(vovworld) - ໃນຂອບເຂດການຢ້ຽມຢາມທາງລັດຖະກິດ ຍີ່ປຸ່ນ, ຕອນບ່າຍວັນທີ 18/3, ທ່ານປະທານປະເທດ ເຈືອງເຕີນຊາງ ມີການຢ້ຽມຢາມ ແລະ ກ່າວຄຳເຫັນຕໍ່ໜ້າສະພາແຫ່ງຊາດ ຍີ່ປຸ່ນ, ອົງການນິຕິບັນຍັດທີ່ໄດ້ຮັບການສ້າງຕັ້ງກ່ອນໝູ່ຢູ່ອາຊີ. ດ້ວຍຫົວຂໍ້ວ່າ “ປ່ຽນໃໝ່ ແລະ ມີຫົວຄິດປະດິດສ້າງເພື່ອແທດເໝາະກັບໂລກພວມປ່ຽນແປງ”, ບົດກ່າວປາໄສແມ່ນສານຢັ້ງຢືນຄວາມປາດຖະໜາຢາກເພີ່ມທະວີການພົວພັນມິດຕະພາບ ແລະ ການຮ່ວມມືແບບຍືນຍົງລະຫວ່າງ 2 ປະເທດ ຫວຽດນາມ ແລະ ຍີ່ປຸ່ນ. ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ:
“ຍີ່ປຸ່ນ ກາຍເປັນຄູ່ຮ່ວມມືອັນດັບໜຶ່ງ ແລະ ສຳຄັນໃນພາລະກິດຫັນປະເທດຊາດເປັນປະເທດອຸດສາຫະກຳ, ທັນສະໄໝຂອງຫວຽດນາມ. ຫວຽດນາມ ໄດ້ນຳໃຊ້ແຫຼ່ງທຶນໜູນຊ່ວຍພັດທະນາຢ່າງເປັນທາງການ (ODA) ອັນລ້ຳຄ່າຂອງ ຍີ່ປຸ່ນຢ່າງມີປະສິດທິຜົນ. ເພື່ອສືບຕໍ່ຍູ້ແຮງຮູບແບບການເຕີບໂຕ, ພວກຂ້າພະເຈົ້າລໍຄອຍການຮ່ວມມືຢ່າງມີປະສິດທິຜົນ ແລະ ການໜູນຊ່ວຍຕັ້ງໜ້າຂອງຍີ່ປຸ່ນຜ່ານການແບ່ງປັນບົດຮຽນໃນການຄຸ້ມຄອງ, ເພີ່ມທະວີການມອບໂອນເຕັກໂນໂລຢີ... ພວກຂ້າພະເຈົ້າ ຫວັງວ່າ ຍີ່ປຸ່ນ ຈະສືບຕໍ່ຮຽງບ່າຮຽງໄຫຼ່, ຊ່ວຍເຫຼືອ ຫວຽດນາມ ກ້າວຂຶ້ນ, ປະຕິບັດສຳເລັດຈຸດໝາຍຫັນປະເທດຊາດເປັນປະເທດອຸດສາຫະກຳ, ທັນສະໄໝ”
ທ່ານປະທານປະເທດ ເຈືອງເຕີນຊາງ ຢືນຢັນອີກວ່າ:
“ຫວຽດນາມ ເຊື່ອໝັ້ນວ່າ, ບັນດາຈຸດໝາຍປ້ອງກັນຄວາມສະຫງົບ, ພັດທະນາ ແລະ ທີ່ຕັ້ງບົດບາດຂອງແຕ່ລະປະເທດ ບັນລຸໄດ້ເມື່ອແຕ່ລະປະເທດຜູກຮັດພາລະກິດຂອງປະເທດຕົນກັບພາລະກິດລວມຂອງພາກພື້ນ ແລະ ໂລກ. ບົນຈິດໃຈນັ້ນ, ສຳລັບບັນດາບັນຫາພິພາດຢູ່ທະເລ, ຫວຽດນາມ ມີທັດສະນະສະເໝີຕົ້ນສະເໝີປາຍ ຢືດໝັ້ນຫຼັກການແກ້ໄຂດ້ວຍມາດຕະການໂດຍສັນຕິວິທີ, ປະຕິບັດຕາມກົດໝາຍສາກົນ... ຫວຽດນາມ ສະໜັບສະໜູນ ຍີ່ປຸ່ນ ກາຍເປັນສະມາຊິກຄະນະປະຈຳສະພາຄວາມໝັ້ນຄົງ ສປຊ, ມີບົດບາດທີ່ຕັ້ງເໝາະສົມໃນເວທີສາກົນ, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ຢູ່ໃນໂລກ.”
ກ່ອນໜ້ານັ້ນ, ທ່ານປະທານປະເທດ ເຈືອງເຕີນຊາງ ມີການພົບປະກັບປະທານສະພາຕຳ່ ແລະ ປະທານສະພາສູງ ຍີ່ປຸ່ນ.
ຕອນບ່າຍວັນທີ 18/3, ທ່ານປະທານປະເທດ ເຈືອງເຕີນຊາງ ມີການພົບປະກັບທ່ານ Kazuo Shii ປະທານຄະນະປະທານຄະນະບໍລິຫານງານສູນກາງພັກ ກອມມູນິດ ຍີ່ປຸ່ນ ທ່ານ Iukio Hatoiama, ອະດີດນາຍົກລັດຖະມົນຕີ ຍີ່ປຸ່ນ ທ່ານ Chihiro Kanagaoa, ປະທານສະພາຊຸກຍູ້ການພົວພັນຕ່າງປະເທດປະຊາຊົນ ຍີ່ປຸ່ນ....