អធិការបតីអាល្លឺម៉ង់លោក Olaf Scholz។ (រូបថត៖ TTXVN)

ទាក់ទងនឹងកិច្ចប្រជុំកំពូលរបស់អង្គការណាតូ លោកអធិការបតី Olaf Scholz ទន្ទឹងរង់ចាំការផ្សាភ្ជាប់ និងការប្តេជ្ញាចិត្តមួយពីមេដឹកនាំណាតូ ក្នុងបរិបទដែលជម្លោះ នៅអ៊ុយក្រែនកំពុងបន្តអូសបន្លាយ។ លោកក៏បានសន្យាថា អាល្លឺម៉ង់ និងអឺរ៉ុបនឹងបន្ត ជួយឧបត្ថម្ភអ៊ុយក្រែនដោយ “អស់ពីសមត្ថភាពតាមដែលអាចធ្វើទៅបាន” ទាំងផ្នែក ហិរញ្ញវត្ថុ សេដ្ឋកិច្ច មនុស្សធម៌ នយោបាយ និងការផ្គត់ផ្គង់អាវុធដល់ក្រុងគៀវនៅទាំង “ថ្ងៃនេះនិងអនាគត”។ ទោះជាយ៉ាងណាក៏ដោយ លោកបានសង្កត់ធ្ងន់ថា ណាតូនឹងមិនចូលរួមការប្រយុទ្ធនោះទេ។ លោកបានអំពាវនាវឲ្យមានការអនុវត្តផែនការ Marshall មួយ ដើម្បីកសាងអ៊ុយក្រែនឡើងវិញក្រោយសង្គ្រាម។ ក្នុងនាមជាប្រធាន G7 អធិការបតីអាល្លឺម៉ង់មានបំណងចង់រៀបចំកិច្ចប្រជុំអន្តរជាតិមួយសំដៅឆ្ពោះទៅរក កិច្ចព្រមព្រៀងស្តីពីការវិនិយោគនៅអ៊ុយក្រែន។

នៅឯកិច្ចប្រជុំកំពូល EU នាពេលខាងមុខ លោកអធិការបតី Scholz បានឲ្យដឹង ថា គោលដៅរបស់លោកគឺចលនាសមាជិក EU ឲ្យផ្តល់បេក្ខភាពចូលរួម EU ដល់ អ៊ុយក្រែននិងម៉ុលដាវ៉ា។ ក្រៅពីនោះ លោកអធិការបតី Scholz បានចាត់ទុកថា EU ក៏ត្រូវបង្កលក្ខណៈសម្រាប់ការចរចាចូលជាសមាជិករបស់អាល់បានី និងម៉ាសេដូន ខាងជើងផងដែរ។ នៅក្នុងសុន្ទរកថារបស់ខ្លួន អធិការ បតីអាល្លឺម៉ង់ក៏បានជំរុញដំណោះស្រាយ ចំពោះបញ្ហានាំចេញគ្រាប់ធញ្ញជាតិពីអ៊ុយក្រែនផងដែរ។

ស្តីពីបញ្ហាថាមពល អធិការបតីអាល្លឺម៉ង់បានបញ្ជាក់ថា រដ្ឋាភិបាលអាល្លឺម៉ង់កំពុងសម្របសម្រួលជាមួយ ដៃគូអន្តរជាតិ ដើម្បីចាត់វិធានការគ្រប់បែបយ៉ាង សំដៅទប់ស្កាត់ការខ្វះខាតថាមពល ក្នុងរដូវរងាខាងមុខនេះ៕