(vovworld)- ຫວຽດນາມ ຍາມໃດກໍຕັ້ງຫນ້າປະກອບສ່ວນ ເພື່ອສ້າງ ອາຊຽນ ຮ່ວມສຳພັນຢ່າງແຫນ້ນແຟ້ນ, ສາມັກຄີ, ເຂັ້ມແຂງ, ນັບມື້ນັບມີບົດບາດ ແລະ ທີ່ຕັ້ງສຳຄັນຢູ່ພາກພື້ນ ແລະ ສາກົນ. ນີ້ກໍແມ່ນບັນດາຈຸດໝາຍ ຊື່ງໃນປີຜ່ານມາ ຫວຽດນາມ ໄດ້ມານະພະຍາຍາມພ້ອມກັບ ອາຊຽນ ຜັນຂະຫຍາຍການປະຕິບັດ. ກ່ອນທີ່ສ້າງປະຊາຄົມອາຊຽນ ສຳເລັດຜົນ 1 ປີ, ຫວຽດນາມ ໄດ້ສ້າງຫລາຍຂີດໝາຍສຳຄັນໃນວິວັດການສ້າງປະຊາຄົມ ອາຊຽນ ພ້ອມທັງກະກຽມໄລຍະພັດທະນາຕໍ່ໄປຂອງອາຊຽນ.
ທ່ານນາຍົກລັດຖະມົນຕີ ຫງວຽນເຕີນຢູງ ເຂົ້າຮ່ວມ
ກອງປະຊຸມສຸດຍອດ ອາຊຽນ 25
|
ການຮ່ວມມືອາຊຽນ ຍາມໃດກໍໄດ້ຮັບການກຳນົດແມ່ນມີຄວາມໝາຍສຳຄັນຍຸດທະສາດສຳລັບຄວາມໝັ້ນຄົງ ແລະ ການພັດທະນາຂອງຫວຽດນາມ, ພິເສດ ໄລຍະປະຈຸບັນ ເມື່ອຫວຽດນາມ ພວມນັບມື້ນັບເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ. ບົນຈິດໃຈນັ້ນ, ປີ 2014 ຫວຽດນາມ ໄດ້ຕັ້ງຫນ້າເຂົ້າຮ່ວມ, ປະກອບສ່ວນຢ່າງມີປະສິດທິຜົນເຂົ້າໃນວິວັດການສ້າງປະຊາຄົມ ອາຊຽນ, ປັບປຸງຄວາມສາມັກຄີ ແລະ ເສີມຂະຫຍາຍຄວາມຮັບຜິດຊອບ, ສຽງເວົ້າລວມຂອງອາຊຽນໃນບັນດາບັນຫາຍຸດທະສາດຢູ່ພາກພື້ນ, ພ້ອມທັງປະກອບສ່ວນສ້າງການກຳນົດທິດໃຫຍ່ຂອງອາຊຽນ ຫລັງປີ 2015.
ຕັ້ງຫນ້າຜັນຂະຫຍາຍວິວັດທະນາການສ້າງປະຊາຄົມອາຊຽນ
ຜ່ານໄລຍະ 5 ປີ ແຫ່ງວິວັດທະນາການສ້າງປະຊາຄົມອາຊຽນ, ມາຮອດປະຈຸບັນ ອາຊຽນ ບັນລຸໄດ້ບາງໝາກຜົນຢ່າງແນ່ນອນ. ຄວາມຄືບຫນ້າການຜັນຂະຫຍາຍລວມໃນ 3 ເສົາຄ້ຳ: ການເມືອງ ຄວາມໝັ້ນຄົງ, ເສດຖະກິດ, ວັດທະນະທຳສັງຄົມ ຂອງທັງກຸ່ມອາຊຽນ ບັນລຸໄດ້ກວ່າ 85%. ສະເພາະ ຫວຽດນາມ, ເລື່ອງຜັນຂະຫຍາຍວິວັດທະນາການສ້າງປະຊາຄົມອາຊຽນ ໄດ້ຮັບການຜັນຂະຫຍາຍຢ່າງກວ້າງຂວາງໃນທັງ 3 ເສົາຄ້ຳ. ໃນຂົງເຂດການເມືອງຄວາມໝັ້ນຄົງ, ຫວຽດນາມ ໄດ້ປະກອບສ່ວນຫລາຍຢ່າງເຂົ້າໃນການສ້າງ, ແບ່ງປັນ, ເສີມຂະຫຍາຍບັນດາມາດຖານປະພຶດ ແລະ ບັນດາກົນໄກຮ່ວມມືທີ່ມີຢູ່ແລ້ວຂອງພາກພື້ນຢ່າງມີປະສິດທິຜົນ. ເປັນຫນ້າສົນໃຈ, ໃນຂົງເຂດເສດຖະກິດ, ຍາມໃດຫວຽດນາມ ກໍນອນໃນຈຳນວນ 4 ປະເທດ ບັນລຸອັດຕາສ່ວນຜັນຂະຫຍາຍສູງສຸດ, ປະຈຸບັນ ຫວຽດນາມ ຢືນອັນດັບ 2 ຖັດຈາກ ສິງກະໂປ ດ້ວຍອັດຕາສ່ວນປະມານ 90%. ທ່ານ ຟ້າມກວາງວີງ, ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ຢືນຢັນວ່າ:
“ສຳລັບ ຫວຽດນາມ, ພວກເຮົາແມ່ນຫນຶ່ງໃນບັນດາປະເທດນຳຫນ້າໃນການປະຕິບັດບັນດາມາດຖານ ແລະ ວິວັດທະນາການສ້າງປະຊາຄົມ ອາຊຽນ ທີ່ໄດ້ວາງອອກ ແລະໄດ້ຮັບການຕີລາຄາສູງຈາກຄະນະເລຂາ ອາຊຽນ. ໃນໄລຍະຈະມາເຖິງ, ແນ່ນອນວ່າ ພວກເຮົາຕ້ອງປະຕິບັດໃຫ້ຫລາຍກວ່າ, ພິເສດ ແມ່ນບັນດາຫນ້າວຽກທີ່ຍັງເຫລືອດ້ວຍລະດັບຮ່ວມສຳພັນສູງກວ່າ.”
ປັບປຸງຄວາມສາມັກຄີ ອາຊຽນ
ໃນປີຜ່ານມາ, ຄວາມຮັບຜິດຊອບ ແລະ ບົດບາດຫລັກແຫລ່ງຂອງອາຊຽນ ໃນການຮັກສາສັນຕິພາບ, ຄວາມໝັ້ນຄົງ, ສະຖຽນລະພາບຢູ່ພາກພື້ນ ສືບຕໍ່ໄດ້ຮັບການຍົກສູງຂຶ້ນ ແລະ ສະແດງໃຫ້ເຫັນຢ່າງຈະແຈ້ງຜ່ານບັນດາການຜັນແປເຄັ່ງຕຶງຢູ່ທະເລຕາເວັນອອກ. ເລີ່ມຈາກຜົນປະໂຫຍດປົກປັກຮັກສາອະທິປະໄຕ ແລະ ຜືນແຜນດິນອັນຄົບຖ້ວນ, ຫວຽດນາມ ຢືດໝັ້ນຮັກສາບັນດາຫລັກການຂອງກົດໝາຍສາກົນ, ບັນດາຂໍ້ຕົກລົງທີ່ໄດ້ລົງນາມລະຫວ່າງ ອາຊຽນ ແລະ ຈີນ, ມານະພະຍາຍາມພ້ອມກັບບັນດາປະເທດ ອາຊຽນ ຮັບປະກັນຄວາມສາມັກຄີພາຍໃນກຸ່ມ. ທ່ານ ຟ້າມບີງມີງ, ຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຖືວ່າ: ເລື່ອງບັນດາລັດຖະມົນຕີການຕ່າງປະເທດ ອາຊຽນ ໄດ້ອອກຖະແຫລງການປະຫວັດສາດເມື່ອວັນທີ 10/5/2014 ກ່ຽວກັບບັນດາການຜັນແປຢູ່ທະເລຕາເວັນອອກ ຫລື ຖະແຫລງການຮ່ວມ AMM-47 ໄດ້ຮັບຮູ້ຄຳໝັ້ນສັນຍາຂອງບັນດາປະເທດ ອາຊຽນ ຕ້ອງປະຕິບັດຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ສະແດງໃຫ້ເຫັນ ອາຊຽນ ໄດ້ເສີມຂະຫຍາຍ ຄວາມສາມັກຄີ ຢ່າງແຮງ, ສະແດງສຽງເວົ້າລວມ ແລະ ເປັນເອກະພາບຕໍ່ບັນດາບັນຫາຍຸດທະສາດຢູ່ພາກພື້ນ.
“ບັນຫາທະເລຕາເວັນອອກ ຍາມໃດກໍແມ່ນຄວາມເອົາໃຈໃສ່ລວມຂອງບັນດາປະເທດ ອາຊຽນ. ອາຊຽນ ເປັນເອກະພາບສູງ, ຖື ບັນຫາທະເລຕາເວັນອອກ ຕ້ອງໄດ້ຮັບການແກ້ໄຂໂດຍສັນຕິວິທີ, ເນັ້ນຫນັກເຖິງການຈຳກັດ, ບໍ່ນຳໃຊ້ອາວຸດຫລື ນາບຂູ່ການນຳໃຊ້ອາວຸດ ແລະ ປະຕິບັດຕາມກົດໝາຍສາກົນ, ສົນທິສັນຍາກົດໝາຍວ່າດ້ວຍທະເລຂອງ ສປຊ ປີ 1982, ຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC). ພິເສດ ບັນດາປະເທດເປັນເອກະພາບກັນສູງກ່ຽວກັບເລື່ອງຕ້ອງຍູ້ແຮງວິວັດທະນາການສ້າງປະມວນຂໍ້ກຳນົດການປະພຶດຢູ່ທະເລຕາເວັນອອກ(COC) ລະຫວ່າງ ອາຊຽນ ແລະ ຈີນ.”
ປະກອບສ່ວນສ້າງກຳນົດທິດໃຫຍ່ຂອງອາຊຽນ
ອາຊຽນ ແນ່ນອນວ່າ ຈະສຳເລັດຈຸດໝາຍສ້າງປະຊາຄົມຖືກກັບການກຳນົດເວລາໃນປີ 2015. ປະຈຸບັນ ອາຊຽນ ໄດ້ສ້າງວິໄສທັດປະຊາຄົມອາຊຽນໃຫ້ແກ່ໄລຍະຫລັງປີ 2015 ແລະ ຊຸກຍູ້ສ້າງຫນ່ວຍສະເພາະກິດຂັ້ນສູງຮຽບຮຽງແຜນການຜັນຂະຫຍາຍ, ຊຶ່ງຄາດວ່າເລີ່ມເຄື່ອນໄຫວແຕ່ເດືອນ 1/2015. ວິໄສທັດດັ່ງກ່າວ ແມ່ນສຸມໃສ່ຕົ້ນຕໍເຂົ້າໃນການກຳນົດທິດໃຫຍ່ຈຳນວນຫນຶ່ງຄື: ສືບຕໍ່ປັບປຸງປະຊາຄົມອາຊຽນ ແລະ ເຮັດໃຫ້ການຮ່ວມສຳພັນອາຊຽນ ເລິກເຊິ່ງກວ່າ ດ້ວຍລະດັບສະຫນິດຕິດພັນ ແລະ ການຮ່ວມມືສູງກວ່າ ໃນ 3 ເສົາຄ້ຳ: ຊຸກຍູ້ ອາຊຽນ ມຸ່ງໄປສູ່ປະຊາຊົນ ແລະ ຖືປະຊາຊົນເປັນໃຈກາງ, ສ້າງປະຊາຄົມໃຫ້ເຂັ້ມແຂງດ້ວຍຕົນເອງໃນການຮັບມືກັບບັນດາສິ່ງທ້າທາຍພວມເກີດຂຶ້ນຢ່າງມີປະສິດທິຜົນ. ກ່ຽວກັບບັນດາຫນ້າທີ່ຂອງຫວຽດນາມໃນໄລຍະຈະມາເຖິງ, ທ່ານ ຟ້າມກວາງວີງ, ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມຊີ້ແຈ້ງວ່າ:
“ຫລັງປີ 2015, ອາຊຽນ ຕ້ອງສ້າງວິໄສທັດສູງກວ່າ ເພື່ອນຳປະຊາຄົມ ອາຊຽນ ພັດທະນາຢ່າງເຂັ້ມແຂງກວ່າ. ພວກເຮົາຈະຕັ້ງຫນ້າປະກອບສ່ວນເຂົ້າໃນການເພີ່ມທະວີຄວາມສາມັກຄີ ອາຊຽນ, ເຮັດແນວໃດເພື່ອໃຫ້ ອາຊຽນ ພ້ອມກັນສາມັກຄີມານະພະຍາຍາມຕາມບັນດາຈຸດໝາຍລວມ. ພວກເຮົາຕັ້ງຫນ້າພ້ອມກັບ ອາຊຽນ ປະກອບສ່ວນສ້າງສະພາບແວດລ້ອມສັນຕິພາບ, ສະຖຽນລະພາບ ພ້ອມທັງເສີມຂະຫຍາຍບົດບາດໃຈກາງຂອງ ອາຊຽນ ເມື່ອ ອາຊຽນຮ່ວມມືຢ່າງເລິກເຊິ່ງກວ່າສຳລັບບັນດາປະເທດຄູ່ຮ່ວມມື ກໍຄືສ້າງບັນດາມາດຖານການປະພຶດຢູ່ພາກພື້ນ ແລະ ໂຄງປະກອບພາກພື້ນພວມໄດ້ຮັບການສ້າງຂຶ້ນ.”
ປີ 2015 ແມ່ນປີທີ່ ອາຊຽນ ສ້າງເປັນປະຊາຄົມ ແລະ ກໍແມ່ນ 20 ປີ ທີ່ຫວຽດນາມ ເຂົ້າເປັນສະມາຊິກ ອາຊຽນ. ໃນ 20 ປີຜ່ານມາ ເປັນຂີດໝາຍສຳຄັນ, ແມ່ນໄລຍະເພື່ອໃຫ້ຫວຽດນາມ ຫວນຄືນຫລັງ ແລະ ພັດທະນາ. ໃນໄລຍະຕໍ່ໄປ, ຫວຽດນາມ ສືບຕໍ່ເສີມຂະຫຍາຍບົດບາດແມ່ນສະມາຊິກຕັ້ງຫນ້າ, ເປັນເຈົ້າການ, ມີຄວາມຮັບຜິດຊອບພ້ອມກັບບັນດາປະເທດໃນພາກພື້ນ ນຳອາຊຽນ ຜ່ານຜ່າສິ່ງທ້າທາຍ, ກາຍເປັນປະຊາຄົມເຂັ້ມແຂງ, ຮ່ວມສຳພັນຢ່າງແຫນ້ນແຟ້ນ ແລະ ພັດທະນາແບບຍືນຍົງຫລັງປີ 2015.