(vovworld) – ເກາະໂກ່ນກໍ ນອນຢູ່ນອກຝັ່ງທະເລຕາເວັນອອກ, ຫ່າງຈາກເກືອຕຸ່ງ, ຂຶ້ນກັບຕາແສງ ວິ້ງກວາງ, ເມືອງ ວິ້ງລິງ, ແຂວງ ກວາງຈີ້ ປະມານ 28 ກິໂລແມັດ. ເກາະໂກ່ນກໍ ບໍ່ໃຫຍ່ປານໃດ, ມີເນື້ອທີ່ປະມານ 2,5 ຕາລາງກິໂລແມັດເທົ່ານັ້ນ, ແຕ່ພັດມີທີ່ຕັ້ງຍຸດທະສາດໃນການພັດທະນາເສດຖະກິດ, ສັງຄົມຂອງລະບົບເກາະ, ເກາະທະເລ, ເຂດທະເລຫວຽດນາມ ແລະ ມີບົດບາດໃຫຍ່ຫຼວງທີ່ສຸດໃນການປ້ອງກັນຊາດ, ປ້ອງກັນຄວາມສະຫງົບຢູ່ເຂດດິນຕໍ່ແຜ່ນ ແລະ ເຂດນ່ານທະເລ.
![ໄປຢ້ຽມຢາມເກາະໂກ່ນກໍ - ảnh 1](https://image.vovworld.vn/w730/uploaded/vovworld/bcgmbuiq/2013_08_23/con%20co%202.jpg)
ເກາະໂກ່ນກໍ
(ພາບ: ອິນເຕີແນດ)
ຂ້າພະເຈົ້າມາຢາມໂກ່ນກໍ ໃນຍາມຮຸ່ງເຊົ້າ, ພາຍຫຼັງຂີ່ເຮືອເປັນເວລາເກືອບ 2 ຊົ່ວໂມງ. ໂກ່ນກໍ ປະກົດອອກຢູ່ເບື້ອງໜ້າປຽບເໝືອນນະຄອນບົນທະເລ, ໂຄມໄຟທະເລຍັງແຈ້ງສະຫວ່າງຢູ່. ໃນຊຸ່ມມື້ອາກາດດີ, ຈາກໂກ່ນກໍ ຫຼຽວໄປຍັງທິດຕາເວັນຕົກທ່ານຈະເຫັນສີຂຽວອຸ່ມທູ່ມຂອງປ່າສົນແຄມທະເລເກືອຕຸ່ງ ແລະ ຫາດຊາຍທະເລຂາວລ້ວນຕໍ່ໜ້າອ່າວໂມກ, ທິດຕາເວັນຕົກສຽງໃຕ້ຂອງເກາະແມ່ນແມ່ນ້ຳເບັ໋ນຫາຍ, ຢູ່ທາງໄກແມ່ນສາຍພູຫຼວງທີ່ໃຫຍ່ໂຕມະໂຫຖານ. ພືດສາຊາດໄມ້ໃນເກາະແມ່ນອຸດົມສົມບຸນພໍສົມຄວນ, ຢູ່ເກາະມີຕົ້ນໄມ້ຫາຍາກບາງປະເພດເຊິ່ງຢູ່ເຂດດິນຕໍ່ແຜ່ນພັດບໍ່ມີ, ໃນເກາະຍັງມີປ່າຫູກວາງ, ຮອດລະດູໃບໄມ້ຫຼົ່ນ, ໃບໄມ້ເຕັມໄປດ້ວຍສີແດງໃນທົ່ວເຂດ, ເຮັດໃຫ້ຮູບພາບເກາະໂກ່ນກໍມີຄວາມງົດງາມກວ່າອີກ. ໃນເກາະຍັງມີຕົ້ນໄມ້ໃຫ້ໝາກບາງປະເພດອີກຄື ໝາກຮຸ່ງ, ໝາກກ້ວຍ… ທັງເປັນແຫຼ່ງທັນຍາຫານ ສະໜອງໃຫ້ແກ່ທະຫານ ແລະ ປະຊາຊົນໃນເກາະ, ທັງເປັນທີ່ອາໄສຂອງນົກຫຼາຍປະເພດ.
ເດືອນ 4/2005, ເມືອງເກາະໂກ່ນກໍ ໄດ້ຮັບການສ້າງຕັ້ງຢ່າງເປັນທາງການ ແລະ ປະຈຸບັນ ຢູ່ເກາະມີປະຊາຊົນນັບສິບຄອບຄົວ, ດຳລົງຊີວິດດ້ວຍອາຊີບກໍ່ສ້າງກິດຈະກຳຢູ່ເກາະ, ຫາປາ ແລະ ເຮັດວຽກຢູ່ບັນດາອົງການ, ຫົວໜ່ວຍຂອງເມືອງເປັນຕົ້ນຕໍ່. ເອື້ອຍ ຫງວຽນທິລານ, ແມ່ນໜຶ່ງໃນຈຳນວນຊາວໜຸ່ມຕະລຸມບ່ອນ 40 ຄົນ ທີ່ໄປສ້າງຊີວິດໃໝ່ຢູ່ໂກນກໍ ນັບແຕ່ປີ 2004, ໃຫ້ຮູ້ວ່າ ເມື່ອຫາກໍ່ໄປຍັງເກາະແຫ່ງນີ້, ອຳນາດການປົກຄອງທ້ອງຖີ່ນໄດ້ຊ່ວຍເຫຼືອຄອບຄົວເອື້ອຍກ່ຽວກັບເຮືອນຢູ່, ໄຟຟ້າ, ນຳ້ສະອາດ. ອຳນາດການປົກຄອງ ແລະ ກຳລັງຕ່າງໆກໍ່ມາຢ້ຽມຢາມ, ຊອກຮູ້ກ່ຽວກັບຄວາມຫຍຸ້ງຍາກໃນການດຳລົງຊີວິດ ແລະ ເຮັດວຽກຢູ່ທີ່ນີ້ເປັນປະຈຳ. ເມື່ອເປັນພະຍາດ, ເສນາລັກໃນເກາະກໍ່ກວດ ແລະ ໃຫ້ຢາປິ່ນປົວພະຍາດ
“ຕອບສະໜອງຂະບວນການໄປກໍ່ສ້າງຊີວິດໃໝ່ຢູ່ເກາະ ໂດຍສູນກາງຊາວໜຸ່ມປຸກລະດົມ, ຂ້າພະເຈົ້າໄດ້ສະໝັກໃຈໄປ ແລະ ຢູ່ເກາະແຫ່ງນີ້ເລີຍ. ເຖິງວ່າເງື່ອນໄຂໄປມາ ແລະ ອາກາດຈະຮ້າຍແຮງກໍ່ຕາມ, ແຕ່ຍາມໃດພວກຂ້າພະເຈົ້າກໍ່ພະຍາຍາມ. ຄອບຄົວຂ້າພະເຈົ້າມີລູກສອງຄົນພວມໄປຮຽນ. ໃນຊຸ່ມມື້ທຳອິດປະສົບກັບຄວາມຫຍຸ້ງຍາກ, ຂາດເຂີນຫຼາຍຢ່າງ, ແຕ່ປະຈຸບັນ, ເຮືອນຊານບ້ານຊ່ອງແລະ ທາງຄົມມະນາຄົມໄປມາກໍ່ກວ້າງໃຫຍ່, ສວຍງາມ ແລະ ສະດວກສະບາຍກວ່າ”.
![ໄປຢ້ຽມຢາມເກາະໂກ່ນກໍ - ảnh 2](https://image.vovworld.vn/w730/uploaded/vovworld/bcgmbuiq/2013_08_23/con%20co1.jpg)
ເກາະໂກ່ນກໍ
(ພາບ: ອິນເຕີແນດ)
ທ່ານ ເລກວາງແລງ, ປະທານຄະນະກຳມະການປະຊາຊົນເມືອງເກາະໂກ່ນກໍ, ໃຫ້ຮູ້ວ່າ, ໃນປີນີ້, ທະຫານ ແລະ ປະຊາຊົນເມືອງເກາະໂກ່ນກໍ ສືບຕໍ່ຜັນຂະຫຍາຍການລົງທຶນກໍ່ສ້າງລະບົບພື້ນຖານໂຄງລ່າງ ແລະ ສະເໜີບັນດາກົນໄກ, ນະໂຍບາຍ ເພື່ອຮັບປະກັນຊີວິດສັງຄົມ, ຍົກສູງຊີວິດທາງດ້ານວັດຖຸ, ຈິດໃຈໃຫ້ແກ່ປະຊາຊົນ. ສິ່ງທີ່ສຳຄັນກວ່ານັ້ນແມ່ນການບຳລຸງສ້າງ, ສອນວິຊາຊີບໃຫ້ແກ່ປະຊາຊົນໃນເກາະ. ດ້ວຍທິດພັດທະນາໃຫ້ເປັນເກາະແຫ່ງການທ່ອງທ່ຽວ, ປະຊາຊົນຢູ່ທີ່ນີ້ຈຳເປັນຕ້ອງໄດ້ຮັບການບຳລຸງສ້າງກ່ຽວກັບການບໍລິການທ່ອງທ່ຽວ ແລະ ໄດ້ຮັບການໂຄສະນາກ່ຽວກັບສະຕິປົກປັກຮັກສາສິ່ງແວດລ້ອມ, ອະນຸລັກຮັກສາຊີວະນາໆພັນຂອງທະເລເກາະແຫ່ງນີ້.
“ປະຈຸບັນ, ວຽກເຮັດງານທຳ, ລາຍຮັບຂອງປະຊາຊົນຢູ່ທີນີ້ບໍ່ເປັນປົກກະຕິ. ແຕ່ພວກຂ້າພະເຈົ້າຈະບຳລຸງສ້າງ, ສອນວິຊາຊີບ ເພື່ອຮັບເຂົາເຈົ້າມາເຮັດວຽກຢູ່ບັນດາອົງການ, ກິດຈະກຳກໍ່ສ້າງໃນເກາະ ກໍ່ຄືເຄື່ອນໄຫວການບໍລິການ, ດຳເນີນທຸລະກິດໃນເກາະ. ພວກຂ້າພະເຈົ້າຖືເປັນສຳຄັນການພັດທະນາເສດຖະກິດ, ຮັບໃຊ້ຊີວິດການເປັນຢູ່ຂອງປະຊາຊົນໃນເກາະຕິດພັນກັບການປ້ອງກັນຊາດປ້ອງກັນຄວາມສະຫງົບຢູ່ເກາະທະເລຂອງປະເທດຊາດ”.
![ໄປຢ້ຽມຢາມເກາະໂກ່ນກໍ - ảnh 3](https://image.vovworld.vn/w730/uploaded/vovworld/bcgmbuiq/2013_08_23/con%20co%203.jpg)
ເກາະໂກ່ນກໍ
(ພາບ: ອິນເຕີແນດ)
ເກາະໂກ່ນກໍ ໄດ້ຮັບການຕີລາຄາວ່າມີຄວາມສາມາດບົ່ມຊ້ອນໃນການພັດທະນາການທ່ອງທ່ຽວຊີວະພາບ, ແມ່ນແຫ່ງເຕົ້າໂຮມຊີວະນາໆພັນພິເສດສະເພາະຂອງທະເລເຂດຮ້ອນ, ໃນນັ້ນມີລະບົບຊີວະພາບຫີນປະກາລັງ, ແມ່ນເຂດເຕົ້າໂຮມຂອງສິນທະເລທີ່ຫາຍາກ, ມີມູນຄ່າເສດຖະກິດສູງຫຼາຍປະເພດ, ດ້ວຍປ່າກວມເກືອບ 80% ເນື້ອທີ່ທັງໝົດໃນເກາະ. ຄຽງຂ້າງຄູນຄ່າຊີວະນາໆພັນ, ເຂດທະເລເກາະໂກ່ນກໍ ຍັງມີຄູນຄ່າດ້ານທັດສະນີຍະພາບ, ວັດທະນະທຳ, ປະຫວັດສາດອີກດ້ວຍ. ທ່ານ ເລກວາງແລງ, ປະທານຄະນະກຳມະການປະຊາຊົນເມືອງເກາະໂກ່ນກໍ, ໃຫ້ຮູ້ວ່າ:
“ໂກ່ນກໍ ມີທ່າແຮງຫຼາຍຢ່າງເພື່ອສ້າງບັນດາຜະລິດຕະພັນທ່ອງທ່ຽວທີ່ເປັນເອກະລັກສະເພາະ, ໃນນັ້ນມີການທ່ອງທ່ຽວຊີວະພາບທະເລເກາະ, ຢູ່ທ້ອງທະເລມີ ”ປ່າຫີນປະກາລັງ” ທີ່ສວຍງາມ… ເໝາະສົມກັບການທ່ອງທ່ຽວດຳນ້ຳພະຈົນໄພ ແລະ ພັກຜ່ອນບຳລຸງສຸຂະພາບ. ນອກນັ້ນ, ເມືອງເກາະກໍ່ເອົາໃຈໃສ່ທີ່ສຸດເຖິງການພັດທະນາການທ່ອງທ່ຽວປະຫວັດສາດ, ທ່ອງທ່ຽວວັດທະນະທຳ”.
ປະຈຸບັນ, ໂກ່ນກໍ ນັບມື້ນັບພັດທະນາ. ໂດຍໝູນໃຊ້ຄວາມສາມາດບົ່ມຊ້ອນຂອງເກາະ, ຂອງເສດຖະກິດທະເລ, ປະຊາຊົນແຫ່ງນີ້ພວມປົກປັກຮັກສາ, ກໍ່ສ້າງ ເພື່ອໃຫ້ໂກນກໍ ກາຍເປັນເກາະແຫ່ງການທ່ອງທ່ຽວ, ສັນຕິພາບ ແລະ ພັດທະນາໃນອະນາຄົດໃກ້ໆນີ້.