ສຳລັບຊາວຫວຽດນາມແຕ່ລະຄົນ, ບຸນປີໃຫມ່ປະຈຳຊາດ ຍາມໃດກໍມີຄວາມໝາຍທີ່ສັກກະລະບູຊາ. ແລະສຳລັບ ຊາວຫວຽດນາມ ອາໄສຢູ່ຕ່າງປະເທດແຕ່ລະຄົນແລ້ວ, ເມື່ອປີເກົ່າຜ່ານໄປ ປີໃຫມ່ວຽນມາ, ແມ່ນຍິ່ງມີຄວາມຄິດຮອດຄິດເຖິງບ້ານເກີດເມືອງນອນ ກ່ວ່າເວລາໃດໝົດ. ເຖິງວ່າ ຢູ່ແຫ່ງໃດກໍຕາມ, ຈຸດເວລາທີ່ສັກກະລະບູຊານັ້ນ ເຂົາເຈົ້າກໍ່ລ້ວນແຕ່ອ່າວຍຫນ້າເມືອຫາບ້ານເກີດເມືອງນອນດ້ວຍອະນຸສອນຫລາຍຢ່າງ ແລະ ປາດຖະຫນາວ່າ ປະເທດຊາດຈະນັບມື້ນັບໄດ້ຮັບການພັດທະນາ.
ຕ້ອນຮັບບຸນປີໃຫມ່ປະຈຳຊາດແມ່ນຈຸດວັດທະນະທຳທີ່ເປັນເອກະລັກສະເພາະທີ່ສຸດຂອງຊາດຫວຽດນາມ. ເມື່ອເວົ້າເຖິງບຸນເຕັດ, ແມ່ນຫວນຄິດເຖິງຫລາຍສິ່ງຫລາຍຢ່າງ ແຕ່ສຳລັບຊາວຫວຽດນາມອາໄສຢູ່ຕ່າງປະເທດແລ້ວ, ບັນຍາກາດເຕົ້າໂຮມກັບຄອບຄົວ, ສີສັນຫລາກຫລາຍຂອງຕະຫລາດດອກໄມ້, ການປະດັບປະດາເຮືອນຊານ, ກະກຽມພາໝາກໄມ້, ກະກຽມພາເຂົ້າຕ້ອນຮັບປີໃຫມ່ ນັ້ນແມ່ນສິ່ງທີ່ເຂົາເຈົ້າຄິດເຖິງຫລາຍທີ່ສຸດ. ເມື່ອໂອກາດບຸນເຕັດ, ລະດູບານໃຫມ່ວຽນມາ, ຊາວຫວຽດນາມອາໄສຢູ່ປະເທດຕ່າງໆໃນໂລກ ມີເງື່ອນໄຂໄດ້ກັບເມືອເຕົ້າໂຮມກັບຄອບຄົວ, ຍາດຕິພີ່ນ້ອງ ເພື່ອເຈືອຈານເຂົ້າກັບບັນຍາກາດຕ້ອນຮັບບຸນເຕັດ. ສຳລັບຊາວຫວຽດນາມທີ່ພວມດຳລົງຊີວິດຢູ່ຫ່າງໄກຈາກບ້ານເກີດເມືອງນອນ ແລະ ບໍ່ມີເງື່ອນໄຂກັບເມືອ, ບັນດາຮູບພາບຂອງບຸນເຕັດນັ້ນເຮັດໃຫ້ເຂົາເຈົ້າຍິ່ງຄິດຮອດຄິດເຖິງຫລາຍ. ດີງງອກທ໋າຍ, ນັກສຶກສາຫວຽດນາມ ພວມຮຳ່ຮຽນ ຢູ່ ອາເມລິກາ ໄດ້ແບ່ງປັນວ່າ:
“ເມື່ອດຳລົງຊີວິດຢູ່ຫ່າງໄກປະເທດຊາດ, ແຕ່ລະຄົນລ້ວນແຕ່ມີຄວາມຄິດຮອດຄິດເຖິງ. ນັ້ນແມ່ນຄິດເຖິງບ້ານເກີດເມືອງນອນ, ຄອບຄົວ, ໝູ່ເພື່ອນ ແລະ ພິ່ນ້ອງ. ເຖິງຢ່າງໃດກໍຕາມ, ຈຸດເວລາທີ່ເຮັດໃຫ້ຂ້າພະເຈົ້າຄິດຮອດຄິດເຖິງບ້ານເກີດເມືອງນອນທີ່ສຸດ ແມ່ນຈຸດເວລາສົ່ງທ້າຍປີເກົ່າ ຕ້ອນຮັບປີໃຫມ່. ເພາະວ່າ ເວລານັ້ນ ໃຜໆກໍຟ້າວຟັ່ງເພື່ອກັບຄືນເມືອຕ້ອນຮັບບຸນເຕັດພ້ອມກັບຄອບຄົວ ແລະ ພີ່ນອ້ງ. ເວລານີ້ ຂ້າພະເຈົ້ານຶກເຖິງບົດເພງ: Nho ve Ha Noi ຄິດຮອດຮ່າໂນ້ຍ ຂອງນັກດົນຕີ ຮ່ວາງຮຽບ“
![ຊາວຫວຽດນາມ ອາໄສຢູ່ຕ່າງປະເທດຕ້ອນຮັບບຸນເຕັດ - ảnh 1](https://image.vovworld.vn/w730/uploaded/vovworld/bcgmbuiq/2012_01_18/ba%20con%20viet%20kieu%20mua%20sam%20tet.jpg)
ຊາວຫວຽດນາມອາໄສຢູ່ຕ່າງປະເທດຊື້ເຄື່ອງຂອງຕ້ອນຮັບບຸນເຕັດ
ເຖິງວ່າ ເງື່ອນໄຂປະຈຸບັນ ແມ່ນຕ່າງກັບກ່ອນນີ້ຫລາຍແລ້ວ, ບັນດາເຍື່ອງອາຫານໃນພາເຂົ້າຂອງບຸນເຕັດຂອງພໍ່ແມ່ຊາວຫວຽດນາມອາໄສຢູ່ຕ່າງປະເທດກໍຄົບຖ້ວນ, ແຕ່ວ່າ ບັນຍາກາດຄືຢູ່ບ້ານເກີດເມືອງນອນບໍ່ອາດພົບເຫັນຢູ່ເຂດແດນໄກໄດ້. ເຖິງວ່າໄດ້ມາເຢຍລະມັນເພື່ອເຕົ້າໂຮມກັບຄອບຄົວກວ່າ 10 ປີ ແລ້ວກໍຕາມ ແຕ່ເມື່ອໂອກາດບຸນປີໃຫມ່ປະຈຳຊາດວຽນມາ, ປ້າ ຫງວຽນທີທ໋າຍ ພັດຄິດຮອດຄິດເຖິງບ້ານເກີດເມືອງນອນຫລາຍ.
“ບຸນເຕັດຢູ່ບ້ານເກີດເມືອງນອນຍາມໃດກໍເຕັມໄປດ້ວຍຄວາມອົບອຸ່ນ ແລະ ເຂັ້ມຂົ້ນໄປດ້ວຍສີສັນຊາດ. ຢູ່ຕ່າງປະເທດ ເຖິງວ່າ ຊີວິດການເປັນຢູ່ແມ່ນອີ່ມໜຳສຳລານ ແລະ ສິວິໄລກວ່າ ແຕ່ຍາກຈະປຽບທຽບກັບວັດທະນະທຳ ມູນເຊື້ອຂອງຊາວຫວຽດນາມໄດ້. ໃນຈຸດເວລາ ທ່ານປະທານປະເທດອ່ານຈົດໝາຍອວຍພອນປີໃຫມ່, ຂ້າພະເຈົ້າມີຄວາມຮູ້ສຶກພິເສດ,ນັ້ນແມ່ນຈຸດເວລາສົ່ງທ້າຍປີເກົ່າ ຕ້ອນຮັບປີໃຫມ່, ເວລານັ້ນ ຍິ່ງຄິດຮອດຄິດເຖິງບ້ານເກີດເມືອງນອນກວ່າເກົ່າ“
ສຳລັບ ເຈົາ Soryari ຊຶ່ງແມ່ນນາງສາວຊາວເຜົ່າຂະແມ ຢູ່ ອານຢາງແລ້ວ, ບຸນເຕັດປີນີ້ ແມ່ນປີທຳອິດນ້ອງຫ່າງໄກຈາກຄອບຄົວ. ນາງເຈົາພວມຮຽນປະລິຍາໂທ ຂະແຫນງການສຶກສາຢູ່ Hawaii ສະຫະລັດອາເມລິກາ. ສຳລັບນາງເຈົາແລ້ວ, ຄວາມ ຮູ້ສຶກກ່ຽວກັບລະດູບານໃຫມ່ ແມ່ນກິນຫອມຫວນຂອງຕົ້ນເຂົ້າ, ຕົ້ນໄມ້ອອກໜໍ່ຈໍ່ດອກ ທ່າມກາງ ອາກາດຫນາວເຢັນ ແລະ ຕອນນັ່ງຝີງໄຟເຝົ້າໝໍ້ເຂົ້າຕົ້ມໃນຄ່ຳຄືນທ້າຍປີເກົ່າ.
“ເປັນຄັ້ງທຳອິດທີ່ຂ້າພະເຈົ້າຕ້ອນຮັບລະດູບານໃຫມ່ຢູ່ຕ່າງປະເທດ. ເຖິງວ່າ ໄລຍະເວລາຈະຜ່ານໄປຢ່າງໄວວາກໍຕາມ, ແຕ່ ຂ້າພະເຈົ້າຍັງຄິດຮອດຄິດເຖິງບ້ານເກີດເມືອງນອນຫລາຍ. ສິ່ງທີ່ສ້າງຄວາມປະທັບໃຈທີ່ສຸດທີ່ມີຕໍ່ຂ້າພະເຈົ້າ ນັ້ນແມ່ນການຫັນປ່ຽນ ແລະ ພັດທະນາຢ່າງບໍ່ຢຸດຢັ້ງຂອງເຂດດິນແດນ ອານຢາງ ໃນຊຸມປີມໍ່ໆມານີ້. ຂ້າພະເຈົ້າຈະກັບຄືນເມືອບ້ານເກີດເມືອງນອນ ເພື່ອປະກອບກຳລັງເຫື່ອແຮງຂອງຕົນເຂົ້າໃນການພັດທະນາແລະສ້າງຄວາມວັດທະນາຖາວອນໃຫ້ແກ່ບ້ານເກີດເມືອງນອນພາຍຫລັງຮຽນຈົບ.“
ໃນຈຸດເວລາທີ່ສັກກະລະບູຊາສົ່ງທ້າຍປີເກົ່າ ຕ້ອນຮັບປີໃຫມ່, ນອກຈາກ ຄວາມຄິດຮອດຄິດເຖິງບ້ານເກີດເມືອງນອນ, ສິ່ງທີ່ພໍ່ແມ່ ປະຊາຊົນຄອງຄອຍທີ່ສຸດແມ່ນ ປະເທດຊາດສືບຕໍ່ບັນລຸໄດ້ບັນດາຜົນງານທາງດ້ານເສດຖະກິດ, ວັດທະນະທຳ ສັງຄົມໃນປີໃຫມ່, ທີ່ຕັ້ງບົດບາດຂອງປະເທດຊາດນັບມື້ນັບໄດ້ຮັບການຍົກສູງຂຶ້ນ ເພື່ອໃຫ້ຫວຽດນາມ ສາມາດບືນຂ້ືນອັນດັບທີ່ສູງກ່ວາໃນຕາຕະລາງຈັດອັນດັບຂອງໂລກ. ການປະກອບສ່ວນຂອງພໍ່ແມ່ຊາວຫວຽດນາມອາໄສຢູ່ຕ່າງປະເທດ ກໍແມ່ນກຳລັງຫນູນສຳຄັນສ້າງເປັນຜົນງານເຫຼົ່ານັ້ນ. ທ່ານ ຫງວຽນດຶກເຄືອງ, ອາຈານສອນຂະແຫນງການເງິນ ຢູ່ສະຖານບັນການຄ້າ ປາຣີ, ປະທານສະມາຄົມວິທະຍາສາດ ແລະ ຜູ້ຊ່ຽວຊານຂອງຫວຽດນາມ ປະຈຳຝລັ່ງ ຖືວ່າ:
“ຕອ້ງດຳລົງຊີວິດ ແລະ ເຮັດວຽກເປັນຢ່າງດີ ເພື່ອຄວາມເອກອ້າງທະນົງໃຈຕໍ່ປະເທດຊາດ, ສາມາດເປັນກຸນແຈເພື່ອສ້າງປະເທດເຮົ້າໃຫ້ກາຍເປັນປະເທດມະຫາອຳນາດ. ຄວາມໄຝ່ຝັນ, ທະນຸທະໜອມຄວາມມຸ້ງຫວັງ, ຢືດໝັ້ນ ຝຶກຝົນຫລໍ່ຫລອມຕົນເອງ ແລະ ຕັ້ງຫນ້າເຂົ້າຮ່ວມການປະກອບສ່ວນໃຫ້ແກ່ການພັດທະນາຂອງປະເທດຊາດ ແມ່ນວຽກງານທີ່ຄວນເຮັດ. ເມື່ອເວົ້າເຖິງຫວຽດນາມ ບໍ່ພຽງແຕ່ເວົ້າເຖິງປະເທດຫນຶ່ງທີ່ຕັ້ງຢູ່ໃນອາຊີອາຄະເນເທົ່ານັ້ນ ຫາກຍັງແມ່ນພາບພົດແຫ່ງຄວາມສາມັກຄີ, ຄວາມເປັນເອກະພາບຂອງຊາວຫວຽດນາມ ເຖິງວ່າຈະດຳລົງຊີວິດຢູ່ ແຫ່ງຫົນໃດໃນໂລກກໍ່ຕາມ.“
ເມື່ອຢູ່ຫ່າງໄກຈຶ່ງເຫັນວ່າ ພວກເຮົາຮັກແພງບ້ານເກີດເມືອງນອນ ແລະ ຄິດຮອດຄິດເຖິງບ້ານເກີດເມືອງນອນຫຼາຍປານໃດ. ຜູ້ໃດທີ່ມີໂອກາດຕ້ອນຮັບບຸນເຕັດຫ່າງໄກບ້ານເກີດເມືອງນອນຈັກເທື່ອຫນຶ່ງ ລ້ວນແຕ່ເວົ້າຄືແນວນັ້ນ. ລະດູບານໃຫມ່ວຽນມາອີກວາລະຫນຶ່ງຢູ່ບ້ານເກີດເມືອງນອນ ອັນໄດ້ເປັນການເຮັດໃຫ້ຊາວຫວຽດນາມອາໄສຢູ່ຕ່າງປະເທດແຕ່ລະຄົນ ເກີດຄວາມຄິດຮອດຄິດເຖິງປະເທດຊາດ ແລະ ຮັກແພງບ້ານເກີດເມືອງນອນຍິ່ງກວ່າເວລາໃດໝົດ./.
ຸຸໂຕຕວັນ