ໄລຍະ 2011 – 2015: ເສດຖະກິດ ຫວຽດນາມ ພວມຢູ່ໃນທ່າຟື້ນຟູ
ພາບປະກອບ
(vovworld) – ຕອນເຊົ້າວັນທີ 23/9, ຢູ່ ຮ່າໂນ້ຍ, ຄະນະເສດຖະກິດສູນກາງ ພັກກອມມູນິດ ຫວຽດນາມ ສົມທົບກັບມະຫາວິທະຍາໄລເສດຖະກິດແຫ່ງຊາດ, ທະນາຄານໂລກ, ກຳມາທິການເສດຖະກິດ ສະພາແຫ່ງຊາດ ໄດ້ຈັດຕັ້ງກອງປະຊຸມສຳມະນາວິທະຍາສາດ ສາກົນ “ທົບທວນຄືນໄລຍະທາງພັດທະນາເສດຖະກິດ - ສັງຄົມໄລຍະ 5 ປີ 2011 – 2015 ແລະ ການປັບປຸງຍຸດທະສາດ”. ກ່າວຄຳເຫັນທີ່ກອງປະຊຸມສຳມະນາ, ທ່ານຮອງນາຍົກລັດຖະມົນຕີ ຫວຽດນາມ ຫງວຽນຊວນຟຸກ ຊີ້ແຈ້ງວ່າ:
“ໂດຍຮັບຮູ້ຢ່າງເລິກເຊິ່ງບັນດາຄວາມຫຍຸ້ງຍາກຂອງພື້ນຖານເສດຖະກິດ, ພັກ ແລະ ລັດຖະບານ ໄດ້ຕັດສິນໃຈນຳໃຊ້ມາດຕະການຕ່າງໆຢ່າງຄົບຊຸດເພື່ອແນໃສ່ສືບຕໍ່ຫັນເສດຖະກິດມະຫາພາກ ໃຫ້ເປັນປົກກະຕິ, ໜູນຊ່ວຍບັນດາວິສາຫະກິດຢ່າງມີປະສິດທິຜົນ ເພື່ອແນໃສ່ສ້າງພື້ນຖານເສດຖະກິດທັນສະໄໝ, ຂະຫຍັນຂັນເຄື່ອນ ແລະ ມີຄວາມສາມາດແກ່ງແຍ້ງກັບສາກົນ. ຂ້າພະເຈົ້າເຊື່ອໝັ້ນວ່າ ຄຳເຫັນທາບທາມຂອງຜູ້ແທນຈະໄຈ້ແຍກບັນດາຄວາມຫຍຸ້ງຍາກໃນປະຈຸບັນ, ບັນດາໄພອັນຕະລາຍ ແລະ ທ່າອຽງ ໃນອະນາຄົດກັບພື້ນຖານເສດຖະກິດຢ່າງເລິກເຊິ່ງ, ບັນດາຂໍ້ສະເໜີຈະຊ່ວຍໃຫ້ລັດຖະບານມີບັນດາລັດຖະນະໂຍບາຍຢ່າງແຮງກ່ວາອີກ ເພື່ອຊ່ວຍພື້ນຖານເສດຖະກິດຟື້ນຟູໂດຍໄວ.”
ທີ່ກອງປະຊຸມສຳມະນາ, ບັນດານັກຊ່ຽວຊານເສດຖະກິດກໍ່ຊີ້ແຈ້ງວ່າ: ລັດຖະບານຄວນມີການປັບປຸງໃຫ້ເໝາະສົມ, ມີປະສິດທິຜົນກ່ວາອີກໃນບັນດາຍຸດທະສາດ ແລະ ແຜນກຳນົດ, ແຜນການພັດທະນາຂະແໜງຂອງ ຫວຽດນາມ.