ຕັດແຖບຜ້າບັນດາກິດຈະກຳຢູ່ໂຮງຮຽນ  Abyei (ພາບ: qdnd.vn)

       ໃນ 80 ປີຜ່ານມາ, ຍາມໃດ ກອງທັບ ປຊຊ ຫວຽດນາມ ກໍ່ແມ່ນກຳລັງຫຼັກແຫຼ່ງ ພ້ອມກັບທົ່ວພັກ, ທົ່ວປວງຊົນ ສ້າງບັນດາວິລະກຳອັນສະຫງ່າອົງອາດໃນພາລະກິດຕໍ່ສູ້ປົດປ່ອຍຊາດ, ຍາດເອົາເອກະລາດ, ເສລີພາບ, ທ້ອນໂຮມປະເທດຊາດເປັນເອກະພາບ, ສ້າງສາ ແລະ ປົກປັກຮັກສາປະເທດຊາດ. ພ້ອມກັບການປົກປັກຮັກສາປະເທດຊາດ, ກອງທັບ ປຊຊ ຫວຽດນາມ ກໍ່ໄດ້ປະຕິບັດຫຼາຍພັນທະສາກົນ, ປະກອບສ່ວນຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບຢ່າງໝັ້ນແກ່ນ ເພື່ອພັດທະນາ, ພ້ອມກັນສ້າງສັນຕິພາບ.

   ໂຮງຮຽນມັດທະຍົມຕອນປາຍ Abyei ຕັ້ງຢູ່ໃກ້ກັບຖານທີ່ໝັ້ນຂອງກອງຊ່າງແສງ ຫວຽດນາມ ຂຶ້ນກັບຄະນະຝ່າຍຮັກສາສັນຕິພາບ ສປຊ ຢູ່ Abyei, ເຂດທີ່ມີຄວາມຂັດແຍ່ງລະຫວ່າງ ສ.ຊູດັງ ແລະ ສ.ຊູດັງໃຕ້. ອາຈານ Satino, ຜູ້ອຳນວຍການໂຮງຮຽນ ໃຫ້ຮູ້ວ່າ:

  ພວກຂ້າພະເຈົ້າບໍ່ມີຫໍສະໝຸດ ແລະ ຂາດໂຕະ, ຕັ່ງ. ມີບາງຫ້ອງຮຽນ, ນັກຮຽນຕ້ອງເອົາໂຕະ, ຕັ່ງມາຫ້ອງຮຽນ, ເລິກຮຽນກໍ່ເອົາເມືອບ້ານ. ຫ້ອງຮຽນກໍ່ຂາດເຊັ່ນດຽວກັນ. ພວກຂ້າພະເຈົ້າຢາກມີຫ້ອງຮຽນ 3 ຫ້ອງຕື່ມອີກ.

   ຫ້ອງຮຽນງາມຫຼາຍ, ພວກຫຼານຂໍຂອບໃຈການຊ່ວຍເຫຼືອຂອງທະຫານ ຫວຽດນາມ. ພວກຫຼານມີຄວາມພາກພູມໃຈທີ່ສຸດເມື່ອໄດ້ຮຽນໃນຫ້ອງຮຽນໃໝ່ນີ້, ມັນຕ່າງກັນກັບຫ້ອງຮຽນເກົ່າ.

   ເມື່ອພວກຂ້າພະເຈົ້າໄປຜ່ານເຂດຊຸມຊົນຕ່າງໆ ກໍ່ລ້ວນແຕ່ໄດ້ຮັບຮອຍຍີ້ມທີ່ເປັນມິດຂອງ ປຊຊ, ພວກຂ້າພະເຈົ້າຮູ້ສຶກມີຄວາມສຸກທີ່ສຸດ.

   Abyei ແມ່ນໜຶ່ງໃນບັນດາແຫ່ງທີ່ບັນດານັກຮົບກອງທັບ ປຊຊ ຫວຽດນາມ ໄດ້ປະຕິບັດພັນທະສັນຕິພາບສາກົນໃນໄລຍະສັນຕິພາບ. ພາຍຫຼັງເວລາກ່ວາ 10 ປີທີ່ໄດ້ເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ, ມາຮອດປະຈຸບັນ, ຫວຽດນາມ ໄດ້ສົ່ງນາຍທະຫານ, ທະຫານປະຊາຊົນມືອາຊີບເກືອບ 900 ເທື່ອຄົນ ໄປເຮັດໜ້າທີ່ຢູ່ບັນດາຄະນະຜູ້ຕາງໜ້າ. ນີ້ແມ່ນການພິສູດໃຫ້ແກ່ຄຳໝັ້ນສັນຍາ ແລະ ຄວາມຮັບຜິດຊອບຂອງ ຫວຽດນາມ ທີ່ມີຕໍ່ປະຊາຄົມສາກົນໃນການຮັກສາສັນຕິພາບ ແລະ ຄວາມໝັ້ນຄົງທົ່ວໂລກ ດ້ວຍຈິດໃຈ “ຫວຽດນາມ ຢາກເປັນເພື່ອນມິດ, ຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບຂອງວົງຄະນາຍາດສາກົນ”.

ໂດຍໄດ້ເຂົ້າຮ່ວມຢ່າງຕັ້ງໜ້າ ແລະ ມີຄວາມຮັບຜິດຊອບເຂົ້າໃນໜ້າທີ່ຮັກສາສັນຕິພາບຂອງ ສປຊ, ບັນດານັກຮົບກອງທັບ ປຊຊ ຫວຽດນາມ ໄດ້ສະແດງໃຫ້ເຫັນຄຸນນະທາດອັນສູງສົ່ງ ສ້າງເປັນບຸກຄະລິກອັນດີງາມຂອງອ້າຍທະຫານລຸງ ໂຮ່ ແລະ ມູນເຊື້ອອັນສະຫງ່າລາສີຂອງກອງທັບ ປຊຊ ຫວຽດນາມ ເມື່ອພ້ອມແລ້ວທີ່ຈະປະກອບສ່ວນເຂົ້າໃນຊີວິດແຫ່ງສັນຕິພາບຂອງມວນມະນຸດ.

 ເພື່ອຮັກສາສະພາບແວດລ້ອມແຫ່ງສັນຕິພາບຮັບໃຊ້ເປົ້າໝາຍພັດທະນາປະເທດຊາດ, ກອງທັບ ປຊຊ ຫວຽດນາມ ບໍ່ພຽງແຕ່ເຮັດໜ້າທີ່ສ້າງສາ ແລະ ປົກປັກຮັກສາປະເທດເປັນຢ່າງດີເທົ່ານັ້ນ, ຫາກຍັງຕັ້ງໜ້າຜັນຂະຫຍາຍບັນດາການເຄື່ອນໄຫວຮ່ວມມືກັບກອງທັບປະເທດຕ່າງໆອີກດ້ວຍ.

  ການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ຫວຽດນາມ-ລາວ ຄັ້ງທີ 2 ຈັດຂຶ້ນໃນທ້າຍເດືອນຕຸລາທີ່ຜ່ານມາ ດ້ວຍບັນດາການເຄື່ອນໄຫວຄື: ເຄົາລົບ, ທາສີເສົາຫຼັກໝາຍອະທິປະໄຕ, ປູກຕົ້ນໄມ້ມິດຕະພາບ, ລາດຕະເວນຮ່ວມ, ເປີດສະຫຼອງນຳໃຊ້ບັນດາກິດຈະກຳມິດຕະພາບ… ບັນດາການເຄື່ອນໄຫວໄດ້ສ້າງຄວາມປະທັບໃຈກ່ຽວກັບນ້ຳໃຈມິດຕະພາບ, ຄວາມສາມັກຄີລະຫວ່າງກອງທັບ ແລະ ປຊຊ ສອງປະເທດ. ທ່ານພັນເອກ ວຽງໄຊ ສຸລິວົງ, ທີ່ປຶກສາຝ່າຍປ້ອງກັນຊາດລາວ ປະຈຳ ຫວຽດນາມ ຢືນຢັນວ່າ:

   ການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ແມ່ນໜຶ່ງໃນບັນດາການເຄື່ອນໄຫວພົວພັນຕ່າງປະເທດປ້ອງກັນຊາດສອງຝ່າຍທີ່ສຳຄັນແຖວໜ້າຂອງສອງປະເທດໃນປີນີ້, ມີຄວາມໝາຍສຳຄັນທີ່ສຸດ ເພື່ອສືບຕໍ່ຈັດຕັ້ງ ແລະ ຜັນຂະຫຍາຍປະຕິບັດບັນດາເນື້ອໃນຂອງແຜນການຮ່ວມມືລະຫວ່າງສອງກະຊວງປ້ອງກັນປະເທດ. ພ້ອມທັງສືບຕໍ່ເສີມຂະຫຍາຍມູນເຊື້ອສາມັກຄີ ແລະ ການຮ່ວມມືຮອບດ້ານລະຫວ່າງສອງພັກ, ສອງກອງທັບ ຫວຽດນາມ-ລາວ ນັບມື້ນັບໜັກແໜ້ນ ແລະ ພັດທະນາຢ່າງແຮງ.

  ການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ໄດ້ຈັດຂຶ້ນເປັນປະຈຳ ໄດ້ກາຍເປັນຮູບແບບຮ່ວມມືຢ່າງມີປະສິດທິຜົນລະຫວ່າງ ຫວຽດນາມ ກັບບັນດາປະເທດບ້ານໃກ້ເຮືອນຄຽງ. ທ່ານພົນໂທ ຮ່ວາງຊວັນຈຽນ ຮອງລັດຖະມົນຕີກະຊວງປ້ອງກັນປະເທດ ຫວຽດນາມ ຢືນຢັນວ່າ:

   ຜົນສຳເລັດຂອງການພົບປະແລກປ່ຽນຄັ້ງຕ່າງໆ ໄດ້ສະແດງໃຫ້ເຫັນຄວາມຕັດສິນໃຈຂອງອົງຄະນະພັກກອງທັບສູນກາງ ແລະ ກະຊວງປ້ອງກັນປະເທດ ຫວຽດນາມ, ບັນດາທ້ອງຖິ່ນ, ໂດຍສະເພາະ ແມ່ນ ປຊຊ ແລະ ກຳລັງປ້ອງກັນຊາຍແດນຂອງ ຫວຽດນາມ ແລະ ບັນດາປະເທດບ້ານໃກ້ເຮືອນຄຽງ ມີເສັ້ນຊາຍແດນທາງບົກຮ່ວມ, ໃນການເພີ່ມທະວີນ້ຳໃຈສາມັກຄີມິດຕະພາບ, ຊຸກຍູ້ການຮ່ວມມືຢ່າງແທດຈິງ, ພ້ອມກັນສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະ ພັດທະນາ.

ພາກທີ 3: ນະໂຍບາຍປ້ອງກັນຊາດເພື່ອເປົ້າໝາຍສັນຕິພາບ

  ດ້ວຍແນວທາງອັນຖືກຕ້ອງ ແລະ ບາກກ້າວເດີນທີ່ເໝາະສົມ, ການທູດປ້ອງກັນຊາດ ໄດ້ສ້າງໃຫ້ມີບັນດາກົນໄກ ເພື່ອໃຫ້ກອງທັບ ປຊຊ ຫວຽດນາມ ແລະ ບັນດາປະເທດທີ່ກ່ຽວຂ້ອງ ອາດຈະແກ້ໄຂບັນດາສິ່ງທ້າທາຍໄດ້, ຮັດແຄບບັນດາຄວາມແຕກໂຕນ ບົນຈິດໃຈແກ້ໄຂບັນຫາໂດຍສັນຕິວິທີ, ດ້ວຍການເຈລະຈາ ແລະ ຄວາມເຂົ້າອົກເຂົ້າໃຈຊື່ງກັນ ແລະ ກັນ. ທ່ານພົນເອກ ຟານວັນຢາງ ລັດຖະມົນຕີກະຊວງປ້ອງກັນປະເທດ ຫວຽດນາມ ຢືນຢັນວ່າ:

   ຫວຽດນາມ ໄດ້ປະຕິບັດ 4 ນະໂຍບາຍປ້ອງກັນຊາດ: ບໍ່ຮ່ວມສຳພັນດ້ານການທະຫານ, ບໍ່ໄປຕາມປະເທດນີ້ເພື່ອຕ້ານຄືນປະເທດນັ້ນ, ບໍ່ແກ້ໄຂບັນດາບັນຫາດ້ວຍມາດຕະການທະຫານ ແລະ ກໍ່ບໍ່ໃຫ້ບັນດາອົງການທະຫານຂອງປະເທດຕ່າງໆຕັ້ງຖານທີ່ໝັ້ນໃນປະເທດຂອງຕົນ. ນີ້ແມ່ນແນວທາງທີ່ຖືກຕ້ອງເພື່ອໃຫ້ ຫວຽດນາມ ຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຂອງປະເທດຊາດ.

   ກ່າວຄຳເຫັນທີ່ສູນຄົ້ນຄ້ວາຍຸດທະສາດ ແລະ ສາກົນ ອາເມລິກາ ປີ 2022, ທ່ານນາຍົກລັດຖະມົນຕີ ຫວຽດນາມ ຟ້າມມິນຈິງ ກໍ່ຊີ້ແຈ້ງວ່າ:

  ລະຫວ່າງການເຈລະຈາ ແລະ ການສູ້ຢັນກັນ, ຫວຽດນາມ ຈະເລືອກເອົາການເຈລະຈາ. ລະຫວ່າງການໂອ້ລົມສົນທະນາ ແລະ ການປະທະກັນ, ພວກເຮາກໍ່ເລືອກເອົາການໂອ້ລົມສົນທະນາ. ລະຫວ່າງສັນຕິພາບ ແລະ ສົງຄາມ, ພວກເຮົາເລືອກເອົາສັນຕິພາບ. ໃນໂລກທີ່ເຕັມໄປດ້ວຍການຜັນແປ, ແກ້ງແຍ້ງຍຸດທະສາດ ແລະ ຫຼາຍການເລືອກເຟັ້ນນັ້ນ, ຫວຽດນາມ ບໍ່ເລືອກຝ່າຍ, ຫາກເລືອກຄວາມເປັນທຳ, ຄວາມຍຸດຕິທຳ, ສະເໝີພາບ, ຄວາມຈິງ, ບົນພື້ນຖານບັນດາຫຼັກການຂອງກົດໝາຍສາກົນ.

        ທັດສະນະຂອງ ຫວຽດນາມ ໄດ້ຮັບການສະໜັບສະໜູນ ແລະ ຕີລາຄາສູງຈາກປະເທດຕ່າງໆ. ທ່ານພັນເອກ Thomas Stevenson, ອະດີດທີ່ປຶກສາຝ່າຍປ້ອງກັນຊາດ ອາເມລິກາ ປະຈຳ ຫວຽດນາມ ຖືວ່າ:

   ການປະຕິບັດ 4 ນະໂຍບາຍການພົວພັນຕ່າງປະເທດປ້ອງກັນຊາດ ໄດ້ຊ່ວຍໃຫ້ ຫວຽດນາມ ພັດທະນາຢ່າງແຮງ. ມາຮອດປະຈຸບັນ, ຫວຽດນາມ ມີການພົວພັນຄູ່ຮ່ວມມືຍຸດທະສາດຮອບດ້ານກັບເກືອບຄືວ່າກັບທຸກປະເທດມະຫາອຳນາດ, ມີການພົວພັນທີ່ດີກັບບັນດາປະເທດມະຫາອຳນາດ ແລະ ພື້ນຖານເສດຖະກິດພວມເຕີບໂຕກັບລະດັບຊື່ງຫຼາຍປະເທດຕ້ອງເຄົາລົບນັບຖື. ບັນດານະໂຍບາຍຂອງ ຫວຽດນາມ ພວມເຄື່ອນໄຫວຢ່າງມີປະສິດທິຜົນ ແລະ ພັດທະນາຢ່າງແຮງ.

  ຜ່ານໄລຍະອັນຍາວນານທາງດ້ານປະຫວັດສາດ, ຊາດ ຫວຽດນາມ ຕ້ອງຜ່ານສົງຄາມຍາດເອົາເອກະລາດຫຼາຍຄັ້ງ, ຫວຽດນາມ ເຂົ້າໃຈເລິກຄຸນຄ່າຂອງສັນຕິພາບ, ປາດຖະໜາຢາກຮັກສາ ແລະ ຕັດສິນໃຈຮັກສາສັນຕິພາບຂອງປະເທດຊາດ, ຕັດສິນໃຈຮັກສາເອກະລາດ, ເສລີພາບ, ອະທິປະໄຕ, ຜືນແຜ່ນດິນອັນຄົບຖ້ວນ, ຜົນປະໂຫຍດຂອງປະເທດຊາດ, ຊົນຊາດ. ຫວຽດນາມ ກໍ່ມີຄວາມມຸ່ງຫວັງວ່າ ໂລກ, ພາກພື້ນ, ທຸກປະເທດ, ທຸກຊົນຊາດ ຈະລ້ວນແຕ່ໄດ້ຊົມໃຊ້ສັນຕິພາບ, ເສລີພາບ, ຄວາມອີ່ມໜຳສຳລານ, ສົມບູນພູນສຸກ.

      ພ້ອມກັບໂລກສ້າງສັນຕິພາບ ແມ່ນນະໂຍບາຍສະເໝີຕົ້ນສະເໝີປາຍຂອງກອງທັບ ປຊຊ ຫວຽດນາມ. ບັນດາຄວາມມານະພະຍາຍາມຮັບປະກັນສະພາບແວດລ້ອມແຫ່ງສັນຕິພາບພາຍໃນປະເທດ, ປະຕິບັດບັນດາພັນທະສາກົນ, ເຂົ້າຮ່ວມກຳລັງຮັກສາສັນຕິພາບ ສປຊ, ໄດ້ ແລະ ພວມແມ່ນພື້ນຖານເພື່ອໃຫ້ ຫວຽດນາມ ສືບຕໍ່ໄປຕາມນະໂຍບາຍປ້ອງກັນຊາດສັນຕິພາບ, ປ້ອງກັນຕົວເອງ, ເຂົ້າຮ່ວມການຊຸກຍູ້ການຮ່ວມມືມິດຕະພາບກັບບັນດາປະເທດເພື່ອໂລກແຫ່ງສັນຕິພາບ./.