(vovworld) - ​ຕອນ​ບ່າຍ​ວັນ​ທີ 9/8, ຢູ່​ສຳນັກງານ​ລັດຖະບານຢູ່​ຮ່າ​ໂນ້ຍ, ທ່ານ​ຮອງ​ນາຍົກລັດຖະມົນຕີຫວຽດນາມ Nguyen Xuan Phuc ​ໄດ້​ໃຫ້ການ​ຕ້ອນຮັບ​ຄະນະ​ຜູ້​ແທນ​ກະຊວງ​ໂຍທາ​ທິການ ​ແລະ ຂົນ​ສົ່ງ ​ແຫ່ງ ສປປ ລາວ, ​ໂດຍ​ລັດຖະມົນຕີ ສົມ​ມາດ ພົນ​​ເສນາ ນຳ​ໜ້າ ທີ່​ພວມ​ຢູ່​ຢ້ຽມຢາມ ​ແລະ ​ເຮັດ​ວຽກ​ຢູ່​ຫວຽດນາມ. ທ່ານ​ຮອງ​ນາຍົກລັດຖະມົນຕີ Nguyen Xuan Phuc ຖື​ວ່າ: ການ​ຢ​້ຽມຢາມ​ຂອງ​ທ່ານ​ລັດຖະມົນຕີ ສົມ​ມາດ ພົນ​​ເສນາ ມີ​ຄວາມ​ໝາຍ​ສຳຄັນ, ກົງ​ກັບ​ໂອກາດ 2 ປະ​ເທດ​ພວມ​ຈັດ​ຕັ້ງ​ການ​ເຄື່ອນ​ໄຫວ​ສະ​ເຫຼີ​ມສະຫຼອງ 50 ປີ​ແຫ່ງ​ວັນ​ສ້າງ​ຕັ້ງ​ສາຍ​ພົວພັນ​ທາງ​ການ​ທູດ ​ແລະ 35 ປີ​ແຫ່ງ​ວັນ​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື​ຫວຽດນາມ - ລາວ. ທ່ານ​ຮອງ​ນາ​ຍົກ​ລັດຖະມົນຕີ Nguyen Xuan Phuc ສະ​ເໜີ​ໃຫ້​ຂະ​ແໜງ​ຄົມມະນາຄົມ​ຂົນ​ສົ່ງ 2 ປະ​ເທດ ສືບ​ຕໍ່​ຮ່ວມ​ມື​ຢ່າງ​ແໜ້​ນ​ແຟ້ນກ່ວາອີກ, ທາ​ບທາມ​ຄວາມ​ເຫັນ​ເຊິ່ງກັນ ​ແລະ ກັນ​ ກ່ຽວ​ກັບ​ຂົງ​ເຂດ​ຄົມມະນາຄົມ​ຂົນ​ສົ່ງ 2 ຝ່າຍ ​ແລະ ຫຼາຍ​ຝ່າຍ. 2 ຝ່າຍ​ຄວນ​ນຳ​ການ​ຮ່ວມ​ມື ທາງ​ດ້ານ​ຄົມມະນາຄົມ​ຂົນ​ສົ່ງ​ກ້າວ​ເຂົ້າ​ສູ່​ລວງ​ເລິກ, ມີ​ປະສິດທິ​ຜົນ ​ແລະ ​ແທດ​ຈິງ, ພິ​ເສດ​ແມ່ນ​ຊຸກຍູ້​ບັນດາ​ການ​ເຄື່ອນ​ໄຫວ​ຂົນ​ສົ່ງ​ທ່ອງທ່ຽວ​ດ້ວຍ​ທາງບົກ, ​ເປີດ​ກ້ວາງ​ແລວ​ເສດຖະກິດ​ຕາ​ເວັນ​ອອກ - ຕາ​ເວັນ​ຕົກ.​.​.​ ທ່ານ​ລັດຖະມົນຕີ​ກະຊວງ​​ໂຍທາ​ທິການ ​ແລະ ຂົນ​ສົ່ງ ລາວ ສົມ​ມາດ ພົນ​​ເສນາ ຫວັງ​ວ່າ ພະນັກງານ​ຂະ​ແໜງ​ຄົມມະນາຄົມ​ຂົນ​ສົ່ງ 2 ປະ​ເທດ​ຈະສືບ​ຕໍ່​ເສີມ​ຂະຫຍາຍ​ມູນ​ເຊື້ອ​ການ​ຮ່ວມ​ມື​ມິດຕະພາບ​ທີ່​ສະໜິດ​ຕິດ​ພັນ ​ເພື່ອ​ປະກອບສ່ວນ​ພັດທະນາ​ຂະ​ແໜງ​ຄົມມະນາຄົມ​ຂົນ​ສົ່ງ​ຢູ່​ແຕ່ລະ​ປະ​ເທດ​ໃຫ້​ດີ​ຍິ່ງໆ​ຂຶ້ນ.