ເບ໊ນກ໊າດ ກາຍເປັນນະຄອນທີ 5 ຂຶ້ນກັບແຂວງ ບິ່ງເຢືອງ

    ໂດຍນອນຢູ່ທາງທິດເໜືອແຂວງ ບິ່ງເຢືອງ, ນະຄອນ ເບ໊ນກ໊າດມີເນື້ອທີ່ 234 ກວ່າຕາລາງກິໂລແມັດ, ມີປະຊາກອນຫຼາຍກວ່າ 364.000 ຄົນ, ມີ 8 ຫົວໜ່ວຍປົກຄອງຂັ້ນຕາແສງ. ພາຍຫຼັງກາຍເປັນເທດສະບານເປັນເວລາ 10 ປີ,ເບ໊ນກ໊າດ ໄດ້ກາຍເປັນຕົວເມືອງອະລິຍະທຳທັນສະໄໝເທື່ອລະກ້າວ, ມີເສດຖະກິດພັດທະນາຢ່າງຂະຫຍັນຂັນເຄື່ອນ, ຊີວິດການເປັນຢູ່ຂອງປະຊາຊົນນັບມື້ໄດ້ຮັບການປົວແປງໃຫ້ດີຂຶ້ນ. ນີ້ແມ່ນພື້ນຖານທີ່ສຳຄັນເພື່ອໃຫ້ ເບ໊ນກ໊າດ ມີເງື່ອນໄຂຢ່າງພຽງເພື່ອກາຍເປັນນະຄອນທີ 5 ຂຶ້ນກັບແຂວງ ບິ່ງເຢືອງ. ທ່ານ ຫງວຽນຈ້ອງເອິນ ປະທານຄະນະກຳມະການປະຊາຊົນນະຄອນ ເບ໊ນກ໊າດ ໃຫ້ຮູ້ວ່າ:

      “ພາຍຫຼັງກາຍເປັນນະຄອນ, ພວກຂ້າພະເຈົ້າສືບຕໍ່ເອົາໃຈໃສ່ສ້າງເງື່ອນໄຂໜູນຊ່ວຍແຫຼ່ງກຳລັງ ເພື່ອໃຫ້ທ້ອງຖິ່ນລົງທຶນພັດທະນາພື້ນຖານໂຄງລ່າງຄົມມະນາຄົມ,ວັດທະນະທຳສັງຄົມ ເພື່ອຕອບສະໜອງຄວາມຮຽກຮ້ອງຕ້ອງການພັດທະນາຂອງທ້ອງຖິ່ນ. ພ້ອມກັນນັ້ນ ກໍ່ສະເໜີແຂວງສຸມໃສ່ຊີ້ນຳ ເພື່ອຜັນຂະຫຍາຍປະຕິບັດບັນດາໂຄງການກິດຈະກຳຈຸດສຸມໃນບໍລະເວນ”.

     ມາຮອດປັດຈຸບັນແຂວງ ບິ່ງເຢືອງ ໄດ້ມີບັນດານະຄອນລວມມີ ທູ໋ເຢົາໂໝດ, ຖ້ວນອານ, ຢີ໊ອານ, ເຕິນອວຽນ ແລະ ເບ໊ນກ໊າດ ກາຍເປັນທ້ອງຖິ່ນທຳອິດ ແລະ ເປັນທ້ອງຖິ່ນໜຶ່ງດຽວໃນທົ່ວປະເທດທີ່ມາຮອດປັດຈຸບັນມີ 5 ນະຄອນ. ບິ່ງເຢືອງ ແມ່ນແຂວງ ໜຶ່ງດຽວຢູ່ ຫວຽດນາມ ມີຄວາມເປັນກຽດຖືກຈັດໃນບັນຊີລາຍຊື່ປະຊາຄົມມີຍຸດທະສາດພັດທະນານະຄອນອັດສະລິຍະດີເດັ່ນໃນໂລກໃນປີ 2021. ອ້າຍ ໂຕຮວິ່ງແອັງຕ໊ວນ ຢູ່ນະຄອນ ທູ໋ເຢົາໂໝດ ແບ່ງປັນວ່າ:

     “ໄລຍະທີ່ຜ່ານມາ, ແຂວງ ບິ່ງເຢືອງ ໄດ້ມີການປ່ຽນແປງຫຼາຍຢ່າງ ພິເສດແມ່ນການລົງທຶນທາງດ້ານພື້ນຖານໂຄງລ່າງ, ການບໍລິການ, ການສຶກສາ… ຜ່ານນັ້ນສ້າງໂອກາດສ້າງວຽກເຮັດງານທຳ ພ້ອມປົວແປງຊີວິດການເປັນຢູ່ໃຫ້ແກ່ປະຊາຊົນ”.

      ໄລຮອດປີ 2023 ແຂວງ ບິ່ງເຢືອງ ມີຍອດເນື້ອທີ່ 2.700 ຕາລາງກິໂລແມັດ, ມີປະຊາກອນ 2.800.000 ຄົນ ແມ່ນທ້ອງຖິ່ນມີລາຍຮັບສະເລ່ຍໃສ່ຫົວຄົນສູງກວ່າໝູ່ໃນທົ່ວປະເທດບັນລຸປະມານ 8,29 ລ້ານດົ່ງຕໍ່ເດືອນ. ທາງແຂວງວາງເປົ້າໝາຍການເຕີບໂຕເສດຖະກິດ ສະເລ່ຍໄລຍະ 2021 – 2030 ແມ່ນປະມານ 10% ຕໍ່ປີ, ລະດັບ GRDP ສະເລ່ຍໃສ່ຫົວຄົນບັນລຸ 15.700 ກວ່າ USD, ຕາມແຜນກຳນົດພັດທະນາ, ເຖິງປີ 2030 ແຂວງ ບິ່ງເຢືອງ ພະຍາຍາມສູ້ຊົນກາຍເປັນນະຄອນຂຶ້ນກັບສູນກາງ ແລະ ແມ່ນໜຶ່ງໃນບັນດາສູນກາງພັດທະນາອຸດສາຫະກຳການບໍລິການທີ່ຂະຫຍັນຂັນເຄື່ອນ ແລະ ຮອບດ້ານຂອງພາກພື້ນ. ເຖິງປີ 2050 ບິ່ງເຢືອງ ຈະກາຍເປັນສູນກາງຕົວເມືອງອຸດສາຫະກຳ, ການຄ້າ ການບໍລິການລະດັບພາກພື້ນ ແລະ ສາກົນ. ທີ່ກອງປະຊຸມປະກາດແຜນຜັງແຂວງ ບິ່ງເຢືອງ ໄລຍະ 2021 – 2030 ທີ່ຈັດຂຶ້ນໃນເດືອນ ກັນຍາ ທີ່ຜ່ານມາ, ທ່ານນາຍຍົກລັດຖະມົນຕີຫວຽດນາມ ຟ້າມມິງຈິ໊ງ ເນັ້ນໜັກວ່າ:

      “ບິ່ງເຢືອງ ມີທ່າດີໃນການເຊື່ອມຕໍ່ບັນດາເຂດນຳກັນ. ຂະນະທີ່ພັດທະນາລະບົບຄົມມະນາຄົມທີ່ດີກໍ່ຈະສ້າງໃຫ້ມີເຂດພັດທະນາໃໝ່, ສ້າງໃຫ້ມີບັນດາເຂດອຸດສາຫະກຳ, ເຂດຕົວເມືອງ, ເຂດບໍລິການໃໝ່ ຫຼື ສ້້າງບັນດາຄຸນຄ່າໃໝ່ ສ້າງຄວາມສະດວກໃນການສັນຈອນໄປມາໃຫ້ແກ່ປະຊາຊົນ, ຫຼຸດຜ່ອນຄ່າໃຊ້ຈ່າຍ ໂລຈີສະຕິກ, ເພີ່ມລັກສະນະແກ່ງແຍ້ງຂອງສິນຄ້າ”.

      ແຜນຜັງແຂວງບິ່ງເຢືອງ ພາຍຫຼັງທີ່ໄດ້ຜັນຂະຫຍາຍໃນພຶດຕິກຳຕົວຈິງ ຈະສ້າງເງື່ອນໄຂສະດວກໃຫ້ແກ່ແຂວງ ບິ່ງເຢືອງ ເວົ້າລວມ ແລະ ບັນດານະຄອນຂຶ້ນກັບແຂວງ ກໍ່ຄືຫົວໜ່ວຍປົກຄອງຂັ້ນຕ່າງໆພັດທະນາພື້ນຖານໂຄງລ່າງເສດຖະກິດ - ສັງຄົມ, ພື້ນຖານໂຄງລ່າງເຕັກໂນໂລຊີຂໍ້ມູນຂ່າວສານ, ຊັບພະຍາກອນມະນຸດຢ່າງມີປະສິດທິຜົນ. ທ່ານ ຫງວຽນແທັງເຕິມ ປະທານຄະນະກຳມະການປະຊາຊົນນະຄອນ ຖ້ວນອານ ໃຫ້ຮູ້ວ່າ:

      “ເຂດຕົວເມືອງ ຖ້ວນອານ ໄດ້ຮັບການກຳນົດແມ່ນປະຕູຂອງແຂວງ ບິ່ງເຢືອງ ແມ່ນຕົວເມືອງເຊື່ອມຕໍ່ກັບບັນດາຕົວເມືອງທາງທິດເໜືອຂອງແຂວງ ແລະ ນະຄອນ ໂຮ່ຈີມິນ. ພາຍຫຼັງມີແຜນຜັງແຂວງ, ພວກຂ້າພະເຈົ້າຈະດຳເນີນການດັບປັບແຜນຜັງລວມຂອງນະຄອນໃນນັ້ນເອົາໃຈໃສ່ຜັນຂະຫຍາຍການລົງທຶນພື້ນຖານໂຄງລ່າງ ພິເສດແມ່ນພື້ນຖານໂຄງລ່າງຄົມມະນາຄົມ”.