(vovworld) - ພາຍໃຕ້ຫົວຂໍ້ວ່າ: “ເພື່ອນມິດເພື່ອສັນຕິພາບ - ຄູ່ຮ່ວມມືເພື່ອຄວາມ ວັດທະນາຖາວອນ”, ກອງປະຊຸມສຸດຍອດ ຂອງເວທີປາໄສການຮ່ວມມື ອາຊີ - ເອີລົບ ຫລື ASEM 9 ຖືກໄຂຂຶ້ນຢ່າງເປັນທາງການໃນວັນທີ 5/11 ຢູ່ ນະຄອນຫລວງວຽງຈັນ. ທ່ານນາຍົກລັດຖະມົນຕີ ຫວຽດນາມ Nguyen Tan Dung ພ້ອມກັບປະມຸກລັດ 50 ທ່ານ ແລະ ບັນດາການນຳລັດຖະບານປະເທດສະມາຊິກ ASEM ໄດ້ເຂົ້າຮ່ວມກອງປະຊຸມສຳຄັນນີ້.
ກອງປະຊຸມສຸດຍອດ ASEM 9
ພາບ: internet
|
ເວທີປາໄສດຳເນີນໄປໃນສະພາບໂລກພວມປະເຊີນຫນ້າກັບຄວາມຫຍຸ້ງຍາກ ແລະ ສິ່ງທ້າທາຍຫລາຍຢ່າງ, ພິເສດ ວິກິດການເສດຖະກິດໂລກແກ່ຍາວ, ສະນັ້ນ ທີ່ກອງປະຊຸມສຸດຍອດ ASEM 9, ບັນດາການນຳຈະສຸມໃສ່ປຶກສາຫາລືກ່ຽວກັບການຟື້ນຕົວເສດຖະກິດ, ຫັນປ່ຽນຮູບການການເຕີບໂຕ, ສົມທົບນະໂຍບາຍໃນບັນດາບັນຫາເສດຖະກິດ ການເງິນ ຢູ່ ສອງພາກພື້ນ. ໃນຂອບເຂດກອງປະຊຸມ, ASEM 9 ຈະຮັບສາມປະເທດເປັນສະມາຊິກໃຫມ່ ນັ້ນຄື: ບັງກະລາເທດ, ນອກແວ ແລະ ສະວິດ, ຍົກຍອດຈຳນວນສະມາຊິກຂອງ ASEM ຂຶ້ນເຖິງ 51 ປະເທດ. ນີ້ເປັນຄັ້ງທຳອິດ ບັນດາປະເທດຢູ່ນອກ ສະຫະພາບເອີລົບ ເຂົ້າຮ່ວມ ASEM , ສ້າງເປັນກົນໄກຮ່ວມມື ອາຊີ ເອີລົບນັບມື້ນັບເລິກເຊິ່ງ ແລະ ກວ້າງຂວາງ, ໝັ້ນຄົງ, ສືບຕໍ່ຢືນຢັນບົດບາດທີ່ຕັ້ງ ແລະ ຍົກສູງຄວາມສາມາດບົ່ມຊ້ອນການຮ່ວມມືຂອງເວທີປາໄສ.
ຊື່ງແມ່ນຫນຶ່ງໃນ 26 ປະເທດສະມາຊິກສ້າງຕັ້ງຂອງ ASEM, ໃນ 16 ປີຜ່ານມາ, ຫວຽດນາມ ໄດ້ມີການປະກອບສ່ວນສຳຄັນໃນ 3 ເສົາຄ້ຳຮ່ວມມືຂອງ ASEM ນັ້ນແມ່ນການເຈລະຈາດ້ານການເມືອງ, ການຮ່ວມມືເສດຖະກິດ ແລະ ການຮ່ວມມືໃນບັນດາຂົງເຂດອື່ນ, ໃນນັ້ນ ປະກອບສ່ວນພົ້ນເດັ່ນສຸດ ແລະ ເປັນຂີດໝາຍໃນໄລຍະທາງພັດທະນາຂອງ ASEM ນັ້ນແມ່ນ ຫວຽດນາມ ຈັດຕັ້ງກອງປະຊຸມຂັ້ນສູງ ASEM 5 (ປີ 2004) ສຳເລັດຜົນ. ຫວຽດນາມ ກໍເປັນເຈົ້າພາບກອງປະຊຸມຂັ້ນລັດຖະມົນຕີຂອງ ASEM ເປັນຫລາຍຄັ້ງ, ສະເຫນີ ແລະ ພ້ອມກັບບັນດາປະເທດສະມາຊິກຮັບຮອງເອົາເອກະສານ ແລະ ຂໍ້ຕົກລົງສຳຄັນຫລາຍສະບັບທີ່ມີລັກສະນະກຳນົດທິດໃນວິວັດທະນາການຮ່ວມມື ASEM . ມາຮອດປະຈຸບັນ, ຫວຽດນາມ ໄດ້ສະເຫນີຂໍ້ລິເລີ່ມ 16 ຂໍ້ ແລະ ຮ່ວມສ້າງຂໍ້ລິເລີ່ມອື່ນ ສີບຂໍ້ກ່ຽວກັບການເພີ່ມທະວີການຮ່ວມມື ASEM ໃນຂົງເຂດວັດທະນະທຳ, ການສຶກສາ, ສາທາລະນະສຸກ, ຄົມມະນາຄົມຂົນສົ່ງ, ຄວາມໝັ້ນຄົງດ້ານພະລັງງານ, ແບ່ງປັນບົດຮຽນໃນການເພີ່ມວຽກເຮັດງານທຳ ແລະ ຮັບປະກັນຊີວິດສັງຄົມ. ທີ່ກອງປະຊຸມຂັ້ນລັດຖະມົນຕີ ASEM ກ່ຽວກັບແຮງງານ ແລະ ວຽກເຮັດງານທຳຄັ້ງທີ 4 ດຳເນີນໄປຢູ່ຮ່າໂນ້ຍຫວ່າງແລ້ວນີ້, ທ່ານນາງ ຟ້າມທິຫາຍຈ່ວຽນ ລັດຖະມົນຕີກະຊວງແຮງງານ ທະຫານເສຍອົງຄະ ແລະ ສັງຄົມ
“ລັດຖະບານ ຫວຽດນາມ ພວມຜັນຂະຫຍາຍແຜນຮ່າງສ້າງວຽກເຮັດງານທຳຄື: ສ້າງໂຄງການວຽກເຮັດງານທຳແຫ່ງຊາດ, ໂຄງການສອນວິຊາຊີບໃຫ້ແກ່ຊາວຫນຸ່ມ, ໂຄງການແກ້ໄຂວຽກເຮັດງານທຳຕິດພັນກັບການລົບລ້າງຄວາມອຶດຫິວຫລຸດຜ່ອນຄວາມທຸກຍາກ. ຫວຽດນາມ ກໍເລີ່ມຕົ້ນຜັນຂະຫຍາຍການປະກັນວ່າງງານ ແລະ ເພີ່ມທະວີກຳລັງຄວາມສາມາດໃຫ້ແກ່ລະບົບບໍລິການວຽກເຮັດ”
ໃນຂອບເຂດການຮ່ວມມື ASEM , ຫວຽດນາມພ້ອມກັບບັນດາປະເທດສະມາຊິກຮອບຮອງເອົາເອກະສານ ແລະ ຂໍ້ຕົກລົງສຳຄັນມີລັກສະນະກຳນົດທິດໃນວິວັດທະນາການຮ່ວມມື ASEM ຄື: ຖະແຫລງການຮ່າໂນ້ຍກ່ຽວກັບການພົວພັນຄູ່ຮ່ວມມືເສດຖະກິດ ASEM ຢ່າງແຫນ້ນແຟ້ນກວ່າ” ແລະ ຖະແຫລງການ ASEM ກ່ຽວກັບການເຈລະຈາລະຫວ່າງບັນດາພື້ນຖານວັດທະນະທຳ, ຄວາມສິວິໄລ”. ເວທີປາໄສ ASEM ມີທີ່ຕັ້ງນັບມື້ນັບສຳຄັນສຳລັບຫວຽດນາມ ໃນວິວັດທະນາການພັດທະນາເສດຖະກິດສັງຄົມ. ຄູ່ເຈລະຈາທັງໝົດຊື່ງຫວຽດນາມໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດ ແລະ ຄູ່ເຈລະຈາຮອບດ້ານ ລ້ວນແຕ່ແມ່ນບັນດາສະມາຊິກ ASEM . ASEM ກໍແມ່ນພາກພື້ນລົງທຶນໂດຍກົງ ແລະ ສະຫນອງການຊ່ວຍເຫລືອພັດທະນາຫລາຍສຸດໃຫ້ແກ່ຫວຽດນາມ. ສະນັ້ນ ເລື່ອງເຂົ້າຮ່ວມຢ່າງຕັ້ງຫນ້າ ແລະ ເປັນເຈົ້າການໃນ ASEM ບໍ່ພຽງແຕ່ປະກອບສ່ວນຍົກສູງທີ່ຕັ້ງບົດບາດໃນເວທີສາກົນຂອງປະເທດຊາດເທົ່ານັ້ນ ຫາກຍັງສ້າງເງື່ອນໄຂສະດວກເພື່ອໃຫ້ ຫວຽດນາມຊຸກຍູ້ ແລະ ເພີ່ມພູນຄູນສ້າງບັນດາການພົວພັນສອງຝ່າຍກັບບັນດາຄູ່ຮ່ວມມືຢູ່ສອງທະວີບ, ຫນູນຊ່ວຍຢ່າງຕັ້ງຫນ້າໃຫ້ແກ່ການຜັນຂະຫຍາຍນະໂຍບາຍການຕ່າງປະເທດຂອງພັກ ແລະ ລັດຫວຽດນາມ. ບົນຈິດໃຈນັ້ນ ຄະນະຜູ້ແທນ ຫວຽດນາມ ໂດຍທ່ານນາຍົກລັດຖະມົນຕີ Nguyen Tan Dung ນຳຫນ້າເຂົ້າຮ່ວມກອງປະຊຸມສຸດຍອດ ASEM 9 ຈັດຂຶ້ນຢູ່ ສປປລາວ ຈະສືບຕໍ່ສະແດງໃຫ້ເຫັນບົດບາດສະມາຊິກຕັ້ງຫນ້າ ແລະ ມີຄວາມຮັບຜິດຊອບໃນບັນດາເວທີປາໄສຫລາຍຝ່າຍໃຫຍ່ສຸດຊຶ່ງ ຫວຽດນາມເຂົ້າຮ່ວມດ້ວຍຖານະເປັນສະມາຊິກສ້າງຕັ້ງ ASEM . ຫວຽດນາມກໍຈະສືບຕໍ່ມານະພະຍາຍາມພ້ອມກັບບັນດາປະເທດສະມາຊິກສະເຫນີຂໍ້ລິເລີ່ມເພື່ອປະກອບສ່ວນຢ່າງແທດຈິງໃຫ້ແກ່ຜົນສຳເລັດຂອງກອງປະຊຸມ, ຍົກສູງ ທີ່ຕັ້ງ ບົດບາດ ຂອງອາຊຽນ ແລະ ປະກອບສ່ວນຊຸກຍູ້ການພົວພັນຄູ່ຮ່ວມມື ອາຊີ ເອີລົບນັບມື້ນັບພັດທະນາ, ມີຊີວິດຊີວາ, ແທດຈິງ ແລະ ມີປະສິດທິຜົນກວ່າ.