ພາຍຫຼັງການເລືອກຕັ້ງສະພາແຫ່ງຊາດຊຸດທີ 8 ຢູ່ຢູແກຼນດ້ວຍໄຊຊະນະແມ່ນໄດ້ແກ່ບັນດາພັກເດີນຕາມທ່າອຽງນິຍົມຝ່າຍຕາເວັນຕົກນັ້ນ, ຢູແກຼນພວມຮີບເຮັ່ງດຳເນີນການເຈລະຈາກ່ຽວກັບການສ້າງຕັ້ງລັດຖະບານປະສົມ. ແຕ່ບັນດາຄວາມບໍ່ລົງລອຍກັນຢູ່ພາຍໃນ ຢູແກຼນ ພ້ອມກັບການເພີ່ມທະວີການບຸກໂຈມຕີຄັ້ງຕ່າງໆຂອງກຳລັງລຸກຮື້ຂຶ້ນຢູ່ພາກຕາເວັນອອກ ຢູແກຼນ ພວມແມ່ນສິ່ງກີດຂວາງສຳລັບບັນດາການນຳປະເທດນິ້ີ້ໃນການປະຕິບັດບັນດາຄຳໝັ້ນສັນຍາທີ່ເຕັມໄປດ້ວຍຄວາມມັກໃຫຍ່ໃຝ່ສູງກ່ຽວກັບສັນຕິພາບ ແລະ ເປີດກ້ວາງການພົວພັນກັບສະຫະພາບເອີລົບ.
ພາຍຫຼັງທີ່ບັນດາກຳລັງເດີນຕາມລັດທິຊາດແຫ່ງສະຫງົບ ແລະ ບັນດາພັກນິຍົມຝ່າຍຕາເວັນຕົກ ຍາດໄດ້ໄຊຊະນະໃນການເລືອກຕັ້ງສະພາແຫ່ງຊາດເມື່ອວັນທີ 26/10, ວຽກງານທີ່ຫຍຸ້ງຍາກທີ່ສຸດແມ່ນສ້າງສຳພັນທະມິດກຳອຳນາດຊຶ່ງໄດ້ເລີ່ມເຄື່ອນໄຫວ. ດ້ວຍ 98,4 ຍອດຈຳນວນບັດທີ່ໄດ້ນັບແລ້ວ, ພັກແນວໂຮມປະຊາຊົນຂອງທ່ານນາຍົກລັດຖະມົນຕີ Arseniy Atsenyuk ສາມາດຍາດໄດ້ 22,17% ຈຳນວນບັດ ແລະ ພວມນຳໜ້າກຸ່ມ Poroshenko ຂອງປະທານາທິບໍດີພວມດຳລົງຕຳແໜ່ງ ທ່ານ Petro Poroshenko ດ້ວຍ 21,82% ຈຳນວນບັດ.
ສະຖານທີ່ປ່ອນບັດຢູ່ຢູແກຼນ |
ຍາກທີ່ຈະດຸນດຽງຜົນປະໂຫຍດລະຫວ່າງຝ່າຍຕ່າງໆໃນຄະນະລັດຖະບານໃໝ່
ພາຍຫຼັງການເລືອກຕັ້ງ, ຜູ້ຄົນທັງຫຼາຍປາຖະໜາວ່າ 2 ພັກນີ້ຈະຮ່ວມມືກັນໃນຄະນະລັດຖະບານໃໝ່ ແລະ ທ່ານ Arseniy Atsenyuk ສືບຕໍ່ດຳລົງຕຳແໜ່ງນາຍົກລັດຖະມົນຕີ. ເພື່ອຮັບປະກັນໃຫ້ກວມທີ່ນັ່ງສ່ວນຫຼາຍໃນສະພາແຫ່ງຊາດ, 2 ກຸ່ມພັກນີ້, ແນ່ນອນວ່າ ຈະຕ້ອງການມີການຊ່ວຍເຫຼືອຈາກພັກ “ຊ່ວຍເຫຼືອເອງ”ຊຶ່ງແມ່ນພັກຍາດໄດ້ອັນດັບທີ່ 3 ໃນການເລືອກຕັ້ງສະພາແຫ່ງຊາດ. ແຕ່ໃນຂະນະນັ້ນ, ວັນທີ 29/10, ທ່ານນາຍົກລັດຖະມົນຕີ Arseniy Atsenyuk ໄດ້ຍອມຮັບວ່າ ຢາກສືບຕໍ່ດຳລົງຕຳແໜ່ງນາຍົກລັດຖະມົນຕີ, ແຕ່ພັດຄັດຄ້ານຂໍ້ຕົກລົງສຳພັນທະມິດ ຊຶ່ງກ່ອນໜ້ານັ້ນ, ກຸ່ມ Poroshenko ຂອງປະທານາທິບໍດີພວມດຳລົງຕຳແໜ່ງ ທ່ານ Petro Poroshenko ນຳສະເໜີ ແລະ ເພື່ອທົດແທນບັນຫານີ້, ທ່ານນາຍົກລັດຖະມົນຕີ Arseniy Atsenyuk ໄດ້ຍົກອອກແຜນການສະເພາະຂະນະທີ່ສະເໜີສ້າງສາຍສຳພັນທະມິດກັບພັກອື່ນໆທີ່ຍາດໄດ້ຈຳນວນບັດດ້ວຍອັນດັບຕໍ່ໄປ. ສິ່ງນີ້ສະແດງໃຫ້ເຫັນຄວາມຈິງວ່າ ເຖິງວ່າບັນດາພັກຝ່າຍສະໜັບສະໜູນການຫຍັບມໍ່ເຂົ້າກັບເອີລົບ ຍາດໄດ້ໄຊຊະນະກໍຕາມ, ແຕ່ເພື່ອສ້າງຕັ້ງລັດຖະບານໃໝ່ ໃນນັ້ນມີການດຸນດຽງຜົນປະໂຫຍດລະຫວ່າງບັນດາພັກຝ່າຍນັ້ນ ບໍ່ແມ່ນເລື່ອງງ່າຍ.
ຄວາມຂັດແຍ້ງດ້ານການເມືອງລະຫວ່າງບັນດາຝ່າຍຢູ່ພາຍໃນ ກີແອບ ຍັງພວມຮຸນແຮງຢູ່. ແນວທາງນິຍົມຄວາມສະຫງົບ, ປອງດອງໄກ່ເກ່ຍຊາດດ້ວຍເລື່ອງຕັ້ງໜ້າຂົນຂວາຍການເຈລະຈາກັບບັນດາບຸກຄົນແຍກຕົວຂອງປະທານາທິບໍດີ Poroshenko ພັດບໍ່ໄດ້ຮັບຄວາມເຫັນດີເຫັນພ້ອມຈາກຝ່າຍຂອງນາຍົກລັດຖະມົນຕີ Arseniy Atsenyuk. ພາຍຫຼັງປະກາດໝາກຜົນການເລືອກຕັ້ງ, ທ່ານນາຍົກລັດຖະມົນຕີ Arseniy Atsenyuk ຖະແຫຼງວ່າ ລັດຖະບານໃໝ່ຄວນແກ້ໄຂບັນຫາກັບພວກກໍ່ການຮ້າຍຢູ່ພາກຕາເວັນອອກໂດຍໄວ ແລະ ຕ້ອງທຳການຕໍ່ສູ້ເພື່ອປະເທດຊາດ. ໃນຂະນະທີ່ທ່ານ Petro Poroshenko ພວມສະໜັບສະໜູນການປະຕິຮູບເພື່ອຊີວິດມະນຸດ ແລະ ມີຄວາມສາມາດແກ້ໄຂການແບ່ງແຍກໃນສັງຄົມ ຢູແກຼນ ນັ້ນ, ບັນດາຜູ້ຮ່ວມງານດ້ານການເມືອງຂອງທ່ານ Poroshenko ພັດກ່າວຫາທ່ານບໍ່ປະຕິບັດບັ້ນການທະຫານຕ້ານກຳລັງລຸກຮື້ຂຶ້ນຢ່າງຂ້ຽວຂາດ.
ອະນາຄົດຂອງ ຢູແກຼນ ແມ່ນຄືແນວໃດ ?
ໃນສະພາບປະຈຸບັນ, ທ່ານ Poroshenko ຈະສາມາດສ້າງກຳລັງໜູນຫຼັງມີກຳລັງແຮງພຽງພໍເພື່ອປະຕິບັດບັນດານະໂຍບາຍຂອງຕົນໄດ້ຫຼືບໍ່? ນັ້ນແມ່ນຄຳຖາມ ທີ່ຍາກຈະໃຫ້ຄຳຕອບໄດ້. ບັນຫາພາກຕາເວັນອອກ, ເບິ່ງຄືວ່າ ບໍ່ອາດຊອກຫາວິທີການແກ້ໄຂໄດ້. ພາຍຫຼັງດຳເນີນການເລືອກຕັ້ງພຽງ 2-3 ຊົ່ວໂມງ , ບັນດາການປະທະກັນລະຫວ່າງກອງທັບລັດຖະບານ ແລະ ກຳລັງແຍກຕົວຢູ່ພາກຕາເວັນອອກພັດລະເບີດຂຶ້ນ ອັນໄດ້ເຮັດໃຫ້ມີຜູ້ຮັບບາດເຈັບລົ້ມຕາຍນັບສິບຄົນ. ນອກຈາກນັ້ນ, ໃນວັນທີ 2/11 ໜ້ານີ້, ຜູ້ມີສິດເລືອກຕັ້ງປະມານ 4 ລ້ານຄົນຢູ່ບັນດາເຂດແຍກຕົວ ກໍດຳເນີນ ການເລືອກຕັ້ງເອງ ຊຶ່ງແມ່ນການກະທຳຢັ້ງຢືນວ່າ ເຂົາເຈົ້າບໍ່ກ່ຽວຂ້ອງຫຍັງເຖິງອຳນາດການປົກຄອງຂັ້ນສູນກາງ, ບໍ່ຢາກຢູ່ໃຕ້ການຄວບຄຸມຂອງລັດຖະບານນິຍົມຝ່າຍຕາເວັນຕົກ.
ອີກບັນຫາໜຶ່ງ, ນັ້ນແມ່ນພະລັງງານ. ເຮັດແນວໃດ ແມ່ນຕ້ອງຮັບປະກັນແຫຼ່ງພະລັງງານເມື່ອລະດູໜາວພວມວຽນມາ, ນັ້ນແມ່ນສິ່ງທ້າທາຍຢ່າງໃຫ່ຍຫຼວງສຳລັບທ່ານ Poroshenko. ຄຳຖາມກ່ຽວກັບແຫຼ່ງເງິນຊຳລະໜີ້ສິນໃຫ້ລັດເຊຍ ເພື່ອສືບຕໍ່ຮັບແຫຼ່ງພະລັງງານອາຍແກັສ ນັ້ນ, ມາຮອດປະຈຸບັນຍັງຄົງບໍ່ມີຄຳຕອບ. ພ້ອມກັນນັ້ນ, ແຫຼ່ງງົບປະມານຖືກຫຼຸດໜ້ອຍຖອຍລົງ, ອັດຕາເງິນເຟີ້ເພີ່ມຂຶ້ນສູງ, ການແບ່ງແຍກລະຫວ່າງຄວາມຮັ່ງມີ ແລະ ທຸກຍາກໃນສັງຄົມ ກໍນັບມື້ນັບເພີ່ມຂຶ້ນ, ອັນໄດ້ເຮັດໃຫ້ອະນາຄົດຂອງ ຢູແກຼນ ມືດມົວທີ່ສຸດ. ຄວາມຫຍຸ້ງຍາກທາງດ້ານເສດຖະກິດພວມເຮັດໃຫ້ປະຊາຊົນທົ່ວປະເທດນີ້ຂາດຄວາມໝັ້ນໃຈ. ຍ້ອນເຫດນີ້ເອງ, ເຂົາເຈົ້າບໍ່ລໍຄ່ອຍຕໍ່ການປ່ຽນແປງພາຍຫຼັງການເລືອກຕັ້ງ. ສະພາບຂາດສະຖຽນລະພາບທາງດ້ານການເມືອງ, ໄພອັນຕະລາຍເກີດການຈະລາຈົນ, ຂາດແຄນພະລັງງານ, ຄວາມທຸກຍາກອຶດຫິວ ແລະ ເສດຖະກິດຊຸດໂຊມ ກໍແມ່ນທຸກສິ່ງທຸກຢ່າງທີ່ ຢູແກຼນພວມຕ້ອງປະເຊີນໜ້າ.
ໃນຈຸດເວລານີ້, ຢູແກຼນຄວນສ້າງຕັ້ງສຳພັນທະມິດດ້ານການເມືອງເພື່ອຟື້ນຟູສັນຕິພາບ ແລະ ດຳເນີນການປະຕິຮູບຢ່າງເລິກເຊິ່ງກ້ວາງຂວາງ ແນໃສ່ນຳປະເທດນີ້ຫຼຸດພົ້ນອອກຈາກສະພາບຊຸດໂຊມທີ່ຮ້າຍແຮງ. ແຕ່ດ້ວຍການຜັນແປໃນປະຈຸບັນ ໄດ້ສະແດງໃຫ້ເຫັນວ່າ ຍາກທີ່ຈະມີບາດກ້າວບຸກທະລຸໃດໆ ເພື່ອຊ່ວຍຫັນປ່ຽນສະພາບການຂອງປະເທດຊາດຊຶ່ງພວມຖືກຕົກຢູ່ໃນສະພາບວິກິດການ.