(vovworld) – ອາຊຽນ ແລະ ຈີນ ຫາກໍ່ເຫັນດີເປັນເອກະສັນຊຸກຍູ້ການເຈລະຈາເພື່ອສ້າງສຳເລັດກອບກົດແຫ່ງການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ໃນລະຫວ່າງປີ 2017. ໝາກຜົນດັ່ງກ່າວໄດ້ສ່ອງແສງໃຫ້ເຫັນການຫັນປ່ຽນອັນໃຫຍ່ຫຼວງໃນທ່າທີຂອງປັກກິ່ງ ຕໍ່ບັນຫາສັບສົນຂອງພາກພື້ນ ໃນຂະນະນີ້ເປັນຄັ້ງທຳອິດມີໄລຍະເວລາທາງການໃຫ້ແກ່ COC ທີ່ໄດ້ຍົກອອກມາ.
ບັນດາເຈົ້າໜ້າທີ່ຂັ້ນສູງ ອາຊຽນ ແລະ ຈີນ ຖ່າຍຮູບທ່ີລະນຶກທີ່ກອງປະຊຸມປຶກສາຫາລືກ່ຽວກັບ DOC
(ພາບ: ສຳນັກຂ່າວສານຊິນຮວາ)
ແຕ່ປີ 2010, ຈີນ ແລະ 10 ປະເທດສະມາຊິກຂອງສະມາຄົມປະຊາຊາດບັນດາປະເທດອາຊີຕາເວັນອອກສ່ຽງໃຕ້ (ອາຊຽນ) ໄດ້ປຶກສາຫາລືປະມວນກົດແຫ່ງການປະພຶດເພື່ອມຸ່ງໄປເຖິງການຫຼິກລ້ຽງການປະທະກັນລະຫວ່າງບັນດາຝ່າຍທີ່ໄດ້ຍົກອອກຄຳຮຽກສິດຢູ່ທະເລຕາເວັນອອກ. ແຕ່ຕ້ອງຮອດປີ 2013, 2 ຝ່າຍຈຶ່ງດຳເນີນການທາບທາມຄວາມເຫັນຢ່າງເປັນທາງການກ່ຽວກັບເອກະສານນິຕິກຳດັ່ງກ່າວ. ແຕ່ເຖິງຢ່າງໃດກໍ່ຕາມ, ເກືອບຄືວ່າບໍ່ທັນມີບັນດາບາດກ້າວເດີນພໍສົມຄວນໃດຍ້ອນບັນດາການເຈລະຈາກ່ຽວກັບ COC ເຄີຍຖືກໂຈະໄວ້ຢ່າງຕໍ່ເນື່ອງຍ້ອນຕ້ອງຖືກຜົນສະທ້ອນຈາກບັນດາປັດໄຈເຄັ່ງຕຶງໃນພາກພື້ນ.
ບັນລຸໄດ້ຄວາມເຫັນດີເຫັນພ້ອມ
ກອງປະຊຸມລະຫວ່າງບັນດາເຈົ້າໜ້າທີ່ຂັ້ນສູງ ຈີນ - ອາຊຽນ ກ່ຽວກັບການປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ຖືກດຳເນີນໃນວັນທີ 15 ແລະ 16/8 ຢູ່ ໝານເຈົາຫຼີ, ເຊິ່ງແມ່ນນະຄອນທ່າກ່ຳປັ່ນຢູ່ພາກເໜືອຂອງຈີນ. ກອງປະຊຸມນີ້ກໍ່ໄດ້ດຳເນີນພາຍຫຼັງກອງປະຊຸມລັດຖະມົນຕີການຕ່າງປະເທດ ອາຊຽນ - ຈີນ ເມື່ອທ້າຍເດືອນ 7 ຜ່ານມາຢູ່ລາວ. ທີ່ກອງປະຊຸມນີ້, ອາຊຽນ ແລະ ຈີນ ໄດ້ເຫັນດີເຫັນພ້ອມຕໍ່ແຜນການແກ້ໄຂບັນດາການຂັດແຍ້ງກັນບົນທະເລຕາເວັນອອກຜ່ານການເຈລະຈາ ແລະ ນຳໃຊ້ຂອບບັນດາກົດຂໍ້ບັງຄັບຂອງພາກພື້ນ. 2 ຝ່າຍໄດ້ເປັນເອກະສັນສືບຕໍ່ປະຕິບັດ DOC ແລະ ຢັ້ງຢືນຄືນໃໝ່ບັນດາແຜນການຄື: ແກ້ໄຂການຂັດແຍ້ງກັນຜ່ານການເຈລະຈາ, ຄວບຄຸມຄວາມບໍ່ລົງລອຍກັນໂດຍອີງໃສ່ຂອບບັນດາກົດຂໍ້ບັງຄັບຂອງພາກພື້ນ, ເພີ່ມທະວີການຮ່ວມມືທາງທະເລ ແລະ ມຸ່ງໄປເຖິງການເຈລະຈາກ່ຽວກັບກົດແຫ່ງການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ເພື່ອແນໃສ່ຮັບປະກັນສັນຕິພາບ ແລະ ສະຖຽນລະພາບໃນພາກພື້ນ.
ກ່ອນໜ້ານັ້ນ, ອາຊຽນ ແລະ ຈີນໄດ້ເຫັນດີສ້າງຕັ້ງໂທລະສັບສາຍດ່ວນ ແລະ ນຳໃຊ້ກົດແຫ່ງການປະພຶດຊຸດໜຶ່ງຕໍ່ການປະທະກັນທີ່ເກີດຂຶ້ນໂດຍບັງເອີນຢູ່ທະເລຕາເວັນອອກ. ກົດແຫ່ງການປະພຶດດັ່ງກ່າວຖືກຍົກອອກມາແຕ່ປີ 2014, ໂດຍຫຼາຍປະເທດລົງນາມ, ເຊິ່ງລວມມີບັນດາປະເທດຢູ່ອາຊີ - ປາຊີຟິກເຊັ່ນ: ອາເມລິກາ, ຍີ່ປຸ່ນ, ຈີນ ແລະ ຫວຽດນາມ. ຄາດຄະເນວ່າ, ແຜນຮ່າງກ່ຽວກັບໂທລະສັບສາຍດ່ວນ ແລະ ຂໍ້ຕົກລົງຫຼີກເວັ້ນການປະທະກັນຢູ່ທະເລຕາເວັນອອກຈະຖືກຍື່ນສະເໜີເພື່ອໃຫ້ສັດຕະຍາບັນຢູ່ກອງປະຊຸມສຸດຍອດ ອາຊຽນ - ຈີນ, ເຊິ່ງຈະຈັດຕັ້ງຢູ່ ວຽງຈັນ, ປະເທດ ລາວໃນວັນທີ 7/9 ຈະມາເຖິງ.
ບາດກ້າວຫັນປ່ຽນຢ່າງຕັ້ງໜ້າ
ຕໍ່ໜ້າການປະທະກັນທີ່ນັບມື້ນັບເພີ່ມຂຶ້ນຢູ່ທະເລຕາເວັນອອກ, ທັດສະນະຂອງອາຊຽນແມ່ນຈຳເປັນຕ້ອງມີ COC ທີ່ມີລັກສະນະຜູກມັດໂດຍໄວ ແລະ ກຳນົດສັງລວມບັນດາກົດແຫ່ງການປະພຶດຂອງຝ່າຍຕ່າງໆ ເພື່ອແນໃສ່ຮັບປະກັນສັນຕິພາບ, ຄວາມສະຫົງບປອດໄພໃນການເດີນທະເລຢູ່ທະເລຕາເວັນອອກ, ສະກັດກັ້ນ ແລະ ຄວບຄຸມການປະທະກັນ, ແກ້ໄຂການຂັດແຍ້ງກັນດ້ວຍສັນຕິວິທີ, ບົນພື້ນຖານເຄົາລົບກົດໝາຍສາກົນ ແລະ ສົນທິສັນຍາ ສະຫະປະຊາຊາດ ກ່ຽວກັບກົດໝາຍວ່າດ້ວຍທະເລປີ 1982. COC ທັງປະກອບສ່ວນເຂົ້າໃນການເພີ່ມທະວີການພົວພັນຄູ່ຮ່ວມມືຍຸດທະສາດ ອາຊຽນ - ຈີນກວ່າອີກ, ທັງຕັ້ງໜ້າປະກອບສ່ວນຮັບປະກັນສັນຕິພາບ, ສະຖຽນລະພາບ ແລະ ການພັດທະນາລວມຢູ່ທະເລຕາເວັນອອກ ກໍ່ຄືຢູ່ໃນພາກພື້ນເວົ້າລວມ. ເຖິງຢ່າງໃດກໍ່ຕາມ, ນັບແຕ່ດຳເນີນການທາບທາມຄວາມເຫັນ COC ລະຫວ່າງ ອາຊຽນ - ຈີນ ເມື່ອປີ 2013, ບັນດາຮອບເຈລະຈາເຄີຍຖືກໂຈະເວລາຢ່າງລຽນຕິດຍ້ອນຝ່າຍຈີນ. ຍ້ອນເຫດນັ້ນ, ເລື່ອງອາຊຽນ ແລະ ຈີນ ເປັນຄັ້ງທຳອິດບັນລຸໄດ້້ຂໍ້ຕົກລົງກ່ຽວກັບແຜນຮ່າງລວມຂອງ COC ໃນກາງປີ 2017, ໄດ້ດຶງດູດຄວາມສົນໃຈເປັນພິເສດຈາກບັນດານັກສັງເກດການ. ເພາະວ່າມັນດຳເນີນພາຍຫຼັງສານອະນຸຍາໂຕ ຕຸລາການ (PCA) ຍົກອອກຄຳຕັດສິນປະຕິເສດ “ເສັ້ນລິນງົວ“ ທີ່ໄຮ້ເຫດຜົນ ໂດຍຈີນເປັນຜູ້ແຕ້ມເອງຢູ່ທະເລຕາເວັນອອກ. ປັກກິງທວງເອົາອະທິປະໄຕຢູ່ທະເລຕາເວັນອອກເກືອບທັງໝົດ, ເຂົາເຈົ້າແຕ້ມເສັ້ນລິນງົວຢູ່ໃນເຂດທະເລຂອງຫວຽດນາມ, ຟີລິບປິນ, ມາເລເຊຍ, ບຣູໄນ. ຍ້ອນເຫດນັ້ນ, ເລື່ອງ ຈີນເປັນຄັ້ງທຳອິດໄດ້ພ້ອມກັບ ອາຊຽນເປີດເຜີຍກ່ຽວກັບເວລາກຳນົດໃຫ້ COC ນັ້ນ, ເປັນການສະແດງໃຫ້ເຫັນເຈດຕະນາດີໃນການແກ້ໄຂການຂັດແຍ້ງກັນຢູ່ທະເລຕາເວັນອອກດ້ວຍ DOC.
ພາຍຫຼັງກອງປະຊຸມນີ້, ສື່ມວນຊົນທາງການຂອງຈີນ ໄດ້ໃຫ້ຂ່າວວ່າ: ທ່ານ ຫຼິວເຈິງໝິນ, ຮອງລັດຖະມົນຕີການຕ່າງປະເທດ ຈີນ ໄດ້ຢັ້ງຢືນວ່າ: ປັກກິ່ງ ປາດຖະໜາຢາກຮັກສາການພົວພັນອັນດີງາມກັບ ອາຊຽນ. ທ່ານ ຫຼິວເຈິງໝິນ ກໍ່ເອີ້ນນີ້ວ່າ “ຜົນງານ” ລະຫວ່າງ ອາຊຽນ ແລະ ຈີນ ໃນຂະນະທີ່ທຸກໆຝ່າຍໄດ້ເຫັນດີເຫັນພ້ອມກັບເລື່ອງຮັກສາບັນດາຊ່ອງເຈລະຈາເປັນປະຈຳ ແລະ ຕັດສິນໃຈປະຕິບັດສຳເລັດຮ່າງກົດແຫ່ງການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ໃນກາງປີ 2017. ກ່ອນນັ້ນບໍ່ດົນປານໃດ, ໃນເດືອນ 7/2016, ທີ່ກອງປະຊຸມລັດຖະມົນຕີການຕ່າງປະເທດ ອາຊຽນ - ຈີນ, ຈີນ ໄດ້ຢັ້ງຢືນຄືນໃໝ່ຄຳໝັ້ນສັນຍາ “ລະງັບໃຈເອງ”, ບໍ່ມີການກະທຳທີ່ເຮັດໃຫ້ສະພາບການສັບສົນ ແລະ ເຄັ່ງຕຶງຂຶ້ນຕື່ມຢູ່ທະເລຕາເວັນອອກ, ຄຳໝັ້ນສັນຍາແກ້ໄຂການຂັດແຍ້ງຜືນແຜ່ນດິນ ແລະ ສິດຕັດສິນອັນຖືກຕ້ອງດ້ວຍມາດຕະການສັນຕິພາບ, ບໍ່ຂົ່ມຂູ່ ຫຼື ນຳໃຊ້ກຳລັງອາວຸດ, ຜ່ານການທາບທາມຄວາມເຫັນ ແລະ ການເຈລະຈາຢ່າງສະໜິດສະໜົມລະຫວ່າງບັນດາປະເທດມີສ່ວນກ່ຽວຂ້ອງໂດຍກົງ, ເໝາະສົມກັບບັນດາຫຼັກການ, ກົດໝາຍສາກົນໄດ້ຮັບການຮັບຮູ້ຢ່າງກ້ວາງຂວາງ, ເຊິ່ງລວມມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ 1982 (UNCLOS).
ປະຫວັດສາດໃນຫຼາຍທົດສະວັດຜ່ານມາໄດ້ພິສູດໃຫ້ເຫັນວ່າ, ສັນຕິພາບ ແລະ ສະຖຽນລະພາບໄດ້ນຳມາເຊິ່ງຄວາມວັດທະນະຖາວອນ ແລະ ການພັດທະນາໃນພາກພື້ນ. ສະພາບຄວາມເຄັ່ງຕຶງປະທະກັນຢູ່ທະເລຕາເວັນອອກ ອາດຈະພາໄປເຖິງບັນດາຜົນຮ້າຍຢ້ອນຫຼັງຍາກທີ່ຄາດຄະເນລ່ວງໜ້າໄດ້. ດັ່ງນັ້ນ, ຍິ່ງກ່ວາເວລາໃດໝົດ, ອາຊຽນ ແລະ ຈີນ ຕ້ອງສ້າງຕັ້ງກົດແຫ່ງການປະພຶດໂດຍໄວເພື່ອອາດສາມາດແກ້ໄຂບັນຫາສິດຜົນປະໂຫຍດລວມຢູ່ທະເລຕາເວັນອອກ. COC, ເຊິ່ງເປັນເອກະສານທີ່ມີລັກສະນະຜູກມັດດ້ານນິຕິກຳສູງກ່ວາ, ພວມໄດ້ຮັບຄວາມຫວັງວ່າຈະແທນໃຫ້ DOC, ທີ່ຄົງຕົວມາເປັນເວລາກ່ວາ 10 ປີຜ່ານມາໂດຍໄວ, ດ້ວຍເຈດຕະນາດີຂອງທຸກໆຝ່າຍ.