ສະຫະພັນບັນດາອົງການມິດຕະພາບຫວຽດນາມ: ຮຽກຮ້ອງຈີນຢຸດຕິບັນດາການເຄື່ອນໄຫວນາບຄູ່ເຖິງສັນຕິພາບ,ປອດໄພໃນພາກພື້ນ
(ພາບປະກອບຈາກ Công Định/Hữu Trung/TTXVN)
(vovworld) – ໃນວັນທີ 27/5, ສະຫະພັນບັນດາອົງການມິດຕະພາບ ຫວຽດນາມ ມີຈົດໝາຍເປີດກ່ຽວກັບເລື່ອງ ຈີນ ຕັ້ງຮ້ານເຈາະນ້ຳມັນຜິດກົດໝາຍໃນເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງ ຫວຽດນາມ. ຈົດໝາຍດັ່ງກ່າວຊີ້ແຈ້ງວ່າ: ປະຊາຊົນ ຫວຽດນາມ ແລະ ຫາງສຽງໂລກເອົາໃຈໃສ່ ແລະ ມີຄວາມວິຕົກວັງວົນຕໍ່ໜ້າເລື່ອງ ຈີນ ຍົກຍ້າຍ ແລະ ຕັ້ງຮ້ານເຈາະນ້ຳມັນ ໄຮຢາງ - 981 ເຂົ້າເລິກໃນເຂດເສດຖະກິດ ແລະ ເຂດໄຫຼ່ທະວີບຂອງ ຫວຽດນາມ. ການກະທຳພຽງລຳພັງຝ່າຍດຽວນີ້ຂອງ ຈີນ ໄດ້ລະເມີດສິດອະທິປະໄຕ ແລະ ສິດອຳນາດສານສຳລັບບັນດາເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງ ຫວຽດນາມ ຢ່າງຮ້າຍແຮງ, ໄປຝືນກັບຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ລະຫວ່າງ ຈີນ ແລະ ອາຊຽນ ແລະ ລະເມີດສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982 (UNCLOS) ຢ່າງແຮງ. ການກະທຳດັ່ງກ່າວຂອງ ຈີນ ໄດ້ກໍ່ຜົນສະທ້ອນທີ່ຫຍໍ້ທໍ້ເຖິງສະພາບແວດລ້ອມສັນຕິພາບ, ສະຖຽນລະພາບຢູ່ພາກພື້ນ ແລະ ຢູ່ໃນໂລກ, ພ້ອມທັງສົ່ງຜົນບໍ່ດີເຖິງການພົວພັນມິດຕະພາບ, ການຮ່ວມມືລະຫວ່າງ ຫວຽດນາມ - ຈີນ.
ສະຫະພັນບັນດາອົງການມິດຕະພາບ ຫວຽດນາມ ຮຽກຮ້ອງ ແລະ ສະເໜີໃຫ້ບັນດາອົງການຈັດຕັ້ງ ແລະ ສ່ວນບຸກຄົນ, ເພື່ອນມິດສາກົນ ສືບຕໍ່ອອກສຽງຮຽກຮ້ອງໃຫ້ ຈີນ ຖອນຮ້າຍເຈາະນ້ຳມັນ, ບັນດາກຳ່ປັ່ນ ແລະ ເຮືອບິນປ້ອງກັນອອກຈາກເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງ ຫວຽດນາມ, ເຄົາລົບກົດໝາຍສາກົນ ແລະ ອະທິປະໄຕຖືກຕ້ອງຕາມກົດໝາຍຂອງ ຫວຽດນາມ, ຢຸດຕິບັນດາການກະທຳລຳພັງຝ່າຍດຽວທີ່ນາບຂູ່ເຖິງສັນຕິພາບ, ສະຖຽນລະພາບ ແລະ ຄວາມສະຫງົບໃນພາກພື້ນ.