អ៊ីស្រាអែលបានចាប់ខ្លួនអភិបាលក្រុងយេរូសាឡិមចំណុះរដ្ឋអំណាចប៉ាឡេស្ទីន

ក្នុងការវាយប្រហារនាថ្ងៃទី១៤ខែតុលាកងកម្លាំងអ៊ីស្រាអែលបានចាប់ខ្លួនអភិបាលក្រុងយេរូសាឡិមលោក Adnan Ghaith ជាមន្ត្រីជាន់ខ្ពស់របស់ប៉ាឡេស្ទីន។ក្រៅពីនោះ កងកម្លាំងសន្តិសុខអ៊ីស្រាអែលបានចាប់ខ្លួនអគ្គលេខាធិការចលនា Fatah ចំនួន ២ រូបនៅយេរូសាឡិមនិងនៅអ៊ីសាវីយ៉ាដែលជាតំបន់ជិតខាងរបស់ប្រជាជនប៉ាឡេស្ទីននៅយេរូសាឡិមខាងកើត។ភាគីអ៊ីស្រាអែលបានឲ្យដឹងថាជនទាំង៣នាក់នេះត្រូវបានចាប់ខ្លួនជាច្រើនដងរូបមកហើយដោយសារពួកគេបានសហការជាមួយស្ថាប័នសន្តិសុខប៉ាឡេស្ទីននិងបង្កឧបសគ្គដល់ការលក់ផ្ទះនិងការលក់អចលនទ្រព្យរបស់ប្រជាជនប៉ាឡេស្ទីននៅយេរូសាឡិម។

មុននេះនាថ្ងៃទី២៥ខែកញ្ញាលោក Ghaith ត្រូវបានកោះហៅសាកសួរដោយសារមានការសង្ស័យពីការរំលោភច្បាប់អ៊ីស្រាអែលដែលហាមឃាត់រដ្ឋអំណាចប៉ាឡេស្ទីនមិនឱ្យធ្វើសកម្មភាពនៅយេរូសាឡិម។