(vovworld) - ເຖິງວ່າປີ 2012 ປະສົບກັບຄວາມຫຍຸ້ງຍາກ, ການທ້າທາຍຫຼາຍຢ່າງກໍ່ຕາມ, ແຕ່ການຮ່ວມມືໃນອາຊຽນຍັງຄົງບັນລຸຜົນງານທີ່ຕັ້ງໜ້າ. ພ້ອມກັບການສືບຕໍ່ຕັດສິນໃຈ ແລະ ໃຫ້ບຸລິມະສິດສູງແກ່ການຜັນຂະຫຍາຍການກໍ່ສ້າງປະຊາຄົມ, ອາຊຽນຍັງສະແດງໃຫ້ເຫັນຫຼັກໝັ້ນຂອງຕົນໃນການແກ້ໄຂບັນດາບັນຫາພາຍໃນກຸ່ມ ກໍ່ຄືການທ້າທາຍຕ່າງໆຢູ່ນອກກຸ່ມອີກ. ຄວາມເຫັນດີເຫັນພ້ອມນຳກັນ ແມ່ນເງື່ອນໄຂເພື່ອແກ້ໄຂຮົ້ວກີດຂວາງ, ເຮັດໃຫ້ອາຊຽນມີຄວາມສາມັກຄີ ແລະ ເປັນເອກະພາບນຳກັນກວ່າ ເພື່ອຮັບມືກັບການທ້າທາຍຕ່າງໆໃນຕໍ່ໜ້າ.
(ພາບ ອິນເຕີແນດ)
ອາດເຫັນໄດ້ວ່າ, ເສັ້ນທາງພັດທະນາຂອງອາຊຽນໃນ 45 ປີທີ່ຜ່ານມາ ບໍ່ພຽງແຕ່ມີຄວາມສະດວກສະບາຍເທົ່ານັ້ນ, ຫາກຕ້ອງຜ່ານຜ່າການທ້າທາຍຫຼາຍຢ່າງ, ພິເສດແມ່ນໃນປີ 2012
ເປັນຄັ້ງທຳອິດໃນປະຫວັດ 45 ປີ ແຫ່ງການສ້າງຕັ້ງ ແລະ ພັດທະນາ, ຢູ່ກອງປະຊຸມລັດຖະມົນຕີການຕ່າງປະເທດອາຊຽນເມື່ອເດືອນ 7/2012. ອາຊຽນບໍ່ສາມາດຮັບຮອງເອົາຖະແຫຼງການຮ່ວມໄດ້ ຍ້ອນທັດສະນະຂອງຝ່າຍຕ່າງໆກ່ຽວກັບບັນຫາທະເລຕາເວັນອອກມີຄວາມແຕກຕ່າງກັນ. ແຕ່ດ້ວຍມູນເຊື້ອແຫ່ງຄວາມສາມັກຄີ ຂອງອາຊຽນ, ພ້ອມກັບການປະພຶດຕໍ່ທີ່ເໝາະສົມ, ສຸດທ້າຍອາຊຽນກໍ່ໄດ້ເຫັນດີເຫັນພ້ອມຕໍ່ຫຼັກການຮ່ວມ. ລະຫວ່າງ 10 ປະເທດກໍ່ມີປະຫວັດສາດ, ວັດທະນະທຳ, ລະດັບພັດທະນາ, ລະບອບການເມືອງ - ສັງຄົມ ແລະ ຜົນປະໂຫຍດທີ່ແຕກຕ່າງກັນ, ດັ່ງນັ້ນ, ບາງວຽກງານບໍ່ໄດ້ຮັບຄວາມເຫັນດີເຫັນພ້ອມນຳກັນກໍ່ແມ່ນເລື່ອງທຳມະດາ ແລະ ເຂົ້າໃຈງ່າຍ. ເຖິງວ່າໃນເບື້ອງຕົ້ນຈະມີຄວາມແຕກຕ່າງກັນກໍ່ຕາມ, ແຕ່ສຸດທ້າຍລ້ວນແຕ່ຖືຜົນປະໂຫຍດລວມຂອງອາຊຽນເປັນຕົ້ນ, ດັ່ງນັ້ນເຖິງວ່າບັນຫາທີ່ວາງອອກຈະສັບສົນ ແລະ ມີຄວາມສະດຸ້ງໄວຄືແນວໃດ, ແຕ່ດ້ວຍນ້ຳໃຈສາມັກຄີນຳກັນກໍ່ສາມາດແກ້ໄຂໄດ້. ທ່ານ ຫງວຽນຕ໋ຽນມິງ, ຫົວໜ້າກົມອາຊຽນ, ກະຊວງການຕ່າງປະເທດຫວຽດນາມ, ໃຫ້ຂໍ້ສັງເກດວ່າ:
”ພາຍຫຼັງບໍ່ໄດ້ຮັບຜົນທີ່ກອງປະຊຸມລັດຖະມົນຕີການຕ່າງປະເທດອາຊຽນ 45 (AMM 45) ບັນດາປະເທດອາຊຽນລ້ວນແຕ່ຮັບຮູ້ໄດ້ວ່າ, ສິ່ງດັ່ງກ່າວຈະກໍ່ຄວາມເສຍຫາຍອັນໃຫຍ່ຫຼວງໃຫ້ແກ່ອາຊຽນ, ຖ້າບໍ່ແກ້ໄຂໄດ້, ອາຊຽນຈະຕົກເຂົ້າສູ່ສະພາບວິກິດການ. ດັ່ງນັ້ນ, ເມື່ອອິນໂດເນເຊຍ ຍົກຂໍ້ລິເລີ່ມກ່ຽວກັບການຮັບຮອງເອົາຖະແຫຼງການ 6 ຂໍ້ນັ້ນ, ບັນດາປະເທດໃນກຸ່ມກໍ່ເຫັນດີເຫັນພ້ອມໃນທັນທີ. ບັນດາປະເທດອາຊຽນ ລ້ວນແຕ່ມີການກະທຳອັນລະອຽດ ເພື່ອປັບປຸງຄວາມສາມັກຄີຂອງຕົນ”.
ອາຊຽນ ໄດ້ເຫັນດີເຫັນພ້ອມຕໍ່ຫຼັກໝັ້ນຮ່ວມ, ນັ້ນແມ່ນບັນຫາຮັກສາສັນຕິພາບ, ສະຖຽນລະພາບ, ຄວາມໝັ້ນຄົງໃນທະເລຕາເວັນອອກ. ບັນດາປະເທດສະມາຊິກໄດ້ເຫັນດີຜັນຂະຫຍາຍການປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ກ້າວໄປເຖິງການລົງນາມໃນປະມວນຫຼັກການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ສະໜັບສະໜູນເລື່ອງການພິພາດຕ່າງໆບົນພື້ນຖານກົດໝາຍສາກົນ.
ດ້ວຍຫົວຂໍ້ ”ອາຊຽນ: ປະຊາຄົມໜຶ່ງ, ຊາຕະກຳດຽວ” ນັ້ນ, ການຮ່ວມມືອາຊຽນໃນປີ 2012 ຍັງສະແດງໃຫ້ເຫັນຄວາມເຫັນດີເຫັນພ້ອມສູງໃນການຮັກສາຈຸດສຸມ ແລະ ທິດບຸລິມະສິດຂອງຕົນ. ໃນວິວັດການສ້າງຕັ້ງປະຊາຄົມອາຊຽນໃນປີ 2015, ປີ 2012, ພ້ອມກັບການປະກາດສ້າງຕັ້ງອົງການສັນຕິພາບ ແລະ ໄກເກ່ຍ ປອງດອງອາຊຽນ, ອາຊຽນໄດ້ຮັບຮອງເອົາຖະແຫຼງການມະນຸດສະທຳ. ນີ້ແມ່ນບາດກ້າວສຳຄັນຂອງອາຊຽນໃນວິວັດການສ້າງປະຊາຄົມການເມືອງ - ຄວາມໝັ້ນຄົງ, ເໝາະສົມກັບທິດນຳ, ຫຼັກການເຄື່ອນໄຫວຂອງອາຊຽນນັ້ນແມ່ນ ”ຄວາມເປັນເອກະພາບໃນລັກສະນະຫຼາຍຮູບຫຼາຍແບບ”. ທ່ານ ຫງວຽນຕ໋ຽນມິງ, ຫົວໜ້າກົມອາຊຽນ, ກະຊວງການຕ່າງປະເທດຫວຽດນາມ, ຖືວ່າ:
”ນີ້ແມ່ນບາດກ້າວທີ່ມີຄວາມສຳຄັນທີ່ສຸດໃນອາຊຽນ, ເພາະວ່າບັນດາປະເທດໃນອາຊຽນ, ມີລະບອບການເມືອງທີ່ແຕກຕ່າງກັນ. ແຕ່ຜ່ານ 1 ປີ ແຫ່ງການປຶກສາຫາລື, ບັນດາປະເທດອາຊຽນ ໄດ້ບັນລຸຄວາມເຫັນດີເຫັນພ້ອມ, ນອກຈາກການປະຕິບັດບັນດາມາດຖານມະນຸດສະທຳຂອງຝ່າຍຕາເວັນຕົກແລ້ວ ຍັງເອົາໃຈໃສ່ເຖິງບັນດາບັນຫາຂອງພາກພື້ນອີກດ້ວຍ. ດັ່ງນັ້ນ, ສິ່ງສຳຄັນໃນຖະແຫຼງການສິດທິມະນຸດ ແມ່ນໄດ້ກຳນົດບັນດາມາດຖານຢ່າງຈະແຈ້ງ, ແຕ່ກ່ອນອື່ນໝົດແມ່ນຕ້ອງເຄົາລົບບັນດາມາດຖານ, ກົດໝາຍຂອງແຕ່ລະປະເທດ. ນີ້ແມ່ນຜົນສຳເລັດຂອງບັນດາປະເທດອາຊຽນໃນການເຈລະຈາ ເພື່ອບັນລຸຄວາມເຫັນດີເປັນເອກະພາບ”.
ປີ 2012, ໄປຄຽງຄູ່ກັບການຜັນຂະຫຍາຍວິວັດການຮ່ວມສຳພັນ ແລະ ເຊື່ອມຈອດອາຊຽນຢ່າງມີປະສິດທິຜົນ, ອາຊຽນກໍ່ໄດ້ຕັ້ງໜ້າເປີດກວ້າງການຮ່ວມມືກັບບັນດາຄູ່ຮ່ວມມືຢູ່ນອກກຸ່ມ. ອາຊຽນພ້ອມກັບອາເມລິກາ ແລະ ອິນເດຍ ໄດ້ຍົກການພົວພັນຂຶ້ນເປັນການພົວພັນຄູ່ຮ່ວມມືຍຸດທະສາດ. ບັນດາຄູ່ຮ່ວມມືກໍ່ໄດ້ສະເໜີຂໍ້ລິເລີ່ມກ່ຽວກັບການຮ່ວມມືອັນລະອຽດຫຼາຍຢ່າງກັບອາຊຽນ. ຍີ່ປຸ່ນໝັ້ນໝາຍໜູນຊ່ວຍ ODA 500 ຕື້ເຢັນ ເພື່ອໃຫ້ບັນດາປະເທດແຄມແມ່ນ້ຳຂອງພັດທະນາໂຄງລ່າງໃນ 3 ປີຈະມາເຖິງ. ສ່ວນຈີນສະເໜີສ້າງຕັ້ງຄະນະກຳມະການເຊື່ອມຈອດ ອາຊຽນ - ຈີນ, ໜູນຊ່ວຍບັນດາໂຄງການເຊື່ອມຈອດອາຊຽນ ດ້ວຍບ້ວງສິນເຊື່ອ 10 ຕື້ ໂດລາສະຫະລັດ, ປະກອບເງິນຕື່ມອີກ 5 ລ້ານໂດລາ ໃຫ້ແກ່ກອງທຶນລວມອາຊຽນ - ຈີນ. ສເກົາຫຼີ ໜູນຊ່ວຍອາຊຽນ 10 ລ້ານໂດລາສະຫະລັດກ່ຽວກັບການເຊື່ອມໂຍງຕາມຂໍ້ລິເລີ່ມເຊື່ອມຈອດອາຊຽນ, ອີຢູ ອຸປະຖຳເງິນ 15 ລ້ານ ເອີໂຣ ໃນໄລຍະ 2012 – 2016. ເຂັດລັບຜົນສຳເລັດຂອງອາຊຽນ ແມ່ນຍ້ອນມີຄວາມເຫັນດີເປັນເອກະພາບໃນລັກສະນະຫຼາຍຮູບຫຼາຍແບບ, ເດັດດ່ຽວຮັກສາສີສັນ, ພ້ອມກັນມຸ້ງໄປເຖິງສັນຕິພາບ, ສະຖຽນລະພາບ, ການຮ່ວມມືເພື່ອພັດທະນາ.
ປີ 2013, ໂດຍສືບຕໍ່ຮັກສາບັນດາຫຼັກການອັນເປັນພື້ນຖານນີ້ຢ່າງໝັ້ນຄົງ, ແນ່ນອນວ່າ ອາຊຽນຈະຮັກສາພະລັງຊີວິດ ແລະ ທີ່ຕັ້ງພິເສດສະເພາະຂອງຕົນໄດ້. ໃນຕໍ່ໜ້າອາຊຽນຍັງມີຄາດໝາຍອັນໃຫຍ່ຫຼວງຫຼາຍຢ່າງທີ່ຕ້ອງປະຕິບັດ. ນັ້ນແມ່ນການສ້າງຕັ້ງປະຊາຄົມອາຊຽນໃນປີ 2015, ສືບຕໍ່ສວມບົດບາດໃຈກາງຢູ່ອາຊີຕາເວັນອອກ, ສູ້ຊົນເພື່ອສັນຕິພາບ, ການຮ່ວມມື ແລະ ພັດທະນາຢູ່ໃນໂລກ.