ການວາງສະແດງຮູບພາບການພົວພັນຮ່ວມມື ຫວຽດນາມ - ກຳປູເຈຍ
ພາບ:vietnamnet.vn |
(vovworld) - ເພື່ອຂຳ່ນັບຮັບຕ້ອນການສະເຫລີມສະຫລອງ 45 ປີ ແຫ່ງວັນສ້າງສາຍພົວພັນທາງການທູດ ຫວຽດນາມ - ກຳປູເຈຍ (24/6/1967- 24/6/2012) ແລະ ປີມິດຕະພາບ ຫວຽດນາມ - ກຳປູເຈຍ”, ວັນທີ 15/6 ຢູ່ ຮ່າໂນ້ຍ, ກົມໃຫຍ່ການເມືອງ, ຫໍພິພິດທະພັນປະຫວັດສາດການທະຫານ ຫວຽດນາມ ໄດ້ຈັດຕັ້ງງານວາງສະແດງຫົວເລື່ອງສະເພາະ: ຫວຽດນາມ -ກຳປູເຈຍ ຮ່ວມສຳພັນສູ້ຮົບ, ການຮ່ວມມືຮອບດ້ານ. ໃນງານວາງສະແດງຄັ້ງນີ້ ໄດ້ວາງສະແດງຮູບພາບ, ເອກະສານ, ວັດຖຸພັນທີ່ພົ້ນເດັ່ນ ກວ່າ 300 ຢ່າງ ເຊິ່ງສະແດງໃຫ້ເຫັນໄລຍະແຫ່ງການພັດທະນາ, ສາຍພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດ ໃນ 45 ປີຜ່ານມາ, ສ່ອງແສງຄວາມສາມັກຄີສູ້ຮົບ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ, ກອງທັບ ແລະ ປະຊາຊົນສອງປະເທດ ຫວຽດນາມ ແລະ ກຳປູເຈຍ. ທ່ານ ຫວູໝາວ ອະດີດຫົວຫນ້າຄະນະກຳມະການຫ້ອງວ່າການສະພາແຫ່ງຊາດ, ປະທານສະມາຄົມມິດຕະພາບ ຫວຽດນາມ ກຳປູເຈຍ ເວົ້າວ່າ:
“ການວາງສະແດງຮູບພາບຮ່ວມສຳພັນສູ້ຮົບ ຫວຽດນາມ ກຳປູເຈຍ ແມ່ນມີຄວາມຈຳເປັນທີ່ສຸດ ແລະ ມີຄວາມໝາຍອັນໃຫຍ່ຫລວງ. ຫໍພິພິດທະພັນການທະຫານໄດ້ຈັດຕັ້ງງານວາງສະແດງເປັນລະບົບ, ມີຄວາມໝາຍ ຊ່ວຍໃຫ້ຜູ້ຊົມສາມາດວາບພາບໄດ້ວິວັດທະນາການປະຕິວັດຊຶ່ງສອງປະເທດໄດ້ຮຽງບ່າຮຽງໄຫລ່, ປະຊາຊົນ ແລະ ກອງທັບສອງປະເທດໄດ້ຮ່ວມຂຸມຄອງສູ້ຮົບ ເພື່ອປົກປັກຮັກສາພາລະກິດປະຕິວັດຂອງຕົນ.