ທ່ານກໍ່ໄດ້ເນັ້ນຫນັກຢ່າງແຮງວ່າ ສິ່ງທີ່ຄວນເຮັດໃນຈຸດເວລານີ້ ບໍ່ພຽງແຕ່ຫລຸດຜ່ອນການປ່ອຍອາຍ carbon ເທົ່ານັ້ນ ຫາກຕ້ອງຊອກຫາວິທີການຫັນປ່ຽນທັງໝົດພື້ນຖານເສດຖະກິດໃຫ້ສອດຄ່ອງກັບບັນດາເປົ້າໝາຍພັດທະນາແບບຍືນຍົງ. ພ້ອມກັບຄຳຮຽກຮ້ອງຂອງທ່ານເລຂາທິການໃຫຍ່ ສປຊ, ມີບົດກ່າວປາໄສ, ຄຳໝັ້ນສັນຍາຫລາຍບົດ ກໍ່ຄືຂໍ້ລິເລີ່ມ ໂດຍບັນດາຜູ້ຕາງຫນ້າບັນດາປະເທດກໍ່ໄດ້ຍົກອອກມາ.

ທ່ານເລຂາທິການໃຫຍ່ ສປຊ ເຄີຍຍອມຮັບວ່າ ໂລກ ພວມປະລາໄຊ ໃນການຕໍ່ສູ້ຕ້ານການປ່ຽນແປງຂອງດິນຟ້າອາກາດ. ແລະ ຖ້າຫາກບັນດາປະເທດບໍ່ຕັດສິນໃຈ ແລະ ບໍ່ຮີບເຮັ່ງເຂົ້າຮ່ວມການຕໍ່ສູ້ນັບແຕ່ບັດນີ້ ການປ່ຽນແປງຂອງດິນຟ້າອາກາດຈະກາຍເປັນ “ໄພອັນຕະລາຍ” ສຳລັບການດຳລົງຊີວິດຂອງມວນມະນຸດ.