ທ່ານເອກອັກຄະລັດຖະທູດ ດັ້ງດິ່ງກຸ໊ຍ, ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ (ພາບ: VOV)

   ກ່າວຄຳເຫັນທີ່ກອງປະຊຸມ, ທ່ານເອກອັກຄະລັດຖະທູດ ດັ້ງດິ່ງກຸ໊ຍ, ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ ໄດ້ສະແດງຄວາມວິຕົກກັງວົນຢ່າງເລິກເຊິ່ງຕໍ່ການປີນຂັ້ນໄດໃນຄວາມເຄັ່ງຕຶງລະຫວ່າງ ຊາວ ອິດສະຣາແອັນ ແລະ ປາແລັດສະຕິນ ເຊິ່ງໄດ້ເຮັດໃຫ້ມີຈຳນວນຜູ້ເສຍຊີວິດ ແລະ ຮັບບາດເຈັບນັບມື້ນັບຫຼາຍ; ພ້ອມທັງຢັ້ງຢືນວ່າ ຫວຽດນາມ ກ່າວປະນາມການບຸກໂຈມຕີຄັ້ງຕ່າງໆທີ່ແນ່ໃສ່ສາມັນຊົນ ແລະ ບັນດາພື້ນຖານໂຄງລ່າງພົນລະເຮືອນ. ທ່ານເອກອັກຄະລັດຖະທູດ ດັ້ງດິ່ງກຸ໊ຍ ຮຽກຮ້ອງໃຫ້ບັນດາຝ່າຍທັງໝົດ ຈົ່ງຢຸດຕິທຸກການກະທຳໃຊ້ຄວາມຮຸນແຮງໃນທັນທີ ແລະ ລະງັບໃຈ, ບໍ່ເຮັດໃຫ້ສະພາບການສັບສົນຂຶ້ນຕື່ມ. ຫວຽດນາມ ສະເໜີ ບັນດາຝ່າຍ, ພິເສດແມ່ນ ອິດສະຣາແອັນ ຈົ່ງເຄົາລົບກົດໝາຍວ່າດ້ວຍມະນຸດສະທຳສາກົນ ແລະ ລະງັບໃຈຢ່າງສຸດຂີດ ເພື່ອຫຼຸດຜ່ອນຜົນເສຍຫາຍ ແລະ ກໍລະນີເສຍຊີວິດ, ຮັບບາດເຈັບໃຫ້ແກ່ສາມັນຊົນ. ຄວນແກ້ໄຂການປະທະກັນໂດຍສັນຕິວິທີ ແລະ ເພື່ອສັນຕິພາບແບບຍືນຍົງຍາວນານຢູ່ພາກພື້ນຕາເວັນອອກກາງນັ້ນ ມີແຕ່ເສັ້ນທາງໜຶ່ງດຽວ ນັ້ນແມ່ນ ປະຕິບັດມາດຕະການຄົງຕົວທັງສອງລັດ ອິດສະຣາແອັນ ແລະ ປາແລັດສະຕິນ.