(vovworld) - ດັ່ງທີ່ພວກເຮົາໃຫ້ຂ່າວໄປແລ້ວ, ໂດຍຮັບຄຳເຊີນຂອງທ່ານປະທານປະເທດຫວຽດນາມ Truong Tan Sang ແລະ ພັນລະຍາ, ວັນທີ 31/10 ທ່ານປະທານສະພາເອີລົບ Herman Van Rompuy ແລະ ພັນລະຍາເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການ. ຕອນບ່າຍວັນທີ 31/10, ພາຍຫຼັງພິທີຕ້ອນຮັບຢ່າງເປັນທາງການຢູ່ສຳນັກງານປະທານປະເທດ, ທ່ານປະທານປະເທດ Truong Tan Sang ໄດ້ມີການເຈລະຈາກັບທ່ານປະທານສະພາເອີລົບ Herman Van Rompuy.
ທີ່ການເຈລະຈາ, ສອງຝ່າຍໄດ້ສະແດງຄວາມເພິ່ງພໍໃຈຕໍ່ການພັດທະນາຢ່າງວ່ອງໄວ ແລະ ຕັ້ງໜ້າຂອງການພົວພັນສອງຝ່າຍນັບທັງ 3 ຂົງເຂດເສົາຄ້ຳເສດຖະກິດ - ການຄ້າ, ການເມືອງ ແລະ ການຮ່ວມມືພັດທະນາໃນໄລຍະຜ່ານມາ. ທ່ານປະທານປະເທດ Truong Tan Sang ແລະ ທ່ານປະທານສະພາເອີລົບ Herman Van Rompuy ໄດ້ເຫັນດີສືບຕໍ່ເພີ່ມທະວີການແລກປ່ຽນຄະນະຜູ້ແທນ, ໂດຍສະເພາະແມ່ນຄະນະຜູ້ແທນຂັ້ນສູງ, ສືບຕໍ່ສົ່ງເສີມ ແລະ ສ້າງເງື່ອນໄຂສະດວກໃຫ້ແກ່ວິສາຫະກິດຫວຽດນາມ ແລະ EU ທຳການລົງທຶນ, ດຳເນີນທຸລະກິດຍາວນານຢູ່ຕະຫຼາດຂອງກັນຫຼາຍກວ່າອີກ, ພິເສດແມ່ນໃນບັນດາຂົງເຂດອຸດສາຫະກຳ, ພື້ນຖານໂຄງລ່າງ, ຄົມມະນາຄົມຂົງສົ່ງ, ພະລັງງານ, ການເງິນ, ສາທາລະນະສຸກ, ທ່ອງທ່ຽວ ແລະ ການບໍລິການ. EU ໃຫ້ຄຳໝັ້ນສັນຍາຈະໜູນຊ່ວຍດ້ານເຕັກນິກ, ຊຸກຍູ້ການເຈລະຈາເພື່ອໃຫ້ 2 ຝ່າຍສາມາດສຳເລັດໂດຍໄວ ແລະ ລົງນາມໃນສັນຍາ FTA ຫວຽດນາມ - EU; ຊຸກຍູ້ເລື່ອງຮັບຮູ້ກົນໄກເສດຖະກິດການຕະຫຼາດຂອງຫວຽດນາມ ໂດຍໄວ. 2 ຝ່າຍໄດ້ເຫັນດີເປັນເອກະພາບນຳກັນ ສົມທົບກັນຢ່າງແໜ້ນແຟ້ນເພື່ອແນໃສ່ຜັນຂະຫຍາຍບັນດາໂຄງການ ODA ໄລຍະ 2011 – 2013 ຢ່າງມີປະສິດທິພົນ ແລະ ກຳນົດບຸລິມະສິດຮ່ວມມືໃນໄລຍະ 2014 – 2020 ບົນພື້ນຖານຍຸດທະສາດພັດທະນາເສດຖະກິດສັງຄົມຂອງຫວຽດນາມ ໄລຍະ 2011 – 2020.
ສອງຝ່າຍໄດ້ເຫັນດີເພີ່ມທະວີການເຈລະຈາ ແລະ ຮ່ວມມືຢູ່ບັນດາເວທີປາໄສພາກພື້ນ ແລະ ສາກົນ, ໂດຍສະເພາະແມ່ນຢູ່ສະຫະປະຊາຊາດ, ກອງປະຊຸມສຸດຍອດອາຊີ - ເອີລົບ (ASEM). ສອງຝ່າຍສະໜັບສະໜູນຄວາມມານະພະຍາຍາມສ້າງພາກພື້ນອາຊີຕາເວັນອອກສຽງໃຕ້ ສັນຕິພາບ, ສະຖຽນລະພາບ, ຮ່ວມມື ແລະ ມິດຕະພາບ; ເນັ້ນໜັກຄວາມຈຳເປັນຕ້ອງຮັບປະກັນຄວາມສະຫງົບປອດໄພ ແລະ ຄວາມເສລີໃນການເດີນທະເລຢູ່ເຂດທະເລຕາເວັນອອກ; ສະໜັບສະໜູນເລື່ອງແກ້ໄຂການພິພາດໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ແລະ ບັນລຸປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC).
ເນື່ອງໃນໂອກາດນີ້, ສອງຝ່າຍໄດ້ລົງນາມສັນຍາອຸປະຖຳການປ່ຽນແປງຂອງດິນຟ້າອາກາດປີ 2012 ທີ່ມີມູນຄ່າ150 ລ້ານເອໂລ ໂດຍທະນາຄານລົງທຶນເອີລົບອຸປະຖຳ ແລະ ຖະແຫຼງການກ່ຽວກັບການເຊັນສັນຍາການເງິນຂອງ “ໂຄງການໜູນຊ່ວຍນະໂຍບາຍການຄ້າ ແລະ ການລົງທຶນຂອງເອີລົບ (EUMUTRAP)”.
ພາຍຫຼັງການເຈລະຈາ, ທ່ານປະທານປະເທດຫວຽດນາມ Truong Tan Sang ແລະ ທ່ານປະທານສະພາເອີລົບ Herman Van Rompuy ໄດ້ມີການພົບປະກັບວົງການນັກຂ່າວ. ທ່ານປະທານປະເທດ Truong Tan Sang ກ່າວວ່າ : ເທບ
“ EU ແມ່ນໜຶ່ງໃນບັນດາຄູ່ຄ້າ, ນັກລົງທຶນ ແລະ ນັກອຸປະຖຳອັນດັບໜຶ່ງຂອງຫວຽດນາມ ແລະ ຫວຽດນາມແມ່ນຄູ່ຄ້າໃຫຍ່ອັນດັບ 5 ຂອງ EU ໃນກຸ່ມອາຊຽນ. ເລື່ອງ 2 ຝ່າຍລົງນາມໃນສັນຍາຄູ່ຮ່ວມມື ແລະ ການຮ່ວມມືຮອບດ້ານ PCA ໃນເດືອນ 6/2012 ແລະ ດຳເນີນການເຈລະຈາຄັ້ງທີ່ 1 ສັນຍາການຄ້າເສລີ FTA ຫວຽດນາມ- EU ໃນເ້ດືອນ 10/2012 ນັ້ນ , ແມ່ນບາດກ້າວເດີນລະອຽດທີ່ສຳຄັນແນໃສ່ສ້າງການພົວພັນຄູ່ຮ່ວມມືຢ່າງສະເໝີພາບ ແລະ ການຮ່ວມມືຮອບດ້ານລະຫວ່າງ ຫວຽດນາມ- EU ແລະ ບັນດາປະເທດພາຄີ ”
ສ່ວນ ທ່ານປະທານສະພາເອີລົບ Herman Van Rompuy ໃຫ້ຮູ້ວ່າ : (ເທບ)
“ ຫວຽດນາມແມ່ນຄູ່ຮ່ວມມືສຳຄັນພິເສດຂອງ EU ໃນພາກພື້ນອາຊີ. ຂ້າພະເຈົ້າປາດຖະໜາຢາກເປີດກ້ວາງການພົວພັນລະຫວ່າງ 2 ຝ່າຍ ບົນພື້ນຖານ ສັນຍາ PCA ທີ່ໄດ້ລົງນາມໃນຕົ້ນປີ. ຂ້າພະເຈົ້າຍັງຕີລາຄາສູງການດຳເນີນການເຈລະຈາ ສັນຍາການຄ້າເສລີ FTAລະຫວ່າງ ຫວຽດນາມ- EU, ສິ່ງນີ້ຈະເປັນການຊຸກຍູ້ການເຕີບໂຕ ແລະ ສ້າງວຽກເຮັດງານທຳຢູ່ຫວຽດນາມ ແລະ EU ” .
ໃນຕອນບ່າຍຂອງວັນດຽວກັນ. ທ່ານເລຂາທິການໃຫຍ່ພັກກອມມູນິດຫວຽດນາມ Nguyen Phu Trong, ທ່ານນາຍົກລັດຖະມົນຕີ Nguyen Tan Dung ໄດ້ໃຫ້ການຕ້ອນຮັບ ທ່ານປະທານສະພາເອີລົບ Herman Van Rompuy ຢ່າງສະໜິດສະໜົມ .