ໂດຍຕອບສະໜອງຕາມຄຳເຊີນຂອງປະທານາທິບໍດີ ສະຫະພັນລັດເຊຍ Vladimir Putin , ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ເດີນທາງໄປລັດເຊຍໃນວັນທີ 7/5 ເພື່ອເຂົ້າຮ່ວມພິທີສະເຫຼີມສະຫຼອງ 70 ປີແຫ່ງວັນໄຊຊະນະຂອງສົງຄາມປ້ອງກັນປະເທດຊາດອັນຍິ່ງໃຫຍ່ແຕ່ວັນທີ 8-10/5/2015. ການມີໜ້າຂອງ ທ່ານປະທານປະເທດຫວຽດນາມ ເຈືອງເຕີ້ນຊາງ ໃນເຫດການອັນຍິ່ງໃຫຍ່ຂອງປະເທດລັດເຊຍຄັ້ງນີ້ ແມ່ນເພື່ອແນໃສ່ຢືນຢັນວ່າ : ເຖິງວ່າສະພາບການໂລກ ແລະ ສະພາບການຢູ່ແຕ່ລະປະເທດມີການປ່ຽນແປງຫຼາຍຢ່າງກໍຕາມ, ແຕ່ນ້ຳໃຈຂອງປະຊາຊົນຫວຽດນາມທີ່ສະຫງວນໃຫ້ປະຊາຊົນສະຫະພາບໂຊຫວຽດເມື່ອກ່ອນນີ້ ( ສະຫະພັນລັດເຊຍໃນປະຈຸບັນ) ບໍ່ມີວັນທີ່ ຈະປ່ຽນແປງ .
ວັນທີ 8/2/1965, ປະຊາຊົນລັດເຊຍຈັດງານຊຸມນຸມມິດຕິງສະໜັບສະໜູນຫວຽດນາມ |
ພ້ອມກັບການນຳຂັ້ນສູງປະມານ 30 ທ່ານຂອງປະເທດຕ່າງໆ ກໍຄືບັນດາຜູ້ນຳບັນດາອົງການຈັດຕັ້ງສາກົນ, ສະຫະປະຊາຊາດ, ທ່ານປະທານປະເທດຫວຽດນາມ ເຈືອງເຕີ້ນຊາງ ເຂົ້າຮ່ວມພິທີສວນສະໜາມເນື່ອງໃນໂອກາດວັນໄຊຊະນະປີນີ້ຢູ່ຈັດຕຸລັດແດງທີ່ນະຄອນຫຼວງມົດສກູ. ພິທີສວນສະໜາມໄດ້ຮັບການຕີລາຄາວ່າ ມີຂອບຂະໜາດໃຫຍ່ກວ່າໝູ່ໃນປະຫວັດສາດຍຸກທັນສະໄໝ ຊຶ່ງມີການເຂົ້າຮ່ວມຂອງ 15.000 ຄົນ, ລົດຖັງ, ລົດຫຸ້ມເກາະ, ລົດທະຫານ…ລວມ 200 ຄັນ ພ້ອມກັບອາວຸດຍຸດທະພັນທັນສະໄໝຢ່າງບໍ່ເຄີຍເຫັນເທື່ອ. ນອກຈາກນັ້ນ, ການຢ້ຽມຢາມ ສະຫະພັນລັດເຊຍຂອງ ທ່ານປະທານປະເທດຫວຽດນາມ ເຈືອງເຕີ້ນຊາງ ຍັງແມ່ນໂອກາດເພື່ອໃຫ້ 2 ປະເທດສືບຕໍ່ປັບປຸງການພົວພັນຮ່ວມມື 2 ຝ່າຍຢ່າງສະໜິດແໜ້ນຍິ່ງໆຂຶ້ນ.
ເປັນການລິເລີ່ມໃຫ້ການຕໍ່ສູ້ຍາດເອົາເອກະລາດຂອງຫວຽດນາມ
ກ່ອນນີ້ 70 ປີ, ໄຊຊະນະຂອງສົງຄາມປ້ອງກັນປະເທດຊາດອັນຍິ່ງໃຫຍ່ຊຶ່ງ ປະຊາຊົນສະຫະພາບໂຊຫວຽດຍາດມາໄດ້ນັ້ນ, ໄດ້ເປີດແງ່ຫວັງໃໝ່ໃຫ້ແກ່ມວນມະນຸດເພື່ອກໍ່ສ້າງສັງຄົມກ້າວໜ້າ, ສ້າງບັນດາເງື່ອນໄຂສະດວກເພື່ອປຸກລຸກຂະບວນການຕໍ່ສູ້ປົດປ່ອຍຊາດ, ຕ້ານລັດທິລ່າເມືອງຂຶ້ນໃນທົ່ວທຸກທະວີບໃນຊຸມປີ 1950 ແລະ 1960 ຂອງສະຕະວັດທີ 20. ສຳລັບຫວຽດນາມ ແລ້ວ, ເສັ້ນທາງໄຊຊະນະຂອງປະຊາຊົນຫວຽດນາມແມ່ນເລີ່ມມາຈາກໄຊຊະນະຂອງສົງຄາມປ້ອງກັນປະເທດຊາດອັນຍິ່ງໃຫຍ່. ຕອບສຳພາດນັກຂ່າວໂທລະພາບລັດເຊຍ ກ່ອນການເດີນທາງຢ້ຽມຢາມ, ທ່ານປະທານປະເທດຫວຽດນາມ ເຈືອງເຕີ້ນຊາງ ເນັ້ນໜັກວ່າ :
“ ສຳລັບຫວຽດນາມແລ້ວ, ໄຊຊະນະຂອງພວກເພື່ອນໄດ້ປະກອບສ່ວນສຳຄັນໃຫ້ການປະຕວັດຫວຽດນາມຍາດເອົາໄຊຊະນະ, ເອກະລາດໃນປີ 1945, ສະຖາປະນາປະເທດສາທາລະນະລັດປະຊາທິປະໄຕຫວຽດນາມ. ແລະ ຫຼັງຈາກນັ້ນ ພຽງ 5 ປີເທົ່ານັ້ນ, ລັດຖະບານສະຫະພາບໂຊຫວຽດໃນຄາວນັ້ນ ໄດ້ຮັບຮູ້ລັດຖະບານ ສາທາລະນະລັດປະຊາທິປະໄຕຫວຽດນາມ, ພ້ອມທັງຕົກລົງສ້າງຕັ້ງສາຍພົວພັນທາງການທູດກັບຫວຽດນາມ. ພວກຂ້າພະເຈົ້າຖືວ່າ ນີ້ແມ່ນຫຼັກໝາຍປະຫວັດສາດທີ່ສຳຄັນທີ່ສຸດ, ມີຄວາມໝາຍອັນຍິ່ງໃຫຍ່ໃນສາຍພົວພັນທາງການທູດລະຫວ່າງ ຫວຽດນາມ-ສະຫະພາບໂຊຫວຽດ (ລັດເຊຍໃນປະຈຸບັນ)”
ແບບຢ່າງແຫ່ງສາຍໃຈສາກົນທີ່ປອດໃສ, ສັດຊື່ບໍລິສຸດ
ນ້ຳໃຈສາກົນອັນສູງສົ່ງ ແລະ ການສະໜັບສະໜູນທຸກດ້ານຂອງບັນດາປະຊາຊາດໃນສະຫະພາບໂຊຫວຽດອ້າຍນ້ອງໃນສະໄໝນັ້ນ ໄດ້ປະກອບສ່ວນສຳຄັນເພື່ອໃຫ້ປະຊາຊົນຫວຽດນາມສ້າງໜ້າປະຫວັດສາດຄຳດ້ວຍໄຊຊະນະລະດູບານໃໝ່ປີ 1975 ປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບ. ກຳລັງແຮງຂອງສາຍພົວພັນຫວຽດນາມ - ສະຫະພາບໂຊຫວຽດ ໄດ້ຖືກສ້າງຂຶ້ນຈາກ ແບບຢ່າງແຫ່ງສາຍໃຈສາກົນທີ່ປອດໃສ, ສັດຊື່ບໍລິສຸດ. ເພາະສະນັ້ນ, ເມື່ອຕອບສຳພາດນັກຂ່າວໂທລະພາບລັດເຊຍ ເນື່ອງໃນໂອກາດນີ້, ທ່ານປະທານປະເທດຫວຽດນາມ ເຈືອງເຕີ້ນຊາງ ຢືນຢັນວ່າ :
“ ການມີໜ້າຂອງພວກຂ້າພະເຈົ້າທີ່ພິທີສະເຫຼີມສະຫຼອງ 70 ປີແຫ່ງວັນໄຊຊະລັດທິຟາດຊິດ ແມ່ນເລື່ອງທົ່ວໄປ. ພວກເຮົາຕ່າງກໍຮູ້ວ່າ ປະຈຸບັນ ໂລກມີການປ່ຽນແປງຫຼາຍຢ່າງ, ສະພາບການຢູ່ແຕ່ລະປະເທດກໍມີການປ່ຽນແປງຫຼາຍຢ່າງ, ແຕ່ນ້ຳໃຈຄວາມຮັກແພງລະຫວ່າງປະຊາຊົນຫວຽດນາມ ແລະ ປະຊາຊົນສະຫະພາບໂຊຫວຽດເມື່ອກ່ອນນີ້ ( ສະຫະພັນລັດເຊຍໃນປະຈຸບັນ) ບໍ່ມີວັນທີ່ ຈະປ່ຽນແປງ”
ການພົວພັນຫວຽດນາມ-ລັດເຊຍໃນປະຈຸບັນ ແມ່ນໄດ້ສືບທອດຈາກການພົວພັນຫວຽດນາມ-ສະຫະພາບໂຊຫວຽດ ດ້ວຍຊັບສົມບັດອັນລ້ຳຄ່າແມ່ນບັນດາຜົນງານອັນຍິ່ງໃຫຍ່ຂອງໄມຕີຈິດມິດຕະພາບ ແລະ ການຮ່ວມມືທີ່ເປັນມູນເຊື້ອໂດຍເລີ່ມມາຈາກຊຸມປີກ່ອນນີ້. ພາຍຫຼັງຄວາມມານະພະຍາຍາມຫຼາຍຢ່າງ, ປີ 2001, ຫວຽດນາມ ແລະ ລັດເຊຍໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດ ແລະ ຮອດປີ 2012 ໄດ້ຍັກລະດັບເປັນການພົວພັນຄູ່ຮ່ວມມືຍຸດທະສາດຮອບດ້ານ, ຕອບສະໜອງຄວາມຮຽກຮ້ອງຕ້ອງການໃນການຮ່ວມມື 2 ຝ່າຍໃນໄລຍະໃໝ່.
ໝາກຜົນໃນປະຈຸບັນ, ຄວາມເຊື້ອໝັນຕໍ່ອະນາຄົດ
ໃນ 1 ທົດສະວັດແຫ່ງການຜັນຂະຫຍາຍການພົວພັນຄູ່ຮ່ວມມືຍຸດທະສາດ ແລະ ເກືອບ 30 ປີແຫ່ງການຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານນັ້ນ, ການພົວພັນຫວຽດນາມ-ລັດເຊຍຍາດໄດ້ບັນດາຜົນງານອັນໃຫຍ່ຫຼວງ, ປະກອບສ່ວນສຳຄັນເຂົ້າໃນກິດຈະການຫັນປັນທັນສະໄໝ ແລະ ພັດທະນາຢູ່ແຕ່ລະປະເທດ. 2 ຝ່າຍຖືເປັນສຳຄັນ ແລະ ມີຄວາມຕ້ອງການຮ່ວມມືນຳກັນບົນພື້ນຖານສະເໝີພາບ, ຕ່າງຝ່າຍຕ່າງມີຜົນປະໂຫຍດ, ທີ່ຕັ້ງບົດບາດຂອງແຕ່ລະປະເທດໃນນະໂຍບາຍການຕ່າງປະເທດທີ່ມີຕໍ່ກັນ ໄດ້ເພີ່ມຂຶ້ນຫຼາຍພໍສົມຄວນ. ຈຸດທີ່ພົ້ນເດັ່ນຂອງການພົວພັນດ້ານການເມືອງຫວຽດນາມ-ລັດເຊຍ ແມ່ນມີຄວາມໄວ້ວາງໃຈຢ່າງສູງ ດ້ວຍບັນດາຮູບແບບຮ່ວມມືທີ່ມີຫຼາຍຮູບຫຼາຍແບບ. ການຮ່ວມມືດ້ານເສດຖະກິດຫວຽດນາມ-ລັດເຊຍນັບມື້ນັບໄດ້ຮັບການເພີ່ມທະວີ. ການຮ່ວມມືດ້ານມະນຸດສາດລະຫວ່າງຫວຽດນາມ-ລັດເຊຍສືບຕໍ່ມີບົດບາດເປັນຂົວຕໍ່ເຊື່ອມຈອດລະຫວ່າງ 2 ຊາດ. ໃນສານທີ່ສົ່ງເຖິງບັນດາການນຳສະຫະພັນລັດເຊຍເນື່ອງໃນໂອກາດຈັດຕັ້ງສະເຫຼີມສະຫຼອງເຫດການທີ່ສຳຄັນຍິ່ງນີ້, ທ່ານປະທານປະເທດຫວຽດນາມ ເຈືອງເຕີ້ນຊາງ ໄດ້ຢືນຢັນອີກເທື່ອໜຶ່ງວ່າ :
“ ຊຸມວັນເດືອນປີຈະຜ່ານພົ້ນໄປ, ແຕ່ຊາດຫວຽດນາມບໍ່ມີວັນຈະຫຼົງລືມຕໍ່ນ້ຳໃຈ, ການຊ່ວຍເຫຼືອອັນໃຫຍ່ຫຼວງ ແລະ ມີປະສິດທິຜົນຂອງພວກເພື່ອນໃນການຕໍ່ສູ້ຍາດເອົາເອກະລາດ ກໍຄືໃນກິດຈະການຟື້ນຟູ ແລະ ສ້າງສາປະເທດຊາດໃນປະຈຸບັນ. ອວຍພອນໃຫ້ປະເທດລັດເຊຍນັບມື້ນັບພັດທະນາຢ່າງຈະເລີນຮຸ່ງເຮືອງ, ທີ່ຕັ້ງບົດບາດຂອງລັດເຊຍບົນເວທີພາກພື້ນ ແລະ ສາກົນນັບມື້ນັບສູງຂຶ້ນ ”
ດ້ວຍອະດີດຕະການທີ່ເຕັມໄປດ້ວຍຄວາມເອກອ້າງທະນົງໃຈ, ບັນດາໝາກຜົນທີ່ຍິ່ງໃຫຍ່ໃນປະຈຸບັນ, ດ້ວຍຄວາມຕັດສິນໃຈ ແລະ ຄວາມຫວັງຂອງການນຳ ແລະ ປະຊາຊົນ 2 ປະເທດນັ້ນ, ພວກເຮົາມີຄວາມເຊື່ອໝັ້ນຕໍ່ອະນາຄົດທີ່ສະຫວ່າງສະໄຫວຂອງການພົວພັນຫວຽດນາມ-ລັດເຊຍ.