ປະຈຸບັນ, ມິງລອງ ມີກວ່າ 3.000 ຜະລິດຕະພັນ (ພາບ: ເຄື່ອງປັ້ນດິນເຜົາ ມິງລອງ)

        ເຄື່ອງໝາຍການຄ້າ ເຄື່ອງປັ້ນດິນເຜົາ ມິງລອງ I ໂດຍທ່ານ ລິ໊ງອັກມິງ, ປະທານສະພາບໍລິຫານ ບໍລິສັດ ມິງລອງ I ຈຳກັດ, ສ້າງຕັ້ງໃນປີ 1970. ໃນຫຼາຍປີຜ່ານມາ, ບັນດາຜະລິດຕະພັນ ເຄື່ອງປັ້ນດິນເຜົາ ມິງລອງ I ໄດ້ກາຍເປັນສ່ວນໜຶ່ງທີ່ຂາດບໍ່ໄດ້ໃນຫຼາຍຄອບຄົວຊາວ ຫວຽດນາມ, ຍ້ອນຄຸນນະພາບ ແລະ ການອອກແບບຜະລິດຕະພັນ. ປະຈຸບັນ, ມິງລອງ ມີກວ່າ 3.000 ຜະລິດຕະພັນ, ມີການອອກແບບ ແລະ ລວດລາຍທີ່ເປັນຫຼາຍຮູບຫຼາຍແບບ. ບັນດາຜະລິດຕະພັນລ້ວນແຕ່ຕອບສະໜອງບັນດາມາດຕະຖານດ້ານຄຸນນະພາບ - ເຕັກນິກ - ວິຈິດສິນໃນຂົງເຂດຜະລິດເຄື່ອງປັ້ນດິນເຜົາໃນໂລກປະຈຸບັນ, ຍ້ອນເຫດນັ້ນ, ບັນດາຜະລິດພັນ ຍາມໃດກໍ່ໄດ້ຮັບການຕີລາຄາສູງຈາກຜູ້ບໍລິໂພກ.

        “ບັນດາຜະລິດຕະພັນ ເຄື່ອງປັ້ນດິນເຜົາ ມິງລອງ ມີຄຸນນະພາບສູງ. ຄອບຄົວຂອງຂ້າພະເຈົ້າໄດ້ນຳໃຊ້ຫຼາຍຜະລິດຕະພັນເປັນເວລາ 5 – 6 ປີແລ້ວ. ຂ້າພະເຈົ້າເຫັນວ່າ ຜະລິດຕະພັນ ງາມ ແລະ ດີທີ່ສຸດ”.

        “ຂ້າພະເຈົ້າໄດ້ນຳໃຊ້ເປັນຫຼາຍປີ, ຄຸນນະພາບດີທີ່ສຸດ. ມາຮອດປະຈຸບັນ, ບັນດາຈອກນ້ຳຊາດິນເຜົາຂາວ ຍັງຮັກສາສີເໝືອນເດີມ, ບໍ່ເຫຼືອງເຂື້ອງ. ຜະລິດຕະພັນມີຄຸນນະພາບ, ງາມ, ອຸດົມສົມບູນ, ມີຫຼາຍແບບໃໝ່”.

        ເພື່ອຜະລິດອອກບັນດາຜະລິດຕະພັນມີຄຸນນະພາບ, ບໍລິສັດ ມິງລອງ I ຈຳກັດ ໄດ້ນຳໃຊ້ການຜະລິດຕາມລະບົບເຕັກໂນໂລຊີ, ເຕັກນິກທັນສະໄໝຂອງ ເຢຍລະມັນ, ຍີ່ປຸ່ນ ແລະ ຫຼາຍປະເທດກ້າວໜ້າໃນໂລກ. ພ້ອມກັນນັ້ນ, ນັບແຕ່ຂອດທຳອິດແມ່ນການເລືອກວັດຖຸດິບ, ວິສາຫະກິດກໍ່ໃຫ້ບຸລິມະສິດສົມທົບກັນ ແລະ ເສີມຂະຫຍາຍທ່າແຮງຂອງດິນທຳມະຊາດທີ່ຫາຍາກແຕ່ລະຊະນິດ, ຮັບປະກັນບໍ່ມີສານພິດ. ທ່ານນາງ ຫງວຽນທິຮົ່ງແອັງ, ຫົວໜ້າຄຸ້ມຄອງ showroom ມິງລອງ ທົ່ວປະເທດ, ໃຫ້ຮູ້ວ່າ:

        “ປະຈຸບັນ, ອຸນຫະພູມການເຜົາຂອງ ມິງລອງ ແມ່ນ 1.380 ອົງສາ C, ແມ່ນອຸນຫະພູມສູງທີ່ສຸດໃນການເຜົາໃນປະຈຸບັນຢູ່ ຫວຽດນາມ. ໃນໂລກກໍ່ມີເຄື່ອງໝາຍການຄ້າຈຳນວນໜຶ່ງທີ່ສາມາດເຜົາຮອດລະດັບອຸນຫະພູມນີ້ເທົ່ານັ້ນ. ດ້ວຍອຸນຫະພູມນີ້, ຄຸນນະພາບຂອງເຄື່ອງປັ້ນດິນເຜົາຈະທົນທານກວ່າ, ປອດໄພຕໍ່ສຸຂະພາບກວ່າ”.

ເຄື່ອງປັ້ນດິນເຜົາ ມິງລອງ ໄດ້ຮັບການເຊີດຊູເປັນຫຼາຍຄັ້ງຈາກບັນດາລາງວັນຢູ່ພາຍໃນ ແລະ ຕ່າງປະເທດ (ພາບ: ເຄື່ອງປັ້ນດິນເຜົາ ມິງລອງ)

        ພິເສດ, ໜຶ່ງໃນບັນດາມາດຕະຖານເຊິ່ງຜູ້ບໍລິໂພກສົນໃຈ ແລະ ຕີລາຄາສູງຜະລິດຕະພັນຂອງ ມິງລອງ ແມ່ນຄວາມປອດໄພຂອງບັນດາຜະລິດຕະພັນ. ໃນໄລຍະ 50 ປີຜ່ານມາ, ຄະນະການນຳຂອງບໍລິສັດ ຍາມໃດກໍ່ສຸມຈິດສຸມໃຈເພື່ອປັບປຸງຜະລິດຕະພັນໃຫ້ສອດຄ່ອງກັບຄວາມຕ້ອງການຂອງຜູ້ບໍລິໂພກ, ທັງຮັບປະກັນສຸຂະພາບ, ເປັນມິດກັບສິ່ງແວດລ້ອມ ແຕ່ຍັກຮັກສາສີສັນເປັນເອກະລັກຂອງ ມິງລອງ. ທ່ານ ລິ໊ງອັກມິງ, ປະທານສະພາບໍລິຫານເຄື່ອງປັ້ນດິນເຜົາ ມິງລອງ I, ໃຫ້ຮູ້ວ່າ:

        “ພວກຂ້າພະເຈົ້າບໍ່ພຽງແຕ່ມີຫົວຄິດປະດິດສ້າງໃນການອອກແບບຜະລິດຕະພັນ, ຍ້ອນວ່າ ການອອກແບບຜະລິດຕະພັນເຖິງຈະດີຄືແນວໃດ ຫາກການຂຸດຄົ້ນດຳເນີນທຸລະກິດບໍ່ບັນລຸປະສິດທິຜົນ ຫຼື ຍັງບໍ່ທັນຕອບສະໜອງຕາມຄວາມຕ້ອງການ, ຄວາມຮຽກຮ້ອງຂອງລູກຄ້າໄດ້ນັ້ນ ແມ່ນຍັງບໍ່ທັນບັນລຸຜົນສຳເລັດ. ຜະລິດອອກຜະລິດຕະພັນໜຶ່ງກໍ່ຍາກແລ້ວ, ແຕ່ຕອບສະໜອງໄດ້ຕາມຄວາມຮຽກຮ້ອງຂອງສັງຄົມ, ຂອງຜູ້ບໍລິໂພກຍິ່ງຍາກວ່າ. ມາດຕະການຂອງ ມິງລອງ ແມ່ນ ຍາມໃດກໍ່ຊອກຫາວິທີເພື່ອບັນລຸໄດ້ 4 ຄຳ “ງ່າຍດາຍ - ມີຜົນ”.

        ປະຈຸບັນ, ມິງລອງ I ໄດ້ຮັບການຮູ້ຈັກວ່າ ແມ່ນເຄື່ອງໝາຍການຄ້າເຄື່ອງປັ້ນດິນເຜົາແຖວໜ້າຂອງ ຫວຽດນາມ, ດ້ວຍລະບົບວາງຂາຍສິນຄ້າ, ຜູ້ຈຳໜ່າຍ, ຕົວແທນຢູ່ທົ່ວປະເທດ ຫວຽດນາມ ແລະ ກວ່າ 10 ຕະຫຼາດສາກົນ, ຄື: ເຢຍລະມັນ, ຝລັ່ງ, ໂຮນລັງ, ອາເມລິກາ, ຍີ່ປຸ່ນ… ເຖິງວ່າບັນລຸໄດ້ຜົນງານຫຼາຍຢ່າງກໍ່ຕາມ, ແຕ່ ມິງລອງ I ຍັງລົງທຶນ, ຄົ້ນຄວ້າ, ປ່ຽນແປງໃໝ່ຢ່າງບໍ່ຢຸດຢັ້ງ. ທ່ານ ລິ໊ງອັກມິງ ໃຫ້ຮູ້ຕື່ມອີກວ່າ:

        “ມິງລອງ ໄດ້ກ້າວໄປເຖິງເຕັກໂນໂລຊີໃໝ່ສຸດຂອງໂລກ ແມ່ນຜະລິດເຄື່ອງປັ້ນດິນເຜົາມີຄຸນນະພາບສູງ ເຕັກໂນໂລຊີເຜົາເທື່ອດຽວ. ເພື່ອເຜົາເທື່ອໜຶ່ງດຽວແຕ່ບັນລຸຄຸນນະພາບຄື ເອີລົບ ນັ້ນ, ໂດຍສະເພາະແມ່ນຄືຂອງ ເຢຍລະມັນ ແມ່ນຍາກທີ່ສຸດ. ປະຈຸບັນ, ເຕັກໂນໂລຊີຂອງເຂົາເຈົ້າເປັນອັດຕະໂນມັດ 72 ຊົ່ວໂມງ, ມິງລອງ ພຽງແຕ່ໃຊ້ເວລາ 24 ຊົ່ວໂມງ ກໍ່ສາມາດຜະລິດອອກຜະລິດຕະພັນທີ່ມີຄຸນນະພາບສູງຄືແນວນັ້ນ. ນັ້ນແມ່ນການປະດິດຄິດສ້າງ ທີ່ສ້າງບາດກ້າວບຸກທະລຸໃນການຜະລິດ”.

        ດ້ວຍການສ້າງຕັ້ງ ແລະ ພັດທະນາເປັນເວລາກວ່າ 50 ປີ, ເຄື່ອງປັ້ນດິນເຜົາ ມິງລອງ ໄດ້ຮັບການເຊີດຊູເປັນຫຼາຍຄັ້ງຈາກບັນດາລາງວັນຢູ່ພາຍໃນ ແລະ ຕ່າງປະເທດ. ບັນດາລາງວັນ ແລະ ການຮັບຮູ້ຂອງຜູ້ບໍລິໂພກຢູ່ພາຍໃນ ແລະ ຕ່າງປະເທດນັ້ນ ເປັນການຢັ້ງຢືນທີ່ຕັ້ງຂອງວິສາຫະກິດທີ່ນຳໜ້າຂະແໜງໃນຂົງເຂດການຜະລິດເຄື່ອງປັ້ນດິນເຜົາຢູ່ ຫວຽດນາມ.