(vovworld)- ການເຈລະຈາຮອບທີ 6 ກ່ຽວກັບສັນຍາການຄ້າເສລີ FTA ລະຫວ່າງ ຫວຽດນາມ ແລະ ສະຫະພາບເອີລົບ (EU) ຫາກໍ່ສິ້ນສຸດໃນທ້າຍອາທິດຜ່ານມາ ຢູ່ ນະຄອນຫລວງ ບຣຸກແຊນ ປະເທດແບນຊີກ, ດ້ວຍ 12 ກຸ່ມເຈລະຈາກ່ຽວກັບຫລາຍຂົງເຂດທີ່ແຕກຕ່າງກັນ. ຕາມການສັງເກດຈາກສອງຝ່າຍ, ໃນການເຈລະຈາຄັ້ງນີ້ ສອງຝ່າຍກຳນົດໄດ້ວິວັດການກ້າວໄປເຖິງສິ້ນສຸດການເຈລະຈາໃນເດືອນ 9/2014. ນີ້ໄດ້ຮັບຖືວ່າ ແມ່ນບາດກ້າວຕັ້ງຫນ້າທີ່ສຸດ, ເປີດແງ່ຫວັງຮ່ວມມືໃຫມ່ໃນການພົວພັນລະຫວ່າງ ຫວຽດນາມ ແລະ ອີຢູ ໃນໄລຍະຈະມາເຖິງ.
ທ່ານ ຟ້າມແຊງເຈົາ, ເອກອັກຄະລັດຖະທູດ ຫວຽດນາມ ປະຈຳ
ແບນຊີກ
photo:citinew.net
|
ຕາມຫົວຫນ້າຄະນະເຈລະຈາຫວຽດນາມ ແລະ ອີຢູ ແລ້ວ, ເຖິງວ່າ ມີບາງບັນຫາຍັງຄົງຄ້າງຄື: ເປີດປະຕູຕະຫລາດບໍລິການ, ຕະຫລາດຊື້ຊັບສິນຂອງລັດຖະບານ… ແຕ່ທີ່ການເຈລະຈາຄັ້ງນີ້, ດ້ວຍຄວາມໄວ້ເນື້ອເຊື່ອໃຈດ້ານການເມືອງສູງ, ສອງຝ່າຍຊອກໄດ້ສຽງເວົ້າລວມ, ຮັບປະກັນຄວາມດຸນດຽງລະຫວ່າງສິດຜົນປະໂຫຍດຂອງຫວຽດນາມ ກັບສິດຜົນປະໂຫຍດຂອງ ອີຢູ. ເຖິງວ່າ ການລົງນາມໃນສັນຍາ FTA ຍັງຕ້ອງອີງໃສ່ວຽກງານດ້ານເຕັກນິກ, ນິຕິກຳໃນໄລຍະຈະມາເຖິງກໍຕາມ ແຕ່ ສັນຍາ FTA ລະຫວ່າງຫວຽດນາມ ແລະ ອີຢູ ອາດຈະສຳເລັດໃນປີນີ້. ເລື່ອງລົງນາມໃນສັນຍາ FTA ແນ່ນອນວ່າຈະເປີດໄລຍະຮ່ວມມືໃນລະດັບສູງກວ່າລະຫວ່າງສອງຝ່າຍ.
ເຂດການຄ້າເສລີທີ່ເຕັມໄປດ້ວຍຄວາມຫວັງ
ເດືອນ 8/2012, ຫວຽດນາມ ແລະ ອີຢູ ເລີ່ມຕົ້ນການເຈລະຈາສັນຍາ FTA ເປັນຄັ້ງທຳອິດ. ໃນເກືອບ 2 ປີຜ່ານມາ, ດ້ວຍການເຈລະຈາໂດຍກົງເປັນ 6 ຄັ້ງ, ບັນດາບັນຫາຮ້ອນເຮັ່ງທີ່ສຸດເພື່ອກ້າວໄປເຖິງເຂດການຄ້າເສລີໄດ້ຮັບການແລກປ່ຽນຢ່າງກົງໄປກົງມາ ແລະ ຮັບປະກັນຄວາມດຸນດຽງລະຫວ່າງສິດຜົນປະໂຫຍດຂອງສອງຝ່າຍ: ທ່ານ Francs Jensen, ເອກອັກຄະລັດຖະທູດ, ຫົວຫນ້າຄະນະຜູ້ຕາງຫນ້າ ອີຢູ ປະຈຳຫວຽດນາມ ເນັ້ນຫນັກວ່າ:
“ບັນຫາຫລັກແຫລ່ງ ນັ້ນແມ່ນສອງຝ່າຍກຳນົດໄດ້ຄວາມຫວັງທີ່ແນ່ນອນ. ພ້ອມກັນແບ່ງປັນ ຄວາມຫວັງ ນັ້ນກ່ຽວກັບເຂດການຄ້າເສລີໃນອະນາຄົດ. ແຕ່ວ່າ ໃນວິວັດການເຈລະຈາ, ອີຢູ ກໍເຂົ້າໃຈໄດ້ວ່າ ຫວຽດນາມ ຍັງແມ່ນປະເທດພວມພັດທະນາ ແລະ ອີຢູ ໄດ້ຄິດໄລ່ເຖິງປັດໄຈນີ້ແລ້ວ.”
ຫວຽດນາມ ແມ່ນຄູ່ຮ່ວມມືທີ 3 ຢູ່ ອາຊຽນ ຊື່ງ ອີຢູ ເຈລະຈາສັນຍາ FTA, ສ່ວນ ອີຢູ ແມ່ນຄູ່ຮ່ວມືໃຫຍ່ທຳອິດຊື່ງ ຫວຽດນາມ ເຈລະຈາສັນຍາ FTA. FTA ໄດ້ຮັບການລົງນາມ ຈະສ້າງກາລະໂອກາດໃຫ້ແກ່ທັງສອງຝ່າຍ. ສຳລັບ ຫວຽດນາມ, FTA ຈະຊ່ວຍລົບລ້າງບັນດາຮົ້ວກີດຂວາງດ້ານການຄ້າ, ພາສີ ແລະ ປອດພາສີ, ສ້າງຄວາມສະດວກໃຫ້ແກ່ການເຕີບໂຕສົ່ງອອກເວົ້າສະເພາະ ແລະ ການເຕີບໂຕເສດຖະກິດເວົ້າລວມ. ປະຈຸບັນ, ມີພຽງປະມານ 42% ສິນຄ້າສົ່ງອອກຂອງຫວຽດນາມ ໄປຍັງ ອີຢູ ຖືກຍົກເວັ້ນອັດຕາພາສີ 0%. ຖ້າຫາກ FTA ໄດ້ຮັບການປະຕິບັດ, ອັດຕານີ້ ສາມາດເພີ່ມຂຶ້ນເຖິງ 90%. ຄຽງຄູ່ກັນນັ້ນ ພ້ອມກັບວິວັດການເຈລະຈາ, FTA, EU ຈະຍູ້ແຮງການຮັບຮູ້ຂໍ້ກຳນົດເສດຖະກິດການຕະຫລາດສຳລັບ ຫວຽດນາມ ສ້າງຄວາມສະດວກໃຫ້ແກ່ຫວຽດນາມ ໃນການຕໍ່ສູ້ກັບບັນດາຮູບການອາລັກຂາດ້ານການຄ້າຄື: ພາສີຕ້ານການຂາຍບຸບລາຄາ. ກົງກັນຂ້າມ, ສຳລັບ ອີຢູ, FTA ຈະຊ່ວຍບັນດານັກລົງທຶນ ອີຢູ ມີສະພາບແວດລ້ອມຢ່າງສະດວກສະບາຍກວ່າ, ເປີດປະຕູກວ່າ, ເປັນຕົ້ນໃນບັນດາຂົງເຂດທີ່ ອີຢູ ມີຫລາຍທ່າແຮງ. ທ່ານ Francs Jensen ຖືວ່າ:
“ການເຈລະຈາ FTA ໄດ້ນຳມາເຊິ່ງຜົນປະໂຫຍດບໍ່ພຽງແຕ່ໃຫ້ແກ່ຫວຽດນາມເທົ່ານັ້ນ ຫາກທັງ ເອີລົບ ອີກດ້ວຍ. ທັງສອງຝ່າຍແມ່ນບັນດາຄູ່ຮ່ວມມືທີ່ດີຂອງກັນ, ສະນັ້ນ ທັງສອງຝ່າຍລ້ວນແຕ່ຕ້ອງມຸ່ງໄປເຖິງເຂດການຄ້າເສລີທີ່ເຕັມໄປດ້ວຍຄວາມຫວັງກວ່າ, ນຳມາຜົນປະໂຫຍດສູງກວ່າໃຫ້ສອງຝ່າຍ. ສະນັ້ນ ບໍ່ຄວນປະໃຫ້ບັນດາຂໍ້ຈຳກັດຜູກມັດໃນໄລຍະສັ້ນ, ເພາະວ່າ FTA ແມ່ນເພື່ອໄລຍະຍາວ, ມີລັກສະນະພັດທະນາແບບຍືນຍົງໃຫ້ທັງສອງຝ່າຍ. ”
ແງ່ຫວັງໃຫຍ່ໃຫ້ແກ່ການຮ່ວມມືສອງຝ່າຍ
ປີ 2013, ເຖິງວ່າເສດຖະກິດພາກພື້ນ ອີຢູ ບໍ່ທັນຟື້ນຕົວກໍຕາມ ແຕ່ວົງເງິນການຄ້າສອງສົ້ນ ຫວຽດນາມ - ອີຢູ ຍັງຄົງບັນລຸກວ່າ 30 ຕື້ USD. ບັນດາປະເພດສິນຄ້າສົ່ງອອກຕົ້ນຕໍຂອງຫວຽດນາມ ລວມມີ: ເກີບຫນັງ, ເຄື່ອງຕຳ່ແຜ່ນຕັດຫຍິບ, ກາເຟ, ສິນໃນນ້ຳ, ເຄື່ອງເຟນີເຈີຜະລິດດ້ວຍຫນັງ. ພ້ອມກັນນັ້ນ ສິນຄ້ານຳເຂົ້າຈາກ ອີຢູ ຕົ້ນຕໍ ແມ່ນບັນດາຜະລິດຕະພັນເຕັກໂນໂລຊີສູງຄື: ກົນຈັກ, ອຸປະກອນໄຟຟ້າ, ເຮືອບິນ, ລົດໂອໂຕ, ລົດຈັກ, ຢຸກຢາ, ເຫລັກກ້າ. ດ້ວຍແງ່ຫວັງລົງນາມໃນສັນຍາ FTA ປະຈຸບັນ, ບັນດາວິສາຫະກິດ ພວມຢືນຕໍ່ຫນ້າກາລະໂອກາດໃຫຍ່ເພີ່ມການສົ່ງອອກ. ທ່ານ ຟ້າມແຊງເຈົາ, ເອກອັກຄະລັດຖະທູດ ຫວຽດນາມ ປະຈຳ ແບນຊີກ ເຊື່ອໝັ້ນວ່າ:
“ການຄ້າຍັງຄົງສືບຕໍ່ເພີ່ມຂຶ້ນດ້ວຍ 24%/ປີໃນໄລຍະ 2 ປີຜ່ານມາ. ຄຽງຄູ່ດ້ານການຄ້າ, ການຖ່ອຍທອດເຕັກໂນໂລຊີ ຕັ້ງຫນ້າທີ່ສຸດ ແລະ ສິ່ງທີ່ສຳຄັນ ແມ່ນຍັງຄົງຮັກສາທຶນ ODA ໄດ້. ປະຈຸບັນ, ຫລາຍປະເທດສະມາຊິກ ໃນ ອີຢູ ສາມາດຫລຸດລົງ ຫລືກ້າວໄປເຖິງການຫລຸດຜ່ອນແຫລ່ງທຶນນີ້ ແຕ່ ODA ຂອງ ອີຢູ ຍັງສືບຕໍ່ເພີ່ມຂຶ້ນ. ນັ້ນແມ່ນສິ່ງພິເສດ. ການພົວພັນລະຫວ່າງ ຫວຽດນາມ ແລະ ອີຢູ ໄດ້ລື່ນກາຍຂອບເຂດການພົວພັນທຳມະດາຂອງປະເທດໄດ້ຮັບການຊ່ວຍເຫລືອ ແລະ ປະເທດຊ່ວຍເຫລືອ. ດ້ວຍສັນຍາ FTA , ຫວຽດນາມ ນຳສິນຄ້າເຂົ້າຕະຫລາດ ເອີລົບ ແລະ ປາດຖະຫນາຈະສິ້ນສຸດການເຈລະຈາໃນປີນີ້.”
ສະຫະພາບເອີລົບ ພາຍຫລັງຮັບຮອງເອົາສົນທິສັນຍາ Lisbon ປີ 2009 ພວມມຸ່ງໄປເຖິງກາຍເປັນແບບຢ່າງສະຫະລັດ ລວມມີ: 28 ປະເທດ, ຍົກສູງລັກສະນະເຊື່ອມໂຍງເຂົ້າກັບສາກົນຂອງຕົນ. ໃນນະໂຍບາຍການຕ່າງປະເທດຂອງຕົນ, ອີຢູ ເອົາໃຈໃສ່ເຖິງ ພາກພື້ນ ອາຊຽນກວ່າ, ໃນນັ້ນ ມີຫວຽດນາມ.
ເປັນຫນ້າສົນໃຈ ແຕ່ປີ 2013, ບັນດາປະເທດໃນກຸ່ມ ອີຢູ ໄດ້ຜ່ານຜ່າວິກິດການເສດຖະກິດໃນເບື້ອງຕົ້ນ, ຄ່ອຍໆເຂົ້າສູ່ສະພາບເປັນປົກກະຕິ, ມີການເຕີບໂຕ, ແກ້ໄຂວຽກເຮັດງານທຳ ແລະ ສະພາບວ່າງງານ. ສະນັ້ນ ປີ 2014 ພວມໄດ້ຮັບຄວາມມຸ່ງຫວັງວ່າ ພາກພື້ນນີ້ຈະບັນລຸການເຕີບໂຕຢ່າງແຮງຄືນໃຫມ່. ບົນພື້ນຖານ ການພົວພັນຮ່ວມມືອັນດີງາມທີ່ມີຢູ່ແລ້ວ, ເລື່ອງສຳເລັດການເຈລະຈາ ແລະ ລົງນາມໃນສັນຍາ FTA ໂດຍໄວ, ຈະສ້າງເງື່ອນໄຂໃຫ້ແກ່ການຈະເລີນເຕີບໂຕດ້ານການຄ້າ, ການລົງທຶນ ລະຫວ່າງ ຫວຽດນາມ ແລະ ອີຢູ ພັດທະນາໃນຊຸມປີຈະມາເຖິງ.