ໂລກຖືກແບ່ງແຍກໃນການແກ້ໄຂວິກິດການຢູ່ ຊີຣີ
Anh Huyen -
(vovworld) – ລູກສອນໄຟນຳວິຖີ Tomahawk 59 ລູກ ຊຶ່ງ ອາເມລິກາ ຍິງໃສ່ຖານທີ່ໝັ້ນກອງທັບອາກາດ ຊີຣີ ໃນວັນທີ 07/04. ເຫດການດັ່ງກ່າວ ໄດ້ເຮັດໃຫ້ບັນດານັກສັງເກດການດ້ານການເມືອງ, ນັກການທະຫານ ແລະ ປະຊາຄົມສາກົນ ສັ່ນສະເທືອນ ແລະ ຕົກສະເງີ້, ເພາະວ່າກ່ອນໜ້ານັ້ນ ອຳນາດການປົກຄອງໃໝ່ຂອງ ອາເມລິກາ ມີແຜນນະໂຍບາຍບໍ່ແຊກແຊງເຂົ້າ ຊີຣີ, ຊ້ຳບໍ່ໜຳຍັງກຽມພ້ອມຈະຮ່ວມມືກັບປະທານາທິບໍດີ ຊີຣີ Assad ເພື່ອຕ້ານ IS. ແຕ່ສິ່ງທີ່ຕ້ອງໄດ້ເວົ້ານັ້ນ ແມ່ນພາຍຫລັງເຫດການດັ່ງກ່າວ ວິທີການຊຶ່ງບັນດາປະເທດພວມຊອກຫາມາດຕະການໃຫ້ແກ່ບັນຫາ ຊີຣີ ນັ້ນ ພັດໄດ້ສະແດງໃຫ້ເຫັນການແບ່ງແຍກ ແລະ ຄວາມບໍ່ລົງລອຍກັນຢ່າງເລິກເຊິ່ງ, ອາດຈະເຮັດໃຫ້ການສູ້ຮົບຕ້ານ IS ຢືນຢູ່ຕໍ່ໜ້າໄຟອັນຕະລາຍໃໝ່. ບົດຂຽນ “ໂລກຖືກແບ່ງແຍກໃນການແກ້ໄຂວິກິດການຢູ່ ຊີຣີ” ຂອງບັນນາທິການ ແອ໋ງຮ່ຽນ
ປະທານາທິບໍດີ ອາເມລິກາ Donald Trump
(ພາບ: AFP/TTXVN)
ດ້ວຍບັນດາຖະແຫຼງການ ແລະ ທັດສະນະທີ່ກົງກັນຂ້າມກັນ ກັບການກະທຳຂອງ ອາເມລິກາ ບຸກໂຈມຕີຢ່າງກະທັນຫັນໃສ່ ຊີຣີ ດ້ວຍລູກສອນໄຟນຳວິຖີ, ເລື່ອງແກ້ໄຂສົງຄາມທີ່ແກ່ຍາວເປັນເວລາຫລາຍປີຜ່ານມາຢູ່ປະເທດຕາເວັນອອກກາງນີ້ ເບິ່ງຄືວ່າ ພວມຕົກເຂົ້າສູ່ສະພາບບໍ່ມີທາງອອກ.
ສະໜັບສະໜູນ ແລະ ຄັດຄ້ານ
ໃນຂະນະທີ່ ລັດເຊຍ ແລະ ອີຣານ ກ່າວປະນາມການບຸກໂຈມຕີຢ່າງຮຸນແຮງ, ຖືກໍລະນີບຸກໂຈມຕີທາງອາກາດຂອງ ອາເມລິກາ ແນໃສ່ ຊີຣີ ແມ່ນການຮຸກຮານຕ້ານຄືນປະເທດທີ່ມີອະທິປະໄຕ, ລະເມີດ ລະບຽບກົດໝາຍສາກົນ, ແຕ່ຫລາຍປະເທດອື່ນໆພັດສະໜັບສະໜູນການກະທຳດ້ານການທະຫານພຽງລຳພັງຝ່າຍດຽວຂອງ ອຳນາດການປົກຄອງ ປະທານາທິບໍດີ ອາເມລິກາ Donald Trump.
ອາຣັບບີ ຊະອຸດິ, ແມ່ນປະເທດພັນທະມິດຂອງ ອາເມລິກາ ຖະແຫຼງວ່າ ປະເທດນີ້ ສະໜັບສະໜູນການບຸກໂຈມຕີລູກສອນໄຟຂອງ ອາເມລິກາ ແນໃສ່ ຊີຣີ ຢ່າງສິ້ນເຊີງ ແລະ ເອີ້ນການກະທຳຂອງ ວໍຊິງຕັນ ແມ່ນ “ຄຳຕັດສິນກ້າຫານ”. ກະຊວງການຕ່າງປະເທດ ອາຣັບບີ ຊະອຸດິ ໄດ້ປະກາດເນັ້ນໜັກເຖິງບັນດາການເຄື່ອນໄຫວການທະຫານຂອງ ອາເມລິກາ ທີ່ແນໃສ່ບັນດາເປົ້າໝາຍການທະຫານຢູ່ ຊີຣີ ແມ່ນປະຕິກິລິຍາໂຕ້ຕອບການນຳໃຊ້ອາວຸດເຄມີຂອງອຳນາດການປົກຄອງ ຊີຣີ ສຳລັບສາມັນຊົນ. ເຫັນພ້ອມກັບທັດສະນະຄືດັ່ງກ່າວ, ອັງກິດ ຢືນຢັນວ່າ ການບຸກໂຈມຕີທາງອາກາດຂອງ ອາເມລິກາ ແມ່ນປະຕິກິລິຍາທີ່ເໝາະສົມສຳລັບ “ການບຸກໂຈມຕີໃຊ້ອາວຸດເຄມີຢ່າງໂຫດຮ້າຍ” ໂດຍລັດຖະບານ ຊີຣີ ກໍ່ຂຶ້ນ. ຕວກກີ ໃຫ້ຮູ້ວ່າ: ເຂົາເຈົ້າຖືການບຸກໂຈມຕີທາງອາກາດຂອງ ອາເມລິກາ ແມ່ນ “ຕັ້ງໜ້າທີ່ສຸດ” ແລະ ຢືນຢັນວ່າ ປະເທດນີ້ ຈະສະໜັບສະໜູນຢ່າງຄົບຖ້ວນ ເພື່ອຮັບປະກັນວ່າ ທ່ານ Basar Al-Assad ຕ້ອງຮັບຜິດຊອບກ່ຽວກັບການກະທຳຂອງອຳນາດການປົກຄອງຂອງຕົນ. ພາຍຫລັງກອງປະຊຸມປຶກສາຫາລືຢ່າງຮີບດ່ວນ ເຢຍລະມັນ ແລະ ຝະລັ່ງ ໄດ້ອອກຖະແຫຼງການຮ່ວມ ຮຽກຮ້ອງໃຫ້ມີມາດຕະການສັນຕິພາບໂດຍຜ່ານສະຫະປະຊາຊາດ. Berlin ແລະ Paris ຖືວ່າ: ລະບອບ Assad ຕ້ອງຮັບຜິດຊອບການບຸກໂຈມຕີດ້ວຍອາວຸດເຄມີຢູ່ ຊີຣີ ແລະ ຖືວ່າ ປະຕິກິລິຍາຂອງ ອາເມລິກາ ແມ່ນ “ອາດຈະເຫັນອົກເຫັນໃຈ”. ໃນຂະນະນັ້ນ ຈີນ ຮຽກຮ້ອງທຸກຝ່າຍທີ່ກ່ຽວຂ້ອງທັງໝົດ ເຄົາລົບບັນດາຂໍ້ຕົກລົງການເມືອງ ເພື່ອແນໃສ່ພະຍາຍາມສະກັດກັ້ນປີນຂັ້ນໄດດ້ານການທະຫານ.
ປະທານາທິດໍດີ ລັດເຊຍ ແລະ ປະທານາທິບໍດີ ອີຣານ
(ພາບEPA/TTXVN)
ບໍ່ພຽງແຕ່ບັນດາປະເທດອື່ນເທົ່ານັ້ນ, ຫາກຢູ່ພາຍໃນເວທີການເມືອງອາເມລິກາ ກໍມີການແບ່ງແຍກພາຍຫຼັງກໍລະນີບຸກໂຈມຕີຊີຣີອີກດ້ວຍ. ໃນຂະນະທີ່ສະມາຊິກສະພາແຫ່ງຊາດບາງທ່ານຂອງອາເມລິກາ ຊົມເຊີຍເລື່ອງປະທານາທິບໍດີ Donald Trump ຍ້ອນມີການກະທຳບຸກໂຈມຕີຊີຣີຢ່າງວ່ອງໄວນັ້ນ, ກໍມີສະມາຊິກສະພາແຫ່ງຊາດຄົນອື່ນໆພັດລະມັດລະວັງ ແລະ ລະແວງສົງໄສກ່ຽວກັບລັກສະນະດ້ານນິຕິທຳຂອງການບຸກໂຈມຕີ. ຝ່າຍສະໜັບສະໜູນ ປະທານາທິບໍດີ Donald Trump ຖືວ່າ ປະທານາທິບໍດີ Donald Trump ໄດ້ມີການກະທຳຢ່າງວ່ອງໄວໂດຍຕັດສິນເອງ, ສ່ວນຝ່າຍອື່ນພັດຖືວ່າ ປະທານາທິບໍດີ Donald Trump ໄດ້ອອກຄຳສັ່ງບຸກໂຈມຕີໂດຍບໍ່ຜ່ານສະພາແຫ່ງຊາດ ແມ່ນລະເມີດລັດທະທຳມະນູນ.
ທິດທາງໃດທີ່ແທດເໝາະກັບວິກິດການຊີຣີ
ການບຸກໂຈມຕີຄັ້ງນີ້ ແມ່ນການກະທຳທາງທະຫານຄັ້ງທຳອິດຂອງອາເມລິກາ ແນໃສ່ອຳນາດການປົກຄອງຂອງ ປະທານາທິບໍດີ Al-Assad ພາຍຫຼັງເກີດສົງຄາມກາງເມືອງຊີຣີ, ພ້ອມກັນນັ້ນ ກໍແມ່ນການກະທຳທາງທະຫານຄັ້ງທຳອິດຂອງອາເມລິກາພາຍຫຼັງທີ່ທ່ານ Donald Trump ດຳລົງຕຳແໜ່ງເປັນປະທານາທິບໍດີ. ຂໍ້ອ້າງອີງເພື່ອໃຫ້ປະທານາທິບໍດີ Donald Trump ອອກຄຳສັ່ງບຸກໂຈມຕີຖານທີ່ໝັ້ນຊີຣີຢູ່ພາຍໃນດິນແດນຂອງປະເທດນີ້ ແມ່ນການບຸກໂຈມຕີດ້ວຍອາວຸດເຄມີກ່ອນນີ້ 2-3 ວັນ ອັນໄດ້ເຮັດໃຫ້ສາມັນຊົນຫຼາຍຄົນຖືກເສຍຊີວິດ. ແຕ່ຢູ່ເບື້ອງຫຼັງຄຳຕັດສິນດັ່ງກ່າວນັ້ນ, ແມ່ນຍັງຊ້ອນແຝງຫຼາຍສິ່ງທີ່ເລິກລັບ. ກໍລະນີຍິງລູກສອນໄຟ Tomahawh ຕ້ານຊີຣີ, ຕາມບັນດານັກສັງເກດການແລ້ວ, ມັນອາດຈະນອນໃນແຜນການຄິດໄລ່ຂອງປະທານາທິບໍດີ Donald Trump ເພື່ອຍາດເອົາສິດເປັນເຈົ້າການໃນພາກພື້ນຕາເວັນອອກກາງ ແລະ ກຳນົດຂອບເຂດສົ່ງຜົນສະທ້ອນຂອງຕົນ. ເປັນອັນວ່າ ບັນດາຝ່າຍທີ່ກ່ຽວຂ້ອງໃນການສູ້ຮົບອັນນອງເລືອດຢູ່ຊີຣີ ອາດຈະລະງັບໃຈເພື່ອບໍ່ເຮັດໃຫ້ເພີ່ມທະວີການສູ້ຮົບຢູ່ຕາເວັນອອກກາງຫຼືບໍ່? ເປັນທີ່ຈະແຈ້ງແລ້ວວ່າ ການພົວພັນລັດເຊຍ-ອາເມລິກາໄດ້ເພີ່ມຄວາມແຕກແຫງພາຍຫຼັງກໍລະນີນີ້.
ດ້ວຍບັນດາການຜັນແປໃນປະຈຸບັນ, ຄວາມບໍ່ລົງລອຍກັນລະຫວ່າງບັນດາປະເທດທີ່ມີຜົນສະທ້ອນອັນໃຫຍ່ຫຼວງໃຫ້ແກ່ບັນດາຄວາມມານະພະຍາຍາມຊອກຫາທາງອອກໃຫ້ແກ່ການປະທະກັນ./.
Anh Huyen