ປະທານປະເທດເຈີ່ນດ້າຍກວາງພົບປະສັງສັນກັນກັບບັນດາສາດສະດາຈານຍາດໄດ້ລາງວັນNobel
ປະທານປະເທດເຈີ່ນດ້າຍກວາງພົບປະສັງສັນ
ກັນກັບບັນດາສາດສະດາຈານຍາດໄດ້ລາງວັນNobel
(vovworld) – ກ່າວຄຳເຫັນທີ່ການພົບປະສັງສັນກັບຄະນະບັນດາສາດສະດາຈານໄດ້ຮັບລາງວັນ Nobel ແລະ ບັນດານັກວິທະຍາສາດສາກົນ ເຂົ້າຮ່ວມກອງປະຊຸມສາກົນ “ວິທະຍາສາດພື້ນຖານ ແລະ ສັງຄົມ”, ວັນທີ 09/07, ທ່ານປະທານປະເທດ ເຈີ່ນດ້າຍກວາງ ຢືນຢັນວ່າ: ພັກ, ລັດ ຫວຽດນາມ ຍາມໃດກໍ່ສະຫງວນຄວາມເອົາໃຈໃສ່ເປັນພິເສດໃຫ້ວິທະຍາສາດ - ເຕັກໂນໂລຢີ, ນີ້ແມ່ນລັດຖະນະໂຍບາຍແຖວໜ້າ, ແມ່ນໜຶ່ງໃນບັນດາກຳລັງໜູນສຳຄັນທີ່ສຸດ ເພື່ອພັດທະນາເສດຖະກິດ - ສັງຄົມ…ບັນດາຜົນງານຂອງ ຫວຽດນາມ ໃນໄລຍະຜ່ານມາ ມີການປະກອບສ່ວນຢ່າງຕັ້ງໜ້າຂອງວິທະຍາສາດ - ເຕັກໂນໂລຢີ, ໃນນັ້ນມີວິທະຍາສາດພື້ນຖານ. ທ່ານປະທານປະເທດຕີລາຄາສູງບັນດາການປະກອບສ່ວນທີ່ເຕັມໄປດ້ວຍຄວາມສຸດຈິດສຸດໃຈ ນັບແຕ່ຫລາຍປີຜ່ານມາຂອງສາດສະດາຈານ ເຈີ່ນແທງເວີນ ແລະ ສາດສະດາຈານ ເລກີມງ້ອກ ໃນການຈັດຕັ້ງບັນດາລາຍການ “ພົບປະ ຫວຽດນາມ” ຢູ່ນະຄອນ ກູຍເຍີນ (ບີງດິງ) ເພື່ອສ້າງຕັ້ງຕາໜ່າງເຊື່ອມຕໍ່ບັນດານັກວິທະຍາສາດສາກົນກັບປະຊາຄົມບັນດານັກວິທະຍາສາດ ຫວຽດນາມ. ທ່ານປະທານປະເທດ ເຈີ່ນດ້າຍກວາງ ເນັ້ນໜັກວ່າ:
“ຂ້າພະເຈົ້າສະເໜີວ່າ: ອຳນາດການປົກຄອງທຸກຂັ້ນເອົາໃຈໃສ່ໂຄສະນາ, ຍົກສູງຄວາມຮັບຮູ້ຂອງທັງລະບົບການເມືອງ ແລະ ທົ່ວປວງຊົນ ກ່ຽວກັບບົດບາດ, ຄວາມສຳຄັນຂອງວິທະຍາສາດ - ເຕັກໂນໂລຢີເວົ້າລວມ, ວິທະຍາສາດພື້ນຖານເວົ້າສະເພາະ; ເພີ່ມທະວີການຊີ້ນຳນຳພາສຳລັບພາລະກິດພັດທະນາວິທະຍາສາດ - ເຕັກໂນໂລຢີ; ຕິດພັນບັນດາຄາດໝາຍ, ໜ້າທີ່ວິທະຍາສາດ - ເຕັກໂນໂລຢີກັບບັນດາຄາດໝາຍ, ໜ້າທີ່ພັດທະນາເສດຖະກິດ - ສັງຄົມຂອງແຕ່ລະຂະແໜງ, ແຕ່ລະຂັ້ນ ແລະ ແຕ່ລະທ້ອງຖິ່ນ. ສຸມໃສ່ພັດທະນາວິທະຍາສາດ - ເຕັກໂນໂລຢີຢ່າງແຮງ, ເຮັດໃຫ້ວິທະຍາສາດ - ເຕັກໂນໂລຢີກາຍເປັນກຳລັງໜູນສຳຄັນທີ່ສຸດ ເພື່ອພັດທະນາກຳລັງຜະລິດທີ່ທັນສະໄໝ, ເສດຖະກິດພູມປັນຍາ, ຍົກສູງສະມັດຕະພາບ, ຄຸນນະພາບ, ປະສິດທິຜົນ ແລະ ກຳລັງແກ່ງແຍ້ງຂອງພື້ນຖານເສດຖະກິດ; ປົກປັກຮັກສາສິ່ງແວດລ້ອມ, ຮັບປະກັນການປ້ອງກັນຊາດປ້ອງກັນຄວາມສະຫງົບ. ”