(vovworld)- ສຳລັບນັກທ່ອງທ່ຽວຜູ້ທີ່ມັກຄົ້ນຫາທຳມະຊາດ, ນ້ຳຕົກຕາດ Dray Nur ແມ່ນສະຖານທີ່ທ່ອງທ່ຽວທີ່ຂາດບໍ່ໄດ້ໃນລາຍການທ່ອງທ່ຽວນະຄອນ ບວນມາທວດ, ແຂວງ ດັກລັກ. ນ້ຳຕົກຕາດ Dray Nur ບໍ່ພຽງແຕ່ດຶງດູດນັກທ່ອງທ່ຽວດ້ວຍຄວາມງາມແບບທຳມະຊາດເທົ່ານັ້ນ ຫາກຍັງດຶງດູດນັກທ່ອງທ່ຽວດ້ວຍບັນດາເທບນິຍາຍທີ່ຕິດພັນກັບຊື່ຂອງນ້ຳຕົກຕາດອີກດ້ວຍ. ໃນລາຍການຄົ້ນຫາຫວຽດນາມ ພາກນີ້ ພວກເຮົາຂໍແນະນຳບົດທີ່ມີຫົວຂໍ້ວ່າ: ນ້ຳຕົກຕາດ Dray Nur ຢູ່ເຂດໄຕງວຽນ
ນ້ຳຕົກຕາດ Dray Nur
|
ນ້ຳຕົກຕາດ Dray Nur ຕັ້ງຢູ່ບໍລິເວນບ້ານ Kuop, ຫ່າງຈາກນະຄອນ ບວນມາທວດໄປທາງທິດໃຕ້ ປະມານ 25 ກິໂລແມັດ. ນ້ຳຕົກຕາດ Dray Nur ແມ່ນນ້ຳຕົກຕາດທີ່ສວຍງາມ ແລະ ໃຫຍ່ໂຕມະໂຫຖານ ດ້ວຍຄວາມຍາວປະມານ 250 ແມັດ, ສູງກວ່າ 30 ແມັດ ແມ່ນສັນຍາລັກແຫ່ງຄວາມງາມແບບຮົກເຮື້ອເປົ່າຫວ່າງ. ນ້ຳຕົກຕາດ Dray Nur ແມ່ນນ້ຳຕົກຕາດໃຫຍ່ສຸດ, ນອນໃນລະບົບນ້ຳຕົກຕາດ 3 ແຫ່ງຄື: ຢາລອງ, ນ້ຳຕົກຕາດ Dray Nur- Dray Sap ຂອງແມ່ນ້ຳ Serepok. ນ້ຳຕົກຕາດ Dray Nur ຕັ້ງຢູ່ຄຽງຂ້າງນ້ຳຕົກຕາດ Dray Sap ຫ່າງຈາກຂົວອູ່ຕັ້ງຂ້າມ ແມ່ນ້ຳ Serepok ດ້ວຍໄລຍະທາງອັນສັ້ນໆ. ເມື່ອສັງເກດຈາກທາງໄກ, ທ່ານຈະເຫັນນ້ຳຕົກຕາດ Dray Nur ຄືດັ່ງສາຍນ້ຳໃຫຍ່ຈາກຈອມພູສູງຊັນໄຫລລົງເປັ່ນສຽງດັ່ງກ້ອງກັງວານໄປທົ່ວພູຜາປ່າໄມ້. ສຳລັບນ້ຳຕົກຕາດ Dray Nur ຊາວທ້ອງຖິ່ນເຄີຍເອີ້ນວ່າ ແມ່ນນ້ຳຕົກຕາດເມຍ. ຕາມເລື່ອງເລົ່າຂານ ກ່ອນນີ້ ມີສາວຊາວເຜົ່າ ເອເດ ຜູ້ຫນຶ່ງທີ່ສວຍງາມ ພ້ອມກັບຄົນຮັກພາກັນໄປທ່ຽວຫລິ້ນໃນປ່າ ແລະ ເມື່ອນັ່ງຢູ່ເທິງໂງ່ນຫີນໃຫຍ່, ບັງເອີນມີຜີຍັກປະກົດຕົວແລ້ວກໍ່ປ່ຽນຕົວເປັນເສົານ້ຳ, ອ້າຍບ່າວຖືກນ້ຳມ້ວນໄປໄກ ແລະ ຖືກສະຫລົບໄປ ເມື່ອຮູ້ສຶກຕົວແລ້ວຈຶ່ງຮູ້ວ່າ ຄົນຮັກຂອງຕົນຖືກຜີຍັກຈັບໄປແລ້ວ. ບ່ອນທີ່ອ້າຍບ່າວນັ່ງປະຈຸບັນແມ່ນຜາຫີນຂອງກະແສນ້ຳຕົກຕາດ ສ່ວນບ່ອນຂອງຜີຍັກອອກມາແມ່ນນ້ຳຕົກຕາດ.
|
ສຽງນ້ຳຕົກຕາດໄຫລຕະຫລອດປີ ບາງເທື່ອຄືສຽງເວົ້າຄ່ອຍໆ, ບາງເທື່ອຄືສຽງລົມກັນຂອງຄູ່ຮັກ. ເລື່ອງລາວກ່ຽວກັບຄວາມຮັກ ຊື່ງຊາວຊົນເຜົ່າຢູ່ທີ່ນີ້ເລົ່າສູ່ກັນຟັງເຮັດໃຫ້ຊື່ຂອງນ້ຳຕົກຕາດມ່ວນກວ່າ. ບັນດາເລື່ອງລາວກ່ຽວກັບຕົ້ນກຳເນີດຂອງນ້ຳຕົກຕາດ, ຄວາມງາມແບບເລິກລັບມະຫັດສະຈັນ ລ້ວນແຕ່ເປັນສິ່ງທີ່ດຶງດູດນັກທ່ອງທ່ຽວຜູ້ທີ່ເຄີຍມາຢ້ຽມຢາມແຫ່ງນີ້ . ທ່ານ ຫງວຽນກວາງເອີນ, ຊ່າງພາບມາຈາກ ນະຄອນ ໂຮ່ຈິມີນ ແບ່ງປັນວ່າ:
“ທິວທັດທຳມະຊາດຢູ່ເຂດໄຕງວຽນ ແມ່ນສວຍສົດງົດງາມ ແລະເປັນຫລາຍຮູບຫລາຍແບບ ລວມມີນ້ຳຕົກຕາດ, ພູຜາປ່າໄມ້ໃຫຍ່ໂຕມະໂຫຖານ. ນອກນັ້ນ ເຂດໄຕງວຽນ ຍັງມີເຮືອນຣົງ ກໍເປັນສິ່ງທີ່ສ້າງຄວາມປະທັບໃຈ. ມາແຫ່ງນີ້ ຂ້າພະເຈົ້າຈຶ່ງໄດ້ຮັບຊົມທິວທັດທຳມະຊາດທີ່ສວຍງາມ ແລະ ເຂົ້າໃຈຕື່ມອີກກ່ຽວກັບຊີວິດການເປັນຢູ່, ຮີດຄອງປະເພນີຂອງຊາວຊົນເຜົ່າຢູ່ເຂດໄຕງວຽນ.”
ຄວາມສວຍງາມຂອງກະແສ ນ້ຳຕົກຕາດ Dray Nur ຍາມໃດກໍດຶງດູດນັກທ່ອງທ່ຽວມາຢ້ຽມຢາມແຫ່ງນີ້ເປັນຈຳນວນຫລວງຫລາຍ. ພິເສດແມ່ນຜູ້ນິຍົມທ່ອງທ່ຽວພະຈົນໄພ. ເຂົາເຈົ້າມາຢ້ຽມຢາມ ນ້ຳຕົກຕາດ Dray Nur ບໍ່ພຽງແຕ່ໄດ້ຊົມສາຍນ້ຳ ໄຫລຈາກຜາຊັນສູງເທົ່ານັ້ນ ຫາກຍັງໄດ້ໄປຢ້ຽມຢາມຖ້ຳທະລຸກະແສນ້ຳຕົກຕາດອີກດ້ວຍ. ອ້າຍ ກວາງກູຍ, ຜູ້ນຳທ່ຽວຢູ່ ນ້ຳຕົກຕາດ Dray Nur ໃຫ້ຮູ້ວ່າ:
“ກະແສນ້ຳຕົກຕາດຢູ່ທີ່ນີ້ ມີ 3 ຊັ້ນ, ຫນອງນ້ຳຊັ້ນທີ 1 ດ້ວຍລະດັບນ້ຳຕ່ຳ, ສະນັ້ນ ນັກທ່ອງທ່ຽວສາມາດລອຍນ້ຳ ຫລືອາບນ້ຳໄດ້. ຢູ່ຫນອງນ້ຳຊັ້ນທີ 2 ລະດັບນ້ຳສູງສົມຄວນ ສະນັ້ນ ນັກທ່ອງທ່ຽວມານີ້ ທຸກຄົນຕ້ອງປະຕິບັດຕາມການແນະນຳຂອງພາລະກອນກູ້ໄພ. ສ່ວນເມື່ອຢ້ຽມຢາມຫນອງນ້ຳຊັ້ນທີ 3 ລະດັບນ້ຳມີຄວາມເລິກ 8-10 ແມັດ. ແຕ່ຖ້າຮູ້ຈັກວິທີຍ່າງຕາມຝາຫີນນັກທ່ອງທ່ຽວກໍສາມາດເຂົ້າຖ້ຳໄດ້. ຢູ່ທີ່ນີ້ ທ່ານສາມາດຊົມທິວທັດທັງໝົດຂອງ ນ້ຳຕົກຕາດ Dray Nur .”
ຢູ່ໃຈກາງຖ້ຳແມ່ນບ່ອນທັດສະນາຈອນຈັບອົກຈັບໃຈກວ່າໝູ່ຢູ່ ນ້ຳຕົກຕາດ Dray Nur. ລະບົບຖ້ຳຢູ່ທີ່ນີ້ ກວ້າງກວ່າ 3000 ຕາແມັດ, ຢູ່ໃນຖ້ຳຍັງມີໂງ່ນຫີນຫລາຍໂງ່ນດ້ວຍຮູບຊົງຫລາຍຮູບຫລາຍແບບ ເຮັດໃຫ້ທິວທັດຍິ່ງສວຍງາມກວ່າ.
ຈາກນ້ຳຕົກຕາດ Dray Nur, ນັກທ່ອງທ່ຽວຜູ້ທີ່ນິຍົມໄປຄົ້ນຫາທຳມະຊາດ ສາມາດຍ່າງໄປຕາມບັນດາທາງຊອຍໃນປ່າດົງດີບ, ຊົມບັນດາກົກໄມ້ໃຫຍ່ມີອາຍຸນັບພັນປີ ຫລືລໍຖ້າຍາມສາຍັນເພື່ອຊົມເຈຍນັບພັນໂຕບິນເຂົ້າຖ້ຳຫລົບລີ້.
ໄປທ່ອງທ່ຽວ ນ້ຳຕົກຕາດ Dray Nur ນັກທ່ອງທ່ຽວຍັງໄດ້ເຊື່ອມຕົວກັບຊີວິດການເປັນຢູ່ຂອງຊາວບ້ານ Kuop, Nui, Tua ຂຶ້ນກັບຊາວເຜົ່າ ເອເດ ທີ່ດຳລົງຊີວິດມໍ່ກັບ ນ້ຳຕົກຕາດ Dray Nur. ມາຢ້ຽມຢາມ ນ້ຳຕົກຕາດ Dray Nur, ນັກທ່ອງທ່ຽວຈະໄດ້ຮັບຊົມການຕ່ຳເຂົ້າຕາມປະເພນີຂອງຊາວທ້ອງຖິ່ນ, ຕ່ຳຫູກທໍໄຫມ, ໄດ້ເຫັນປະຈັກຕາບັນດາອຸປະກອນລ່າເນື້ອທີ່ເປັນເອກະລັກສະເພາະຂອງຊາວເຜົ່າເອເດ. ນອກນັ້ນ ນັກທ່ອງທ່ຽວຍັງໄດ້ຮັບປະທານອາຫານພິເສດຂອງຊາວທ້ອງຖິ່ນ, ດື່ມເຫລົ້າໄຫ. ມາຢ້ຽມຢາມເຂດໄຕງວຽນ, ນ້ຳຕົກຕາດ Dray Nur ນັກທ່ອງທ່ຽວບໍ່ພຽງແຕ່ຮູ້ໄດ້ວ່າເຂດໄຕງວຽນ ມີລົດຊາດກາເຟທີ່ມີຊື່ສຽງເທົ່ານັ້ນ ຫາກນອກຈາກຊື່ເອີ້ນຂອງຖ້ຳ, ປ່າໄມ້ ຍັງມີເທບນິຍາຍກ່ຽວກັບຄວາມຮັກ, ກ່ຽວກັບເຂດດິນ, ຊາວໄຕງວຽນ ທີ່ຮັກແພງແຂກຄົນ ແລະ ເຕັມໄປດ້ວຍມູນເຊື້ອວັດທະນະທຳ.