(ພາບ: google.com.vn)
(vovworld) -ໃນຂະບວນວິວັດແຫ່ງການສ້າງສາ ແລະ ພັດທະນາປະເທດຊາດ, ຍາມໃດຫວຽດນາມ ກໍ່ຖືການພັດທະນາກະສິກຳ, ຊົນນະບົດ ແລະ ຊາວກະສີກອນເປັນສຳຄັນ. ເພາະວ່າ, ຢູ່ຫວຽດນາມ, ຊາວກະສີກອນກວມເຖິງ 70% ຈຳນວນປະຊາກອນທັງໝົດ. ດັ່ງນັ້ນມະຕິ 26 ຂອງຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 10 ປີ 2008 ໄດ້ ເຕື້ອງເຖິງບັນຫາກໍ່ສ້າງຊົນນະບົດໃໝ່ຢ່າງເປັນພື້ນຖານ, ຮອບດ້ານ ແລະ ເລິກເຊິ່ງ, ຕອບສະໜອງຄວາມປາຖະໜາຂອງປະຊາຊົນ ແລະ ຄວາມຮຽກຮ້ອງຕ້ອງການຂອງຍຸດທະສາດສ້າງເປັນປະເທດອຸດສາຫະກຳໂດຍພື້ນຖານຕາມທິດທັນສະໄໝໃນປີ 2020.
ຊົນນະບົດ ຫວຽດນາມ ກວມເນື້ອທີ່ອັນກວ້າງໃຫຍ່ ດ້ວຍຈຳນວນປະຊາກອນຫຼາຍທີ່ສຸດ, ມີຫຼາຍຊົນເຜົ່າດຳລົງຊີວິດຢູ່ຮ່ວມກັນ, ແມ່ນແຫ່ງອະນຸລັກຮັກສາບັນດາຮີດຄອງປະເພນີຂອງວົງຄະນາຍາດ, ທັງແມ່ນແຫ່ງຜະລິດທີ່ສຳຄັນ, ເພື່ອຜະລິດບັນດາຜະລິດຕະພັນຮັບໃຊ້ໃຫ້ແກ່ຊີວິດຂອງມະນຸດ. ໃນທ່າອ່ຽງແຫ່ງການພັດທະນາປະຈຸບັນນີ້, ແມ່ນບໍ່ສາມາດມີປະເທດອຸດສາຫະກຳໃດໜຶ່ງ ຖ້າຫາກກະສີກຳ, ຊົນນະບົດຍັງຫຼ້າຫຼັງ, ແລະ ຊີວິດການເປັນຢູ່ຂອງຊາວກະສີກອນຍັງຢູ່ໃນລະດັບຕ່ຳໄດ້. ຍ້ອນເຫດນັ້ນ, ພັກ ແລະ ລັດຫວຽດນາມ ຈຶ່ງຖືການກໍ່ສ້າງຊົນນະບົດໃໝ່ແມ່ນໜຶ່ງໃນບັນດາໜ້າທີ່ສຳຄັນອັນດັບໜຶ່ງຂອງພາລະກິດຫັນເປັນປະເທດອຸດສາຫະກຳ ແລະ ທັນສະໄໝ. ກອງປະຊຸມຄັ້ງທີ 7, ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 10 ໄດ້ປະກາດໃຊ້ມະຕິກ່ຽວກັບກະສີກຳ, ຊົນນະບົດ ແລະ ຊາວກະສີກອນ ດ້ວຍຈຸດໝາຍກໍ່ສ້າງຊົນນະບົດໃໝ່ ທີ່ມີພື້ນຖານໂຄງລ່າງເສດຖະກິດ - ສັງຄົມທັນສະໄໝ, ມີໂຄງປະກອບເສດຖະກິດ ແລະ ບັນດາຮູບການຈັດຕັ້ງການຜະລິດເໝາະສົມ, ຊົນນະບົດຕິດພັນກັບການພັດທະນາອຸດສາຫະກຳ, ການບໍລິການ, ຕົວເມືອງຕາມແຜນກຳນົດ, ສັງຄົມຊົນນະບົດມີຄວາມໝັ້ນຄົງ, ເຂັ້ມຂົ້ນໄປດ້ວຍສີສັນວັດທະນະທຳຂອງຊາດ, ລະດັບຄວາມຮູ້ຂອງປະຊາຊົນໄດ້ຮັບການຍົກສູງຂຶ້ນ, ສິ່ງແວດລ້ອມຊີວະພາບໄດ້ຮັບການຮັກສາ, ລະບົບການເມືອງຢູ່ເຂດຊົນນະບົດໄດ້ຮັບການເພີ່ມທະວີ. ກ່າວຄວາມເຫັນຊີ້ນຳການກໍ່ສ້າງຊົນນະບົດໃໝ່ຢູ່ຫວຽດນາມ ຫວ່າງແລ້ວນີ້, ທ່ານນາຍົກລັດຖະມົນຕີ Nguyen Tan Dung, ຊີ້ແຈ້ງວ່າ:
” ການກໍ່ສ້າງຊົນນະບົດໃໝ່ທັງແມ່ນຄາດໝາຍ, ທັງແມ່ນຄວາມຮຽກຮ້ອງຕ້ອງການຂອງການພັດທະນາຢ່າງໝັ້ນຄົງ, ແມ່ນໜ້າທີ່ອັນຮີບດ່ວນ, ທັງແມ່ນແຜນນະໂຍບາຍທີ່ມີລະດັບຍຸດທະສາດສຳຄັນພິເສດໃນພາລະກິດປະຕິວັດຂອງພັກ, ລັດ ແລະ ປະຊາຊົນຫວຽດນາມ. ຜ່ານນັ້ນສ້າງຄວາມເຫັນດີເຫັນພ້ອມ ແລະ ກຳລັງແຮງສັງລວມຂອງລະບົບການເມືອງ, ຄວາມເປັນຈິດໜຶ່ງໃຈດຽວຂອງທົ່ວສັງຄົມໃນການຜັນຂະຫຍາຍ, ປະຕິບັດການກໍ່ສ້າງຊົນນະບົດໃໝ່. ຄະນະກຳມະການປະຊາຊົນແຂວງ, ນະຄອນຕ່າງໆກໍ່ສ້າງແຜນຮ່າງດ້ວຍຂັ້ນຕອນ, ມາດຕະການອັນລະອຽດ ແລະ ເໝາະສົມກັບການກໍ່ສ້າງຊົນນະບົດໃໝ່ຢູ່ແຕ່ລະທ້ອງຖີ່ນ. ຜ່ານນັ້ນ, ສ້າງການຮ່ວມສຳພັນ, ປະສານສົມທົບກັນຢ່າງແໜ້ນແຟ້ນລະຫວ່າງກະຊວງ, ຂະແໜງການ, ທ້ອງຖີ່ນ; ສຸມໃສ່ແກ້ໄຂ 11 ເນື້ອໃນຂອງການກໍ່ສ້າງຊົນນະບົດໃໝ່ທີ່ໄດ້ວາງອອກ”.
(ພາບ: google.com.vn)
ມາຮອດປະຈຸບັນ, ໃນເບື້ອງຕົ້ນ ຂະບວນການກໍ່ສ້າງຊົນນະບົດໃໝ່ຂອງຫວຽດນາມ ໄດ້ຮັບການຜັນຂະຫຍາຍການປະຕິບັດ. ລັດຖະບານໄດ້ມີໂຄງການດຳເນີນງານ ເພື່ອແນໃສ່ປະຕິບັດມະຕິຂອງຄະນະບໍລິຫານງານສູນກາງພັກກ່ຽວກັບກະສີກຳ, ຊາວກະສີກອນ ແລະ ຊົນນະບົດ. ກະຊວງກະສີກຳ ແລະ ພັດທະນາຊົນນະບົດໄດ້ຮັບຜິດຊອບ, ສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງເພື່ອກໍ່ສ້າງໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່. ທ່ານຮອງນາຍົກລັດຖະມົນຕີ Vu Van Ninh, ຫົວໜ້າຄະນະຊີ້ນຳໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່ ສູນກາງ, ຢັ້ງຢືນວ່າ, ພະນັກງານຮາກຖານ ແລະ ປະຊາຊົນພວມພາກພູມໃຈ ແລະ ມີຄວາມເຊື່ອໝັ້ນວ່າ, ຊົນນະບົດໃໝ່ພັດທະນາຈະປະກອບສ່ວນປັບປຸງຊີວິດທາງດ້ານວັດຖຸ ແລະ ຈິດໃຈຂອງຊາວກະສີກອນໃນໄລຍະຫັນເປັນປະເທດອຸດສາຫະກຳ ແລະ ທັນສະໄໝຢ່າງວ່ອງໄວ. ທ່ານຮອງນາຍົກລັດຖະມົນຕີ Vu Van Ninh, ເນັ້ນໜັກວ່າ:
”ຂະບວນວິວັດແຫ່ງການຜັນຂະຫຍາຍ, ຊາບຊືມ, ປະຕິບັດໂຄງການກໍ່ສ້າງຊົນນະບົດໃໝ່ຈະໄດ້ຮັບການປະຕິບັດຢ່າງຄົບຊຸດ, ເດັດດ່ຽວ ແຕ່ບໍ່ຮ້ອນເຮັ່ງ. ຕາມຂໍ້ຕົກລົງຂອງທ່ານນາຍົກລັດຖະມົນຕີແລ້ວ, ເຖິງປີ 2020 ຈະມີ 50% ຈຳນວນຕາແສງບັນລຸມາດຖານ… ນິ້ແມ່ນຂະບວນວິວັດອັນຍາວນານ ແລະ ຕ້ອງໄດ້ຮັບການຜັນຂະຫຍາຍເທື່ອລະກ້າວ ແລະ ຄົບຊຸດ. ເມື່ອຊົນນະບົດໃໝ່ໄດ້ຮັບການກໍ່ສ້າງສຳເລັດແລ້ວ, ພວກເຮົາຍັງຄົງສືບຕໍ່ປັບປຸງມາດຖານນີ້ໃຫ້ສົມບຸນແບບ. ເພາະວ່າ, ການກໍ່ສ້າງຊົນນະບົດໃໝ່ຕ້ອງດຳເນີນໄປຢ່າງບໍ່ຢຸດຢັ້ງ”.
(ພາບ: google.com.vn)
ໃນອະນາຄົດ, ຊົນນະບົດໃໝ່ຫວຽດນາມ ຈະແມ່ນແຫ່ງຜະລິດບັນດາຜະລິດຕະພັນກະສີກຳທີ່ມີສະມັດຕະພາບ, ຄຸນນະພາບສູງຕາມທິດຜະລິດເປັນສິນຄ້າ, ທັງແມ່ນແຫ່ງຮັກສາວັດທະນະທຳທີ່ເປັນມູນເຊື້ອຂອງຊາດ, ແມ່ນແຫ່ງຮັບປະກັນຄວາມກົມກຽວຂອງສາຍພົວພັນລະຫວ່າງມະນຸດກັບທຳມະຊາດ… ດ້ວຍບັນດາລັດຖະນະໂຍບາຍ ແລະ ຄວາມຕັດສິນໃຈສູງຂອງບັນດາກະຊວງ, ຂະແໜງການຂັ້ນສູນກາງ, ອຳນາດການປົກຄອງຂັ້ນຮາກຖານ, ການກໍ່ສ້າງຊົນນະບົດໃໝ່ຢູ່ຫວຽດນາມ ພວມກາຍເປັນບັ້ນຂົນຂວາຍປະຕິວັດຂອງປະເທດ ບົນເສັ້ນທາງຫັນເປັນປະເທດອຸດສາຫະກຳ ແລະ ທັນສະໄໝ ເພື່ອຈຸດໝາຍປະຊາຊົນຮັ່ງມີ ປະເທດຊາດເຂັ້ມແຂງ, ຮັບໃຊ້ກິດຈະການເຊື່ອມໂຍງຂອງຫວຽດນາມ ຢ່າງມີປະສິດທິຜົນ.