលនឹងបន្តខិតខំសម្រេចបានសមិទ្ធិផលបន្ថែមទៀត ដើម្បីបំពេញតាមការរំពឹងទុករបស់បក្ស រដ្ឋ រដ្ឋាភិបាល និងប្រជាជន៕