ພາບປະກອບ .google.com.vn
ໃນຊີວິດຂອງວົງຄະນາຍາດບັນດາເຜົ່າສ່ວນໜ້ອຍຢູ່ໄຕຫງວຽນ, ຍາມໃດ ເຈົ້າກົກເຈົ້າເຫຼົ່າ ກໍ່ມີທີ່ຕັ້ງສຳຄັນ, ໄດ້ຮັບຄວາມໄວ້ເນື້ອເຊື່ອໃຈຈາກຊາວບ້ານ ແລະໄດ້ຮັບຖືວ່າແມ່ນແບບຢ່າງທີ່ດີເດັ່ນ. ເຈົ້າກົກເຈົ້າເຫຼົ່າ Ksor Nhi ຍາມໃດກໍ່ມີໜ້າໃນການເຄື່ອນໄຫວຕ່າງໆຄືຊາບຊືມບັນດາແຜນນະໂຍບາຍ, ນະໂຍບາຍຂອງພັກ, ຕະຫຼອດຮອດການຂົນຂວາຍປະຊາຊົນມອບໂອນທີ່ດິນ, ປະກອບກຳລັງເຫື່ອແຮງໃຫ້ແກ່ການກໍ່ສ້າງກິດຈະກຳສາທາລະນະ. ຍ້ອນເຫດນັ້ນ, ເຈົ້າກົກເຈົ້າເຫຼົ່າ Ksor Nhi ບໍ່ສາມາດຈື່ຈຳໄດ້ວ່າຕົນເອງໄດ້ພ້ອມກັບພະນັກງານຕາແສງ, ບ້ານລົງໄປ ແຕ່ລະຄອບຄົວຈັກເທື່ອ ເພື່ອໂຄສະນາແຜນນະໂຍບາຍ, ແນວທາງ, ນະໂຍບາຍຂອງພັກ, ກົດໝາຍຂອງລັດ, ຂໍ້ກຳນົດຂອງໝູ່ບ້ານຕາແສງ… ທ່ານຍັງພ້ອມກັບໜ່ວຍໄກ່ເກ່ຍລົງໄປແຕ່ລະຄອບຄົວທີ່ມີຄວາມຂັດແຍ້ງ ກັນ ເພື່ອອະທິບາຍໃຫ້ເຂົາເຈົ້າບໍ່ເຮັດສິ່ງທີ່ຜິດພາດ, ຍ້ອນເຫດນັ້ນ, ຈຶ່ງຮັກສາໄດ້ຄວາມສະຫງົບ, ຄວາມເປັນລະບຽບຮຽບຮ້ອຍໃນໝູ່ບ້ານ . ດັ່ງນັ້ນ, ການນຳຕາແສງເດິດບັ່ງ ຈຶ່ງໃຫ້ຂໍ້ສັງເກດວ່າ, ຍ້ອນມີບັນດາຜູ້ສຸດຈິດສຸດໃຈຄື ເຈົ້າກົກເຈົ້າເຫຼົ່າ Ksor Nhi ບັນດາແຜນນະໂຍບາຍ, ນະໂຍບາຍຂອງຂັ້ນເທິງ ກໍ່ຄືຂອງທ້ອງຖີ່ນໄດ້ມາສູ່ປະຊາຊົນໄວກວ່າ. ທ່ານ Nay Brin, ປະທານແນວໂຮມຕາແສງເດິດບັ່ງ, ໃຫ້ຂໍ້ສັງເກດວ່າ:
”ຕາມທ່ານ Ksor Nhi ແລ້ວ. ທຸກສິ່ງທຸກຢ່າງທີ່ເກີດຂຶ້ນໃນໝູ່ບ້ານຄືການສົມລົດ, ການພິພາດທີ່ດິນ, ການຂົນຂວາຍປະຊາຊົນໄປອອກແຮງງານ ທຳການຜະລິດ… ລ້ວນແຕ່ສາມາດແກ້ໄຂຕາມກົດໝາຍຂອງລັດໄດ້. ທ່ານເວົ້າອັນໃດປະຊາຊົນກໍ່ຟັງຕາມ, ເພາະວ່າທ່ານແມ່ນເຈົ້າກົກເຈົ້າເຫຼົ່າທີ່ມີຊື່ສຽງໃນບ້ານ”
ບໍ່ພຽງແຕ່ເວົ້າໃຫ້ປະຊາຊົນຟັງຊື່ໆເທົ່ານັ້ນ, ຫາກເຈົ້າກົກເຈົ້າເຫຼົ່າ Ksor Nhi ແລະຄອບຄົວຍາມໃດກໍ່ແມ່ນແບບຢ່າງນຳໜ້າໃນການເຄື່ອນໄຫວທັງໝົດຢູ່ທ້ອງຖີ່ນ. ຄອບຄົວຂອງເຈົ້າກົກເຈົ້າເຫຼົ່າ Ksor Nhi ມີ 4 ລຸ້ນຄົນຮ່ວມດຳລົງຊີວິດນຳກັນຢ່າງປອງດອງ. ທ່ານເຄີຍຕັກເຕືອນລູກຫຼານວ່າ ຕ້ອງໃຊ້ກຳລັງແຮງ, ພູມປັນຍາ ແລະ ຝາມືຂອງຕົນເພື່ອຜະລິດຈຶ່ງມີຂອງກິນຂອງໃຊ້, ຂອງໄວ້ຂອງເຫຼືອ. ຄອບຄົວຂອງທ່ານໄດ້ລົງທຶນຊື້ລົດໄຖຮັບໃຊ້ການຜະລິດ, ປູກເຂົ້າບະເລແນວພັນໃໝ່, ລ້ຽງງົວ 10 ໂຕ, ລຽງໝູ ແລະໄກ່ຕື່ມອີກ. ບໍ່ພຽງແຕ່ຄືແນວນັ້ນ, ເຈົ້າກົກເຈົ້າເຫຼົ່າ Ksor Nhi ຍັງຂົນຂວາຍປະຊາຊົນພັດທະນາເສດຖະກິດຄອບຄົວ ເພື່ອປັບປຸງຊີວິດການເປັນຢູ່ໃຫ້ດີກວ່າ. ປະຈຸບັນ, ທັງບ້ານມາຮີງ ມີ 76 ຄອບຄົວ ດ້ວຍພົນລະເມືອງ 370 ຄົນ, ຈາກສະພາບທຸກຍາກຂາດເຂີນ, ມາຮອດປະຈຸບັນ, ຊາວບ້ານມາຮິງ ສາມາດລົບລ້າງຄວາມທຸກຍາກອຶດຫີວໄດ້ ແລະ ຊີວິດນັບມື້ນັບມີການປ່ຽນແປງ, ຫຼາຍຄອບຄົວໄດ້ມີໂທລະພາບ, ລົດຈັກ… ທ່ານ Ro Oteo, ຊາວບ້ານມາຮິງ, ໃຫ້ຮູ້ວ່າ:
” ເຈົ້າກົກເຈົ້າເຫຼົ່າໄດ້ຂົນຂວາຍ, ແນະນຳພໍ່ແມ່ປະຊາຊົນໃນບ້ານຜະລິດສົມທົບກັບການລ້ຽງສັດ, ລ້ຽງງົວ, ໝູ, ໄກ່ຕື່ມອີກ, ດັ່ງນັ້ນປະຈຸບັນບໍ່ຖືກອຶດຫີວຄືໃນເມື່ອກ່ອນ. ບໍ່ຖົກຖຽງກັນ, ຕີກັນ, ຮ້າຍດ່າກັນ ເຮັດໃຫ້ຂາດຄວາມສາມັກຄີໃນໝູ່ບ້ານ, ໃຫ້ລູກຫຼານໄປໂຮງຮຽນເພື່ອຮູ້ໜັງສື. ປະຊາຊົນໃນບ້ານຮັກແພງ, ເຊື່ອໝັ້ນ ແລະ ຮູ້ບຸນຄຸນ ເຈົ້າກົກເຈົ້າເຫຼົ່າຫຼາຍ”.
ເຖິງວ່າໄດ້ຮັບໃບຍ້ອງຍໍຈາກຂັ້ນຕ່າງໆຫຼາຍໃບກໍ່ຕາມ, ແຕ່ເຈົ້າກົກເຈົ້າເຫຼົ່າ Ksor Nhi ຍັງຄ່ຽມຄົມທີ່ຖືວ່າ, ທ່ານເຮັດໄດ້ຄືແນວນັ້ນ ແມ່ນຍ້ອນມີຄວາມຮັກແພງຂອງປະຊາຊົນ.
”ຂ້າພະເຈົ້າໄປຂົນຂວາຍປະຊາຊົນ, ແລະ ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນ. ປະຊາຊົນເຫັນດີເຫັນພ້ອມ ອອກແຮງງານທຳການຜະລິດ, ພັດທະນາເສດຖະກິດ, ຮັກສາຊີວິດເປັນປົກກະຕິ”.
ໂດຍບໍ່ແມ່ນຕຳແໜ່ງທີ່ໄດ້ຮັບການແຕ່ງຕັ້ງ, ແຕ່ບັນດາເຈົ້າກົກເຈົ້າເຫຼົ່າຄືເຈົ້າກົກເຈົ້າເຫຼົ່າ Ksor Nhi ຍັງເຮັດວຽກງານລວມຢ່າງສຸດຈິດສຸດໃຈ, ດ້ວຍຄວາມປາຖະໜາວ່າ, ປະຊາຊົນໃນບ້ານຍາມໃດກໍ່ມີຄວາມເຊື່ອໝັ້ນຕໍ່ພັກ, ເພື່ອໃຫ້ໝູ່ບ້ານນັບມື້ນັບມີຄວາມອິ່ມໜຳສຳລານ ແລະ ສະຫງົບສຸກ.