(VOVWORLD) - ຮອດຕອນຄ່ຳວັນທີ 10 ມັງກອນ, ທ່ານນາຍົກລັດຖະມົນຕີ ຟ້າມມິງຈິງ ແລະ ຄະນະຜູ້ແທນຂັ້ນສູງ ຫວຽດນາມ ໄດ້ໄປຮອດ ຮ່າໂນ້ຍ, ສິ້ນສຸດການຢ້ຽມຢາມ ສປປ. ລາວ ແລະ ເປັນປະທານຮ່ວມກອງປະຊຸມຄັ້ງທີ 47 ຂອງຄະນະກຳມະການຮ່ວມມືທະວີພາຄີລະຫວ່າງລັດຖະບານ ຫວຽດນາມ - ລາວ ແຕ່ວັນທີ 9 – 10 ມັງກອນ ຕາມຄຳເຊີນຂອງທ່ານນາຍົກລັດຖະມົນຕີ ລາວ ສອນໄຊ ສີພັນດອນ ຢ່າງເປັນທາງການ.
ໃນຂອບເຂດການຢ້ຽມຢາມ ລາວ ແລະ ເປັນປະທານຮ່ວມກອງປະຊຸມຄັ້ງທີ 47 ຄະນະກຳມະການຮ່ວມມືທະວີພາຄີລະຫວ່າງລັດຖະບານ ຫວຽດນາມ - ລາວ, ຕອນບ່າຍວັນທີ 10 ມັງກອນ, ຢູ່ນະຄອນຫຼວງ ວຽງຈັນ, ທ່ານນາຍົກລັດຖະມົນຕີ ຟ້າມມິງຈິງ ໄດ້ພົບປະກັບທ່ານ ບຸນຍັງ ວໍລະຈິດ, ອະດີດເລຂາທິການໃຫຍ່, ອະດີດປະທານປະເທດລາວ ແລະ ທ່ານ ທອງສິງ ທຳມະວົງ, ອະດີດນາຍົກລັດຖະມົນຕີ ລາວ.
 ທ່ານນາຍົກລັດຖະມົນຕີ ຟ້າມມິງຈິງ ໄດ້ພົບປະກັບທ່ານ ບຸນຍັງ ວໍລະຈິດ, ອະດີດເລຂາທິການໃຫຍ່, ອະດີດປະທານປະເທດລາວ (ພາບ: VOV) |
ຮອດຕອນຄ່ຳວັນທີ 10 ມັງກອນ, ທ່ານນາຍົກລັດຖະມົນຕີ ຟ້າມມິງຈິງ ແລະ ຄະນະຜູ້ແທນຂັ້ນສູງ ຫວຽດນາມ ໄດ້ໄປຮອດ ຮ່າໂນ້ຍ, ສິ້ນສຸດການຢ້ຽມຢາມ ສປປ. ລາວ ແລະ ເປັນປະທານຮ່ວມກອງປະຊຸມຄັ້ງທີ 47 ຂອງຄະນະກຳມະການຮ່ວມມືທະວີພາຄີລະຫວ່າງລັດຖະບານ ຫວຽດນາມ - ລາວ ແຕ່ວັນທີ 9 – 10 ມັງກອນ ຕາມຄຳເຊີນຂອງທ່ານນາຍົກລັດຖະມົນຕີ ລາວ ສອນໄຊ ສີພັນດອນ ຢ່າງເປັນທາງການ.
 ຮອດຕອນຄ່ຳວັນທີ 10 ມັງກອນ, ທ່ານນາຍົກລັດຖະມົນຕີ ຟ້າມມິງຈິງ ເດີນທາງອອກຈາກ ວຽງຈັນ ກັບຄືນເມືອງປະເທດ (ພາບ: TTXVN) |
ເມື່ອຕອບສຳພາດສື່ມວນຊົນກ່ຽວກັບໝາກຜົນການເຄື່ອນໄຫວ, ທ່ານຮອງລັດຖະມົນຕີການຕ່າງປະເທດ ຫວຽດນາມ ໂດ໊ຮຸ່ງຫວຽດ ໃຫ້ຮູ້ວ່າ: ເຖິງວ່າພຽງແຕ່ດຳເນີນໃນ 2 ມື້ເທົ່ານັ້ນ ແຕ່ການເຄື່ອນໄຫວຄັ້ງນີ້ຂອງທ່ານນາຍົກລັດຖະມົນຕີມີຕາຕະລາງເຕັມ, ດ້ວຍເກືອບ 20 ກິດຈະກຳ; ປະກອບສ່ວນຊຸກຍູ້ການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ. ໂດຍມີບັນດາຂີດໝາຍພົ້ນເດັ່ນຄືດັ່ງນີ້:
ທີໜຶ່ງ, ການນຳຂັ້ນສູງສອງປະເທດ ໄດ້ເຫັນດີເປັນເອກະພາບສືບຕໍ່ຮັກສາການພົບປະ, ແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນໃນແງ່ມູມສອງຝ່າຍ ແລະ ຫຼາຍຝ່າຍ ເປັນປະຈຳ; ຜັນຂະຫຍາຍບັນດາກົນໄກຮ່ວມມື, ປຶກສາຫາລືສອງຝ່າຍໃຫ້ເປັນຢ່າງດີ.
ທີສອງແມ່ນ, ພາຍໃຕ້ການຊີ້ນຳຢ່າງໃກ້ຊິດຂອງການນຳຂັ້ນສູງ ແລະ ຄວາມຮີບເຮັ່ງປະຕິບັດວຽກງານຂອງບັນດາກະຊວງ, ຂະແໜງການ, ທ້ອງຖິ່ນ, ສອງຝ່າຍແກ້ໄຂບັນດາໂຄງການທີ່ຍັງຄົງຄ້າງຢ່າງຂາດຕົວ, ສ້າງທ່ວງທ່າໃຫ້ໄລຍະຮ່ວມມືພັດທະນາໃໝ່ຢ່າງຂະຫຍັນຂັນເຄື່ອນ, ແທດຈິງກວ່າ
ທີສາມແມ່ນ, ສອງຝ່າຍເຫັນດີເປັນເອກະພາບກ່ຽວກັບແຜນນະໂຍບາຍ, ກຳນົດທິດບັນດາໂຄງການຍຸດທະສາດໃນການເຊື່ອມຕໍ່ພື້ນຖານໂຄງລ່າງ, ຄົມມະນາຄົມ, ພະລັງງານ, ເພີ່ມທະວີການເຊື່ອມຕໍ່ວິສາຫະກິດເພື່ອເປີດສັງກາດຮ່ວມມືໃໝ່ ມີລັກສະນະເຊື່ອມຕໍ່ສູງ ລະຫວ່າງສອງພື້ນຖານເສດຖະກິດ.
ທີສີ່ແມ່ນ, ສອງຝ່າຍເຫັນດີສືບຕໍ່ແລກປ່ຽນ, ສົມທົບກັບ ກຳປູເຈຍ ພ້ອມກັນຊຸກຍູ້ບັນດາໂຄງການຮ່ວມມືລະຫວ່າງສາມປະເທດ ເພື່ອແນໃສ່ນຳມາເຊິ່ງປະສິດທິຜົນເສດຖະກິດທີ່ແທດຈິງ, ເໝາະສົມກັບຄວາມຮຽກຮ້ອງຕ້ອງການພັດທະນາໃນໄລຍະໃໝ່, ຍົກລະດັບການຜູກມັດດ້ານເສດຖະກິດໃຫ້ສົມກັບການພົວພັນທາງດ້ານການເມືອງ - ການຕ່າງປະເທດ.
ທີຫ້າແມ່ນ, ສອງຝ່າຍໃຫ້ຄຳໝັ້ນສັນຍາສືບຕໍ່ສົມທົບກັນຢູ່ບັນດາເວທີປາໄສສາກົນ ແລະ ພາກພື້ນ ຢ່າງແໜ້ນແຟ້ນ.