ການພົບປະ 2 ຝ່າຍລັດເຊຍ-ຈີນ ຢູ່ນອກກອງປະຊຸມເວທີປາໄສຮ່ວມມືເສດຖະກິດອາຊີ - ປາຊີຝິກ APEC 2014 ຊຶ່ງຫາກໍຖືກຈັດຂຶ້ນຢູ່ປັກກິງປະເທດຈີນ ໄດ້ດຶງດູດຄວາມສົນໃຈເປັນພິເສດຈາກຫາງສຽງສາກົນ. ເພາະວ່ານີ້ແມ່ນການພົບປະຄັ້ງທີ 10 ລະຫວ່າງປະມຸກລັດຂອງ 2 ປະເທດນີ້ໃນຮອບເວລາພຽງ 2 ປີ. ບັນດາເອກະສານ, ສັນຍາຮ່ວມມື, ໃນນັ້ນ, ມີບັນດາຂົງເຂດຖືກຖືວ່າ ແມ່ນພື້ນຖານໃນການພົວພັນດ້ານເສດຖະກິດລະຫວ່່າງລັດເຊຍ-ຈີນ ໄດ້ຮັບການລົງນາມ, ຊຶ່ງເປັນການສະແດງໃຫ້ເຫັນວ່າ 2 ຝ່າຍພວມຕັດສິນໃຈສ້າງການພົວພັນພິເສດ, ຊຶ່ງເປັນການພົວພັນລະຫວ່າງ 2 ປະເທດມະຫາອຳນາດຂອງເອີລົບ ແລະ ອາຊີ.
ປະທານາທິບໍດີລັດເຊຍປູຕິນ ແລະ ປະທານປະເທດຈີນ ສີຈີນຜິງ
(ພາບ: Sputnik)
|
ພາຍຫຼັງໄດ້ພົບປະກັນຢ່າງສະໜິດສະໜົມ, ການນຳ 2 ທ່ານຂອງລັດເຊຍ ແລະ ຈີນໄດ້ເປັນສັກຂີພິຍານພິທີລົງນາມໃນເອກະສານຮ່ວມມື 17 ສະບັບ. ໃນນັ້ນມີໂຄງການກໍ່ສ້າງລະບົບທໍ່ສົ່ງອາຍແກັສທາງທິດຕາເວັນຕົກຂອງລັດເຊຍໄປຍັງຈີນ, ຕາມສັນຍາທີ່ບັນລຸໄດ້ເມື່ອເດືອນ 5 ໂດຍສະໜອງອາຍແກັສ 38 ຕື້ m3 ໃນແຕ່ລະປີ. ດ້ວຍລະບົບທໍ່ສົ່ງອາຍແກັສນີ້, ຖ້າຫາກກໍ່ສ້າງສຳເລັດ, ຄາດວ່າ ຈີນຈະກາຍເປັນປະເທດຈຳໜ່າຍອາຍແກັສຂອງລັດເຊຍຫຼາຍກ່ວາໝູ່ໃນໂລກ, ລືນກາຍທັງເອີລົບ.
2 ຝ່າຍໄດ້ເປັນເອກະພາບກັນຜັນຂະຫຍາຍການປະຕິບັດໂຄງການລົງທຶນດ້ານພະລັງງານປະສົມຢູ່ເຂດ Arkhangelsk ແລະພ້ອມກັນອຸປະຖຳ, ກໍ່ສ້າງ ແລະ ນຳໂຮງງານໄຟຟ້ານ້ຳຕົກແຫ່ງໜຶ່ງເຂົ້າເຄື່ອນໄຫວຢູ່ເຂດຕາເວັນອອກໄກຂອງລັດເຊຍ. ພ້ອມກັນນັ້ນ, ຍັງມີສັນຍາອື່ນໆອີກຫຼາຍສະບັບທີ່ກ່ຽວຂ້ອງເຖິງຂົງເຂດການເງິນ, ທາງລົດໄຟຄວາມໄວສູງ, ເຕັກໂນໂລຢີຂໍ້ມູນຂ່າວສານ, ການບິນອາວະກາດ…
ການພົວພັນທີ່ນຳມາເຊິ່ງຜົນປະໂຫຍດໃຫ້ແກ່ກັນ.
ບັນດາຄວາມວິຕົກກັງວົນລວມກ່ຽວກັບດ້ານພູມິປະເທດ ແລະ ການເມືອງ, ພ້ອມກັບບັນດາຄວາມວິຕົກກັງວົນກ່ຽວກັບອາເມລິກາ ໄດ້ເຮັດໃຫ້ລັດເຊຍ ແລະ ຈີນຈຳເປັນຫຍັບມໍ່ເຂົ້າກັນ. ວິກິດການຢູແກຼນໄດ້ຍູ້ລັດເຊຍ, ອາເມລິກາຕົກເຂົ້າສູ່ສະພາບສົງຄາມເຢັນຄັ້ງໃໝ່ ແລະ ການພົວພັນລະຫວ່າງ 2 ປະເທດຖືກຕົກເຂົ້າສູ່ສະພາບສູ້ຢັນກັນທີ່ຮ້າຍແຮງທີ່ສຸດນັບແຕ່ເວລາສະຫະພາບໂຊຫວຽດຖືກພັງທະລາຍເມື່ອປີ 1991. ກໍເຊັ່ນດຽວກັນກັບການສູ້ຢັນກັນລະຫວ່າງອາເມລິກາ-ອະດີດສະຫະພາບໂຊຫວຽດເມື່ອກ່ອນນີ້, ຈີນໄດ້ກາຍເປັນປະເທດທີ 3 ທີ່ສຳຄັນ ແລະ ການທີ່ຈີນໄດ້ເລືອກເອົາເລື່ອງຢືນຢູ່ກັບຝ່າຍໃດນັ້ນ ກໍແມ່ນສິ່ງທີ່ທັງລັດເຊຍ ແລະ ອາເມລິກາມີຄວາມສົນໃຈທີ່ສຸດ.
ການພົວພັນແບບຄູ່ແຂ່ງ-ຄູ່ຮ່ວມມື, ການພົວພັນຮ່ວມມື - ຈຳກັດຊຶ່ງກັນ ແລະ ກັນລະຫວ່າງ ຈີນ ແລະ ອາເມລິກາໄດ້ເຮັດໃຫ້ລັດເຊຍຫຍັບມໍ່ເຂົ້າກັບຈີນຄືເປັນສິ່ງຊ່ວຍແກ້ໄຂທ່າຕົກຢູ່ໂດດດຽວໃນປະຈຸບັນ. ໃນສະພາວະທີ່ພວມຖືກບັນດາຄຳສັ່ງລົງໂທດຈາກຝ່າຍຕາເວັນຕົກນັ້ນ, ລັດເຊຍຄວນຊອກຫາທາງອອກໃຫ້ແກ່ພື້ນຖານເສດຖະກິດດ້ວຍບັນດາແຫຼ່ງເງິນລົງທຶນຈາກຕ່າງປະເທດ ແລະ ຈີນກໍແມ່ນປະເທດທີ່ສົມຫວັງ.
ແຕ່ກໍບໍ່ໝາຍຄວາມວ່າ ພຽງແຕ່ມົດສະກູຕ້ອງການເທົ່ານັ້ນ, ຫາກປັກກິງກໍຕ້ອງການມີລັດເຊຍໃນຫຼາຍບັນຫາ. ໃນຊຸມປີມໍ່ໆມານີ້, ຈີນຂາດແຄນດດ້ານພະລັງງານເພື່ອຮັບໃຊ້ວິວັດການເຕີບໂຕເສດຖະກິດ. ການຂັດແຍ້ງກ່ຽວກັບເຂດນ້ຳແດນດິນ ກໍໄດ້ຍູ້ການພົວພັນລະຫວ່າງຈີນກັບຫຼາຍປະເທດໃນພາກພື້ນຕົກເຂົາສູ່ສະພາບຄວາມເຄັ່ງຕຶງທີ່ສຸດ. ໃນຄວາມມັກໃຫຍ່ໃຝ່ສູງກ່ຽວກັບປະເທດແຜ່ນດິນໃຫຍ່ຂອງຕົນນັ້ນ, ເບິ່ງຄືວ່າ ຈີນພວມກ້າວເດີນແບບດຽວ ແລະ ໄປຝືນກັບທຸກໆປະເທດໃນໂລກ. ທັງໝົ້ດເຫຼົ່ານັ້ນ ກໍແມ່ນກຳລັງກັນເພື່ອໃຫ້ຈີນພະຍາຍາມສ້າງສຳພັນທະມິດກັບລັດເຊຍ, ຮ່ວມມື 2 ຝ່າຍແບບຕ່າງຝ່າຍຕ່າງມີຜົນປະໂຫຍດ.
ສ້າງການພົວພັນລະຫວ່າງ 2 ປະເທດມະຫາອຳນາດຂອງເອີລົບ ແລະ ອາຊີ
ໃນຕົວຈິງ, ບັນດາສັນຍາທີ່ໄດ້ລົງນາມທີ່ການພົບປະຢູ່ນອກເວທີປາໄສຂັ້ນສູງ APEC ໃນເວລາທີ່ຜ່ານມາ ແມ່ນໄຊຊະນະຂອງທັງ 2 ຝ່າຍ, ຊຶ່ງບໍ່ພຽງແຕ່ມີຄວາມໝາຍດ້ານເສດຖະກິດເທົ່ານັ້ນ, ຫາກຍັງມີຄວາມໝາຍດ້ານການເມືອງອີກດ້ວຍ. ສຳລັບລັດເຊຍແລ້ວ, ປະທານາທິບໍດີ Putin ໄດ້ສົ່ງສານກ່າວເຕືອນວ່າ : ບັນດາຄວາມພະຍາຍາມເຮັດໃຫ້ລັດເຊຍຕົກຢູ່ໂດດດຽວແມ່ນສິ່ງທີ່ຜິດພາດ. ລັດເຊຍໄດ້ເລືອກເອົາເສັ້ນທາງບໍ່ອາໄສຝ່າຍຕາເວັນຕົກ ເພື່ອຟື້ນຟູທີ່ຕັ້ງບົດບາດຂອງຕົນ. ສຳລັບປະເທດຈີນແລ້ວ, ໝາກຜົນເປັນທີ່ຈະແຈ້ງແລ້ວ, ຈີນຕ້ອງການພະລັງງານທຳມະຊາດ ເພື່ອຫຼຸດຜ່ອນຜົນເສຍຫາຍຂອງອາຍແກັສຍ້ອນຖ່ານຫີນກໍ່ມົນລະພິດສິ່ງແວດລ້ອມຢູ່ບັນດາຕົວເມືອງໃຫຍ່.
ໂດຍເລີ່ມມາຈາກການພົວພັນ 2 ຝ່າຍແບບຕ່າງຝ່າຍຕ່າງມີຜົນປະໂຫຍດນັ້ນ, ເພາະສະນັ້ນ, ໃນຂອບເຂດການພົບປະ 2 ຝ່າຍຄັ້ງນີ້, ປະທານາທິບໍດີລັດເຊຍປູຕິນ ແລະ ປະທານປະເທດຈີນ ສີຈີນຜິງ ໄດ້ສະຫງວນຄຳເວົ້າທີ່ສະໜິດສະໜົມໃຫ້ແກ່ກັນ. ເຖິງວ່າສະຖານະການໂລກໃີການປ່ຽນແປງຄືແນວໃດກໍຕາມ, 2 ປະເທດຍັງຄົງສືບຕໍ່ກ້າວເດີນບົນເສັ້ນທາງທີ່ຕົນໄດ້ເລືອກເຟັ້ນ ນັ້ນແມ່ນເປີດກ້ວາງ ແລະ ເພີ່ມທະວີການພົວພັນຮ່ວມມືຮອບດ້ານເພື່ອບັນລຸຜົນສຳເລັດຫຼາຍຢ່າງ. ທັງ ລັດເຊຍ ແລະ ຈີນຕ່າງກໍຫວັງຢາກຢັ້ງຢືນບົດບາດແຫ່ງສິດອຳນາດຂອງຕົນໃນພາກພື້ນ, ເພາະສະນັ້ນ , 2 ແນວຄິດໃຫຍ່ ຈຳເປັນຕ້ອງຮ່ວມສຳພັນນຳກັນເພື່ອກ້າວເດີນບົນເສັ້ນທາງດຽວ.