(vovworld) - ໃນສະພາບການດຳລົງຊີວິດທີ່ເຕັມໄປດ້ວຍຄວາມລຳບາກ, ຫາທາງລ້ຽງຊີບນັ້ນ, ແຕ່ຍັງມີຜູ້ທີ່ໄດ້ສະຫງວນເວລາປິ່ນປົວພະຍາດໂດຍບໍ່ເສຍຄ່າໃຫ້ຜູ້ທີ່ທຸກຍາກ. ນັ້ນແມ່ນອະດີດທ່ານໝໍເສນາຮັກ Dang Cat, ຢູ່ເມືອງໄຕໂຮ່, ຮ່າໂນ້ຍ.
ທ່ານໝໍ Dang Cat
ຂ້າພະເຈົ້າໄດ້ພົບປະກັບອະດີດທ່ານໝໍເສນາຮັກ Dang Cat ໃນເຮືອນຫຼັງນ້ອຍທີ່ມີເນື້ອທີ່ປະມານ 10 ຕາລາງແມັດ, ຢູ່ຮ່ອມບ້ານ 416 ຖະໜົນຫຼາກລອງກວນ, ເມືອງໄຕໂຮ່, ຮ່າໂນ້ຍ. ນີ້ແມ່ນແຫ່ງທີ່ທ່ານກວດ ແລະ ປິ່ນປົວພະຍາດໃຫ້ແກ່ຄົນເຈັບນັບສິບຄົນໃນແຕ່ລະວັນ. ທ່ານໄດ້ເວົ້າຄວາມໃນໃຈສູ່ຟັງວ່າ: ກວ່າ 30 ປີ ແຫ່ງການຮັບໃຊ້ໃນກອງທັບ ຜ່ານສອງໄລຍະແຫ່ງການຕໍ່ຕ້ານຄືຕ້ານພວກລ່າເມືອງຂຶ້ນຝຼັ່ງ ແລະ ຈັກກະພັດອາເມລິກາ. ທ່ານຖືກຈັດສົ່ງໄປຮຽນ ແລະ ຕິດພັນກັບອາຊີບນັ້ນມາຮອດປະຈຸບັນ. ໃນໄລຍະນັ້ນ, ທ່ານໄດ້ມີໜ້າຢູ່ສະໜາມຮົບເກືອບທັງໝົດຈາກເໜືອຮອດໃຕ້ ເພື່ອກວດ, ປິ່ນປົວພະຍາດໃຫ້ແກ່ບັນດານັກຮົບໃນກອງທັບ, ພໍ່ແມ່ປະຊາຊົນຢູ່ໝູ່ບ້ານຕ່າງໆ ນັບທັງປະຊາຊົນສອງປະເທດລາວ ແລະ ກຳປູເຈຍ. ການປະຕິບັດງານດັ່ງກ່າວໄດ້ກາຍເປັນອະນຸສອນຫຼາຍຢ່າງທີ່ໜ້າຈົດຈຳສຳລັບທ່ານ:
”ອະນຸສອນທີ່ໜ້າຈື່ຈຳທີ່ສຸດນັ້ນແມ່ນ, ປີ 1965, ເມື່ອຢູ່ກາງປ່າໃນເຂດໄຕບັກ (ທາງທິດຕາເວັນຕົກສ່ຽງເໜືອ) ສະຫາຍ Dinh Xuan Bi ບາດເຈັບໂດຍສາຍເອັນສົ້ນຕີນຂາດ, ບໍ່ສາມາດຍ່າງໄດ້, ຂ້າພະເຈົ້າໄດ້ຕໍ່ສາຍເອັນນັ້ນສຳເລັດຜົນ, ອັນໄດ້ຊ່ວຍໃຫ້ສະຫາຍ Bi ສືບຕໍ່ການສູ້ຮົບຢູ່ໃນເຂດດັ່ງກ່າວ. ຈາກນັ້ນ, ຂ້າພະເຈົ້າຈຶ່ງເມົາມົວກັບການຄົ້ນຄ້ວາວິທະຍາສາດ”.
ທ່ານໝໍ Dang Cat
ສຳຫຼັບທ່ານແລ້ວ, ເພື່ອຍົກສູງປະສິດທິຜົນແຫ່ງການປິ່ນປົວພະຍາດ ຈຳເປັນຕ້ອງມີການສົມທົບລະຫວ່າງການແພດຫຼວງກັບການແພດພື້ນເມືອງ, ພິເສດແມ່ນສຳຫຼັບບັນດາພະຍາດອັນຕະລາຍ. ມີຫຼາຍພະຍາດທ່ານຕ້ອງສະຫງວນເວລາຫຼາຍວັນເພື່ອຄົ້ນຄ້ວາ, ຊອກຫາວິທີປິ່ນປົວ. ທ່ານໄດ້ຄົ້ນຄ້ວາສຳເລັດ ແລະ ປິ່ນປົວພະຍາດ ແມ່ທ້ອງແປ, ແລະ ພະຍາດເຈັບຄໍ, ບ່າໄຫຼ່, ງ່ອນ, ກະດູກສັນຫຼັງຢ່າງມີປະສິດທິດຜົນ. ຍ້ອນເຫດນັ້ນ, ພໍ່ແມ່ປະຊາຊົນ, ຜູ້ໃດກໍ່ມີຄວາມໄວ້ເນື້ອເຊື່ອໃຈ, ເພິ່ງພາອາໄສທ່ານ ເມື່ອຄອບຄົວມີຄົນເຈັບແຕ່ໄປໂຮງໝໍບໍ່ທັນ. ທ່ານ Do Van Long, ຢູ່ໜ່ວຍ 19, ກຸ່ມ 3 ເມືອງ ໄຕໂຮ່, ທັງແມ່ນຄົນຢູ່ໃກ້ຊິດ, ເປັນເພື່ອນຮ່ວມກົມກອງ, ທັງແມ່ນຄົນເຈັບທີ່ໄດ້ຮັບການປິ່ນປົວຈາກທ່ານ ທ່ານໝໍ Dang Cat ຢ່າງສຸດຈິດສຸດໃຈ, ໄດ້ເວົ້າດ້ວຍຄວາມຕື້ນຕັນໃຈວ່າ:
”ປີ 1999, ຂ້າພະເຈົ້າເປັນພະຍາດ U (ກ້ອນເບົ້າ)ຢູ່ ຂະໝັບຊ້າຍ, ແຕ່ພາຍຫຼັງໄດ້ຮັບການປິ່ນປົວມາເປັນເວລາດົນພໍສົມຄວນຈາກທ່ານໝໍ, ດ້ວຍການສັກຢາຕ້ານເຊື້ອປະມານ 200 ຄັ້ງ, ພະຍາດຂອງຂ້າພະເຈົ້າເຊົາ. ຂ້າພະເຈົ້ານິຍົມນັບຖືທ່ານໝໍທີ່ສຸດ ແລະ ຖືລາວແມ່ນຜູ້ກູ້ເອົາຊີວິດຂອງຕົນ”.
ທ່ານໝໍ Dang Cat ພັກກິນເບ້ຍບຳນານນັບແຕ່ປີ 1989, ແຕ່ 20 ກວ່າປີທີ່ຜ່ານມາ, ທ່ານຍັງຄົງໄປຍັງຄອບຄົວຄົນເຈັບເພື່ອກວດ ແລະ ປິ່ນປົວພະຍາດໃຫ້ແກ່ເຂົາເຈົ້ານັບທັງມື້ຝົນຕົກຫຼືແດດຮ້ອນ. ໃນສິບປີທີ່ຜ່ານມາ, ມີຫຼາຍຄອບຄົວຢາກມອບຂອງຂວັນ, , ເງິນສົດ, ຫຼືວັດຖຸທີ່ມີຄ່າໃຫ້ທ່ານ ເພື່ອສະແດງຄວາມຮູ້ບຸນຄຸນຕໍ່ຜູ້ທີ່ໄດ້ປິ່ນປົວພະຍາດໃຫ້ແກ່ຍາດຕິພີ່ນ້ອງຂອງຕົນ, ແຕ່ທ່ານພັດບໍ່ເອົາ. ຊ້ຳບໍ່ໜຳ, ມີບາງອົງການຈັດຕັ້ງ, ສ່ວນບຸກຄົນຜູ້ທີ່ມີໃຈບຸນ, ໃຈກຸສົນຢາກຊ່ວຍທ່ານເປີດຫ້ອງກວດພະຍາດ, ແຕ່ທ່ານກໍ່ປະຕິເສດ, ດ້ວຍສາຍເຫດທີ່ວ່າ ”ເຂົາເຈົ້າມີຄວາມຕ້ອງການ, ຂ້າພະເຈົ້າຈະຊ່ວຍໃຫ້” ດັ່ງນັ້ນບໍ່ຕ້ອງຕອບບຸນແທນຄຸນ, ບໍ່ຕ້ອງຈ່າຍເງິນອີກ. ປ້າ Le Bich Thinh, ອາຍຸກວ່າ 70 ປີ, ຢູ່ ຮ່າດົງ, ນະຄອນຮ່າໂນ້ຍ ເຄີຍເຈັບຕີນຍ້ອນຖືກອຸບັດຕິເຫດ, ແລະ ເຈັບກະເພາະ ເປັນປະຈຳເວົ້າວ່າ:
”ຖ້າຢາມີລາຄາຖືກທ່ານຈະບໍ່ເອົາ, ສ່ວນຢາແພງ ແລະ ນຳເຂົ້າຈາກຕ່າງປະເທດທ່ານຈະຊ່ວຍຊື້ໃຫ້. ພິເສດແມ່ນເຖິງວ່າຈະແມ່ນກາງຄືນ, ຫຼືຝົນຕົກ, ແດດຮ້ອນທ່ານກໍ່ໄປກວດພະຍາດໃຫ້ແກ່ຄົນເຈັບ. ພາຍຫຼັງກວດພະຍາດແລ້ວ, ທ່ານໝໍຈຶ່ງແນະນຳຊື້ຢາປະເພດໃດ ຫຼື ຄວນກິນຫຍັງ, ບໍ່ຄວນກິນຫຍັງຢ່າງຈິງໃຈ”
ທ່ານໝໍ Dang Cat
ໂດຍແມ່ນຜູ້ທີ່ເຄີຍເປັນຫົວໜ້າກອງເສນາຮັກຕຳຫຼວດປະກອບອາວຸດແຂວງເຊີນລາ, ເປັນຫົວໜ້າກອງເສນາຮັກໂຮງຮຽນນາຍທະຫານປ້ອງກັນຊາຍແດນ ແລະ ໄດ້ຮັບການຕີລາຄາສູງຈາກວົງການນັກວິຊາການ ໃນການກວດ ແລະ ປິ່ນປົວພະຍາດ, ດັ່ງນັ້ນທ່ານ Dang Cat ຍາມໃດກໍ່ຄິດວ່າ: ຊີວິດແມ່ນທຶນຮອນອັນລ້ຳຄ່າ, ຖ້າຍັງມີຊີວິດແມ່ນຍັງມີທຶນຮອນຢູ່. ຜູ້ໃດມີຄວາມຕ້ອງການ, ທ່ານກໍ່ຊ່ວຍເຫຼືອຢ່າງຈິງໃຈ. ທ່ານບໍ່ພຽງແຕ່ກວດ ແລະ ປິ່ນປົວພະຍາດເທົ່ານັ້ນ, ຫາກຍັງໂຄສະນາຄວາມຮູ້ຕ່າງໆໃຫ້ຄົນເຈັບ ເພື່ອໃຫ້ເຂົາເຈົ້າຮັກສາສຸຂະພາບດ້ວຍຕົວເອງອີກດ້ວຍ. ທ່ານ Dang Cat ຖືວ່າ:
”ສຸຂະພາບແມ່ນເງິນຄຳ, ເຮົາຕ້ອງຮູ້ສຸຂະພາບຂອງຕົນເພື່ອກັນພະ ຍາດໃຫ້ດີ. ພິເສດແມ່ນບໍ່ຄວນສູບຢາ, ບໍ່ຄວນດື່ມເຫຼົ້າ, ເບຍ, ອາຫານຕ້ອງຮັບປະກັນຫຼັກອະນາໄມ ແລະ ຕ້ອງເຄົາລົບວິທະຍາສາດ. ຂ້າພະເຈົ້າຄິດວ່າ, ເຮົາມີຄວາມສາມາດຄືແນວໃດ ກໍ່ຮັບໃຊ້ຄົນເຈັບຄືແນວນັ້ນ, ວິທີຂອງຂ້າພະເຈົ້າແມ່ນ ຕ້ອງເຮັດແນວໃດສ້າງຄວາມສະດວກທີ່ສຸດ, ງ່າຍດາຍທີ່ສຸດ, ແລະ ມີປະສິດທິຜົນທີ່ສຸດ. ດັ່ງນັ້ນ, ຢູ່ບ່ອນໃດປະຊາຊົນມີຄວາມຕ້ອງການ, ຂ້າພະເຈົ້າຈະໄປຍັງບ່ອນນັ້ນ”.
ທ່ານ Dang Cat ຄິດວ່າ, ເມື່ອຄົບເຈັບຍັງມາຫາທ່ານເພື່ອກວດ ແລະ ປິ່ນປົວພະຍາດ, ໝາຍຄວາມວ່າເຂົາເຈົ້າມີຄວາມໄວ້ເນື້ອເຊື່ອໃຈ ຕໍ່ທ່ານ, ດັ່ງນັ້ນທ່ານຕ້ອງປິ່ນປົວພະຍາດໃຫ້ແກ່ເຂົາເຈົ້າຢ່າງສຸດຈິດສຸດໃຈ ເພື່ອນຳມາເຊິ່ງສຸຂະພາບໃຫ້ແກ່ຄົນເຈັບ.