រដ្ឋមន្ត្រីការបរទេសអាមេរិក លោក Antony Blinken ជួបជាមួយអគ្គលេខាធិការអង្គការណាតូ លោក Jens Stoltenberg មុនពេលសន្និសីទរដ្ឋមន្ត្រីការបរទេស NATO នៅប្រទេសបែលហ្សិក ថ្ងៃទី ៣ ខែមេសា (រូបថត៖ ណាតូ)

ភាគីទាំងពីរបានពិភាក្សាអំពីអាទិភាពសំខាន់ៗសម្រាប់កិច្ចប្រជុំកំពូលរបស់អង្គការណាតូនៅទីក្រុងវ៉ាស៊ីនតោន សហរដ្ឋអាមេរិក នាខែកក្កដាខាងមុខ រួមទាំងការពង្រឹងការប្តេជ្ញាចិត្តរួមចំពោះអ៊ុយក្រែន និងការពង្រឹងភាពជាដៃគូឥណ្ឌូប៉ាស៊ីហ្វិករបស់អង្គការណាតូ និងសហភាពអឺរ៉ុប (EU) ក៏ដូចជាការពង្រឹងការប្តេជ្ញាចិត្តរបស់ខ្លួនចំពោះការការពារសមូហភាព។ ភាគីទាំងពីរក៏បានសង្កត់ធ្ងន់លើភាពរឹងមាំនៃសម្ព័ន្ធភាពណាតូដោយមានការចូលរួមពីហ្វាំងឡង់ និងស៊ុយអែត ក៏ដូចជាការបង្កើនការវិនិយោគពីប្រទេសសម្ព័ន្ធមិត្តផងដែរ។

មុននេះ នាថ្ងៃទី ២ មេសា រដ្ឋមន្ត្រីការបរទេសអាមេរិក លោក Antony Blinken បានជួបជាមួយប្រធានាធិបតីបារាំង Emmanuel Macron ដើម្បីពិភាក្សាអំពីបញ្ហាអន្តរជាតិក្តៅគគុក។ រដ្ឋមន្ត្រីការបរទេសអាមេរិក និងប្រធានាធិបតីបារាំងក៏បានពិភាក្សាអំពីបញ្ហាប្រឈមនានាពីប្រទេសចិន និងការខិតខំប្រឹងប្រែងដើម្បីពង្រឹងសន្តិសុខស្បៀងពិភពលោក។

សូមគូសបញ្ជាក់ថា រដ្ឋមន្ត្រីការបរទេសអាមេរិក លោក Antony Blinken កំពុងធ្វើដំណើររយៈពេល ៥ ថ្ងៃ ចាប់ពីថ្ងៃទី ១ ដល់ថ្ងៃទី ៥ ខែមេសា ទៅកាន់ប្រទេសបារាំង និងបែលហ្ស៊ិក ដោយរបៀបវារៈផ្តោតសំខាន់លើបញ្ហាក្តៅគគុក ដូចជាជំនួយដល់អ៊ុយក្រែន និងជម្លោះនៅហ្គាហ្សា និងចូលរួមខួបលើកទី ៧៥ នៃការបង្កើតអង្គការសន្ធិសញ្ញាអាត្លង់ទិកខាងជើង (ណាតូ) (១៩៤៩-២០២៤)៕