(vovworld) - ຕອນບ່າຍວັນທີ 20/03, ຢູ່ຮ່າໂນ້ຍ, ທ່ານປະທານປະເທດ ເຈືອງເຕີນຊາງ ໄດ້ໃຫ້ການຕ້ອນຮັບທ່ານຮອງປະທານາທິບໍດີ ສ.ສະຫະພັນມຽນມາ Nyan Tun ເຂົ້າຢ້ຽມຢາຂໍ່ານັບ ໃນຂອບເຂດການຢ້ຽມຢາມຫວຽດນາມ ເປັນຄັ້ງທຳອິດໃນຖານະເປັນຮອງປະທານາທິບໍດີ. ທ່ານປະທານປະເທດ ເຈືອງເຕີນຊາງ ໄດ້ຕີລາຄາສູງການຢ້ຽມຢາມຫວຽດນາມ ຄັ້ງນີ້ຂອງທ່ານຮອງປະທານາທິບໍດີ Nyan Tun ແລະ ຖືວ່າການຢ້ຽມຢາມຈະປະກອບສ່ວນຢ່າງຕັ້ງໜ້າເຂົ້າໃນການເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ຮ່ວມມືອັນດີງາມທີ່ມີຢູ່ແລ້ວລະຫວ່າງ 2 ປະເທດ. ການນຳທັງ 2 ທ່ານ ກໍຢືນຢັນວ່າ, ຈະສືບຕໍ່ຊຸກຍູ້ການຮ່ວມມືໃນບັນດາຂົງເຂດທີ່ມີຄວາມສາມາດບົມຊ້ອນຄື; ນ້ຳມັນອາຍແກັດ, ຂຸດຄົ້ນແຮ່ທາດ... ພ້ອມທັງເພີ່ມທະວີການຮ່ວມມືລະຫວ່າງບັນດາທ້ອງຖິ່ນຂອງ 2 ປະເທດ. ທ່ານປະທານປະເທດໄດ້ສະເໜີວ່າ 2 ຝ່າຍຮັກສາບັນດາກົນໄກຮ່ວມມື 2 ຝ່າຍທີ່ມີຢູ່ແລ້ວໃຫ້ມີປະສິດທິຜົນ, ໃນນັ້ນມີຄະນະກຳມະການປະສົມ, ເພື່ອແນໃສ່ແກ້ໄຂບັນດາຂໍ້ຕິດຂັດ ແລະ ຊຸກຍູ້ການຮ່ວມມືໃນທຸກຂົງເຂດ. ທ່ານຮອງປະທານາທິບໍດີ ມຽນມາ Nyan Tun ໃຫ້ຄຳໝັ້ນສັນຍາວ່າ ຈະມານະພະຍາຍາມຍູ້ແຮງບັນດາຂໍ້ຕົກລົງຂັ້ນສູງທີ່ບັນລຸໄດ້ລະຫວ່າງ 2 ປະເທດ, ພິເສດແມ່ນຖະແຫຼງການຮ່ວມກ່ຽວກັບການຮ່ວມມືໃນ 12 ຂົງເຂດໃຫ້ບຸລິມະສິດ. ການນຳ 2 ທ່ານ ກໍເຫັນດີສືບຕໍ່ສົມທົບກັນ ແລະ ຮ່ວມມືກັນຢ່າງແໜ້ນແຟ້ນໃນບັນດາເວທີປາໄສພາກພື້ນ ແລະ ສາກົນ.