(vovworld) - ຕອນຄໍ່າວັນທີ 12/10, ສະຖານທູດຫວຽດນາມ ປະຈຳລາວ ໄດ້ຈັດການພົບປະແລກປ່ຽນກັບບັນດາພະນັກງານລາວ ທີ່ເຄີຍຮໍ່າຮຽນຢູ່ຫວຽດນາມ. ກ່າວຄຳເຫັນທີ່ການພົບປະ, ທ່ານເອກອັກຄະລັດຖະທູດຫວຽດນາມ ປະຈຳລາວ Ta Minh Chau ໄດ້ຢືນຢັນວ່າ ຍາມໃດຫວຽດນາມ ກໍຮັກສາ, ເພີ່ມພູນຄຸນສ້າງ ແລະ ນຳສາຍພົວພັນລະຫວ່າງຫວຽດນາມ - ລາວ ໃຫ້ນັບມື້ນັບພັດທະນາ ແລະ ເຂົ້າສູ່ລວງເລິກ. ຫວຽດນາມ ເຄົາລົບ ແລະ ຕີລາຄາສູງການປະກອບສ່ວນອັນແທດຈິງ, ສຳຄັນ, ມີຄຸນຄ່າຂອງບັນດາເພື່ອນລາວ ທີ່ເຄີຍຮໍ່າຮຽນຢູ່ຫວຽດນາມ ໃນຊຸມເດືອນປີທີ່ຫຍຸ້ງຍາກລຳບາກ. ທ່ານເອກອັກຄະລັດຖະທູດໄດ້ສະແດງຄວາມເຊື້ອໝັ້ນວ່າ ບັນດານ້ຳໃຈອັນເລິກເຊິ່ງ, ຖືກັນເປັນອ້າຍນ້ອງໃນຄອບຄົວດຽວເຊິ່ງປະຊາຊົນ ແລະ ບັນດາຄູອາຈານຫວຽດນາມ ສະຫງວນໃຫ້ນັກຮຽນລາວ ແມ່ນບັນດາອານຸສອນທີ່ບໍ່ຈືດຈາງໃນຄວາມຊົງຈຳຂອງເຂົາເຈົ້າ.
ຕາງໜ້າໃຫ້ພະນັກງານລາວ ທີ່ເຄີຍຮໍ່າຮຽນ ຢູ່ຫວຽດນາມ, ທ່ານລັດຖະມົນຕີກະຊວງຍຸດຕິທຳລາວ ຈະເລີນ ເຢຍປາວເຮີ, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າລາວ ນາມວິຍາເກດ, ຫົວໜ້າສະຖາບັນການເມືອງ ການປົກຄອງລາວ… ໄດ້ພັດປ່ຽນກັນຂຶ້ນກ່າວຄຳຄິດເຫັນຂອງຕົນ, ຫວນຄືນຊຸມເດືອນປີທີ່ດຳລົງຊີວິດ ແລະ ຮໍ່າຮຽນຢູ່ຫວຽດນາມ. ເຖິງວ່າໃນເງື່ອນໄຂທີ່ທຸກຍາກຂາດເຂີນ, ລຳບາກເພາະສົງຄາມກໍຕາມ, ແຕ່ປະຊາຊົນຫວຽດນາມ ໄດ້ສະຫງວນທຸກເງື່ອນໄຂສະດວກໃຫ້ບັນດານັກຮຽນລາວ. ນ້ຳໃຈນັ້ນຍັງເລິກໃນດວງໃຈຂອງນັກຮຽນລາວ ແຕ່ລະຄົນ, ແມ່ນກຳລັງແຮງເພື່ອໃຫ້ເຂົາເຈົ້າຕັດສິນໃຈ ແລະ ມານະພະຍາຍາມຈົນສຸດຄວາມສາມາດຂອງຕົນເພີ່ມພູນຄຸນສ້າງໃຫ້ສາຍພົວພັນມິດຕະພາບແບບພິເສດລາວ - ຫວຽດນາມ ໃຫ້ນັບມື້ນັບພັດທະນາຢ່າງໝັ້ນຄົງ.