(vovworld) - ສິ້ນສຸດການຢ້ຽມຢາມ ແລະ ເຮັດວຽກຢູ່ສ.ເບລາຣຸດ ຢ່າງເປັນທາງການ, ຄະນະຜູ້ແທນຂັ້ນສູງກະຊວງຕຳຫຼວດຫວຽດນາມ ໂດຍພົນໂທ ໂຕເລີມ, ລັດຖະມົນຕີກະຊວງຕຳຫຼວດຫວຽດນາມ ນຳໜ້າ, ໄດ້ໄປຢ້ຽມຢາມ ແລະ ເຮັດວຽກຢູ່ສ.ສະໂລວາກີ, ຕາມຄຳເຊີນຂອງຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນ Robert Fico. ທີ່ນະຄອນຫຼວງ Bratislava, ຕອນເຊົ້າວັນທີ 06/03 (ຕາມເວລາທ້ອງຖິ່ນ), ທ່ານລັດຖະມົນຕີ ໂຕເລີມ ແລະ ຄະນະຜູ້ແທນຫວຽດນາມ ໄດ້ເຂົ້າຢ້ຽມຂ່ຳນັບທ່ານນາຍົກລັດຖະມົນຕີ Robert Fico ແລະ ລົງນາມໃນເອກະສານຮ່ວມມືຕ່ໍສູ້ປ້ອງກັນ, ຕ້ານອາດຊະຍາກຳລະຫວ່າງກະຊວງຕຳຫຼວດຫວຽດນາມ ແລະ ກະຊວງພາຍໃນສະໂລວາກີ. ທີ່ການຕ້ອນຮັບ, ທ່ານນາຍົກລັດຖະມົນຕີ Robert Fico ປາດຖະໜາວ່າ, ໃນໄລຍະຈະມາເຖິງ, ການຮ່ວມມືດ້ານປ້ອງກັນຄວາມສະຫງົບ, ຕຳຫຼວດຈະສືບຕໍ່ແມ່ນໜຶ່ງໃນບັນດາຂົງເຂດຮ່ວມມືສຳຄັນ, ມີປະສິດທິຜົນໃນການພົວພັນມິດຕະພາບທີ່ເປັນມູນເຊື້ອລະຫວ່າງ 2 ປະເທດ. ສ່ວນທ່ານລັດຖະມົນຕີ ໂຕເລີມ ປາດຖະໜາວ່າ, ທ່ານນາຍົກລັດຖະມົນຕີ Robert Fico ເອົາໃຈໃສ່, ສ້າງເງື່ອນໄຂສະດວກໃຫ້ບັນດາອົງການປະຕິບັດກົດໝາຍ ສະໂລວາກີ ແລະ ກະຊວງຕຳຫຼວດຫວຽດນາມ ຮ່ວມມືຢ່າງແໜ້ນແຟ້ນ ແລະ ມີປະສິດທິຜົນໃນການຕໍ່ສູ້, ປ້ອງກັນ, ຕ້ານອາດຊະຍາກຳ, ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍຂອງແຕ່ລະປະເທດ, ປະກອບສ່ວນປັບປຸງ, ພັດທະນາການພົວພັນມິດຕະພາບ, ທີ່ເປັນມູນເຊື້ອລະຫວ່າງ 2 ປະເທດ.