(vovworld) - ເກາະຮ່ອນຄວາຍ ຢູ່ຫ່າງຈາກດິນຕໍ່ແຜ່ນປະມານ 20 ກມ ແລະ ຂຶ້ນກັບເທດສະບານນຳກັນ, ເມືອງງອກຫຽນ, ແຂວງກ່າເມົາ ແມ່ນໜຶ່ງໃນບັນດາເກາະງາມກວ່າໝູ່ຢູ່ພາກໃຕ້ຫວຽດນາມ, ດ້ວຍອາກາດທີ່ປອດໂປ່ງ, ຫາດຊາຍທະເລຂຽວສະອາດ ພ້ອມກັບເຂດປ່າດົງດິບ. ຜູ້ຄົນທັງຫຼາຍຍັງຮູ້ຈັກເຖິງເກາະຮ່ອນຄວາຍ ດ້ວຍປູຊະນີຍະສະຖານແຫ່ງການລຸກຮຶ້ຂຶ້ນຕ້ານຝລັ່ງຂອງຄູສອນ ຟ້າມງອກຫ່ຽນ ແລະ ໂຄມໄຟທະເລຢູ່ເທິງເກາະທີ່ມີມາກ່ອນນີ້ນັບ 100 ປີ. ທັງໝົດເຫຼົ່ານັ້ນ ໄດ້ສ້າງຄວາມດູດດື່ມໃຫ້ແກ່ນັກທ່ອງທ່ຽວ.
ນັກທ່ອງທ່ຽວໄປຢ້ຽມຢາມເກາະຮ່ອນຄວາຍ
(ພາບ: ອິນເຕີແນດ)
ເກາະຮ່ອນຄວາຍແມ່ນໝູ່ເກາະລວມມີເກາະໃຫຍ່ນ້ອຍທັງໝົດ 5 ແຫ່ງນັ້ນແມ່ນເກາະຮ່ອນຄວາຍ, ຮ່ອນຊາວ, ຮ່ອນໂດ່ຍໂມ່ຍ, ຮ່ອນດ໋າແຫຼ, ຮ່ອນເຕືອງ ດ້ວຍເນື້ອທີ່ທັງໝົດກວ່າ 4 ຕາລາງກມ. ໃນນັ້ນເກາະທີ່ມີລະດັບສູງສຸດແມ່ນ 318 ແມັດ. ເກາະຮ່ອນຄວາຍ ກ່ອນນີ້ມີຊື່ວ່າ ເກາະຢ໋າງເຮືອງ ຫຼື ເກາະເອກະລາດ, ແຕ່ຊາວທ້ອງຖີ່ນມັກເອີ້ນວ່າຮ່ອນຄວາຍ ເພາະວ່າມັນມີຮູບຮ່າງຄືມັນດາງຫົວໃຫຍ່. ຮ່ອນຄວາຍ ບໍ່ພຽງແຕ່ແມ່ນທັດສະນີຍະພາບທີ່ສວຍງາມຂອງແຂວງກ່າເມົາ ເທົ່ານັ້ນ, ຫາກຍັງແມ່ນປູຊະນີຍະສະຖານປະຫວັດສາດທີ່ມີຊື່ສຽງຢູ່ທິດຕາເວັນຕົກຂອງພາກໃຕ້ອີກດ້ວຍ. ວັນທີ 13/12/1940, ຄູສອນ, ນັກຮົບປະຕິວັດ ຟານງອກຫຽນ ໄດ້ບັນຊາທະຫານລຸກຮຶ້ຂຶ້ນຢືດຄອງເກາະຮ່ອນຄວາຍ, ສ້າງເປັນຂີດໝາຍອັນສະຫງ່າລາສີໃນປະຫວັດແຫ່ງການຕໍ່ສູ້ຕ້ານສັດຕູຕ່າງດ້າວຂອງທະຫານ ແລະ ປະຊາຊົນຢູ່ເຂດໃຕ້ສຸດຂອງປະເທດຊາດ.
ນອກຈາກບັນດາຫາດຊາຍທະເລທີ່ສວຍງາມແລ້ວ, ຮ່ອນຄວາຍ ຍັງມີຫາດຫີນຫຼາຍແຫ່ງທີ່ປະກອບດ້ວຍໂງ່ນຫີນຮູບມົນຄືໄຂ່ໜ່ວຍໃຫຍ່ອີກດ້ວຍ. ເພື່ອໄປເຖິງບ່ອນສູງສຸດຂອງເກາະ, ນັກທ່ອງທ່ຽວຕ້ອງຂ້າມປ່າດົງດິບ ແລະ ຂຶ້ນພູ. ອ້າຍ ຫງວຽນແອງຕ໋ວນ, ພະນັກງານທີ່ເຮັດວຽກໃນເກາະຮ່ອນຄວາຍ ເປັນເວລາຫຼາຍປີໃຫ້ຮູ້ວ່າ:
“ຮ່ອນຄວາຍມີລະບົບປ່າດົງດິບ, ໃນນັ້ນມີພືດສາຊາດໄມ້ຫຼາຍປະເພດ. ຕາມຕົວເລກສະຖິຕິຂອງບັນດາຄະນະນັກສຳຫຼວດແລ້ວ, ຢູ່ເກາະແຫ່ງນີ້ມີພືດກວ່າ 1400 ປະເພດສາມາດຜະລິດຢາປົວພະຍາດໄດ້, ນອກນັ້ນຍັງມີສັດຫຼາຍປະເພດຄື: ງູ, ກະຮອກ, ນົກ, ໂຕແລນ…, ດັ່ງນັ້ນຮ່ອນຄວາຍ ຈຶ່ງມີຄູນຄ່າທີ່ສຸດກ່ຽວກັບລະບົບສັດ ແລະ ຊາດໄມ້, ຮ່ອນຄວາຍ ມີຄວາມງາມຂອງປ່າດົງດິບ, ມີອາກາດປອດໂປ່ງ, ສົມກັບການທ່ອງທ່ຽວບຳລຸງສຸຂະພາບ”.
ເຫາດຫີນໃນເກາະຮ່ອນຄວາຍ
(ພາບ: ອິນເຕີແນດ)
ປະຈຸບັນ, ຢູ່ບ່ອນສູງສຸດຂອງຮ່ອນຄວາຍ ຍັງຄົງຮັກສາໂຄມໄຟທະເລ ໂດຍຊາວຝລັ່ງ ກໍ່ສ້າງແຕ່ສະຕະວັດທີ 19 ໄວ້ຄືເກົ່າ, ນີ້ແມ່ນໂຄມໄຟທີ່ສຳຄັນຢູ່ເຂດທະເລທາງທິດຕາເວັນຕົກສ່ຽງໃຕ້ ແລະ ອ່າວໄທ. ໂຄມໄຟທະເລມີຮູບຈັດຕຸລັດ ແລະ ຖືກກໍ່ສ້າງດ້ວຍຫີນສີຂຽວ ແລະ ຊີມັງ. ອ້າຍ ຫງວຽນຮ່ວາຍນາມ, ຫົວໜ້າສະຖານີໂຄມໄຟທະເລຮ່ອນຄວາຍ, ໃຫ້ຮູ້ວ່າ, ໂຄມໄຟທະເລຮ່ອນຄວາຍ ແມ່ນໜຶ່ງໃນບັນດາໂຄມໄຟທີ່ໄດ້ຮັບການກໍ່ສ້າງກ່ອນໝູ່ຢູ່ເຂດທະເລຂອງຫວຽດນາມ.
“ສະຖານີໂຄມໄຟທະເລນີ້ໂດຍຊາວຝລັ່ງກໍ່ສ້າງ ແລະ ຕິດພັນກັບໄຊຊະນະປະຫວັດສາດຂອງນັກຮົບທີ່ເສຍສະຫຼະຊີວິດເພື່ອຊາດ ຟານງອກຫຽນ. ໂຄມໄຟນີ້ຖືກກໍ່ສ້າງໃນເນື້ອທີ່ 400 ຕາລາງແມັດ ດ້ວຍຄວາມສູງ 318 ແມັດ ເທື່ອທຽບໃສ່ໜ້ານ້ຳທະເລ, ຢືນຢູ່ສະຖານີໂຄມໄຟນີ້ສາມາດເຫັນໄດ້ທັດສະນີຍະພາບທີ່ສວຍງາມຂອງທະເລໃນບໍລິເວັນໄກກວ່າ 40 ໄມທະເລ. ພວກຂ້າພະເຈົ້າອະນຸລັກຮັກສາເຂດປູຊະນີຍະສະຖານນີ້ເປັນປະຈຳ ແລະ ຮັກສາເຂດນີ້ໃຫ້ສະອາດ ແລະ ສວຍງາມ ເພື່ອໃຫ້ນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາຢ້ຽມຢາມນັບມື້ນັບຫຼາຍ”
ສະຖານີໂຄມໄຟທະເລໃນເກາະຮ່ອນຄວາຍ
(ພາບ: ອິນເຕີແນດ)
ນອກຈາກຄົ້ນຫາທຳມະຊາດ, ໄປຢ້ຽມຢາມບັນດາປູຊະນີຍະສະຖານປະຫວັດສາດໃນເກາະແລ້ວ, ນັກທ່ອງທ່ຽວມາຢາມເກາະຮ່ອນຄວາຍ ຍັງໄດ້ຮັບປະທານອາຫານທະເລຢູ່ແຄມຝັ່ງທະເລ ຫຼື ຢູ່ເດີນຫຍ້າກາງປ່າ, ແຫ່ງທີ່ມີຕົ້ນໄມ້ໃຫຍ່ ຫຼາຍຕົ້ນ ແລະ ໄດ້ຟັງສຽງນົກຮ້ອງ, ສຽງຄື້ນທະເລທົບໃສ່ຝັ່ງ. ເອື້ອຍ ເຈິ່ນຕວຽດລວານ, ນັກທ່ອງທ່ຽວເກາະຮ່ອນຄວາຍ ທີ່ມາຈາກຮ່າໂນ້ຍ, ໃຫ້ຮູ້ວ່າ:
“ເກາະທີ່ຮົກເຮື້ອຄືຮ່ອນຄວາຍ, ໄດ້ສ້າງຄວາມປະທັບໃຈທີ່ສຸດໃຫ້ແກ່ຂ້າພະເຈົ້າ… ພິເສດ, ເຮົາສາມາດເຂົ້າໃຈຕື່ມອີກກ່ຽວກັບປູຊະນີຍະສະຖານປະຫວັດສາດຢູ່ໃນເກາະ. ເຖິງວ່າທາງໄປຈະລຳບາກກໍ່ຕາມ, ແຕ່ພວກຂ້າພະເຈົ້າໄດ້ສູບອາກາດທີ່ປອດໂປ່ງ, ໄດ້ຟັງສຽງນົກຮ້ອງ, ແລະ ຊົມທັດສະນີຍະພາບທີ່ສວຍງາມໃນປ່າ. ຫວັງວ່າຮ່ອນຄວາຍ ຈະໄດ້ຮັບນັກທ່ອງທ່ຽວຫຼາຍຄົນມາຢ້ຽມຢາມກວ່າອີກ”.
ປະຈຸບັນ, ເກາະຮ່ອນຄວາຍ ພວມໄດ້ຮັບການລົງທຶນພັດທະນາເພື່ອກາຍເປັນເຂດທ່ອງທ່ຽວຊີວະພາບ. ປີ 2009, ແຂວງກ່າເມົາ ໄດ້ປະກາດໃຊ້ຂໍ້ຕົກລົງວາງແຜນເຂດທ່ອງທ່ຽວຊີວະພາບ ຮ່ອນຄວາຍ ແລະ ຮຽກຮ້ອງບັນດານັກລົງທຶນເຂົ້າລົງທຶນໂຄງການຕ່າງໆຄື ກໍ່ສ້າງໂຮງແຮມ, ເຂດບໍລິການທ່ອງທ່ຽວ, ຫາດຊາຍທະເລ… ຫວັງວ່າ ດ້ວຍອາກາດທີ່ປອດໂປ່ງ, ເຢັນສະບາຍ, ທັດສະນີຍະພາບທີ່ສວຍງາມ, ມີປ່າ, ມີທະເລນັ້ນ, ຮ່ອນຄວາຍ ຈະກາຍເປັນສະຖານທີ່ທ່ອງທ່ຽວທີ່ສ້າງຄວາມດຶງດູດບັນດານັກທ່ອງທ່ຽວທັງຢູ່ພາຍໃນ ແລະຕ່າງປະເທດ ໃນອະນາຄົດໃກ້ໆນີ້.