ທ່ານເລຂາທິການໃຫຍ່ ໂຕເລີມ  ແລະ ທ່ານນາຍົກລັດຖະມົນຕີສະຫະພັນລັດເຊຍ Mikhail Vladimirovich Mishustin

    ໃນການຕ້ອນຮັບທ່ານນາຍົກລັດຖະມົນຕີ ສະຫະພັນລັດເຊຍ Mikhail Vladimirovich Mishustin ທີ່ພວມຢ້ຽມຢາມ ຫວຽດນາມ ຢ່າງເປັນທາງການ, ທ່ານເລຂາທິການໃຫຍ່ພັກກອມມູນິດຫວຽດນາມ ໂຕເລີມ ໄດ້ຊົມເຊີຍໝາກຜົນການເຈລະຈາ ແລະ ການພົບປະກັບບັນດາການນຳຂັ້ນສູງ ຫວຽດນາມ ທ່ານເລຂາທິການໃຫຍ່ ໂຕເລີມ ຢືນຢັນວ່າ: ຫວຽດນາມ ຍາມໃດກໍ່ຈົດຈຳການຊ່ວຍເຫຼືອອັນລ້ຳຄ່າ ແລະ ຄວາມສຸດຈິດສຸດໃຈທີ່ຊາວ ໂຊວຽດ ແລະ ລັດເຊຍ ສະຫງວນໃຫ້ຫວຽດນາມ ໃນຊຸມປີທຳການຕໍ່ຕ້ານທີ່ຫຍຸ້ງຍາກ ກໍຄືໃນພາລະກິດສ້າງສາ ແລະ ປ້ອງກັນປະເທດ; ຢືນຢັນວ່າ ຫວຽດນາມ ຖືເປັນສຳຄັນການພົວພັນທີ່ມີມາແຕ່ດົນນານ ແລະ ການພົວພັນຄູ່ຮ່ວມມືຍຸດທະສາດຮອບດ້ານກັບ ລັດເຊຍ, ຍາມໃດກໍ່ຖືລັດເຊຍ ແມ່ນຄູ່ຮ່ວມມືສຳຄັນແຖວໜ້າໃນນະໂຍບາຍການຕ່າງປະເທດຂອງຫວຽດນາມ. ທ່ານເລຂາທິການໃຫຍ່ໂຕເລີມ ກໍ່ໄດ້ຍົກອອກບັນດາທິດທາງສຳຄັນເພື່ອແນໃສ່ເພີ່ມທະວີການພົວພັນລະຫວ່າງ ຫວຽດນາມ - ລັດເຊຍ ໃຫ້ເລິກເຊິ່ງກວ່າອີກໃນໄລຍະຈະມາເຖິງ.

   ເມື່ອແຈ້ງໃຫ້ທ່ານເລຂາທິການໃຫຍ່ຮັບຊາບ ໝາກຜົນການພົບປະເຈລະຈາກັບທ່ານນາຍົກລັດຖະມົນຕີ ຟ້າມມິງຈີງ, ທ່ານນາຍົກລັດຖະມົນຕີ Mikhail Vladimirovich Mishustin ຢືນຢັນວ່າ, ຝ່າຍ ລັດເຊຍ ຕີລາຄາສູງບັນດາຄວາມມານະພະຍາຍາມ ຂອງຝ່າຍຫວຽດນາມໃນການແກ້ໄຂຄວາມຫຍຸ້ງຍາກ, ຊຸກຍູ້ການຮ່ວມມືສອງຝ່າຍໃນໄລຍະມໍ່ໆມານີ້. ທ່ານນາຍົກລັດຖະມົນຕີ Mikhail Vladimirovich Mishustin ຢືນຢັນວ່າ ລັດເຊຍ ຍາມໃດກໍ່ຖືວ່າ ຫວຽດນາມ ແມ່ນໜຶ່ງໃນບັນດາຄູ່ຮ່ວມມື ບຸລິມະສິດສຳຄັນທີ່ສຸດຢູ່ພາກພື້ນ ອາຊີ - ປາຊີຟິກ, ພິເສດແມ່ນຢູ່ອາຊີຕາເວັນອອກສ່ຽງໃຕ້, ພ້ອມແລ້ວທີ່ຈະເປີດກວ້າງການພົວພັນຄູ່ຮ່ວມມືຍຸດທະສາດຮອບດ້ານກັບ ຫວຽດນາມ ໃຫ້ເລິກເຊິ່ງກວ່າອີກໃນ ບັນດາຂົງເຂດເສດຖະກິດ-ການຄ້າ, ພະລັງງານ, ປ້ອງກັນປະເທດ, ຄວາມໝັ້ນຄົງ, ວິທະຍາສາດ-ເຕັກໂນໂລຊີ, ວັດທະນະທຳ, ການສຶກສາ ແລະ ການພົວພັນແລກປ່ຽນປະຊາຊົນ.