(vovworld)-ໃນລະບົບບັນດາຫໍພິພິດທະພັນແຫ່ງຊາດຫວຽດນາມ, ຫໍພິພິດທະພັນປະຫວັດສາດຫວຽດນາມ ໄດ້ຮັບການສ້າງຕັ້ງກ່ອນໝູ່ບົນພື້ນຖານສືບທອດ ຫໍພິພິດທະພັນ Loui Fino ທີ່ຂຶ້ນສະຖາບັນຄົ້ນຄ້ວາຂອງຝລັ່ງກ່ຽວກັບບັນດາປະເທດອາຊີ ໂດຍຊາວຝລັ່ງ ກໍ່ສ້າງເມ່ືອປີ 1926 ແລະ ສຳເລັດໃນປີ 1932. ມາຮອດປີ 1958, ລັດຖະບານຫວຽດນາມຮັບເອົາການຄຸ້ມຄອງຢ່າງເປັນທາງການ, ຫັນປ່ຽນຈາກຫໍພິພິດທະພັນສິລະປະມາເປັນຫໍພິພິດທະພັນປະຫວັດສາດ ແລະ ນຳເຂົ້າເຄື່ອນໄຫວນັບແຕ່ວັນວັນທີ 3/9/1958. ບັນດາວັດຖຸພັນ, ເອກະສານປະຫວັດສາດໃນຫໍພິພິດທະພັນຈະເຮັດໃຫ້ນັກທ່ອງທ່ຽວເຂົ້າໃຈຢ່າງຮອບດ້ານກ່ຽວກັບບັນດາໄລຍະປະຫວັດສາດຂອງຫວຽດນາມຈາກໄລຍະກ່ອນຕະຫລອດຮອດໄລຍະຕໍ່ສູ້ສ້າງສາ ແລະ ປົກປັກຮັກສາປະເທດຊາດ.
ຫໍພິພິທະພັນປະຫວັດສາດຫວຽດນາມ
ພາບ:internet
|
ຫໍພິພິດທະພັນປະຫວັດສາດຫວຽດນາມ ຖືກແບ່ງເປັນ 2 ເຂດ: ເຂດ A ຕັ້ງຢູ່ຖະຫນົນ ຈາງຕຽນ ຮ່າໂນ້ຍ, ສ່ວນເຂດ B ຕັ້ງຢູ່ເຂດເຮືອນເລກທີ 25 ຖະຫນົນ ຕົງດ໋ານຕໍ່ຫນ້າເຂດ A. ຢູ່ເຂດ A ມີອາຄານຫລັງຫນຶ່ງໄດ້ຮັບການກໍ່ສ້າງດ້ວຍສະຖາປັດຕະຍະກຳແບບຝລັ່ງ. ດ້ວຍເນື້ອທີ່ 4000 ຕາແມັດ ວາງສະແດງວັດຖຸພັນ, ຫໍພິພິດທະພັນຫລັງນີ້ໄດ້ວາງສະແດງວັດຖຸພັນເກືອບ 10.000 ຢ່າງ, ລະບົບວາງສະແດງຕົ້ນຕໍຂອງ ຫໍພິພິດທະພັນແມ່ນອີງຕາມໄລຍະເວລາ, ການສະສົມວັດຖຸພັນ ແລະ ສ່ອງແສງຕາມ ເຫດການປະຫວັດສາດ. ຊັ້ນຫນຶ່ງຂອງ ຫໍພິພິດທະພັນ ແມ່ນວາງສະແດງບັນດາວັດຖຸພັນຕາມຫົວເລື່ອງປະເທດຫວຽດນາມສະໄໝປະຖົມບູຮານກອ່ນນີ້ 300.000-400.000 ປີ ແລະ ຫວຽດນາມ ໄລຍະສ້າງສາຮອດສະໄຫມລາຊະວົງເຈີນ. ນາງ Emma Healy, ນັກທ່ອງທ່ຽວມາຈາກ ອັງກິດ ແບ່ງປັນວ່າ:
“ຄວາມປະທັບໃຈຂອງຂ້າພະເຈົ້າ ນັ້ນແມ່ນຫໍພິພິດທະພັນແຫ່ງນີ້ມີເນື້ອທີ່ກວ້າງໃຫຍ່, ບັນຍາກາດສະຫງົບງຽບເພື່ອໃຫ້ນັກທ່ອງທ່ຽວສາມາດຊອກຮູ້ກ່ຽວກັບປະຫວັດສາດຫວຽດນາມ. ນອກນັ້ນ ຂ້າພະເຈົ້າຍັງມີຄວາມປະທັບໃຈຕໍ່ບັນດາວັດຖຸພັນໃນສະໄໝກອ່ນ ຜ່ານນັ້ນສະແດງໃຫ້ເຫັນການຊອກຫາ, ຄົ້ນຄ້ວາຢ່າງລະອຽດ. ວິທີປະດັບປະດາ ກໍຄືເນື້ອທີ່ວາງສະແດງວັດຖຸພັນຢູ່ຫໍພິພິດທະພັນນີ້ກໍເໝາະສົມ.”
ສິ່ງທີ່ສ້າງຄວາມປະທັບໃຈຕໍ່ຜູ້ຊົມເມື່ອເຂົ້າຊົມຊັ້ນ 1 ຂອງເຂດ A ນັ້ນແມ່ນຄ້ອງບ້າງ 7 ຫນ່ວຍຄື: ຄ້ອງບ້າງດົງເຊີນ, ຄ້ອງບ້າງ ງອກຫລູ, ນົງກົງ, ແທ່ງວີງ… ຖືກຈັດວາງອ້ອມເສົາຫລັກຫນຶ່ງທີ່ຄວັດສະຫຼັກຮູບນົກຫົງ ແລະ ຊາວຫວຽດ ບູຮານ, ບັນດາສັນຍາລັກວັດທະນະທຳທີ່ລືຊື່ຂອງຫວຽດນາມ. ຕໍ່ມາແມ່ນເຂດວາງສະແດງບັນດາວັດຖຸພັນອັນລ້ຳຄ່າຂອງບັນດາກິດຈະກຳສາສະຫນາໃນສະໄຫມລາຊະວົງເຈີນ.
ສ່ວນຢູ່ຊັ້ນ 2, ຜູ້ຊົມຈະເຫັນຮູບໂຕເຕົາພ້ອມດ້ວຍແຜ່ນສີລາເທິງຫຼັງ, ຢູ່ສອງເບື້ອງແມ່ນຮູບຂອງນັກວັດທະນະທຳ ຫງວຽນຈ໋າຍ ພ້ອມກັບບັນດາພາບແຕ້ມບູຮານ ຊຶ່ງວາດພາບເຖິງປະຫວັດສາດຫວຽດນາມ ແຕ່ສະໄຫມລາຊະວົງໂຮ່ ເຖິງສະໄຫມລາຊະວົງຫງວຽນ (ສັດຕະວັດທີ XIV-ປີ1945). ນອກນັ້ນ ຍັງມີບັນດາວັດຖຸພັນຫລາຍຢ່າງເຮັດໃຫ້ຜູ້ຊົມເຂົ້າໃຈກ່ຽວກັບປະຫວັດສາດຂອງຊາດຫວຽດນາມ ແຕ່ສະໄຫມລາຊະວົງໂຮ່ຮອດສະໄຫມລາຊະວົງ ຫງວຽນ. Josh ນັກທ່ອງທ່ຽວມາຈາກ ການາດາ ໃຫ້ຮູ້ວ່າ:
“ມີວັດຖຸພັນຫລາຍຢ່າງທີ່ສ້າງຄວາມປະທັບໃຈ. ຄືເຄື່ອງປັ້ນດິນເຜົາໃນສະໄຫມລາຊະວົງ ລີ, ພະພຸດທະຮູບ, ຮູບວັດ, ລະຄັງບູຮານ…ຫລືຮູບແກະຄວັດສະຫລັກຂອງສະໄຫມລາຊະວົງຕ່າງໆຢູ່ຫວຽດນາມໃນເມື່ອກອ່ນ. ວັດຖຸພັນມີຫລາຍຢ່າງ ອຸດົມສົມບູນ.”
ສ່ວນນາງ Kajimura Kyoto, ຊາວຍີ່ປຸ່ນ ທັງຊົມເບິ່ງທັງຈົດຂໍ້ມູນທີ່ແນະນຳຢູ່ວັດຖຸພັນແຕ່ລະຢ່າງໄວ້. ນາງ Kajimura ໃຫ້ຮູ້ວ່າ:
“ຢູ່ຫໍພິພິດທະພັນນີ້ ມີຈານຫລາຍອັນ, ບັນດາລວດລາຍຂອງມັນງາມຫລາຍ ຊື່ງຢູ່ ຍີ່ປຸ່ນ ບໍ່ມີ. ຮູບຖັກແສ່ວ 100 ຕົວຫນັງສື…ນີ້ຂ້າພະເຈົ້າມັກຫລາຍ. ຫວຽດນາມ ມີສີລະປະກຳຖັກແສ່ວເກັ່ງ ແລະ ງາມຫລາຍ. ຜ່ານນັ້ນ ຂ້າພະເຈົ້າເຂົ້າໃຈຫລາຍຢ່າງກ່ຽວກັບວັດທະນະທຳພື້ນເມືອງຂອງຫວຽດນາມ.”
ແລະຢູ່ຊັ້ນ 2 ຂອງຫໍພິພິດທະພັນແຫ່ງນີ້ ຍັງມີຫ້ອງວາງສະແດງຫົວເລື່ອງສະເພາະກ່ຽວກັບສິລະປະປະຕິມາກຳຫີນ ຈຳປາ ແລະ ວັດທະນະທຳ ອອກແອວ ຟູ່ນາມຈາກສັດຕະວັດທີ 7 – 13 ດ້ວຍວັດຖຸພັນກວ່າ 50 ຢ່າງທີ່ເກັບກຳມາໄດ້ຈາກບັນດາແຂວງຄື: ກວ໋າງບີງ, ກວ໋າງນາມ, ບີງດີງ…
ບໍ່ຄືກັບເຂດ A ຂອງຫໍພິພິດທະພັນປະຫວັດສາດຫວຽດນາມ, ເມື່ອເຂົ້າຢ້ຽມຊົມເຂດ B ຢູ່ຖະຫນົນ ຕົງດ໋ານ, ນັກທ່ອງທ່ຽວຈະໄປຢ້ຽມຊົມຈາກຊັ້ນ 2 ກ່ອນ ແລ້ວຈຶ່ງລົງຊັ້ນ 1. ຢູ່ທີ່ນີ້ ມີຫ້ອງວາງສະແດງ 29 ຫ້ອງ ຊື່ງແມ່ນບ່ອນເກັບຮັກສາບັນດາວັດຖຸພັນ, ເອກະສານ, ຮູບພາບໃນສົງຄາມຍາດເອົາເອກະລາດຂອງຊາດ ແຕ່ປີ 1858 -1945 ແລະ ໄລຍະ 30 ປີແຫ່ງການຕໍ່ຕ້ານ ປົກປັກຮັກສາເອກະລາດ ແລະ ໂຮມປະເທດຊາດເປັນເອກະພາບ(1945-1975).
ຫໍພິພິດທະພັນປະຫວັດສາດຫວຽດນາມ ແມ່ນບ່ອນເກັບຮັກສາ ແລະ ວາງສະແດງບັນດາມໍລະດົກວັດທະນະທຳອັນລ້ຳຄ່າຂອງຊາດ. ນີ້ກໍແມ່ນສະຖານທີ່ແນະນຳປະຫວັດສາດຜ່ານບັນດາວັດຖຸພັນທີ່ຫາຍາກ, ຊ່ວຍໃຫ້ຜູ້ຊົມເຂົ້າໃຈກ່ຽວກັບປະຫວັດສາດມີມາແຕ່ດົນນານກໍຄືວິວັດທະນາການສ້າງສາ ແລະ ປົກປັກຮັກສາປະເທດຊາດຂອງຊາດຫວຽດນາມ. ໃນໄລຍະຈະມາເຖິງ, ຫໍພິພິດທະພັນຈະສືບຕໍ່ແນະນຳໃຫ້ນັກທ່ອງທ່ຽວພາຍໃນ ແລະ ຕ່າງປະເທດ ບັນດາວັດຖຸພັນທີ່ສະສົມມາໄດ້, ບັນດາຫ້ອງວາງສະແດງຫົວເລື່ອງສະເພາະໃຫມ່ ເພື່ອຮັບໃຊ້ຄວາມຕ້ອງການຮັບຊົມ ແລະ ຊອກຮູ້ກ່ຽວກັບປະຫວັດສາດຂອງຜູ້ຊົມ.