(vovworld)- ມາຢ້ຽມຢາມ ເທດສະບານຊາປາ ແຂວງ ລາວກາຍ, ນັກທ່ອງທ່ຽວມັກຖ່າຍຮູບຢູ່ໂບດຫີນ, ຂຶ້ນພູ ຮ່າມຣົ່ງ ແລະ ຍ່າງເລາະຫລິ້ນຢູ່ຕາມບັນດາສາຍທາງທີ່ເຕັມໄປດ້ວຍນ້ຳໝອກ. ຊາປາ ບໍ່ພຽງແຕ່ມີຄືແນວນັ້ນ. ຫາກຈຸດພົ້ນເດັ່ນຢູ່ ຊາປາ ນັ້ນແມ່ນ ສີສັນວັດທະນະທຳຂອງບັນດາໝູ່ບ້ານຊາວຊົນເຜົ່າຢູ່ທີ່ນີ້. Homestay ແມ່ນຮູບການທ່ອງທ່ຽວວົງຄະນາຍາດ ໂດຍຊາວທ້ອງຖິ່ນດຳເນີນທຸລະກິດເອງ.
ນັກທ່ອງທ່ຽວຕ່າງປະເທດພັກຜ່ອນນຳຄອບຄົວຊາວຊົນເຜົ່າ
ຢູ່ບ້ານ ຕ໋າວານ-ຊາປາ
ພາບ:internet
|
ຕາແສງ ຕ໋າວານ ຫ່າງຈາກໃຈກາງເທດສະບານ ຊາປາ ປະມານ 20 ກິໂລແມັດ. ຈາກ ຊາປາ ນັກທ່ອງທ່ຽວໄປຕາມເນີນພູ, ເບື້ອງຫນຶ່ງແມ່ນປ່າໄມ້, ເບື້ອງຫນຶ່ງແມ່ນນາຂັ້ນໄດ. ເມື່ອມາຮອດ ຕາແສງ ຕ໋າວານ ນັກທ່ອງທ່ຽວເຄີຍເຂົ້າຢ້ຽມຢາມ ບ້ານ ຕ໋າວານໄຢ ທີ່ສະຫງົບງຽບ. ຢູ່ບ້ານແຫ່ງນີ້, ນັກທ່ອງທ່ຽວຈະພົບເຫັນບັນດາປ້າຍໂຄສະນານ້ອຍໆ ດ້ວຍແຖວຫນັງສືທີ່ວ່າ Homestay, ຊື່ງແມ່ນຮູບການທ່ອງທ່ຽວຖືກນຳເຂົ້າເຄື່ອນໄຫວເມື່ອປີ 1995.
ລຸງຮ່ວາງໝຸກ ຊື່ງແມ່ນຜູ້ທຳອິດຢູ່ ບ້ານ ຕ໋າວານໄຢ ເຮັດບໍລິການທ່ອງທ່ຽວແບບນີ້. ໂອກາດທີ່ພາໃຫ້ລຸງສຳພັດກັບບໍລິການ Homestay ແມ່ນບັງເອີນທີ່ສຸດ. ມື້ຫນຶ່ງ ບັງເອີນມີຜູ້ນຳທ່ຽວ ພານັກທ່ອງທ່ຽວຕ່າງປະເທດມາຢ້ຽມຢາມ ບ້ານ ຕ໋າວານໄຢ ເຂົາເຈົ້າໄປຢ້ຽມຊົມທິວທັດທຳມະຊາດຈົນເດິກ ສະນັ້ນ ຈຶ່ງຂໍອະນຸຍາດໄດ້ພັກຜ່ອນຢູ່ເຮືອນຄອບຄົວລຸງ.
“ຂ້າພະເຈົ້າດຳລົງຊີວິດຢູ່ທີ່ນີ້ມາແຕ່ດົນນານແລ້ວ. ພາຍຫລັງ ລັດອະນຸຍາດໃຫ້ນັກທ່ອງທ່ຽວມາຢ້ຽມຢາມ ບ້ານ ຕ໋າວານໄຢ, ຄອບຄົວຂ້າພະເຈົ້າເປັນຄອບຄົວທຳອິດຕ້ອນຮັບແຂກ ເມື່ອປີ 1995-1996 ແລະ ແຂກທ່ອງທ່ຽວຜູ້ທຳອິດມາກິນຢູ່ນຳຄອບຄົວຂ້າພະເຈົ້າແມ່ນມາຈາກ ດານມາກ.”
ຊາວຊົນເຜົ່າຢູ່ບ້ານຕ໋າວານ ເຮັດບໍລິການHomestay
ພາບ:baotintuc.vn
|
Homestay ແມ່ນຮູບການທ່ອງທ່ຽວເພື່ອໃຫ້ແຂກທ່ອງທ່ຽວກິນຢູ່ໃນຄອບຄົວຂອງຊາວຊົນເຜົ່າ ເພື່ອຊອກຮູ້ກ່ຽວກັບຊີວິດຕົວຈິງກໍຄືອະດີດຕະການ. ແຂກທ່ອງທ່ຽວໄດ້ເຊື່ອມຕົວເຂົ້າກັບວັດທະນະທຳຂອງຊາວຊົນເຜົ່າ, ຜ່ານນັ້ນຈະເຂົ້າໃຈແຈ້ງກ່ຽວກັບສີສັນວັດທະນະທຳ, ຮີດຄອງປະເພນີ ແລະ ແບບແຜນການດຳລົງຊີວິດຂອງຊາວຊົນເຜົ່າຢູ່ ຕ໋າວານໄຢ.
ນັກທ່ອງທ່ຽວມາຢ້ຽມຢາມ ຕ໋າວານໄຢ ສ່ວນຫລາຍແມ່ນມາຈາກ ອັງກິດ, ຝລັ່ງ, ເຢຍລະມັນ, ສະວິດ, ນອກແວ. ເຖິງວ່າພາສາເວົ້າແມ່ນແຕກຕ່າງກັນກໍຕາມ ແຕ່ເມື່ອໂອ້ລົມກັບເຈົ້າຂອງເຮືອນ ກໍສ້າງໃຫ້ນັກທ່ອງທ່ຽວບັນດາອະນຸສອນຍາກທີ່ຫລົງລືມໄດ້.
ແຂກ: ຄອບຄົວຂອງທ່ານມີຈັກຄົນ
ເຈົ້າຂອງເຮືອນ: ຂ້າພະເຈົ້າມີລູກ 10 ຄົນ, ຊາຍ 4 ຄົນ, ຍິງ 6 ຄົນ
ແຂກ: ເຮືອນຫລັງນີ້ແມ່ນໃຫຍ່ໂຕ, ລູກ 10 ຄົນທັງໝົດຂອງທ່ານລ້ວນແຕ່ດຳລົງຊີວິດຢູ່ທີ່ນີ້ເລີຍ ຫລືຢູ່ບ່ອນອື່ນ.
ເຈົ້າຂອງເຮືອນ: ລູກກົກຂອງຂ້າພະເຈົ້າສ້າງຄອບຄົວແລ້ວ, ສ່ວນລູກຊາຍ 2 ຄົນບໍ່ທັນສ້າງຄອບຄົວ ສະນັ້ນພວກຫລານລ້ວນແຕ່ຢູ່ນຳຂ້າພະເຈົ້າ.
ແຂກ: ຄອບຄົວຂອງທ່ານຮັບນັກທ່ອງທ່ຽວເຂົ້າພັກຜ່ອນໃນແຕ່ລະມື້ ແມ່ນບໍ່
ເຈົ້າຂອງເຮືອນ: ແມ່ນແລ້ວ, ຕ້ອນຮັບແຂກເປັນປະຈຳ.
ທ່ານນາງ Maja, ນັກທ່ອງທ່ຽວມາຈາກ ນອກແວ ຮູ້ສຶກປະທັບໃຈຕໍ່ທິວທັດທຳມະຊາດກໍຄືແບບແຜນການດຳລົງຊີວິດຂອງຊາວເຜົ່າໄຢ ຢູ່ ຊາປາ. ມາດຳລົງຊີວິດໃນເຮືອນທ່ານ ໝຸກ ບໍ່ຈັກເທົ່າໃດມື້ ແຕ່ນາງ Maja ໄດ້ສະຫງວນອາລົມຈິດ ແລະ ເຈດຕະນາດີໃຫ້ແກ່ບັນດາສະມາຊິກໃນຄອບຄົວກໍຄືຊາວເຜົ່າໄຢຢູ່ ຕ໋າວານ.
“ນີ້ແມ່ນລາຍການທ່ອງທ່ຽວສ້າງຄວາມປະທັບໃຈທີ່ສຸດ, ທິວທັດທຳມະຊາດຢູ່ທີ່ນີ້ຈັບອົກຈັບໃຈຫລາຍ. ພິເສດຈາກເທິງພູຫລຽວເບິ່ງລົງເຫັນວ່າ ມີນາຂັ້ນໄດງາມທີ່ສຸດ. ຢູ່ປະເທດພວກຂ້າພະເຈົ້າບໍ່ມີຮູບພາບທິວທັດທຳມະຊາດຄືແນວນີ້. ມາຢ້ຽມຢາມໝູ່ບ້ານນີ້ ຂ້າພະເຈົ້າຍັງໄດ້ເຫັນປະຈັກຕາບັນດາເຄື່ອງສິລະປະຫັດຖະກຳ ແລະ ຊາວຊົນເຜົ່າທຸກຄົນລ້ວນແຕ່ນຸ່ງຊຸດພື້ນເມືອງງາມຫລາຍ. ເຖິງວ່າ ບໍ່ມີເວລາຫລາຍເພື່ອພັກຜ່ອນຢູ່ນີ້ ແຕ່ຂ້າພະເຈົ້າເຫັນວ່າ ປະຊາຊົນຢູ່ທີ່ນີ້ແມ່ນຜູ້ຮັກແພງແຂກຄົນ, ເປີດອົກເປີດໃຈ.”
ກ່ອນນີ້, ນັກທ່ອງທ່ຽວຕ່າງປະເທດເມື່ອໄປຢ້ຽມຢາມບ້ານຕ່າງໆຢູ່ ຊາປາແລ້ວ ລ້ວນແຕ່ກັບຄືນພັກຜ່ອນຢູ່ໂຮງແຮມໃນເທດສະບານ ຊາປາ ແຕ່ປະຈຸບັນ ເຂົາເຈົ້າມັກພັກຜ່ອນຢູ່ບ້ານຊາວຊົນເຜົ່າກວ່າ. ຢູ່ທີ່ນີ້ ເຂົາເຈົ້າຮູ້ສຶກໄດ້ຄວາມໃກ້ຊິດສະຫນິດສະຫນົມ, ຄວາມຮັກແພງແຂກຄົນຂອງຊາວບ້ານ ແລະ ໄດ້ຢ້ຽມຊົມ ທິວທັດທຳມະຊາດສວຍງາມຢູ່ທີ່ນີ້.