អនុប្រធានរដ្ឋវៀតណាម លោកស្រី Vo Thi Anh Xuan បានទទួលជួបលោកស្រី Catherine Mary Russell នាយិកាប្រតិបត្តិនៃមូលនិធិកុមាររបស់អង្គការសហប្រជាជាតិ (UNICEF)។ (រូបថត៖ VOV)

នៅក្នុងជំនួបនេះ លោកស្រីអនុប្រធានរដ្ឋបានស្នើឱ្យ UNICEF បង្កើនការជួយឧបត្ថម្ភផ្នែកបច្ចេកទេស និងកៀរគរធនធានដើម្បីជួយវៀតណាមកែលម្អប្រព័ន្ធច្បាប់ អនុវត្តន៍ប្រកបដោយប្រសិទ្ធភាពនូវកម្មវិធីសកម្មភាពជាតិដើម្បីកុមារ ដំណាក់កាល ២០២១-២០៣០ កម្មវិធីជាតិវៀតណាម - UNICEF ដំណាក់កាល ២០២២ - ២០២៦ គោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ គម្រោងស្តីពីទឹក ស្អាត និងអនាម័យ ការថែទាំសុខភាព ការអប់រំ ជាពិសេសការអប់រំវិទ្យាសាស្ត្រ បច្ចេក វិទ្យា វិស្វកម្ម និងគណិតវិទ្យា (STEM) ការប្រយុទ្ធប្រឆាំងនឹងអំពើហិង្សាលើកុមារ ការ កសាងក្រមសូចនាករដើម្បីវាយតម្លៃការងារគាំពារ និងថែទាំកុមារ ឲ្យជិតនឹងស្តង់ដារ អន្តរជាតិ ហើយការយកចិត្តទុកដាក់ជួយឧបត្ថម្ភកុមារអាយុក្រោម ១៦ ឆ្នាំចំនួន ៦,៧% ដែលកំពុងរស់នៅក្នុងស្ថានភាពលំបាក និងត្រូវការជំនួយឧបត្ថម្ភជាប្រចាំ ជាពិសេស នៅតំបន់ឆ្ងាយដាច់ស្រយាល និងតំបន់ជនជាតិភាគតិច។

លោកស្រីនាយិកាប្រតិបត្តិ UNICEF បានវាយតម្លៃខ្ពស់ចំពោះ វៀតណាម ដែល បានអនុវត្តន៍យ៉ាងសកម្មនូវសកម្មភាពសហប្រតិបត្តិការជាច្រើននាពេលកន្លងមក ដោយទទួលបានលទ្ធផលវិជ្ជមានសម្រាប់កុមារវៀតណាម រួមទាំងកុមារដែលមាន កាលៈទេសៈលំបាកពិសេស ក៏ដូចជាការសន្យាអន្តរជាតិដ៏ខ្លាំងក្លារបស់វៀតណាមអំពី សិទ្ធិកុមារផងដែរ។ លោកស្រី  Russell បានអះអាងថានឹងសហការ និងជួយឧបត្ថម្ភ វៀតណាមបន្តអនុវត្តន៍យ៉ាងសកម្មនូវកម្មវិធីជាតិវៀតណាម - UNICEF ដំណាក់កាល ២០២២-២០២៦ និងធានាសិទ្ធិកុមារឲ្យកាន់តែប្រសើរឡើង ជាពិសេសលើវិស័យអប់រំ សុខាភិបាល អាហារូបត្ថម្ភ ការទទួលបានទឹកស្អាត និងអនាម័យ។ លោកស្រី Russell បានវាយតម្លៃខ្ពស់ចំពោះគំនិតផ្តួចផ្តើមរបស់វៀតណាមដែលស្នើឲ្យអង្គការសហប្រជាជាតិយកថ្ងៃទី ១១ ខែមិថុនាជារៀងរាល់ឆ្នាំជា "ថ្ងៃលេងកំសាន្ត" ដោយចាត់ទុកថា ប្រការនេះ នឹងរួមចំណែកជំរុញការអភិវឌ្ឍគ្រប់ជ្រុងជ្រោយរបស់កុមារនៅជុំវិញពិភពលោកសូម្បីតែនៅក្នុងតំបន់ជម្លោះក៏ដោយ៕