ທ່ານພົນເອກ ໂງຊວນລີກ, ລັດຖະມົນຕີກະຊວງປ້ອງກັນປະເທດຫວຽດນາມ ຕ້ອນຮັບທ່ານພົນເອກ Vong Sipen, ຜູ້ບັນຊາການໃຫຍ່ກອງທັບລາຊະອານາຈັກ ກໍາປູເຈຍ (ພາບ:Quang Hai/qdnd.vn)

ທີ່ການຕ້ອນຮັບ ໃນຕອນເຊົ້າວັນທີ 30 ຕຸລາ, ຢູ່ຮ່າໂນ້ຍ, ທ່ານພົນເອກ ໂງຊວນລີກ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ສະແດງຄວາມເຊື່ອໝັ້ນວ່າ ການຢ້ຽມຢາມ ຫວຽດນາມ ຂອງທ່ານພົນເອກ Vong Sipen  ໃນຄັ້ງນີ້ ແລະ ໝາກຜົນຂອງກອງປະຊຸມເຈລະຈາລະຫວ່າງຄະນະຜູ້ແທນການທະຫານຂັ້ນສູງສອງປະເທດ ຈະປະກອບສ່ວນເຂົ້າໃນການປັບປຸງ, ເພີ່ມທະວີການພົວພັນມິດຕະພາບທີ່ເປັນມູນເຊື້ອ, ນໍ້າໃຈສາມັກຄີ, ການຮ່ວມມືຮອບດ້ານ ແລະ ໝັ້ນຄົງລະຫວ່າງສອງປະເທດເວົ້າລວມ ແລະ ກອງທັບຫວຽດນາມ - ກໍາປູເຈຍ ເວົ້າສະເພາະໃຫ້ດີກວ່າອີກ.

ກ່ອນໜ້ານັ້ນ, ຕອນເຊົ້າວັນທີ 30 ຕຸລາ, ຄະນະຜູ້ແທນການທະຫານຂັ້ນສູງກອງທັບປະຊາຊົນຫວຽດນາມ ໂດຍທ່ານ ພົນໂທ ຟານວັນຢາງ ເປັນຫົວໜ້າຄະນະ ໄດ້ມີການເຈລະຈາກັບຄະນະຜູ້ແທນການທະຫານຂັ້ນສູງກອງທັບລາຊະອານາຈັກ ກໍາປູເຈຍ ເຊັ່ນດຽວກັນ. ສອງຝ່າຍໄດ້ເຫັນດີເປັນເອກະພາບສູງວ່າ ໄລຍະຈະມາເຖິງ ຈະສືບຕໍ່ຊີ້ນໍາບັນດາອົງການຂຶ້ນກັບກອງເສນາທິການໃຫຍ່ກອງທັບປະຊາຊົນຫວຽດນາມ ແລະ ກອງບັນຊາການໃຫຍ່ກອງທັບລາຊະອານາຈັກ ກໍາປູເຈຍ ຜັນຂະຫຍາຍປະຕິບັດແຜນການຮ່ວມມືລະຫວ່າງສອງກະຊວງປ້ອງກັນປະເທດ ປີ 2019 ຢ່າງເຂັ້ມງວດ ແລະ ມີປະສິດທິຜົນ; ເພີ່ມທະວີການຮ່ວມມື, ຊ່ວຍເຫຼືອເຊິ່ງກັນແລະກັນລະຫວ່າງທະຫານເຂດຕ່າງໆ; ສົມທົບກັນປະຕິບັດວຽກງານການຊອກຫາ, ທ້ອນໂຮມ ແລະ ສົ່ງອັດຖິຂອງນັກຮົບຫວຽດນາມ ທີ່ເສຍສະຫຼະຊີວິດຢູ່ກໍາປູເຈຍ ກັບຄືນເມືອປະເທດ; ຍູ້ແຮງການລາດຕາເວນສອງຝ່າຍ, ການຄຸ້ມຄອງເສັ້ນຊາຍແດນ, ຫຼັກໝາຍຊາຍແດນ; ການຕໍ່ສູ້ຕ້ານອາດຊະຍາກໍາຂ້າມຊາດ; ຮັກສາຄວາມໝັ້ນຄົງດ້ານການເມືອງ ແລະ ຄວາມສະຫງົບປອດໄພໃນຊີວິດສັງຄົມຢູ່ເຂດຊາຍແດນ...